Read Ntcham 1 Maccabées 13 Bible Online

1 Maccabées 13 - Ntcham bible

1 Maccabées 13

¹Siimɔn gbìl̄ yii Triifɔn kóoǹ ajanjakiti tikpil ki kpáfì, kí dāá nàan̄ Juudee tiŋki.

²U nìn ká yii samaa kɔ́ dinyoondin. Niinee ní u nín jɔ́ḿ Jeerusaleem ki cūtìi kóoǹ Juuda yab ki kpáfì.

³U nìn tīī-bi kunyannyaau ní ki bí-bi yii: «Ni nyí tin man nì m-nabiyaamu nì m-dicaŋku yab ŋée sá kí mɔ̄tì ti-marab nì kunimbɔtidii pu ní. Nimbi ni-ba nyí tijáti tin ti jáńee, nì falaabi bin ti jíńee.

⁴Kí mɔ̄tì ti-marab nì ti-nimbɔtidiiku nì ti-timbundi pu ní bi kūū m-mambi kɔkɔ ní m kíǹ m-baba nee.

⁵Kɔŋkɔnnee maa cáá nsan kí nyàab̀ kí fīī m-maŋfal nnaabu yuntiŋu nee poon. Di sá yii maa sɔ́ǹ m-mambi.

⁶Ama m làá tɔ̀ m-nibul nì kunimbɔtidii, nì ni-nimpoobi nì ni-biyaamu pɔntooŋyi. Tiŋman, anibul kɔkɔ kpáfì kinyɔkɔ kí kúntí-ti, kun puee bi ná-ti.»

⁷Juuda yab nín gbìl̄ Siimɔn nyɔɔbuŋŋi gbantee ní bi fātìi ká kunyannyaau.

⁸Ní bi kíí-u mpɔn yii: «Kɔŋkɔnnee, sii di sá ti-kpiliu, sii di làá fōō a-mambi Juudasi nì Joonatan yil.

⁹Lìntī ti-nyɔkɔpu kujaau poon. A yaa lī puee, míǹ ní ti làá ŋá.»

¹⁰Niinee Siimɔn kóoǹ binib bin pɔ̄ɔ̄ kí já kujaauee ki kpáfì. Bi nìn yáb́ ki dóò Jeerusaleem gundi, ní bi māntìi tú kitiŋ ki cí-kì.

¹¹U nìn dū Abisaloom jipɔɔn Joonatan ki tú Joopee nì dijanjakitil dikpaandi. Joonatan nìn jìn̄ kitiŋ gbanti nib ní ki kāl̀ niin.

¹²Triifɔn yíkì Pitooleemayiisi nì dijanjakitikpaandi ki nín cá Juudee. U nìn kpáaǹ Joonatan, Siimɔn maan un u nìn cúú ki pīiǹ kudiiyee.

¹³Siimɔn nìn gāā u-janjanaapaal Adida ki túĺ dipaal.

¹⁴Triifɔn nìn gbìl̄ yii Siimɔn fōō u-maan yil ní ki bíi bɔ́ntí kí dāá jáǹ-u. Niinee ní u tú binib Siimɔn cee bí tùkù-u yii:

¹⁵«A-maan Joonatan nín sá ukpilee, u bàà nìn máaǹ kí pà animbil aba bí dūú ŋá ubɔti nimbidakaaun. U nín kaa ŋá mimmee pu ní m cúú-u ki pīiǹ kudii.

¹⁶A yaa tīiń animbil kiiloobi kutukub bili nì alaataa aluli, nì Joonatan jipɔmbi bili ḿ dūú pìin̄ sarkee, m làá gíiǹ-u kí líí. M yaa ŋá míǹ ní ki gíiǹ-u ki líìyee, waa làá ti yīkì kí nīn jáà nì ti.»

¹⁷Siimɔn nìn nyí tiŋan pu yii tin ituunee sòon̄ee kaa sá ibaamɔn. Nì míǹ kɔkɔee, u nìn nyàab̄ animbil nì mbiyaamuee ki tīī. Di sá yii u nìn fàŋkí yii samaa ń taa fàtī kí nīn bíi jáà nì u

¹⁸kí lì yii: «Siimɔn nín yíì kaa cūnnì animbil nì mbiyaamu ki tīī Triifɔŋyee di yì-tì ní bi kūū Joonatan.»

¹⁹U nìn dū animbil kiiloobi kutukub bili nì alaataa aluli nì mbiyaamuee ki tīī. Ama Triifɔn nìn mɔ́ntì-u ní, kaa líì Joonatan.

²⁰Míǹ boonee ní Triifɔn kíĺ nsan kí cùú já kí fōō Juudee tiŋki kí nàan̄-kì. U nì u-janjaliibi nìn fātìi dūu dī nsan ŋun cá Adoora tiŋkinee. Ama laakin kamaa bi yaa nìn pée là kí dēe, Siimɔn nì u-janjaliibi nìn pìintí-bi nsan.

²¹Ŋyunti gbantee, bin nìn bí Jeerusaleem tiŋki pɔ̀ti pu laakin bi máń digundi ki túee nìn tūǹ ituun Triifɔn cee. Bi nìn kā u-pu ki tùkù-u ú dīń kuteeu pú kí cáań-bi tijin.

²²Triifɔn nìn bɔ́ntì u-tanjakaliibi kɔkɔ kí nīn cá, ama kunyeeu gbantee, ntaayim nìn lítì tikpil, an puee waa nìn ŋúń ki cūtì. Niinee ní u dūu dī Galaadi tiŋki watil pú.

²³U tóob́ kí bà Baskama tiŋkee ní u yāntì bi kūū Joonatan, ní ki síb́-u niin.

²⁴Míǹ boonee ní Triifɔn nín gítí u-tiŋkin.

²⁵Siimɔn nìn tú binib bi cūtìi yōoǹní u-maan Joonatan, ki cáań ki síb́ Moodiini, bi-naanjab tiŋkin.

²⁶Isirayeel yab nìn súń u-pu an yúntì ní ki ŋá-u dikpɔkpaandi.

²⁷Siimɔn nìn dū ataŋkpee ki máń u-mambi kaakuliŋ pu dikumpool din unil yaa bí ndan, ú wāl̀ee. U nìn dū ataŋkpee ŋin jɔ̀m̀ pɔ́lpɔlee ní ki nákáǹ dikumpoolee nimbiin nì di-boon pú.

²⁸Siimɔn nìn gíti máń akumpoo aluli ŋin cáá akpin ata ata ní ŋi-yilpu cɔ́m̀ee ikuul ili pu bí nīn cáa téetí u-baa nì u-na nì u-mambi pu.

²⁹Ní u máń jaantalkub bifɔkɔb ki māntìi tú akumpooyee. U nìn dū tijanjawan kɔkɔ nì ti-bulifi ki nyɔ̄kɔntì akumpooyee, binib ń nīn pée cáa téetí Maakabeebi pu. U nìn kpítì meelab ki kɔ́ĺ tijanjawanee, ní unil yaa nìn pée bí tiŋku puee, u nìn ŋūǹ kí wāl̀.

³⁰Akumpoo ŋin u nìn yāntì bi máńee dáá gbíntìi bí ki dāa sāā díǹ.

³¹Ŋyunti gbantee, Triifɔn nìn nyáń ubɔtipɔɔn Antiyookuusi boon ki kūū-u.

³²U nìn fōō dibeel u-paaŋŋu, ki kpántì Siiriikpaan bɔtiu. U nìn cáań agìŋ́kpaan.

³³Siimɔn jandi púee, u nìn máń agun ki māntìi tú Juudee timmu. U nìn máń aguŋfɔkɔ nì sintil difɔkɔŋi ki tú-mu. Bi nìn pìintí-mu nì tikpàlkaal tin pɔ̄ɔ̄yee. Bi nìn nyàab̄ tijin ki kpáafì ntimu mun bi máń agun ki tú gbantee poon.

³⁴Boonee ní Siimɔn lēē binib ki tú ubɔti Deemeetriyusi uliliiti cee. Kii Triifɔn nín fúkúl̀ kitiŋee puee, ituunee nìn gbāam̀ Deemeetriyusi ú yàntī Juudee yab ń taa ti pà lampoo.

³⁵Ubɔti Deemeetriyusi nìn kíí Siimɔn nín mēē-u tiŋyee ní ki ŋmàn̄-u kugbɔŋu nee yii:

³⁶«Man ubɔti Deemeetriyusi, m jáaḿ Siimɔn usaraaŋakpil nì bibɔtiibi bɔɔ, nì bitindaŋkpilib nì Juuda yab timbundi.

³⁷Ti fōō sindaariya beefuuliiki nì sindaariya kpakpati tin a púnní-tee. Ti bɔ́ntì kí ŋá mpèé nì ni. Ti làá ŋmà bikàliŋkpilib kugbɔŋu bí pɔ̄-ni diyimɔɔl ní taa ti pà lampoobi.

³⁸Ti nì ni nín nìn pée sòon̄ ki yóoǹ tin dooooyee, míǹ ní ti gbíntìi ŋúb́. Ntimu mun ni máń agun ki túee, nimbi di yì.

³⁹Ti dū ni-yìntitam nì ni nín kaa yúl̀ nì ti deedee pu ki dāa sāā díǹee ki pú-ni. Naa ti máaǹ kí pà lampoo kí tīī ubɔti. Bi yaa nìn gíí Jeerusaleem patanti ubɔ ni pèe, ní taa ti pà.

⁴⁰Ni-kansikin biba yaa cáá mpɔn kí nīn bí bijanjaliibi bin cí ubɔtee kitil poonee, ti làá fōō-bi. Ŋgbansɔŋfi ń fàtīí dòon̄ ti-kansikin.»

⁴¹Kí yòon̄ abin 170, Isirayeel tiŋki kaa nìn gíti bí bin kaa sá Juuda yabee taapu.

⁴²Binib nìn kíĺ ki kíǹ ki ŋmà bi-gbɔnti nì bi nín nyáfí ki dāā tiwan ki ŋmà ŋgbambiyaamu puee yii: «Dibimpeepeekaal din Siimɔn usaraaŋakpil nì ujanjakpil nì Juuda yab kpiliu kpántì gɔminee.»

⁴³Ŋyunti gbanti ní Siimɔn dɔ́miń kí já nì Geeseer tiŋki. U nìn cáań u-janjaliibi ki māntìi tú-kì. U nìn máń sintil difɔkɔku ki tɔ́kɔǹ ataa pu, ní ki ŋàal̄ ki cáa yá kitiŋee guŋŋi. U nìn jáń ki fōō kitiŋee sintil difɔkɔku kubɔ ki kíǹ ki bí niin.

⁴⁴Bijanjaliibi bin nìn bí sintil difɔkɔku kun nìn tɔ́kɔ́ ataa puee nìn yūkufì ki jéetì kitiŋee poon. Báà ŋma pɔbil nìn bíil̀.

⁴⁵Bininjab nìn jɔ́m̀ agun pu nì bi-nimpoobi nì bi-biyaamu. Bi nìn dáaĺ ki cátì tiwan tin bi pēēyee ki gbáà ibiil ki gbàam̄ siimɔn yii ú yàntī bí ŋá mpèé.

⁴⁶Bi nìn lì yii: «Taa dáaĺ ti-tafal ikpiti in ti ŋá-see pu. Ama sɔ̄ ti-saai!»

⁴⁷Siimɔn nì bi nìn sòon̄ ki gbìlīǹ tɔb ní u dū kujaau ki gbēeǹ. Ama u nìn jìn̄-bi ki nyántì kitiŋee ni, ní ki ŋá adiin ŋin poon awaa nìn bée circir. Míǹ boonee ní u nì u-janjaliibi nín kóò Geeseer tiŋkin ki gà ilan ki pàkà ki nyɔ́ŋkí Unimbɔti.

⁴⁸Bi nìn kúntì kitiŋee poon tin kɔkɔ kɔ̄ntí-kì tijɔkɔndee, ní ki dū binib bin ŋúb́ Unimbɔti marab deedeeyee ki kāaǹ. U nìn máń digundi ki tú Geeseer tiŋki ní ki máń u-ba kudii kitiŋ gbantin.

⁴⁹Bin nìn kóò Jeerusaleem kitiŋ pɔ̀ti pu bi máń digundi ki túee kaa nìn gbíntìi ŋūǹ kí nyā kí dā àá kí nyāfì tiba kitiŋin. Ŋkùm nìn bàn̄-bi áli bi-kansikin biba kpíì.

⁵⁰Bi nìn gbāam̀ Siimɔn yii bí ŋá mpèé ní úǹ gbìl̄ ki tīiǹ-bi. Ama u nìn nyántì-bi niin, ní ki fíntì-kì ki nyántì ki-jɔkɔntin.

⁵¹Juuda yab nìn kɔ́ kitiŋ pɔ̀ti pu laakin bi máń digundi ki túee abin 171 poon uŋmaliliiti iwiin mmuŋku nì ita. Bi nìn ŋúb́ tikpakpati ní ki gà inyɔŋki laŋyi ki kɔ́. Bi nìn gà ijajilan nì ilan iba mun ki bɔ̀ɔ́ tibati nì ŋgaŋgamu nì túmbab. Di sá yii bi jáń ki pɔ́ɔkiǹ unannanli ukpaan ubɔ ki jìn̄-u Isirayeel tiŋki pu.

⁵²Siimɔn nìn lēē yii dibintil kamaa bí nīn jīǹ jiŋaal ŋwiin gbanti nì dipɔɔpindi. Bi nìn máń digundi ki tú kunimbɔtidii gbantaŋki, kitiŋ pɔ̀ti pu watil, ní u nì u-janjaliibi kóò niin.

⁵³Siimɔn ká yii u-jipɔɔn Yoowaneesi cíkitì kɔŋkɔnnee. U nìn dū-u ki kpántì u-janjakitil kpiliu. Yoowaneesi nìn kóò Geeseer ní.