Read Ntcham Zacharie 6 Bible Online

Zacharie 6 - Ntcham bible

Zacharie 6

¹M fātìi tí wáaǹ kutaa puee, ní ki wál̀ janjatɔrɔkub binaa nyánní tikúman jooŋŋi ali kansikin.

²Itaamu in máǹ gàaayee di nìn dátí tɔrɔkupeepeekaa, ní itambɔn dátí tɔrɔkuliliiti,

³ní itampiin dátí tɔrɔkutataati, ní itaamu in cáá atan atan ki ŋmàl̄ mmam gàaayee dátí tɔrɔkunanaati.

⁴Ní m bālifì ntuun ŋun bí ki sòoǹ nì mee yii: «Ukpil, itaamu nì tɔrɔkub nee taapu sá yii ba ní?»

⁵Ní ntuunee kíí-mi yii: «Itaamu nì tɔrɔkub gbanti taapu dàkà kubuŋu kun nyēeń kitiŋ jannaatiliŋee ní. Ku nìn bí kitiŋ kɔkɔ Dindaan cee ní kɔŋkɔnnee ku yíkì u-cee.»

⁶Ní tɔrɔku un itambɔn dátée búntì ŋgan pú tiŋki watil, ní tɔrɔku un itampiin dátée búntì ŋwìiń jeetilaŋki pú ní tɔrɔku un itaamu in cáá atan atanee dátée búntì ŋgiil pú tiŋki watil.

⁷Itaamu in máǹ gàaayee nìn nyàab̀ malaa kí cùú yìiǹ kitiŋ pu. Ní ti-Dindaan bí-i yii: «Nín̄ cámaan kí yìiǹ kitiŋ pu.» Ní i búntì ki cūtìi yìin̄ kitiŋ pu.

⁸Ní ti-Dindaan yíiń-mi ki bí yii: «Kpèè, in búntì ŋgan pú tiŋki watilee làá sɔ̀ŋkì m-ŋuul kitiŋ gbanti pu.»

⁹Ní ti-Dindaan sòon̄ nì mi yii:

¹⁰«Cù Eeldayii nì Toobiya nì Yeedaya cee kí fōō animbil ŋin bin bíń kuyuŋuee tɔ́ ki tīińee[5]. Á yīkì díǹ díǹ kí cù Seefaniya jipɔɔn Yoosiya dumpu, binib gbanti nyánní Babiloon ki dáá bàń dee.

¹¹Á fōō animbil nì Sindaariya kí mɔ́ɔ́ kibeefuulii kí cíkiń usaraaŋakpil Yoosadaaki jipɔɔn Joosuwa.

¹²Ní kí tùkù-u yii: <Kpèè, ti-Dindaan Mpɔŋkɔdaan nín lī puee sɔ̀. Unil ubɔ bí doo u-yindi di sá <nnaanti>. Laakin u yaa pée bée, dimaŋfal làá pā kí nyā, úǹ di làá dāá fàtīí mā ti-Dindaan diiku.

¹³Tiŋman, úǹ di làá dāá fàtīí mā ti-Dindaan diiku. U làá dāá nīn pēē abeebɔkuti. U làá dāá kàl̄ u-beejal pu kí kpòotī u-nibul. Usaraaŋal ubɔ làá dāá nīn yú u-ŋaŋgiil pú, ní bi-liitil ń dāá nīn gbìliǹ tɔb mmɔntiim.

¹⁴«<Kibeefuulii gbanti làá dāá nīn bí kunimbɔtidiin bí nīn cáa téetí Eeldayii nì Toobiya nì Yeedaya nì Seefaniya jipɔɔn ŋanti pu.>»

¹⁵Binib làá dāá nyānní ndandati kí fàtīí mā ti-Dindaan diiku. Niin ní ni dāa béetí yii ti-Dindaan Mpɔŋkɔdaan di túnní-mi ni-cee. See ni yaa tɔ́ ti-Dindaan ni-Nimbɔtiu mmɔntiimin baba ní án làá ŋá míǹ.