Read Ntcham Zacharie 8 Bible Online

Zacharie 8 - Ntcham bible

Zacharie 8

¹Ti-Dindaan Mpɔŋkɔdaan sòon̄ nì mi tibɔti nee yii:

²«Man ni-Dindaan Mpɔŋkɔdaan nín lī puee sɔ̀. M cáá Jeerusaleem pu dineeŋkpaandi, dì jákatí-mi.

³An pu ní m lī yii, m làá fàtīí gítiń Siiyɔn jool pu, kí nīn kóò Jeerusaleem tiŋkin. Bi làá dāá nīn yíì Jeerusaleem yii <Deedee tiŋki>, ní kí nīn yíì man ni-Dindaan Mpɔŋkɔdaan jool yii <circir Jool>.

⁴Tiŋman man di lī yii, bijaŋkpilib nì binimpunaatiibi làá dāá fàtīí nyā kí kàl̄ Jeerusaleem tiŋkin imɔŋkijaa pu. Báà ŋma dāa ŋúb́ u-kpandɔŋu, di sá yii bi làá dāá yúntí kí púĺ.

⁵Nnaacimpɔmbiyaamu nì nsapɔmbiyaamu dāa gbéè kitiŋin kpacantib pu ní ki gbíiĺ.»

⁶Ti-Dindaan Mpɔŋkɔdaan lī yii: «Isirayeel yab bin kíǹ kaa kpíìyee yaa ká yii an kaa pée ŋūǹ kí bàń mimmee, ma mun máaǹ kí lì yii an pɔ̄ɔ̄ kí ŋá mimmaaa, man un sá ni-Dindaan Mpɔŋkɔdaaneeee?»

⁷Man ni-Dindaan Mpɔŋkɔdaan di bíi lì yii: «M làá fīī m-nibul kí nyāntí ntimu mun bí ŋwìiń nyalaŋki púee nì mun bí ŋwìiń jeetilaŋki púee.

⁸M làá gíiǹní-bi bí nīn kóò Jeerusaleem tiŋkin. Bi làá dāá nīn sá man nibul, ní man ḿ dāá nīn sá bi-Nimbɔtiu ki ŋúb́-bi ibaamɔn nì deedee poon.»

⁹Ti-Dindaan Mpɔŋkɔdaan nín lī puee sèé: «Ŋyunti ŋun ni nìn bíl̀ m-diiku nyeelee, m-bɔnaatiliibi nìn pōoǹ-ni ipoon. Too, kámaan kunyannyaau, kun puee ŋyunti nee poonee, ni bíi gbìl̀ ipoon gbanti ibaanti.

¹⁰Dooooyee, binib yaa nìn tūǹ ditundee, baa nìn cáá tipaal, ní tiwaŋkuti nìn tūǹ ditundi faalaa. Binannanliibi puee, binib kaa nìn tɔ́ bi-ba kí nyā kí cù laaba. Di sá yii m nìn yāntì binib nyáń tɔb pu.

¹¹Ama kɔŋkɔnnee man ni-Dindaan Mpɔŋkɔdaan di lī yii, maa làá ti ŋá m-nibul din kíǹ kaa kpíìyee kii m nín nìn ŋá dooooyee yab puee.

¹²Di sá yii bi làá dāá kpɔ̀ kí bɔ̄l̀ ŋgbansɔŋfin. Fiinyib làá dāá lòoǹ fiinyi biliŋ, ní kitiŋ ń dāá lòoǹ tikpaajin, ní kutagbɔŋu ń dāá tīī ntaanyim. M làá dāá dū tin bí nee kɔkɔ kí tīī m-nibul din kíǹ nee.

¹³Nimbi Juuda nì Isirayeel naakɔtin yab, atimbun ŋin kíǹee ceeyee, ni nìn sá kii dinibul din bi tɔ́ mbusuee ní. Ama kɔŋkɔnnee, m làá fīī-ni, ní ní kpántí kii dinibul din boon bi bīiǹee. An puee taa fàŋkìmaan! Kámaan kunyannyaau!»

¹⁴Ti-Dindaan Mpɔŋkɔdaan nín lī puee sèé: «Ŋyunti ŋun ni-baabi nìn kɔ́ǹ-mi diŋuulee, m nìn lēē yii m làá sàaǹ-ni, ní maa nìn kpántì m-landɔkɔŋu.

¹⁵Ama kɔŋkɔnnee, m kpántì m-landɔkɔŋu. M lēē kí ŋá Jeerusaleem nì Juuda timmu tiŋan. Ní taa fàŋkì.

¹⁶Kpèèmaan tin ni máaǹ kí ŋée. Báà ŋma ń sòoǹ u-juti ibaamɔn. Ni-bɔsoondiiŋŋinee, ní dū ibaamɔn in làá cáań ŋgbansɔŋfee kí sòoǹ binib bɔti.

¹⁷Ní taa nín̄ dàkafī tɔb pu tilandɔkɔkpiil, kí taa nín̄ pùtī fám. Di sá yii m ná atuun gbanti kɔkɔ, man ni-Dindaan di lī míǹ.»

¹⁸Tibɔti tin ti-Dindaan Mpɔŋkɔdaan sòon̄ nì mee sèé:

¹⁹«Man ni-Dindaan Mpɔŋkɔdaan di bí yii, ni nín bōob̀ kinyɔkɔ uŋmananaati nì uŋmaŋmooŋmooti nì uŋmaluluúti nì uŋmasaalaati poonee làá dāá kpántí nimbi Juuda yab cee dipɔɔpindi nì ifaal nì jiŋaal wiiŋyi ní. «Ama ní nīn néeń ibaamɔn nì ŋgbansɔŋfi.»

²⁰Ti-Dindaan Mpɔŋkɔdaan nín lī puee sèé: «Anibul tikpil nì ntiŋkpaamu yab làá fàtīí tí dāan̄ Jeerusaleem.

²¹Kitiŋ kiba yab làá dāá tùkù kin kíǹee yab yii: <Tí cùmaan kí gbàam̀ ti-Dindaan Mpɔŋkɔdaan, kí nyàab̀-u.> Bíǹ làá dāá kíí-bi yii: <Ti mun làá cù.>

²²Anibul tikpil nì atimbun ŋin cáá mpɔnee làá dāá dāan̄ Jeerusaleem kí nyàab̀ ti-Dindaan Mpɔŋkɔdaan, kí gbàam̀-u.

²³Ti-Dindaan Mpɔŋkɔdaan di lī puee sɔ̀. Ŋwiin gbantee binib saalaa bin sòoǹ isoon i-ba i-bee làá dāá nīn ŋúb́ ujuudaja bɔkutijuti kí bí-u yii: <Ti làá nóó-si kí cù, kun puee ti gbìl̄ yii Unimbɔti bí ni-cee.>»