Read Ntcham 1 Maccabées 15 Bible Online

1 Maccabées 15 - Ntcham bible

1 Maccabées 15

¹Ubɔti Deemeetriyusi jipɔɔn Antiyookuusi kālìń doooo ntimu mun Meediiteeranee tiŋkuu māntìi túee poon ki ŋmàn̄ kugbɔŋu ki tīiń usaraaŋakpil Siimɔn, Juuda yab kpiliu, nì Juuda yab nibul.

²U nín ŋmàn̄ tin kugbɔŋu gbanti poonee sèé: «Man ubɔti Antiyookuusi m jáaḿ Siimɔn un sá usaraaŋakpil nì Juuda nì u-nibul bɔtiuee.

³Bikpitiŋaliibi dɔ́miń ki fōō m-naanjab beel. An pu ní m nyàab̄ kí fàtīí fōō-dì dí gítí kii din nín nìn bí pu dooooyee. M kpáfì ajanjakiti ŋi wīikí tikpil, ki bɔ́ntì kujaau meelab.

⁴M lēē kí fàtīí gítiń kitiŋee ni kí jáǹ bin nāaǹ-kì ní ki nàn̄ m-beelin timmu kunaauee.

⁵Kɔŋkɔnnee, m là á béé yii bibɔtikpikib bin nìn péeǹ-mi ki kāl̀ee nín nìn pú-si lampoobi nì patantib biŋyee, míǹ ní ma mun yú.

⁶M pú-si nsan á mɔ́ɔ́ sii a-ba nimbiliŋ, bí nīn jīǹ-ŋi a-tiŋkin.

⁷Jeerusaleem nì kunimbɔtidii máaǹ kí nīn bí dibatɔlin. Tijanjawan tin a mɔ́ɔ́yee nì ntimu mun a máń agun ki tú ki kóòyee, sii di yì.

⁸Dipɔndi din a cáá kí pà bí dūú kɔ́ǹ ubɔti nimbidakaaunee, nì dipɔndi din a bàà dāa cáá kí pà boonee, a nyáń apɔɔn gbanti kɔkɔn díǹ kí nīn pée cáa cá jaanjaan.

⁹M yaa fātìi fōō m-beelee, m làá dāá tīī sii nì a-timbundi nì kunimbɔtidii kun bí Jeerusaleemee tinyool. Niinee kitiŋ pu nib kɔkɔ làá dāá ká a-kpaanti.»

¹⁰Abin 174 poon ní Antiyookuusi bāań u-naanjab tiŋkin. Ajanjakiti kɔkɔ nìn yú u-boon, ní bijanjaliibi bin nìn kíǹ Triifɔn ceeyee kaa nìn gíti náaǹ.

¹¹Antiyookuusi nìn kùl̄ ki páaǹ Triifɔn boon ní úǹ sáǹ ki tin kɔ́ Doora tiŋkin dimɔɔgbandi.

¹²U nìn ká yii nnaabu jéetì u-pu ní u-janjakitiŋ dū-u ki fá.

¹³Antiyookuusi nìn gāā u-janjanaapaal Doora tiŋki nyɔkɔpu. U nìn cáá bijanjaliibi kutukub dilaataal nì mmuŋku bin còom̄ ataa puee, nì bitanjakaliibi kutukub binii.

¹⁴U nìn māntìi tú kitiŋee, ní bijanjaliibi bin kā meelabinee bí dimɔɔl pu ki jáà nì kì. U nìn pīiǹ bin bí kitiŋee pu baa ti ŋūǹ kí dī kitiŋ àá dimɔɔl pu kí nyāaa, kaa ŋūǹ kí kɔ́.

¹⁵Ŋyunti ŋun Numeeniyusi nì u-yab nyánní Room ki fātìńee, u nìn ŋúbiń kugbɔŋu kí tīī ntimu tikpil bɔtiibi. Tin bi ŋmàn̄ kugbɔŋu gbantinee sèé:

¹⁶«Man Lusiyusi, Room yab bɔsoonliu, m jáaḿ ubɔti Pitooleemee.

¹⁷Usaraaŋakpil Siimɔn nì Juuda nibul nín lēē binib bin ki túnnée bāań ti-cee nì kubɔɔtiiu pèéŋu ní. Bi dɔ́miń kí pɔ̀ntī kubɔɔtiiu pèéŋu ŋun bí ti-kansikinee ti nì bi ń ŋá ubaanti.

¹⁸Bi nìn cáań sindaariya gbampɔɔl din nyiŋfiŋu sá animbil kiiloobi alaataa aŋmooyee ní.

¹⁹An pu ní ti ká yii an ŋān̄ tí ŋmà kugbɔŋu kí tīī ntimu tikpil bɔtiibi kí tùkù-bi yii bí taa ŋá Juuda yab tikpitil tibaaa, kí taa jáǹ-bi bi-timmun nì bi-tiŋkin, ní kí taa kūtì bin bíi jáà nì bee pu kí ŋá mpèé.

²⁰Ti lēē mun yii ti làá fōō sindaariya gbampɔɔl din bi pú-tee.

²¹Míǹ puee binikpitib yaa sáǹ bi-tiŋkin ki dɔ́miń ki kɔ́-nee, ní dū-bi kí ŋá usaraaŋakpil Siimɔn ŋaan ú dáaĺ bi-tafal kii bi-marau nín bālifì puee.»

²²Ubɔsoonli Lusiyusi nìn ŋmàn̄ kugbɔŋu gbanti kubaantiiu ki tīī bibɔtiibi Deemeetriyusi nì Atalee nì Ariyarati nì Arisaasi,

²³nì ntimu mun bí nee kɔkɔ: Samsamee nì Sipaarta nì Deeloosi nì Miindoosi nì Siisiyooni nì Kaarii nì Samoosi nì Paŋfilii nì Liisii nì Alkaarnaasi nì Roodeesi nì Faseelii nì Koosi nì Siidee nì Arfaadi nì Gɔɔrtiini nì Siniidi nì Siipiri nì Siireen.

²⁴U nìn tīī usaraaŋakpil Siimɔn kugbɔŋu gbanti kubaantiiu.

²⁵Ubɔti Antiyookuusi nìn gbíntìi bíi jáà nì Doori tiŋki. U nìn tūǹ bijanjaliibi bi cá ki jáà nì kì kaa gbèentí, ní ki nìn mɔ́ɔ́ tijáti masiimbi. U nìn pīiǹ Triifɔn saŋyi kitiŋ nì dimɔɔl pu, ní ubɔ kaa nìn ŋūǹ kí kɔ́ɔɔ, kí nyā.

²⁶Siimɔn nìn tú u-janjamɔntiibi binib kutukub bili bí cùú kūtì ubɔti pu bí já kujaau. U nìn tú bi tīī-u animbil nì sindaariya nì tijanjawan tikpil.

²⁷Ama Antiyookuusi nìn yíì kaa fōō u-tutundi gbanti. Kí kūtèe, u nìn kpītì u nì Siimɔn nín nìn sòon̄ ki gbìlīǹ tɔb ki ŋá ipèé iŋyee kɔkɔ, ní ki kpántì u-bimbim Siimɔn jandi pú.

²⁸U nìn dū <Ubɔti bɔɔbi> ubɔ, Ateenoobiyusi ki tú ú tùkù-u yii: «Kɔŋkɔnnee, a jáń ki fōō Joopee nì Geeseer timmu nì Jeerusaleem tiŋki pɔ̀ti pu laakin bi máń digundi ki māntìi túee. Man beel timmu dee.

²⁹Ni yāntì ntimu gbanti kpántì kuteeu. Ni kɔ́ǹ ntimu gbanti agìń, ní ki fōō m-beel timmu tikpil ki gāā ni-bindi.

³⁰Kɔŋkɔnnee, ni máaǹ kí gíiǹ ntimu mun ni nìn fōōyee kí tīī-mi. Ni máaǹ kí pà ntimu mun ni fōō muaa bí Juudee tiŋkinee pu lampoobi.

³¹Ní pà animbil kiiloobi kutukub saalaa nì bita ntimuee pu, kí gíti pà kunimbiŋmiiu kubaantiiu ni nín bíil̀ ntimuee poon tiŋyee, nì patantib bin ni máaǹ kí pà ntimu gbanti puee. Ni yaa yíì kaa pàn̄ee, ti làá dāan̄ ní kí jáǹ-ni.»

³²Ateenoobiyusi <Ubɔti bɔɔyee> dūu bàn̄ Jeerusaleem. U ká Siimɔn gaajati, sindaariya nì animbil sambiliŋ ŋin tɔ́kɔ́ teebilib pu nì ajamɔnti. An nìn ŋá-u bitii. Míǹ boonee ní u dū tin pu ubɔti Antiyookuusi túnní-uee ki tùkū Siimɔn.

³³Ní Siimɔn kíí-u yii: «Timbi kaa pée jáń ki fōō kitincaŋ kiba, kaa tí jáń ki fōō biba gaajawanti. Ti-naanjab timmu mun ti nìn fōō difakalee ní ti fātìi fōō. Ti-nannanliibi di nìn jíń ntimu gbanti dulim iyunti iba poon.

³⁴Ŋyuntimɔnti bāań-ti ní ti fātìi fōō ti-naanjab fakal.

³⁵A bí yii tí gíiǹ Joopee nì Geeseer timmu kí tīī-si. Ama ntimu gbanti nib ŋá ti-nibul nì ti-tiŋki tikpitil tikpil. Nì míǹ kɔkɔee, ti làá tīī-si animbil kiiloobi kutukub bili nì alaataa aluli ntimu gbanti pu.» Ateenoobiyusi kaa nìn gātì báà tiba.

³⁶U nìn fātìi nín gítí nì diŋuul ubɔti cee. U nìn tùkū-u Siimɔn nín kíí puee, ní ki máafì-u tigaajati tin kɔkɔ u ká Siimɔn ceeyee. Niinee Antiyookuusi fōō diŋuul ŋkpitim pu.

³⁷Triifɔn nìn yōoǹ meela ubɔ ki sáǹ ki nín cá Oortoosiya.

³⁸Ubɔti Antiyookuusi nìn dū Kandeebee ki kāaǹ ujanjakpikpaan ntimu mun bí dimɔɔgbandee pu. U nìn dū ajanjakiti ŋin còom̄ ataa puee nì bitanjakaliibi ki ŋúbiǹ-u.

³⁹U nìn tīī-u mara yii ú gāā u-janjanaapaal Juudee kpaanyɔkɔ. U máaǹ kí fàtīí mā Keedirɔn tiŋki, kí ŋāŋkì ki-punuubi án pɔ̄ɔkì, di sá yii niin ní bi làá kíĺ kí nīn jáà nì Juuda yab. Ubɔti úǹ u-ba nìn búntì kí jà Triifɔn boon.

⁴⁰Niinee Kandeebee nín cá Jamina ki bàn̄ ki kíĺ ki bíi tákà Juuda yab. U kɔ́ Juudee tiŋkin ki cúú binib ki tɔ́ sarka, ní ki kūū-bi.

⁴¹U nìn fātìi máń Keedirɔn tiŋki, ní ki dū bijanjaliibi bin còom̄ ataa puee nì bitanjakaliibi ki kāaǹ niin. Bi-tundi di sá bí nīn nyēē Juudee daŋŋi pu ki tákà Juuda yab, kii ubɔti nín tīī mara bí ŋá puee.