Read Ntcham 1 Maccabées 16 Bible Online

1 Maccabées 16 - Ntcham bible

1 Maccabées 16

¹Yoowaneesi nyáń Geeseer ní ki cūtìi tùkū u-baa Siimɔn tin Kandeebee bí ki ŋáańee.

²Niinee Siimɔn kpáfì u-jipɔmbi bin sá bikpilibee bili, Juudasi nì Yoowaneesi. U nìn bí-bi yii: «M-mambi nì man nì m-baa dicaŋkun yab jáń nì Isirayeel nannanliibi doooo ti-naacimpɔntin ki dāa sāā díǹ. Iyunti tikpilee, ti ŋúń ki jáń ki fīī Isirayeel.

³Kɔŋkɔnnee m púĺ, ama nimbee, Unimbɔti yāntì mpɔn dáá gbí ni-yakaŋin. An puee, ní fōōmaan man nì m-maan yil. Yīkìmaan kí cùú já ti-timbundi pu, ní Unimbɔti ń nīn bí ni-cee.»

⁴Yoowaneesi nìn lēē Isirayeel tiŋkin bijanjaliibi bin còom̄ ataa puee kutukub mmuŋku nì bitanjakaliibi. Bi nìn nín cá kí jáǹ Kandeebee ní ki gbíntì Moodiini tiŋkin.

⁵Ku wúntì kutaafaau pɔ̀lpɔlee ní bi nín sìntī dipaal pu. Dijanjakitil din poon ní bijanjaliibi bin còom̄ ataa puee nì bitanjakaliibi nìn bée còom̄ ki túŋkí-bi. Mbun ŋubɔ di nìn pītì ajanjakiti alee kansikin.

⁶Yoowaneesi nì u-janjaliibi nìn yúl̀ binannanliibi nimbiin pu. U nìn ká yii u-janjaliibi nìn fàŋkí kí dùtī mbun, niinee u péé ki dūtì. Bi nín ká mimmee, ní bi páaǹ u-boon ki mun dūtì.

⁷Yoowaneesi nìn cúú u-janjakitil ki yākatì akiti akiti. U nìn dū bitanjakaliibi ki yóoǹ bijanjaliibi bin còom̄ ataa puee kansikin, di sá yii binannanliibi tanjakaliibi nìn wīikí tikpil.

⁸U nìn búń dikantándi bí kíĺ kujaau ní ki jáń ki pɔ́ɔkiǹ Kandeebee nì u-janjakitil. Binannanliibi tikpil nìn kpíì, ní bin kíǹ kaa kpíìyee sáǹ ki kɔ́ Keedirɔn tiŋki kin bi máń digundi ki túee poon.

⁹Juudasi nìn fōō tiweendi kujaau poon, ama ní u-nabiki jìn̄ bin sáǹee boon áli ki tin bàn̄ Keedirɔn tiŋkin, kitiŋ kin Kandeebee nìn fātìi máńee.

¹⁰Biba nìn sáǹ ki kɔ́ sintil difɔkɔŋi ŋin bí tisatin ki pìlīǹ Asidoodi tiŋkee. Yoowaneesi nìn tūū kitiŋ gbanti ŋŋmi. Binannanliibi binib kutukub bili di nìn kpíì. Míǹ boonee ní Yoowaneesi nín gítí Juudee nì ŋgbansɔŋfi.

¹¹Abuboosi jipɔɔn Pitooleemee kpántì Gɔmina Jeeriikoo paal pu. U nìn cáá animbil nì sindaariya tikpil,

¹²di sá yii u nìn sá Siimɔn coo ní.

¹³Dilambil nìn kɔ́-u, ní u là kí fōō kitiŋ kí gāā u-bindi. U nìn là kí ŋá nciin kí kpɔ̀ Siimɔn nì u-jipɔmbi.

¹⁴Ŋyunti gbantee, Siimɔn nìn bíi yìiǹ ki màntī kitiŋ pu. Di sá yii u nìn là kí béé agìń ŋin bí ki-nib puee. Abin 177 poon, uŋmal saalaa nì upeekaa, an dàkà yii Seebati ŋmaliu poon ní u nín sìntī Jeeriikoo tiŋkin. U-jipɔmbi Maatatiyasi nì Juudasi nìn céeǹ-u.

¹⁵Abuboosi jipɔɔn nìn fōō-bi kitimbilii kin bi máń agun ki māntìi túee poon. Úǹ di nìn fātìi máń kitiŋ gbanti ní bi yíì-kì Dooki. U nìn ŋá-bi tican ŋkpaami, ama ní ki dū tin u dàkafī kí ŋée ki bál̀. U nìn dū bijanjaliibi ki bál̀.

¹⁶Ŋyunti ŋun Siimɔn nì u-jipɔmbi nyùn̄ ndaam tikpilee, ní Pitooleemee nì u-naacimbi yíkìi yōoǹ bi-janjawanti. Bi nìn páatìi jéetì Siimɔn pu, laakin bi kā ki jīǹee ki kūū Siimɔn nì u-jipɔmbi liitilee, nì u-tɔntɔnliibi biba mun.

¹⁷Pitooleemee ŋá ikpitikpaan ki dū tikpitil ki pàn̄ tiŋan.

¹⁸Míǹ boonee ní Pitooleemee ŋmàn̄ tin u ŋée ki tīī ubɔti Antiyookuusi. U nìn bālifì-u yii ú yàntī ajanjakiti ń dāá jòoń-bi án nín làá ŋá pu ú dū ntimu nì kitiŋee kí ŋá u-ŋaanee.

¹⁹U nìn dū binib biba ki tú Geeseer bí cùú kpɔ̀ Yoowaneesi. U nìn ŋmàn̄ kugbɔŋu ki tīī bijanjakpilib bí dāan̄ u-cee kí fōō animbil nì sindaariya nì tiwampɔkaal.

²⁰Pitooleemee nìn gíti tú bijanjaliibi biba mun bí cùú já kí fōō Jeerusaleem tiŋki nì kigbantaŋ kin pu kunimbɔtidii tɔ́kɔ́ee.

²¹Ama ní ubɔ sáǹ ki cūtì Geeseer ki tùkū Yoowaneesi yii bi kūū u-baa nì u-nabiyaamu. Udaan nìn kútì ki lī yii: «Pitooleemee tú binib bí dāá kpɔ̀ sii mun.»

²²Tibɔtee nìn bíil̀ u-pɔbil tikpil. U nín gbìl̄ yii bi là kí kpɔ̀-uee, ní u cúú bin dɔ́miń kí kpɔ̀-uee ki kūū.

²³Yoowaneesi tuuŋŋi ŋin u gíti túńee nì tijáti tin u jáńee, nì u-pɔ́ɔǹtam nì u nín fātìi máń agun ŋiŋyee nì atuun ŋin u gíti túńee,

²⁴ŋmàn̄ ki kā kugbɔŋu kubɔn. Kugbɔŋu gbanti poonee, bi sòon̄ u nín fōō u-baa yil ki kpántì usaraaŋakpil ki túń atuun ŋiŋyee.