Read Ntcham 1 Maccabées 2 Bible Online

1 Maccabées 2 - Ntcham bible

1 Maccabées 2

¹Usaraaŋakpil ubɔ nìn bí ki sá Yooyariib dicaŋkun, bi yíì u-baa Yoowaneesi ki yíì u-naanja Simeeyɔn. Ŋyunti gbantee, usaraaŋakpilee nìn nyáń Jeerusaleem ní ki cūtìi kóòń Moodiini tiŋkin.

²U nìn cáá jipɔmbi biŋmoo. Bíǹ di sá Yoowaneesi un bi páaǹ diyindi yii Gaadee,

³nì Simeeyɔn un bi páaǹ diyindi yii Taasee,

⁴nì Juudasi un bi gíti yíì yii Maakabeeyee,

⁵nì Eeleeyasaar un bi gíti yíì yii Awaraŋyee nì Joonatan un bi gíti yíì yii Afuusee.

⁶Maatatiyasi nín ká ntimbiil tuuŋŋi ŋin bi tūǹ Juuda nì Jeerusaleem timmunee

⁷ní u bí yii: «Ba busuu di ká-mi nan dee! Mimmee bi màl̄-mi ḿ ká bi nín làá nàan̄ m-nibul nì m-circir tiŋki puee níii? Bi màl̄-mi ḿ nīn kā ki kpàl̄ iŋal ŋyunti ŋun bi dū-kì ki líiǹ ki-nannanliibee níii? Kunimbɔtidii kɔ́ binicambi ŋaan.

⁸Ku kpántì kii unil un kaa ti cáá tinyoolee ní.

⁹Bi kpáaǹ tiwan tin nìn tìì-ku tinyoolee ki búntì, a lì kii tigaajawan tin bi cūtì kujaau ki jáń ki fōońee. Bi kūū ti-biyaamu imɔŋkijaa pu, ní unannanli dū ntàataajimu ki kūū ti-naacimpɔmbi.

¹⁰Anibul ŋin kíǹee, báà ŋma jíń kitiŋee gaajawanti difakal, bi kpáaǹ ki-gaajati ki búntì.

¹¹Bi yōoǹ tin kɔkɔ nìn yì ki-nyaaŋkuee. Dooooyee Jeerusaleem tiŋki nìn tɔ́ ki-ba ní, ama kɔŋkɔnnee kì kpántì uyumbu ní.

¹²Ti-circir kɔŋkooŋŋu nyaaŋku di nìn tìì-ti mmɔn, ama díǹ pu nee, ŋu kpántì kii kuteeuee ní. Bin kaa sá Juuda yabee kɔ́ǹ-ŋu tijɔkɔndi.

¹³Ba pu ní ḿ nīn gíti bí dimaŋfalin?»

¹⁴Kunimbaau poon ní Maatatiyasi nì u-jipɔmbi dáaĺ ki cátì tiwan tin bi pēēyee, ní ki dū kpɔsatab ki pēeǹ ní ki súń tikpil.

¹⁵Ubɔti Antiyookuusi naacimbi bin nìn páb̀ binib bí fá Mooyiisi marabee nìn dūu bāań Moodiini tiŋkin. Bi nìn là kí páb́ Isirayeel yab bí ŋá saraabi kí tīī Greeki yab waaŋi.

¹⁶Isirayeel yab tikpil nìn cūtìi ká-bi, ama ní Maatatiyasi nì u-jipɔmbi bíǹ nìn kākatì bi-ba ki kā dicilpu.

¹⁷Niinee ní ubɔti naacimbee bí Maatatiyasi yii: «A sá ukpil un bɔti páb́ ki cáá mpɔnee ní. A-jipɔmbi nì a-dicaŋkun yab yú a-boon.

¹⁸Nín̄ sá upeekaa kí dāá ŋá kii ubɔti nín yóoǹ mara puee. Atimbun ŋin kɔkɔ kíǹee nì Juuda timmun yab nì bin kíǹ Jeerusaleem tiŋkinee ŋá míǹ. A yaa ŋá míǹ, si nì a-jipɔmbi làá kpántí <Ubɔti bɔɔbi> ní. U làá tīī-ni animbil nì sindaariya nì tiwampɔkaal tikpil.»

¹⁹Ama ní Maatatiyasi kíí mpɔn yii: «Anibul ŋin kɔkɔ kíǹ ki bí ubɔti beel timmunee ŋūǹ kí nīn tɔ́ ubɔti nín lī puee kí dū bi-naanjab nimbɔtisaŋŋu kí fá. Bi ŋūǹ kí ŋá ubɔti nín yóoǹ mara puee.

²⁰Ama man nì m-jipɔmbi nì m-dicaŋkun yabee, ti làá nīn tɔ́ mpèé ŋun Unimbɔti ŋá nì ti-naanjabee ní.

²¹Unimbɔti laŋŋaŋfitiiku poonee, ú taa yàntī tí fá Mooyiisi marab nì u-bɔkpaaŋi!

²²Taa làá fàtīí tɔ̄ mara un ubɔti yóoǹee, kaa làá fàtī ti-boon kí tīī ti-nimbɔtinool báà an yaa yāntì ki sá puee.»

²³Maatatiyasi tin pée sòon̄ kí ŋmīĺee, Juuda yab ubɔ nyáń ki yúl̀ samaa nimbiin ki bàà là kí ŋá saraa Moodiini saraafaŋŋu pu, kii ubɔti nín síiǹ mara puee.

²⁴Maatatiyasi nín ká mimmee, ní an bíi wù-u pɔ̀lpɔl ní u-wunti kɔkɔ bíi jìkì. Niinee diŋuul din sá deedee ŋuulee cúú-u ní u sáǹ ki cūtìi lāntì uninjee nsaraafan pu niin.

²⁵Ŋyunti gbanti ní u kūū ubɔti tuuŋŋu ŋun cútí binib mpɔn bí ŋá saraabee, ní ki gbáń ki wīī nsaraafan.

²⁶U nìn dàkā difaŋgiil Mooyiisi marab pu kii Piinaasi nín nìn ŋá pu ki kūū Saaluu jipɔɔn Simrii puee ní[5].

²⁷Míǹ boonee ní Maatatiyasi yíkìi cōom̀ kitiŋin ki tátí yii: «Bin kɔkɔ cáá difaŋgiil Mooyiisi marab puee nì bin ŋúb́ Unimbɔti pèéŋuee ń páań m-boon!»

²⁸Ní úǹ u-ba nì u-jipɔmbi sáǹ ki búntì ajoonni ki yāntì tin kɔkɔ bi cááyee kitiŋin.

²⁹Niinee binib tikpil bin nìn là kí nīn tɔ́ Unimbɔti kí nīn nóó Mooyiisi marabee nín cá kuteeun ki kíǹ ki kóò niin.

³⁰Nnaabu ŋun nìn jéetì bi-puee puee, bi nìn kpáaǹ bi-biyaamu nì bi-nimpoobi nì bi-waŋkuti.

³¹Ubɔti janjakpilib nì u-janjaliibi bin nìn bí Jeerusaleem, Daafiidi tiŋkinee gbìl̄ an bɔti yii binib dū ubɔti nín yóoǹ mara uŋyee ki fá ki sáǹ ki cūtìi bál̀ kuteeun.

³²Ní bijanjaliibi kupaau kùl̄ ki bīiǹ bi-boon ní ki tin cúú-bi. Bi nìn gāā bi-janjanaapaal ki túĺ-bi, ki bɔ́ntì kí já nì bi ŋwiŋŋuŋfikaa dal.

³³Bijanjaliibee nìn bí Juuda yab yii: «An ŋmāntì kɔŋkɔnnee! Nyānímaan kí ŋá kii ubɔti nín bí yii ní ŋá puee kí fīī ni-maŋfal.»

³⁴Ní Juuda yab kíí yii: «Timbi kaa làá nyā ní kaa nín ŋá kii ubɔti nín bí yii tí ŋá puee. Taa làá yìntīǹ ŋwiŋŋuŋfikaa dal[6].»

³⁵Dicilpu niinee bijanjaliibee kíĺ ki bíi jáà nì bi.

³⁶Ama Juuda yab nìn yíì kaa mɔ́tì bi-ba pu. Baa nìn tɔ́ bi-nannanliibi ditaŋkpalaaa, kaa nìn pīiǹ laakin bi bál̀ee punyɔkɔki.

³⁷Bi nìn bí yii: «Tí kpúmaan nì dipɔbimɔntiil. Yilpu nì taapu sá biseeradambi yii ni kūū-ti digaŋgam kpɔ̀tam ní.»

³⁸Bijanjaliibee nìn jáń nì bi ŋwiŋŋuŋfikaa dal. Bi nì bi-nimpoobi nì bi-biyaamu nì bi-waŋkuti nìn kpíì. Binib kutuku nyɔkɔm ní bi nìn kūū.

³⁹Maatatiyasi nì u-bɔɔbi nín gbìl̄ an bɔtee, bi nìn súń tikpil.

⁴⁰Míǹ boonee ní bi lī tɔb cee yii: «Ti yaa ŋá kii ti-nabiyaamu nín ŋá puee kaa yíkì ki jáń nì anibul ŋin kíǹee kí fīī ti-maŋfal nì ti-yaajakoobiliŋee, bi làá kpɔ̀ kí céetí-ti kitiŋ nee pu an kaa làá sūŋkì.»

⁴¹Ŋwiin gbanti ní Maatatiyasi nì u-bɔɔbi lēē nlandɔkɔ nee yii: «Unil un kamaa di yaa dɔ́miń ki táká-ti ŋwiŋŋuŋfikaa dalee, ti làá jáǹ-u. Mimmee taa làá kpú kii ti-nabiyaamu mun kɔkɔ kpíì bi-balilaŋkinee nín kpíì puee.»

⁴²Niinee ní Asiidee yab dikitil diba dɔ́miń ki kútì bi-pu. An sá binib bin pu bi nyí yii bi cáá dipɔbil Isirayeel tiŋkinee, ní ki nìn bɔ́ntì kí mɔ̄tì Mooyiisi marab pu.

⁴³Kí kūtèe, bin kɔkɔ nìn là kí sāǹ kí ŋmátíí nyā agìń gbantinee nìn dòoń ki kútí bi-wíiŋŋu nì bi-pɔŋŋu pu.

⁴⁴Bi kpáfì dicilpuee ki dūu ŋá dijanjakitil. Bi-ŋuul poonee, bi nìn kù Juuda yab bin kaa tɔ́ Unimbɔti marabee. Bin nìn ŋmátí ki nyēē bi-ŋaanee nìn sáń ki cá anibul ŋin kíǹee cee kí fīī bi-ba.

⁴⁵Maatatiyasi nì u-bɔɔbi nìn yìin̄ ki cūtì an kɔkɔ pu ki kpéelikì awaa saraafaŋyi.

⁴⁶Bi yaa nìn ká Isirayeel tiŋkin kibininjabiki bí ní baa gíí-kì dikpancandee, bi nìn cútí-kì mpɔn ní kí gíí-kì.

⁴⁷Bi nìn kíĺ ki bíi jì bilambidambi gbanti, ní bi nìn lafun ŋúń ki ŋá míǹ sɔkɔmii.

⁴⁸Bi nìn fòol̄ Mooyiisi marab atimbun nì ŋi-bɔtiibi ŋaan. Baa nìn pūǹ ukpitiŋal nsan ú ŋá tiba.

⁴⁹Maatatiyasi kúm yuntiŋu nìn dūu bāań. U nìn yíiń u-jipɔmbi ní ki bí-bi yii: «Iyunti in poon ti bí nee, dilambil nì asiibil di jíń mpaan, an sá dinàandi nì tipɔmbɔti yuntiŋu ní.

⁵⁰Kɔŋkɔnnee m-jipɔmbi, an sá nimbi ní ń mɔ̄tì Mooyiisi marab pu nì difaŋgiil. Ní dū ni-maŋfal kí kúntíǹ mpèé ŋun Unimbɔti nìn ŋá nì ti-naanjabee pu.

⁵¹Téetímaan ti-naanjab nín nìn túń atuun ŋin bi-yuntiŋuee pu. Ni yaa ŋá míǹ, ni làá ká tinyool nì disíndi din làá nīn bí ki cá jaanjaanee.

⁵²Abraam[7] kaa nìn yúl̀ deedee nì Unimbɔti icɔŋki yuŋtiŋuɔɔɔ? An pu ní Unimbɔti ká yii u sá deedeedaan.

⁵³Míǹ mbaantiim Jooseefi[8] nín nìn kɔ́ dinimbinaamandinee, u nìn nóó Unimbɔti marab ní ki dāa kpántì Eejipiti tiŋki kpiliu.

⁵⁴Piinaasi[9] ti-naanja nìn dàkā tininjati tikpil, an pu ní Unimbɔti nìn pōoǹ-u yii u-maaliŋun yab di làá nīn pée sá bisaraaŋaliibi kí nīn cáa cá jaanjaan.

⁵⁵Joosuwa[10] nín nìn túń u-tundi tiŋan puee nìn yāntì u kpántì ubɔsoonli ki kpōotì Isirayeel yab.

⁵⁶Kaleeb[11] nìn fōō kitiŋ difakal, kun puee u nìn lēē seeramɔnti Isirayeel nibul nimbiin.

⁵⁷Daafiidi[12] nìn yúl̀ nì Unimbɔti deedee. An pu ní u fōō dibeejal kí nīn cá talku.

⁵⁸Eelii[13] nìn dàkā Unimbɔti marab pu difaŋgiil. An pu ní an yōoǹ-u ki jɔ́ntiǹ yilpu.

⁵⁹Ananiyasi nì Asariyasi nì Miikayeel[14] nìn máká Unimbɔti pu. An puee an nìn fīī-bi ki nyántì ŋŋmikpaan poon.

⁶⁰Daniyeel[15] nìn sá unil un bí deedeeyee ní. An puee Unimbɔti nìn fīī-u ki nyántì gbikintib nyɔmmun.

⁶¹An puee ní gbìl̄ tiŋan yii ŋyunti kamaa nib bin kɔkɔ máká Unimbɔti puee kāntí mpɔn kí ŋmā kí yūĺ ní.

⁶²Ní taa fàŋkì unikpiti nee. Di sá yii u-nyooti làá kpántí tisuundi ní akoosibil ń ŋmɔ́-u.

⁶³Bi yòontí-u yilpu díǹ, ama fool u làá fu wāŋkì. U làá kpántí ntam, ní u nín màkā kí ŋá tiŋyee ń tɔ̄ nnyimin.

⁶⁴M-jipɔmbi, ní dàkàmaan tininjati kí nīn ŋúb́maan marab an nīn pɔ̄ɔ̄, kun puee bíǹ di làá cáań-ni tinyool.

⁶⁵Kpèèmaan Simeeyɔn ni-nabiki, m nyí u nín sá usaŋkimɔntee. Ní nīn pílifíǹ-u baabadal, ní ú nīn sá-ni ubaati.

⁶⁶Juudasi Maakabee úǹ dàkā tininjati doooo u-naacimpɔntin ní. Úǹ di làá nīn sá ni-janjakpiliu, kí nīn līī ni-nyɔkɔpu ní já nì anibul ŋin sá ni-nannanliibee.

⁶⁷Ní kóoǹ bin kɔkɔ ŋúb́ Maree kí kpāfì ni-cee kí tɔ̀maan ni-nibul pɔntooŋyi.

⁶⁸Ní téeǹ anibul ŋin kíǹee ikpiti in bi ŋá-nee, ní kí nīn tɔ́maan Maree bɔkpaaŋi.»

⁶⁹Míǹ boonee ní Maatatiyasi mēē ki bīiǹ u-jipɔmbi pu, ní ki kpíì ki cūtìi ŋàl̄ u-naanjab.

⁷⁰U nìn cáá abin dilaataal nì imuŋku ili nì abin aluu ní ki nín kpíì, ní u-jipɔmbi dū-u ki bíl̀ u-naanjab kaakulin Moodiini tiŋkin. Isirayeel yab kɔkɔ nìn ŋá u-kpool ŋkpaami.