Read Ntcham Malachie 3 Bible Online

Malachie 3 - Ntcham bible

Malachie 3

¹Kpèè, m làá tɔ̄ń m-tɔntɔnliu. U làá cátí nsan ń dòon̄ m-nimbiin[5]. Dicilpu dicilpu ni-Dindaan un ni nyàab̀ee làá dāan̄ kí kɔ́ u-diikun. Kpèèmaan dipoondi tuuŋŋu ŋun ni kā ki cée. Ŋu dòoń. Ti-Dindaan Mpɔŋkɔdaan di lī míǹ.

²U yaa láa bāańee, ŋma dāa ŋūǹ kí ŋmátí? Ŋma di dāa ŋūǹ kí yūĺ u-nimbiin. U yaa láa páaǹnée, ŋma dāa ŋūǹ kí nīn yú u-taaŋi pu? Di sá yii u bí kii ŋŋmi ŋun dùntī tikútee ní, a lì kii un fíntí tiwanee fɔfɔuee.

³U làá dāá kàl̄ kii unil un dùntī animbil kúti ki ŋáŋkí-tèe. U làá dāá fíntí Leefii yab bisaraaŋaliibi bí nyā dándan, kii bi nín fíntí sindaariya nì animbil kúti tí nyā ki wāĺ bɔ́mbɔŋ puee. Niinee bi làá dāá ŋmā kí ŋá saraabi kí tīī ti-Dindaan kii an nín máaǹ puee.

⁴Ŋyunti gbantee, ti-Dindaan dāa fòol̄ Jeerusaleem yab nì Juuda yab bin kíǹee saraabi kii dooooyee, abin ŋin jítèe.

⁵Ti-Dindaan Mpɔŋkɔdaan nín lī puee sèé: <M làá dāá dāan̄ ni-kansikin kí sòoǹ ni-bɔti. M làá dāá sòoǹ kí kpɔ̀ bikpaŋkpantiibi nì bilaakpaadambi nì bin pùtī fám fámee, nì bin di mùul̄ bipaadambi nì bikpiipoobi nì ataŋkpiibilee, nì bin di kaa fàŋkí-mi ki sàantí unicaanee. Ti-Dindaan Mpɔŋkɔdaan di lī míǹ.

⁶Man ni-Dindaan, maa kpántí, ní nimbee, ni pée gbíntìi sá Jaakɔb naantiibi ní[6].

⁷Ni kākatì ki wāatì m-dàkatam kaa nóó-bi kii ni-naanjab nín nìn ŋá puee. Fàtīí gítiḿmaan m-cee, ní ma mun ń fàtīí gítiń ni-cee. Man ni-Dindaan Mpɔŋkɔdaan di lī míǹ. Ama ní ni lì yii: <Nì mana ní tí fàtīí gítiń a-cee?

⁸Unil ŋūǹ kí mɔ̄ntì Unimbɔtaaa? Ama ní nimbi bí ki mɔ́ntí-mi. Ni gíti bālifì-mi yii: <Tilati poon ní ti mɔ́ntí-si.> Ni mɔ́ntí-mi tisaalaatiil nì saraabi poon.

⁹Mbusu jéetì ni-pu kun puee ni mɔ́ntí-mi, nimbi dinibul nee.

¹⁰Cáaḿmaan tisaalaatiil nín sá puee m-diikun tijin ń nīn bí baabadal kí taa dóó. Ti-Dindaan Mpɔŋkɔdaan di lī yii: <Cɔ̄ŋkìmaan-mi tibɔti gbanti pu kí kpèè m yaa kaa pīitì kutagbɔŋu punyɔmmu utaa ń nì ní ḿ bìin̄ ni-pu tikpil.

¹¹Ni-puee m làá kúntí tijinjin tí taa ti bīil̀ ni-kpaajinti, ní ni-fiinyi sukpaaŋŋi ń lòoǹ, man ni-Dindaan Mpɔŋkɔdaan di lī míǹ.

¹²Atimbun kɔkɔ làá lì yii ni bí mmɔnni, kun puee nimbi tiŋkin ní mmɔn dāa bí. Ti-Dindaan Mpɔŋkɔdaan di lī míǹ.

¹³Ti-Dindaan bí yii: «Ni sòoǹ-mi anyɔɔbun ŋin pɔ̄ɔ̄yee. Ní ni bàlifī yii: <Tilati ní ti sòon̄ ti-kansikin ki bíil̀-si ní?>

¹⁴Ni lì yii: <Kí tɔ̄ Unimbɔti tundee kaa cáá ipaati iba. Ti ŋúb́ u-marab, ki yíiń binib ti kāl̀ dikpool, ti-Dindaan Mpɔŋkɔdaan ń bàà sɔ̄ ti-saai, ama taa ká ipaati iba.

¹⁵Kɔŋkɔnnee, ti ká yii bin yòontí bi-ba yilpuee di bí mmɔnni, ní an bútí bin ŋáań ikpitee. Báà gba bi yaa gbítì Unimbɔti ŋuul, tiba kaa ŋáań-bi.»

¹⁶Bin fàŋkí Unimbɔtee nín nìn bí ki sòoǹ tɔb puee dee. Ti-Dindaan nìn gbìl̄ tin bi sòon̄ee. Bi nìn ŋmàn̄ bin fàŋkí ti-Dindaanee nì bin sīntiǹ bi-ba ki tīī-uee yiŋŋi u-nimbiin.

¹⁷Ti-Dindaan Mpɔŋkɔdaan bí yii: «Ŋwiin ŋun m làá dāá lēē m-pɔŋŋu kí dàkèe, bi làá dāá nīn sá man gaajawanti. M làá dāá dàkà-bi kulaŋŋaŋfitiiu kii ubaati nín dàkà u-jipɔɔn un bí u-cee ki tūǹ-u ditundee puee.

¹⁸Niin ní ni làá fàtīí ká digàntil din bí deedeedambi nì binikpitib kansikinee, nì digàntil din bí bin nóó Unimbɔti ki tūǹ u-tundee nì bin káa nóó-uee kansikin.

¹⁹Man ni-Dindaan Mpɔŋkɔdaan di lī yii: M-ŋuul wiiŋŋu dòoń, ŋu dāa tùm̀ kpaŋkpam kii kipaai ŋmiŋuee ní. Ŋwiin gbantee, bin yòontí bi-ba yilpuee nì bin ŋáań ikpitee làá dāá nīn bí kii timoolee ní. Bi làá dāá wà ní múb. Maa làá dāá kíń-bi inyaan àá dipandi.

²⁰Ama nimbi bin fàŋkí-mee, ŋwìiń ŋun cāabìń tibulcinee làá nyā. Ŋu-wintaabiliŋ làá cáań dicáaǹdi. Ni làá dāá nyā ki yùkufī nì dipɔɔpindi kii anabil ŋin ŋmɔ́ timool ki díkée.

²¹Ŋwiin ŋun m bíi bɔ́ntée dalee, ni làá dāá nīn tɔ́kɔ́ binikpitib pu ki còom̄, di sá yii bi dāa dɔ̄ kii ŋfantamee ní ni-taaŋi taapu. Man ni-Dindaan Mpɔŋkɔdaan di lī míǹ.»

²²Ní téetí marab bin m-tɔntɔnliu Mooyiisi nìn tīī-nee pu. Úǹ ní m nìn tīī marab nì akoobil Ooreeb jool pu ú tīī Isirayeel nibul kɔkɔ.

²³M làá tɔ̄ń Eelii[7] m-bɔnaatiliu ni-cee kí wàatī ní ti-Dindaan wiiŋŋu ŋun sá ŋwiŋkpaan ki cáá tifaandee ń nín bàń.

²⁴Úǹ di làá yàntī bibaatiibi nì bi-jipɔmbi kansikin ń mɔ̄ɔkì[8], ní kí yàntī bijipɔntiibi nì bi-baabi kansikin ń mɔ̄ɔkì. Mimmee, maa ti dòoń kí kúntí ni-tiŋki.