Read Ntcham 1 Maccabées 12 Bible Online

1 Maccabées 12 - Ntcham bible

1 Maccabées 12

¹Joonatan ká yii ŋyunti ŋun poon bi bée ŋān̄. Niinee ní u lēē binib ki tú Room, bí cùú pɔ̀ntī mpèé ŋun nìn bí bi nì Room yab kansikinee.

²U nìn ŋmàn̄ kugbɔŋu ki tú bi cūnnì Sipaarta nì laaba mun.

³Ituunee nìn búntì Room, ní ki bàn̄ ki kɔ́ bisaŋkiliibi kitil diikun. Bi nìn bí yii: «Usaraaŋakpil Joonatan nì Juuda yab timbundi di túnní-ti tí dāan̄ kí sòoǹ kí fàtīí pɔ̀ntī kubɔɔtiiu pèéŋu ŋun bí ni-kansikinee, ní ni nì bi ń ŋá ubaanti.»

⁴Bisaŋkiliibi kitilee nìn ŋmàn̄ kugbɔŋu bí cáá tīī ntimu mun kɔkɔ poon bi làá còom̀ kí jītée. Kugbɔŋu poon an ŋmàn̄ yii bí wúń ituunee pu áli í fàtīí gítí Juuda tiŋkin nì ŋgbansɔŋfi.

⁵Kugbɔŋu kun Joonatan nìn ŋmàn̄ ki tīī Sipaarta yabee sèé:

⁶<Man usaraaŋakpil Joonatan nì Juuda timbundi tindaŋkpilib nì bisaraaŋaliibi nì Juuda yab bin kíǹee di jáaḿ ti-nabiyaamu Sipaarta yab.

⁷An yúntì ni-bɔtiu Areeyioosi ŋmàn̄ kugbɔŋu ki tīiń ti-saraaŋakpiliu Ooniyasi. U nìn lī yii ti sá ni-nabiyaamu ní. Ní kugbɔŋu kun u nìn ŋmàn̄ee nìn lafun dàkà míǹ.

⁸Ooniyasi nìn fōō un ni nìn túnnée nì tinyookpaandi ní. U nìn fōō kugbɔŋu kun nìn sòoǹ kubɔɔtiiu nì mpèé puee ki kíí ki ŋá míǹ.

⁹Circir gbɔnti tin ti cááyee tútúǹ-ti tí nīn bí mmɔntiimin, ní tiba kaa bàà páb́-ti tí ŋá mpèé gbanti.

¹⁰Nì míǹ kɔkɔee, ti là kí dī anyɔɔbun nee pu kí yàntī kunabitiiu nì kubɔɔtiiu kun bí ti-kansikinee ń mɔ̀tīí kɔ́ tɔbin tiŋan. Taa là kí kpántí binicambi ni-cee. Di sá yii an yúntì doooo ni nín túnní ntuun ti-ceeyee.

¹¹Ti pée téetí ni-pu ní múlmul ti-jiŋaakpaambi poon, nì iyunti in ti ŋáań saraabee, nì ti yaa bíi mèé Unimbɔtee. Tiŋman an ŋān̄ ki kítì unil ń nīn téetí u-nabiyaamu pu.

¹²An mɔ̄ǹ-ti ni nín nyáń diyindee pu.

¹³Timbi jandi púee, ti kɔ́ agìń tikpil poon ki jáń tijáti tikpil, di sá yii bibɔtiibi bin māntìi tú-tee jáń nì ti.

¹⁴Tijáti gbanti poonee, taa là kí kɔ́ǹ ni nì ti-bɔɔbi bin kíǹ ti nì bi ŋá mpèéyee digìńdi.

¹⁵Di sá timbi máká Unimbɔti pu ní yii ú jòoń-ti. Úǹ di nyántì-ti ti-nannanliibi ŋaan, ní ki yāntì icoo kɔ́-bi.

¹⁶«An pu ní ti lēē Antiyookuusi jipɔɔn Numeeniyusi, nì Jasɔn jipɔɔn Antiipateer, ki dū-bi ki tú Room yab cee, bí fàtīí pɔ̀ntī mpèé ŋun nìn bí ti-kansikinee ní kí yàntī tí ŋá ubaanti.

¹⁷Ti gíti tīī ti-tuuŋyi mara í cù ni-cee. I máaǹ kí jāam̀-ni, ní kí dū kugbɔŋu kun ti ŋmàn̄ kí dàkà yii ti là kubɔɔtiiu kun bí ti-kansikinee ń mɔ̀tīí píkée.

¹⁸An puee ti gbàam̄-ni yii ní kíí-ti tibɔti gbanti pu.»

¹⁹Kugbɔŋu kun Areeyioosi nìn ŋmàn̄ dooooyee ki tīiń Ooniyasee sèé:

²⁰«Man Areeyioosi, Sipaarta yab bɔtiu jáaḿ usaraaŋakpil Ooniyasi.

²¹Ti ká kugbɔŋu kubɔ Sipaarta yab nì Juuda yab pu. Kugbɔŋuee poonee, an ŋmàn̄ yii anibul alee sá nnabiyaamu, ní bi-liitilee nyánní Abraam dicaŋkun.

²²Kɔŋkɔnnee ti nín béè mimmee, ti gbàam̄-ni yii ní ŋmàń kí tùkù-ti tí béé an yaa bútì-ni.

²³Timbi jandi púee, ti ŋūǹ kí ŋmà kí tùkù-ni tin bí nee: <Ní dū ti-picaŋkpunti nì ti-gaajawanti kí yíiń ni-yati, ní ti mun làá ŋá míǹ mbaantiim. An pu ní ti kpáafì binib bin ti túnní ni-ceeyee yii bí tùkù-ni nlandɔkɔ ŋun ti cáá ni-puee.>»

²⁴Joonatan gbìl̄ yii Deemeetriyusi janjakpilib fàtīi gítiń nì dijanjakitikpaandi din wīikíǹ dipeepeekaalee kí dāá jáǹ-u.

²⁵Niinee Joonatan yíkì Jeerusaleem ki nín túŋkí-bi Amaati tiŋkin. Di sá yii waa là kí pɔ̄-bi mpaan bí kɔ́ u-tiŋkin.

²⁶U nìn dū bicɔŋkiliibi ki tú bi-janjanaapaal pu. Bíǹ nìn fātìi gítìń ki tùkū-u yii binannanliibi bíi bɔ́ntí kí dāá túuǹ-bi kunyeeu kí jáǹ-bi.

²⁷Ŋwìiń jéetèe ní Joonatan bí u-yab yii bí taa gèeǹ kí nīn wāĺ. An sá bí bɔ́ntí kí já kujaau kunyeeuee kɔkɔ ní. U nìn dū bijanjaliibi ki yóoǹ ki māntìi tú dijanjanaapaal.

²⁸Binannanliibi nín gbìl̄ yii Joonatan nì u-janjaliibi bɔ́ntì kí já kujaauee ní tifaandi kɔ́-bi. Bi-wunti nìn gbáà ní kpàkpa ní bi kpāā kpāā ŋŋmi dijanjanaapaal pu ki yíkìi kátì.

²⁹Kutaa nín wúntèe ní Joonatan nì u-janjaliibi nín béè yii bi búntì. Di sá yii bíǹ nìn gbíntìi wāĺ ŋŋmi nín fòol̄ dijanjanaapaal puee ní.

³⁰Joonatan nìn kùl̄ ki bīiǹ bi-boon, ama waa nìn ŋúń ki cúú-bi, kun puee bi nìn dūtì Eeleeteer mɔɔl ki dóò.

³¹Niinee ní Joonatan fātì ki dūu nyīntì Bilaalibub timbundi diba pu, bi yíì-dì yii Sabaadee yab. U nìn jáń ki pɔ́ɔkiǹ-bi, ní ki yōoǹ bi-gaajawanti.

³²U ŋá míǹ ki dóòyee ní bi yíkì niin ki nín cá Damaasi, ki cōom̀ ki jítì kitiŋee kɔkɔ pu.

³³Siimɔn úǹ nìn yíkì ki cōom̀ ki tin gbātì Asikeelɔn tiŋki nì ntimu mun bi máń agun ki tú mu pìlīǹ-kèe. U nyáń niinee ní ki kíĺ Joopee tiŋki watil pú ki jáń ki fōō-kì.

³⁴Di sá yii u nìn gbìl̄ yii niin yab nìn là kí dū kitiŋ gbanti kí ŋá Deemeetriyusi janjaliibi ŋaan ní. U nìn dū bijanjaliibi ki kāaǹ niin bí nīn cí.

³⁵Joonatan nìn fātìi gítìń Jeerusaleem. U nìn kóoǹ bitindaŋkpilib ki kpáfì. U nì bi nìn sòon̄ ní bi lēē yii bi làá mā agun kí tū ntimu mun bí Juudeeyee.

³⁶U nìn lēē mun yii bi làá kūtì Jeerusaleem guŋŋi ŋfɔkɔn, ní kí mā diguŋkpaandi kí pìtī kitiŋ pɔ̀ti pu laakin bi máń digundi ki túee nì laakin kíǹee kansikin. U nìn là kí kàkatī Deemeetriyusi janjaliibi bin bí niinee, kí pìin̄-bi nsan bí taa dā tibaaa, kí taa nyāfì tiba mun.

³⁷Binib nìn kpáfì kí fàtīí mā Jeerusaleem gundi. Di sá yii digundi jandi din bí ŋwìiń nyalaŋki pú ki cá ditantakalinee nìn lítì. Bi nìn fātìi ŋáŋkì Jeerusaleem tincaliiki kin bi yíì Safeenatee mun.

³⁸Siimɔn úǹ nìn fātìi máń digundi ki tú Adida tiŋki kin bí ajoon taapuee. U nìn máń digundi ki dóò ní ki cóoǹ punuubi, ki ŋá tikpàlkaal.

³⁹Triifɔn nìn là kí kpòotī Siiriikpaan tiŋki, ní kí kpántí ubɔti. An puee ní u cúú ubɔti Antiyookuusi.

⁴⁰Ama u nìn fàŋkí yii Joonatan ń taa pìin̄-u nsan kí dāá já nì u. An puee ní Triifɔn nyàab̄ nsàmbiyaamu mun pu u làá dī kí cúú-u kí kpɔ̀ee. Niinee ní u kíĺ nsan ki nín cá Beeti-Seeyan.

⁴¹Joonatan mun nìn nín cá Beeti-Seeyan ki yōoǹ u-janjamɔmmɔntiibi kutukub imuŋku ili ki túkuń-u.

⁴²Triifɔn nín ká yii Joonatan dɔ́miń nì dijanjakitikpaandee, ní u yāntì kaa ti cúú-u mpɔn.

⁴³Ama u nìn fōō-u nì tinyookpaandi, ní ki pú-u tiwampɔkaal. U nìn dū-u ki dàkā u-bɔɔbi, ní ki tīī u-janjaliibi mara yii bí nīn tɔ́-u kii bi nín tɔ́ úǹ u-ba puee.

⁴⁴Boonee ní u bí Joonatan yii: «Ba pu ní a pú dijanjakitil nee digìńdi míǹ? Kujaau kubɔ mun kaa bí ti-kansikinaa!

⁴⁵Yàntī a-janjaliibi ń nīn kùǹ. Lēē binikaaŋkaabi yéè bí gbíntí a-cee, kí táá-mi tí cù Pitooleemayiisi. M làá dū kitiŋ gbanti nì ntimu mun bi máń agun ki túee mubɔ nì mu-janjakitiŋ nì mu-kàliŋkpilib kí ŋá a-ŋaan. An pu gba ní m baasii dɔ́miń Beeti-Seeyan doo. M yaa ŋá míǹ ki dóòyee ní ḿ nīn gítí m-dumpu.»

⁴⁶Joonatan nìn fōō tin Triifɔn nìn sòon̄ee ki kíí, ní ki ŋá kii u nín lī puee: U nìn yāntì u-janjaliibi nín gítí Juudee.

⁴⁷U nìn pée kíǹ u-ba bijanjaliibi kutukub bita ja ní. U nìn dū kutukub bili ki kāaǹ Galiilee ní ki yāntì kutuku un kíǹee nóó-u.

⁴⁸Ama ŋyunti ŋun Joonatan kɔ́ Pitooleemayiisee ní bi dū kitiŋ punyɔmmu ki pīiǹ. Bi nìn cúú-u ní ki dū ntàataajimu ki kūū bin táá-u ki kɔ́ee.

⁴⁹Niinee Triifɔn tú bijanjaliibi bin còom̄ ataa puee nì bitanjakaliibi Galiilee, nì Jisirayeel tantakalin bí cùú kpɔ̀ Joonatan janjaliibi kɔkɔ.

⁵⁰Bíǹ nìn gbìl̄ yii bi cúú usaraaŋakpil ki kūū bin nìn céeǹ-uee kɔkɔ. Nì míǹ kɔkɔee, bi nìn tīī tɔb kunyannyaau ní ki bɔ́ntì kí cùú já kujaau.

⁵¹Bin nìn bíi jì-bee nìn ká yii bi bɔ́ntì kí já kí fīī bi-ba. Niinee ní bíǹ fātì ki nín gítí.

⁵²Juuda yab janjaliibi kɔkɔ nìn fātìi gítìń Juudee tiŋkin nì laafiya. Bi nìn súń Joonatan nì u-yab pu, ní ki nìn fāŋkì tikpil. Isirayeel yab kɔkɔ súń bi-kpool tikpil.

⁵³Binib bin kóò ki māntìi tú Juuda yabee nìn pée kíǹ ki nyàab̀ kí kúntí-bi ní. Binib gbanti nìn lì yii: «Juuda yab kaa ti cáá ukpil, kaa ti cáá un làá tūtuǹ-bee. Tí cù kí jáǹ-bi kí kpɔ̀-bi. Ti yaa ŋá mimmee, ubɔ kaa làá ti téetí bi-pu kitiŋ pu.»