Read Ntcham 1 Maccabées 1 Bible Online

1 Maccabées 1 - Ntcham bible

1 Maccabées 1

¹Aleekisandir Ukpaan, ubɔti Fiiliipi jipɔɔn, yíkì u-tiŋkin Maseeduwaan kí cùú já kujaau. U jáń ki pɔ́ɔkiǹ Daariyusi, Peersi yab nì Meedeesi yab bɔtiu ní ki fōō u-paaŋŋu ki kpántì ubɔti. Greeki yab beelin ní u nìn dá láá kāl̀ tibɔtiil.

²Aleekisandir nìn jáń tijáti tikpil. U nìn jáń ki fōō ntimu mun bi máń agun ki túee, ki kūū mu-bɔtiibi.

³U cūtì áli duulinya kúntinyɔkɔ, ki fúkúl̀ ntimu tikpil. U nìn cáań ŋgbansɔŋfi ntimu kɔkɔn, ama ní ki dāa dūu kpántì ulambidaan nì kpeefam daan.

⁴U nìn kóoǹ dijanjakitikpaandi din pɔ̄ɔ̄ tiŋanee ki kpáfì ní ki nìn dū ntiŋgbamu nì atimbun nì bibɔtiibi ki ŋá u-taapu. U nìn páb́ bíǹ gbanti kɔkɔ bí nīn pà lampoo.

⁵Míǹ boonee ní u lítì iween pu, ní ki ká yii u làá kpú.

⁶Niinee ní u yíiń u-janjakpilib nì abɔtibil ŋin u nì bin bi lōō tibiyatin mbaantiimee. U nì bi nìn kpáfì ki kpōotì u-beel ŋyunti ŋun u dáá bí dimaŋfalinee.

⁷Aleekisandir nìn jíń dibeel abin saalaa nì ali ní ki nín kpíì.

⁸Ní u-janjakpilibee fōō mpɔn ki jíń dibeel bi-timmu mun pu bi nìn kēe.

⁹Bi-kɔkɔ nìn cíkiǹ ubɔti beefuuliiki u-kúm boon. Míǹ mbaantiim ní bi-jipɔmbi mun ŋá abin abin. An di cáań mbusu kitiŋ kɔkɔ pu.

¹⁰Aleekisandir Ukpaan beel boon bin fōōyee kansikin ní kisutuntuŋ kin lòoǹ tiloolee nyáń. Bíǹ di sá Antiyookuusi Eepiifaani, Antiyookuusi Ukpaan jipɔɔn. Bi dá láá péé ki cúú-u Room tiŋkin. Míǹ boonee ní u dāa kpántì ubɔti Greeki yab beel pu abin 137.

¹¹Ŋyunti gbantee binib bin kaa tɔ́ Unimbɔti marabee kɔ́nní Isirayeel yab kansikin. Bi nìn ŋúń ki ŋmātiǹ binib tikpil, di sá yii bi nìn lì yii: «Yīkìmaan tí cùú ŋá mpèé nì ntincamu mun māntìi tú-tee. Di sá yii ŋyunti ŋun ti yíì kaa bí kii bimbee ní inaabu tikpil jéetì ti-pu.»

¹²Binib nìn néeń ki pílifí an bɔtee ní.

¹³Juuda yab kansikin biba nìn ŋá malaa ki cūtìi ká ubɔti. Úǹ nìn pú-bi nsan bí cùú nīn nóó atimbun ŋin kíǹee nín ŋáań puee.

¹⁴Niinee ní bi máń mpaaŋkpaan ŋubɔ Jeerusaleem, kii atimbun gbanti nín māā puee.

¹⁵Bi nìn bīiǹ bi-kpancaŋŋi pu[1]. Bi nìn fātì bi-boon ki tīī mpèé ŋun nìn bí bi nì Unimbɔti kansikinee ki cūtìi nóó bin kaa sá Juuda yabee. Bi nìn dū bi-ba ki nyáfiǹ-bi kí ŋá tikpitil.

¹⁶Antiyookuusi nín ká yii u-beel báaǹ inyaan ki pɔ́ɔkèe ní u ká nlandɔkɔ yii u làá kpántí Eejipiti yab bɔtiu kí nīn kíǹ ki jīǹ abee alee pu tibɔtiil.

¹⁷U nìn yōoǹ dijanjakitikpaandi diba nì janjatɔrɔkub nì kujaau kuntib nì bitanjakaliibi nì meelab tikpil ki kɔ́ Eejipiti tiŋkin.

¹⁸U nìn kíĺ kujaau nì Eejipiti bɔtiu Pitooleemee, ní úǹ túlifì ki sáǹ. U-janjaliibi tikpil nìn fōō tiweendi.

¹⁹Antiyookuusi jáń ki fōō Eejipiti timmu mun bi máń agun ki túee ni ki fúkúl̀ mu-wanti kɔkɔ.

²⁰U nín jáń ki pɔ́ɔkiǹ Eejipiti tiŋki abin 143 poonee ní u fātìi gítìń u-tiŋkin. U nìn dū u-ba ki túĺ Isirayeel watil pú ní u nì u-janjakitikpaandee cūtìi nàn̄ Jeerusaleem kunaau.

²¹Antiyookuusi nìn kɔ́ kunimbɔtidiin nì dilambil. U nìn yāntì bi yōoǹ sindaariya saraafaŋŋu nì fitilab tɔ́kɔŋkaati nì ti-wanti,

²²nì teebil un pu bi pāantí kpɔnɔb bin bi cáa ŋáań Unimbɔti saraayee nì kɔŋkɔmbi bin poon bi ŋáań ndamam ki féeń Unimbɔtee, nì sindaariya sambiliŋ ŋin poon bi ŋáań talaalu ki tùutēe[2], nì ŋŋaapìtikaa nì mbeefuulimu. U nìn yāntì bi lēē sindaariya un bi nìn dūu nyáantì kunimbɔtidii nyɔkɔpuee.

²³U nìn yōoǹ animbil nì sindaariya nì tiwan tin cáá kudapɔɔuee. U nìn ká tigaajati tin bi dūu bál̀ee ní ki yōoǹ ti mun ki kpáàa búntì.

²⁴Antiyookuusi kóoǹ tiwan kɔkɔ mimmee ní ki nín kùǹ u-tiŋkin. U nìn kūū binib tikpil ní ki nìn sòon̄ tilambibɔti an kaa cáá bí lì.

²⁵Kitiŋee kɔkɔ poonee, binib nìn kāl̀ dikpool ki yáliŋkì Isirayeel tiŋki pu tikpil.

²⁶Bibɔtiibi nì bitindaŋkpilib nìn yáliŋkì, bisapɔmbi nì binaacimpɔmbi kaa ti cáá mpɔn, ní binimpoobi nyaaŋku gáń.

²⁷Binimpucambi calib nìn tóoń ikpiisilan, ní binimpucambi kā adiinni nì kunimbaau.

²⁸Nnaabu nee kɔkɔ nimbiinee, kitiŋ nìn cīŋkì. Jaakɔb nibul kɔkɔ nìn kɔ́ icoon.

²⁹Abin ali boonee, ní ubɔti Antiyookuusi tú ulampoofool Juuda yab timmun. U nì dijanjakitikpaandi di nìn nóó ki kɔ́ Jeerusaleem tiŋkin.

³⁰U nìn sòon̄ nì bin kóò niinee dikiildi poon yii u cāabìń-bi ŋgbansɔŋfi, ní binib fōō-u ki kíí. Dicilpu niin ní u páatìi jéetì kitiŋee pu. U nìn nāaǹ-kì ní ki kūū Isirayeel yab tikpil.

³¹U nìn fúkúl̀-kì, ki gāā ŋŋmi ki tūū-kì, ki kpéelikì ki-diiŋŋi nì digundi din māntìi tú-kèe.

³²U-janjaliibi nìn cúú binimpoobi nì mbiyaamu ki tɔ́ sarka, ní ki yōoǹ tiwaŋkuti.

³³Boonee ní bi máń diguŋkpaandi din pɔ̄ɔ̄yee ki māntìi tú Daafiidi tiŋki, ní ki máń sintil difɔkɔŋi ŋin bi máń agun ki túee ní ki dūu ŋá bi-balilaŋki.

³⁴Bi nìn cáań binikpitib dikitil diba ki kāaǹ niin, binib bin dàkà tipɔmbɔtee, ní an dūu kpántì bi-balilaŋki.

³⁵Mpaan gbanti pu ní bi nìn yōontí tijanjawan nì tijikaal. Bi nìn kóoǹ tigaajawan tin bi nìn fúkulìń Jeerusaleem tiŋkinee mun ki síiǹ niin, ní an nìn sá kutaliŋkpaaŋŋu ki tīī Isirayeel yab.

³⁶An nìn baasii sá kutaliŋŋu ní ki tīī kunimbɔtidii, ní ki nìn kɔ́ǹ Isirayeel yab agìŋ́kpaan poon.

³⁷Bijanjaliibi nìn cáá maanyiibab fatikuu ki yàantí kí màntīí tū circir kɔŋkooŋŋu kí kɔ́-ŋu tijɔkɔndi.

³⁸Bi-puee Jeerusaleem yab nìn sáǹ kukunsaŋu. Kitiŋee nìn dūu kpántì binicambi tiŋki. Kì nìn kpántì kinicantiŋ ki tīī bitindambi ní bíǹ dāa gīī ki dū-kì ki fá.

³⁹Ki-circir kɔŋkooŋŋu nìn kūń kii kuteeuee, ní ki-jiŋaalib dūu kpántì kii dikpool wiiŋyee. Binib nìn kíǹ ki ŋúb́ ki-wiŋŋuŋfikaai ki lāā, ní ki kpèé kun nìn tìì-kì tinyoolee fám.

⁴⁰Ki-cooi gíti sá ikpaan ki jítiǹ tinyool tin kì nìn cááyee, dikpool fōō ki-kpaanti paaŋŋu.

⁴¹Ubɔti Antiyookuusi nìn yóoǹ mara yii binib bin kɔkɔ kóò u-beelinee ń dūú kpántí dinibubaantiil

⁴²ní báà ŋma ń fá u-yaajatuuŋŋi. Bin kaa nìn sá Juuda yabee nìn ŋá kii ubɔti nín yóoǹ mara bí ŋá puee.

⁴³Isirayeel yab tikpil mun nìn kíí kí nóó ubɔti saŋŋu. Bi nìn tōotì awaa, ní kaa ti tɔ́ ŋwiŋŋuŋfikaa.

⁴⁴Ubɔti nìn dū kugbɔŋuee ki tú bi cáa cūnnì ki tīī Jeerusaleem nì Juuda timmun yab. U nìn tīī mara bí nīn kíǹ ki nóó kitiŋee yaajakoobiliŋ.

⁴⁵U nìn pīiǹ-bi nsan bí taa ti ŋá bisaraawɔkaabi nì ŋwiin kamaa saraabi nì tijimpin saraabi nì ndafakaam kunimbɔtidiin. U nìn tīī-bi mara bí taa ti dū ŋwiŋŋuŋfikaa nì jiŋaalib wiiŋyi kí yíiń tiba,

⁴⁶ní kí kɔ́ǹ circir kɔŋkooŋŋu nì tin bi cáa tūǹ ku-poon ditundee tijɔkɔndi.

⁴⁷Míǹ boonee Juuda yab ń mā isaraafan nì iwaatootipaan nì awaadiin kí tīī awaa. Bi gíti máaǹ kí dū igbeeti nì tiwaŋkuti tin bi kòóyee kí ŋá saraabi.

⁴⁸Baa ti cáá nsan kí gíí bi-biyaamu akpancan, ní kí gíti tɔ̄ ntimbiil tuuŋŋi tikpil kí kɔ́ǹ bi-ba tijɔkɔndi.

⁴⁹Antiyookuusi nìn là yii Juuda yab ń súntí Mooyiisi marab pu ní kí kpántí tin kɔkɔ maree bālifì yii bí ŋée.

⁵⁰Un kaa tɔ́ ubɔti marauee máaǹ bí kpɔ̀-u ní.

⁵¹Ubɔti nìn dū marab gbanti ki ŋmàn̄ ki ŋá kugbɔŋun ki tīī u-beelin yab kɔkɔ, ní ki lēē bikpilib bí nīn kpèé Juuda yab. U nìn gíti tīī mara Juuda timmu kɔkɔn yii bí nīn ŋáań saraabi bin kaa nóó nì Mooyiisi marabee.

⁵²Juuda yab tikpil bin fá Mooyiisi marabee nìn dū bi-ba ki nákáǹ ubɔti kpilibee, ní ki nìn ŋáań tin kaa kítèe kitiŋee poon.

⁵³An nìn yāntì Isirayeel yab bin nìn yú deedeeyee cá ki bāal̀ laakin kamaa bi nìn ŋūǹ kí báĺee.

⁵⁴Abin 145 poon Kiisileewu ŋmaliu iwiin saalku dal ní bi máń kuwaŋkpitiu kun cāabìń ntimbiilee[3] saraawɔkaa faŋŋu pu. U nìn gíti yāntì bi máń isaraafan Juuda timmu mun kíǹee poon.

⁵⁵Binib nìn tùutī talaalub bi-diiŋŋi punyɔmmu nyɔkɔpui nì imɔŋkijaa pu.

⁵⁶Ubɔti yab yaa nìn ká Mooyiisi marab gbɔŋkuee, bi nìn cátí-ku ní kí dūú tɔ̄ ŋŋmin.

⁵⁷Bi yaa nìn ká mpèé gbɔŋku ubɔ cee, àá ubɔ nóó Mooyiisi Marabee, bi nìn kù udaan ní kí nóó nì ubɔti marau un u nìn síiǹee.

⁵⁸Uŋmal kamaa ntimunee, bi nìn dátí Isirayeel yab bin nìn yú deedeeyee tafal ní.

⁵⁹Uŋmal kamaa poon iwiin mmuŋku nì iŋmoo dalee[4], bi ŋáań Greeki yab waal saraa nsaraafan ŋun bi máń saraawɔkaa faŋŋu puee ní.

⁶⁰Kí nóó nì Ubɔti marauee, bi nìn kù binimpoobi bin gíí bi-biyaamu akpancanee

⁶¹ní kí dū bi-biyaamu gbanti kí kúĺ kí léeń bi-neeŋyi. Bi nìn kù bi-dicaŋŋi yab, nì bin gíí mbiyaamuee akpancanee.

⁶²Nì míǹ kɔkɔee Isirayeel yab tikpil nìn ká dipɔbil ki yúl̀ nì atajal ali kaa jíń tijin tin làá kɔ́ǹ-bi tijɔkɔndee.

⁶³Bi nìn kíí kí kpú ki jítiǹ bí jī tijin tin kaa bí circiree kí nyā circir pèéŋu boon. Bi nìn kūū-bi.

⁶⁴Ŋyunti gbantee, Unimbɔti ŋuul nìn dàn̄ Isirayeel yab pu ŋkpitimin.