Read Ntcham Zacharie 7 Bible Online

Zacharie 7 - Ntcham bible

Zacharie 7

¹Daariyusi nín jíń dibeel dibinnanaatiil uŋmawawati, an dàkà yii uŋmal un bi yíì Kiisileefee iwiin inaa dal ní ti-Dindaan sòon̄ nì Sakari tibɔti nee.

²Beeteel yab nìn tú Sareeseer nì Reegeem-Meeleeki ní ki lēē binib ki kútì bi-pu bí cùú gbàam̀ ti-Dindaan ú sɔ̄ bi-saai.

³Binib gbanti nìn máaǹ kí bàlifì ti-Dindaan Mpɔŋkɔdaan saraaŋaliibi bin bí kunimbɔtidiinee nì u-bɔnaatiliibi yii: «Tí nīn gbíntìi sūǹ ki bōob̀ kinyɔkɔ uŋmaŋmooŋmooti poon kii ti nín pée kpààa ŋáań abin ŋin jítèe pueeyaaa, tí taa ti ŋá?»

⁴Niinee ní ti-Dindaan Mpɔŋkɔdaan sòon̄ nì mi tibɔti nee

⁵ḿ bàlifì kitiŋ nee pu yab kɔkɔ nì bisaraaŋaliibi yii: «Ni nín bōob̀ kinyɔkɔ ki sūǹ ki yáliŋkí uŋmaŋmooŋmooti nì uŋmaluluúti[6] kamaa áli abin imuŋku ita nì saalaayee, ni ŋá míǹ án mɔ̄ɔkiǹ-mi níii?

⁶Ni yaa nìn tí bíi jīǹ ki nyùee, kaa nìn sá nimbi ni-ba ní ni jīǹ ki tììii?»

⁷Ŋyunti ŋun Jeerusaleem yab nì ntimu mun māntìi tú-kèe yab nìn dáá bí nsɔŋfinee, nì ŋyunti ŋun binib nìn dáá kóò Neegeeb teekun nì Seefeelaa paal puee, ti-Dindaan nìn yāntì u-bɔnaatiliibi dooooyee yab báakì ki kpáafì binib tibɔti gbanti.

⁸Ti-Dindaan nìn sòon̄ nì Sakari yii:

⁹«Man ni-Dindaan Mpɔŋkɔdaan nín sòon̄ puee sèé yii: <Ní sòoǹ ni-juti bɔti nì mbaamɔn, ní báà ŋma ń dàkà u-juti dineendi nì disaasɔl.

¹⁰Ní taa mùul̀ ukpiipu nì ditaŋkpiibil, nì unicaan nì bisoodambi. Ni-kansikin ubɔ ń taa dàkafì u-juti pu nlandɔkɔkpiti.»

¹¹Ama bi nìn yíì kaa pílifì, ki pɔ́ɔkì bi-pɔbiliŋ. Bi nìn kpáá bi-tafaliŋ kí taa gbìl̄.

¹²Bi nìn pɔ́ɔkì bi-pɔbiliŋ kii ditaŋkpalee. Baa nìn là kí pīlifì ti-Dindaan Mpɔŋkɔdaan bɔti nì u-dakal din u-Fam nìn dī u-bɔnaatiliibi dooooyee yab pu ki tīī-bee. Niinee ti-Dindaan Mpɔŋkɔdaan gíí bi-pu diŋuul ŋkpitim pu.

¹³An pu ní ti-Dindaan Mpɔŋkɔdaan lī yii: «Kii man nín yíiń-bi baa pílifiǹ-mee, míǹ mbaantiim ní bi yíiń-mi ní ma mun kaa pílifiǹ-bi.

¹⁴M jìn̄-bi bi yàl̄ ki kɔ́ atimbun ŋin kɔkɔ baa nyée poon. Kitiŋ kin bi yíkìi yāntèe, bi nāaǹ-kì, ní ubɔ kaa ti cá ki-naaa, ubɔ kaa ti nyēē ki-ni. Kitiŋ kin nìn sá kimɔntii ki mɔ̄ ŋkaayee dūu kpántì kuteeu.»