Read Ntcham Zacharie 4 Bible Online

Zacharie 4 - Ntcham bible

Zacharie 4

¹Ntuun ŋun nìn bí ki sòoǹ nì mee fātìi gítìń ki fīntì-mi kii bi nín fìntī unil ŋgeem pu puee.

²Ní ŋu bālifì-mi yii: «Ba ní a wāĺ ní?» Ní m kíí-ŋu yii: «M wāĺ fitilab tɔ́kɔŋkaati tin sá sindaariya ŋmee ní. Kusɔŋu kun poon bi ŋáań fitilab kpamee tɔ́kɔ́ ti-yilpu. Fitilab biluli tɔ́kɔ́ ti-pu ní fitila kamaa cáá iŋmii iluli.

³Ní ɔliifi sufii ili yú ki kɔ́ĺ kusɔŋuee, bubɔ yú ŋŋaŋgiil pú, bun kíǹee yú ŋŋaŋgan pú.»

⁴Ní m fātìi bālifì ntuun ŋun bíi sòoǹ nì mee yii: «M-dindaan, tin kɔkɔ m wāĺ nee taapu sá yii ba ní?»

⁵Ní ŋu kíí-mi yii: «Aa nyí ti-taapuɔɔɔ?» Ní m kíí-ŋu yii «Aayee m-dindaan maa nyí.»

⁶Ní ŋu bí-mi yii:

⁷«Fitilab bilulee sá ti-Dindaan nimbiliŋ ŋin di kpèé tin jītí kitiŋ kɔkɔ puee ní.»

⁸Ní m gíti bālifì-ŋu yii: «Kin ɔliifi sufii ili in yú ki kɔ́ĺ fitilab tɔ́kɔŋkaati, bubɔ ŋŋaŋgiil pú, bun kíǹee ŋŋaŋgan púee taapu sá yii ba?»

⁹Ní m fātìi bālifì-ŋu nliliitiim yii: «Ɔliifi pammu mun pu sindaariya nai ili túuń ɔliifi kpam dì i-pu ki còol̀ ki kóò fitilabinee taapu sá yii ba?»

¹⁰Ní ŋu bí-mi yii: «Aa nyí taapuɔɔɔ?» Ní m kíí-ŋu yii: «Aayee m-Dindaan maa nyí.»

¹¹Niinee ní ŋu bí-mi yii: «An sá binib bili bin yil pu bi sītì ŋkpam ki dū-bi ki sú kitiŋ kɔkɔ Dindaan, bi bí u-nimbiin ki tūǹ u-tundee ní.»

¹²Ntuunee tīī dinyɔɔbundi ḿ dūú nàatī Sooroobabeel yii: «An kaa sá nì mpɔn, kaa tí sá nì dikpabil, ama an sá nì man Fam ní.» Ti-Dindaan Mpɔŋkɔdaan di lī míǹ.

¹³Ní u kútì ki lī yii: Dijookpaandi, sii di sá ŋma ní? Sooroobabeel nimbiinee, a làá kpátí kí tàntī. Niin ní u làá lēē ditaŋkpal din làá nīn tíĺ kudiiyee. Binib làá dāá nīn kūuntí ki lì-dì yii: «Mbóo! Mbóo!»

¹⁴Ti-Dindaan gíti sòon̄ nì mi tibɔti nee yii:

¹⁵«Sooroobabeel di bíl̀ kunimbɔtidii nee nyeel, úǹ di làá tí mā-ku kí látí.» Án yaa láa jítì mimmee, ni làá dāá béé yii ti-Dindaan Mpɔŋkɔdaan di túnní-mi ni-cee.

¹⁶Unil ń taa kpèè ditundi nín kíĺ min falaa falaayee fám. Ama unil yaa ká Sooroobabeel kíĺ ki bíi māā kunimbɔtidiiyee, ú nīn fàal̀.