Read Ntcham 1 Maccabées 14 Bible Online

1 Maccabées 14 - Ntcham bible

1 Maccabées 14

¹Abin 172 poonee, Deemeetriyusi uliliiti kóoǹ u-janjakitil ki kpáfì ki nín cá Meedii tiŋkin. U nìn cūtì kí nyàab̀ dijòońdi kí jáǹ Triifɔn.

²Peersi nì Meedii yab bɔtiu Arisaasi gbìl̄ yii Deemeetriyusi kɔ́nní u-tiŋkin. Ní u tú u-janjakpiliu ubɔ ú cùú cúuń-u nì u-nimbiliŋ kí cáań.

³Ujanjakpilee cūtì ki jáń ki pɔ́ɔkiǹ Deemeetriyusi janjaliibi. U nìn cúú ubɔti ki cáá-u ki tīī ubɔti Arisaasi, ní úǹ dū-u ki pīiǹ kudii.

⁴Siimɔn maŋfal wiiŋyi kɔkɔ poonee, Juudee tiŋki nìn bí ŋgbansɔŋfin ní. U nìn nyàab̄ u-timbundi naam, ní u-maŋfal wiiŋyi kɔkɔ poonee, u-pɔŋŋu nì tinyool tin u nìn cááyee nìn mɔ̄ǹ Juuda yab tikpil.

⁵U nìn jáń ki fōō Joopee meela yulilaŋki, ní ki mɔ̄tìi nyáń diyindi. An di yì-tì ní Juuda yab ká nsan kí cù ntimu mun Meediiteeranee tiŋkuu māntìi túee.

⁶U nìn wāaǹ u-timbundi kpaanyɔkɔ, ní ki nìn cáá u-tiŋki pu mpɔn.

⁷U nìn cúuń tijáti poon binib tikpil kuyuŋu. U nìn jáń ki fōō Geeseer nì Beeti-Suur timmu, nì Jeerusaleem tiŋki pɔ̀ti pu laakin bi nìn máń digundi ki túee. U nìn kúntì kitiŋ gbanti poon tin kɔkɔ nìn kɔ̄ntí-kì tijɔkɔndee. Ubɔ kaa nìn pée ŋúń ki yúl̀ u-nimbiin.

⁸Binib nìn kù bi-kpaaŋŋi nì ŋgbansɔŋfi. Kitiŋ nìn lòoǹ tikpaajin, ní dipaal pu sufii lòoǹ abil mmɔntiim.

⁹Bitikpilib nìn kā sampaambi pu ní ki sòoǹ an nín bútì bi-tiŋki puee. Binaacimpɔmbi nìn pēē abɔkutinyaan ki gbìn̄ bi-gbajab ki mɔ̀ɔǹ.

¹⁰Siimɔn nìn tìì Juudee timmu tijikaal an nín máaǹ puee, ní ki nìn máń digundi ki māntìi tú-mu. Niinee ní u-yindi gbītì ki tin bàn̄ ilaan kɔ.

¹¹U nìn cáań ŋgbansɔŋfi Isirayeel tiŋki pu, ní an nìn mɔ̄ǹ Isirayeel nibul tikpil.

¹²Báà ŋma nìn kā u-fiinyiu nì u-fiigiu booŋŋu taapu nì ŋgbansɔŋfi. Ubɔ kaa nìn fàŋkí tiba[24].

¹³Binannanliibi bin nìn jáà nì bee wáŋkì Juudee tiŋki pu. Bi nìn jáń ki pɔ́ɔkiǹ bi-bɔticambi.

¹⁴Siimɔn nìn tútúǹ u-tiŋki yab bin sá biwɔfibee. U nìn yāntì binib ŋúb́ Unimbɔti marau, ní ki nìn jìn̄ Juuda yab binikpitib bin kaa nóó Unimbɔti marabee.

¹⁵U nìn tīī kunimbɔtidii ku-nyooti, ní ki nìn nyàab̄ asambil ŋin bi cáa ŋáań saraabee tikpil ki kútì.

¹⁶Room nì Sipaarta timmunee, binib nìn gbìl̄ Joonatan kúm pu ní kunimbaau nìn kɔ́-bi tikpil.

¹⁷Ama Sipaarta yab nìn gbìl̄ mun yii u-naal Siimɔn fōō u-yil ki kpántì usaraaŋakpil, ki jíń dinyandi Juudee timbilimmu nì ki-timmu pu.

¹⁸Niinee ní bi ŋmàn̄-u tasa kúti pilinti pu kugbɔŋu. Bi nìn pɔ̄ntì kubɔɔtiiu pèéŋu ŋun nìn bí bi nì u-mambi Juudasi nì Joonatan kansikinee.

¹⁹Bi nìn kàan̄ kugbɔŋu gbanti Isirayeel samaau kɔkɔ nimbiin Jeerusaleem.

²⁰Sipaarta yab nín nìn ŋmàn̄ kugbɔŋu kuŋyee sèé: «Timbi Sipaarta yab nì ti-kpilib di jáaḿ Siimɔn usaraaŋakpil, nì bitindaŋkpilib nì bisaraaŋaliibi nì Juuda yab bin sá ti-nabiyaamuee.

²¹«Binib bin ni túnní ti-nibul ceeyee máafì-ti ni nín nyáń diyindi pu binib tɔ́-ni puee. Bi-dāantam mɔ́ɔkiǹ-ti tikpil.

²²Tin kɔkɔ bi máafì-tee, ti dūu ŋmàn̄ ki ŋá ti-tiŋki gbɔŋkpaaŋkun. Ti nín ŋmàn̄ puee sèé: <Antiyookuusi jipɔɔn Numeeniyusi, nì Jaasɔn jipɔɔn Antiipateer dɔ́miń ti-cee. Juuda yab di nìn túnní-bi ti-cee kí pɔ̀ntī mpèé ŋun bí ti-kansikinee.

²³An mɔ́ɔkiǹ samaa ń fōō binib gbanti nì jilma, ní kí dū kugbɔŋu kun bi cáań-tee kí dūú kpāafì laakin ti yōontí kitiŋ pu bɔti gbɔntee. An yaa ŋá mimmee Sipaarta yab làá nīn cáa téetí. Kí kūtèe, ti mun ŋmàn̄ kugbɔŋu ki tīī usaraaŋakpil Siimɔn.>»

²⁴Boon kpataaayee ní Siimɔn dū Numeeniyusi ki tú Room ú cùú pɔ̀ntī mpèé ŋun bí bi nì Room yab kansikinee. U nìn cūnnì sindaariya gbampɔɔl din nìn nyìm̀ kii kiiloobi alaataa aŋmooyee ki pú-bi.

²⁵Juuda yab nín gbìl̄ mimmee ní bi bíi bàlifī bi-ba yii: «Mana ní ti làá ŋá ní kí dàkà Siimɔn nì u-jipɔmbi yii ti nyí tiŋan tin bi ŋá ki tīī-tee?

²⁶Di sá yii úǹ nì u-mambi nì u-baa dicaŋku kɔkɔ jáń nì binannanliibi kaa gbēeǹ. Bi jáń nì Isirayeel nannanliibi ki jìn̄-bi, ní ki tīī ti-nibul dibatɔl.» Niinee ní bi ŋmàn̄ tasa kúti pilinti pu tiŋmaŋmabiti ki cáa nákáǹ jaantalkub pu Siiyɔn jool pu.

²⁷Bi nín ŋmàn̄ tipilindi gbanti pu puee sèé: «Abin 172 poon Eeluul ŋmaliu iwiin saalku nì ita, an dàkà yii usaraaŋakpil Siimɔn nín fōō tikpitee bintataatiil poon,

²⁸ní bisaraaŋaliibi kitil nì samaa nì abɔtibil nì bitindaŋkpilib ŋá dikpafikpaandi. Dikpafil gbanti poon ní bi sòon̄ tibɔti nee:

²⁹Ti-tiŋki nee ká tijáti tikpil. Kujaau kamaa poonee, usaraaŋakpil Maatatiyasi un sá Yooyariib dicaŋkunee nì u-jipɔmbi Siimɔn nì u-mambi kaa mɔ́tì bi-maŋfal pu mbusu nimbiin. Bi dū bi-ba ní ki tīī ki bíitì ti-nibul nannanliibi ki mɔ́tì ti-nimbɔtidiiku nì ti-marab pu. Tiŋman bi baasii tīī ti-nibul tinyool ní.

³⁰Joonatan kóoǹ ti-timbul nee nib ki kpáfì ní bi ŋá ubaanti, ní u kpántì bi-saraaŋakpiliu, boonee ní u kpíì ki cūtìi ŋàl̄ u-naanjab.

³¹Isirayeel yab nannanliibi bàà mākafì yii bí bàà kɔ́ Juudee kí wīī kitiŋ kí kpìtī kunimbɔtidii.

³²Siimɔn kaa nìn kíí ki yíkì ki jáń u-timbundi pu. U lēē u-gaajati dijandi ki dūu nyàab̄ tijanjawan ki tīī u-tiŋki janjaliibi ní ki pà-bi mun.

³³U nìn máń agun ki māntìi tú Juudee nì Beeti-Suur nì ntimu mun bí kitiŋ kpaanyɔkɔee ki wúń mu-pu. Niin ní bi-nannanliibi janjawanti nìn bí. Siimɔn nìn dū Juuda yab janjakitil ki kāaǹ kitiŋ gbantin.

³⁴U nìn máń digundi ki māntìi tú Joopee tiŋki kin bí dimɔɔgbandee, nì Geeseer tiŋki kin pìlīǹ Asidoodee. Dooooyee binannanliibi di nìn jíń kitiŋ gbanti ki kā. Ama ntimu muli gbanti poonee, Siimɔn nìn dū Juuda yab biba ki kāaǹ niin, ní ki tīī-bi tin kɔkɔ pée máaǹ bí nīn cááyee.

³⁵Samaa nìn ká Siimɔn deedeeu. Bi nìn béè yii u nìn là kí tīī u-timbundi tinyool ní. An pu ní Juuda yab nìn lēē-u ú nīn sá bi-kpiliu nì bi-saraaŋakpiliu kí ŋmā kí jāam̀-u tin kɔkɔ u ŋée pu. Siimɔn nìn yúl̀ nì u-timbundi deedee nì ibaamɔn poon. U nìn nyàab̄ kí dī isan kɔkɔ pu kí yàntī Juuda yab ń kpántí ditimbuŋkpaandi.

³⁶U-maŋfal wiiŋyi poonee, u nìn ŋúń ki jìn̄ bin kaa sá Juuda yabee Juudee tiŋkin, ki kpáaǹ bin nìn bí Daafiidi Tiŋkin Jeerusaleemee. Niin ní binib gbanti nìn náań ditiŋyil ki máń digundi ki tú, ní ki nyēē ki ŋáań ajɔkɔntuun laakin pìlīǹ kunimbɔtidiiyee. Míǹ ní bi ŋáań ki kpèé circir paaŋŋu fám.

³⁷Siimɔn nìn kāaǹ Juuda yab janjaliibi ditiŋyil gbantin. U nìn túń atuun kí mɔ̀tīí wúń ki-pu, kí ŋmā kí yàntī kitiŋee nì Jeerusaleem tiŋki ń nīn bí ŋgbansɔŋfin. U nìn máń ki tɔ́kɔ́ǹ kitiŋee gundi fɔkɔŋŋu pu.

³⁸«An puee ubɔti Deemeetriyusi uliliiti yāntì Siimɔn gbíntìi sá usaraaŋakpil.

³⁹U pú-u diyindi yii <Ubɔti bɔɔ> ní ki tīī-u tinyool tikpil.

⁴⁰Di sá yii ubɔti nìn gbìl̄ yii Room yab nìn yíì Juuda yab yii bi-bɔɔ nì bin pá bi-boonee nì bi-nabiyaamu. Bi nìn fōō binib bin Siimɔn tú bi-ceeyee nì jilma.

⁴¹An pu ní Juuda yab nì bisaraaŋaliibi fōō tin bi sòon̄ ki síiǹee yii Siimɔn nì u-jipɔmbi nì bi-naantiibi làá nīn sá bikpilib nì bisaraaŋakpilib, kí nīn cí ŋyunti ŋun Unimbɔti làá tɔ̄ń ubɔnaatilee.

⁴²Siimɔn di sá timbi janjakpikpaaŋwu. U máaǹ kí nīn kpèé kunimbɔtidii ní kí lēē atuun kpilib nì bikàliŋkpilib bin làá nīn kpèé kitiŋee nì bin làá nīn kpèé tijanjawanee sintil difɔkɔŋin.

⁴³Siimɔn di nìn kpèé kunimbɔtidii. Siimɔn yindi pu ní bi làá nīn cáa nyìitī kitiŋ pu gbɔnti kɔkɔ pu. U cáá nsan kí nīn pèentí dijiŋaabɔkutil dimandi nì sindaariya daaŋku.

⁴⁴Samaa nì bisaraaŋaliibi kansikin ubɔ kaa cáá nsan kí fá tin u lēē yii bí ŋée. Ubɔ kaa cáá nsan kí kpákáǹ Siimɔn marab bin u yóoǹee, àá kí kóoǹ kitiŋ pu nib kí kpāfì waa pú kinyɔkɔ. Ubɔ kaa cáá nsan kí pèen̄ dijiŋaabɔkutil din máǹ cínciŋee nì tinákaŋkaal tin sá sindaariyee.

⁴⁵Un kaa tɔ́ u nín lēē yii bí ŋá puee àá ki fá tin u síiǹee tibee, bí dáaĺ udaan tafal.

⁴⁶«Samaa kɔkɔ nìn kíí Siimɔn ń ŋá kii bi nín síiǹ marab puee.

⁴⁷Siimɔn nìn kíí kí kpántí usaraaŋakpil nì dijanjakitil kpiliu nì Juuda yab timbundi nì bisaraaŋaliibi kpiliu, ní kí nīn sá dinibul kɔkɔ yidaaŋwu.»

⁴⁸Juuda yab lēē yii bi làá dū tibɔti gbanti kí ŋmà tasa kúti pilinti pu kí dū-tì kí nákań kunimbɔtidii cindin laakin báà ŋma làá nīn wāĺee.

⁴⁹Bí dū tibɔti gbanti tibaantiilee kí ŋmà tipilindi pu kí dūú síiń kunimbɔtidiin laakin bi yōontí animbilee. An yaa ŋá mimmee, tipilindi gbanti làá nīn bí ki tīī Siimɔn nì u-jipɔmbi.