Read Ntcham Zacharie 5 Bible Online

Zacharie 5 - Ntcham bible

Zacharie 5

¹M tí wáaǹ kutaayee ní ki ká kugbɔŋu kubɔ ŋàaǹ kutaa pu.

²Ní ntuun bālifì-mi yii: «Ba ní a wāĺ ní?» Ní m kíí yii: «M wāĺ kugbɔŋu kubɔ ŋàaǹ kutaa pu, ku-púuŋŋu sá meetab saalaa, ní ku-waaŋŋu sá meetab biŋmoo.»

³Niinee ní ŋu bí-mi yii: «An sá mbusu bɔti tin bi làá dūú tɔ̄ kitiŋ nee kɔkɔ puee ní. Bi ŋmàn̄ kugbɔŋu gbanti jandi diba pu yii bí jà binaayub kɔkɔ kitiŋ nee pu, ní ki ŋmàn̄ dijandi din kíǹee pu yii bí jà bin kɔkɔ pùtī fám fámee mun.»

⁴Ti-Dindaan Mpɔŋkɔdaan lī yii: «Mama m-ba di tɔ́ń mbusu gbanti. U làá kɔ́ unaayuu kamaa diikun, unil un kamaa pùtī m-yindi fám fámee diikun. Mbusu gbanti làá gbíntí bi-diiŋŋin ní kí wà tikɔkɔ, kí kpáaǹ ŋi-dɔi nì ŋi-taŋkpeeŋi.»

⁵Ntuun ŋun bíi sòoǹ nì mee sútìń ní ki bí-mi yii: «Yáatí kí kpèè kun còom̄ ki dòoń nee.»

⁶Ní m bālifì-ŋu yii: «Ba ní an sá ní?» Ní ŋu kíí yii: «An sá kukabiku kun poon ní kitiŋ nee kɔkɔ kpitii kēe.»

⁷Ŋyunti gbantee, dibìil din sá tikúmanee cúu gántì yilpu ní m ká unimpu ubɔ kā kukabikuee poon.

⁸Ní ntuun bí-mi yii: «Unimpu nee sá tikpitil daaŋku ní.» Ní u téé-u ki gíiǹ ki tɔ́ kukabikun, ní ki dū ku-bìil kun sá tikúmanee ki púkuǹ.

⁹Míǹ boon m wáaǹ kutaayee ní ki ká binimpoobi bili páaǹní. Bi nìn cáá ifeen an náań nì naakpaapiin feeŋyi, ní kubuŋu téekí-bi bi ŋàaǹ ki cá. Ní bi yōoǹ kukabikuee ki cáa jɔ́ntì kutaa.

¹⁰Ní m bālifì ntuun ŋun bí ki sòoǹ nì mee yii: «Bi cáǹ kukabikuee la?»

¹¹Ní ŋu kíí-mi yii: «Bi cáǹ-kù Sineeyaar tiŋkin kí tin mā-kù kuwaadii ní. Bi làá mā dikɔl ní kí dū-ku kí báań dikɔlee pu.»