Read Ntcham 1 Maccabées 3 Bible Online

1 Maccabées 3 - Ntcham bible

1 Maccabées 3

¹Juudasi un bi gíti yíì Maakabeeyee fōō u-baa yil ki kpántì ukpil.

²U-nabiyaamu kɔkɔ nì bin kɔkɔ nìn bí u-baa jandi púee nìn yúl̀ u-boon ki tíkí-u. An nìn mɔ̄ǹ-bi bí já Isirayeel pu.

³Juudasi nìn kútì u-nibul nyooti. U yaa nìn dū u-janjawanti ki pēeǹ ki dū tikúti gbampɔɔl ki páaǹ u-bindi puee, u nìn náań nì kujawɔkɔu ní. U nìn gbìǹ u-gbajau ní kí kíĺ ki bíi jáà. Nì u-tàataajiki ní u nìn cáa wúǹ u-janjaliibi pu.

⁴U-jaaku poonee, u nìn náań nì gbikinti ní, a lì kii digbikintipɔmbil di tɔ́ kí cúú upeelee.

⁵U nìn nyàab̀ bin kaa yú deedee nì Maree ki jì-bi. U nìn cáá bin páb̀ u-nibulee ki tòó ŋŋmin.

⁶U nìn kɔ̄ntí binikpitib dinyoondi, ní bin nìn jáà nì Maree nìn fàŋkí. Juudasi nìn ŋúń ki fīī u-nibul ki líì.

⁷U nìn yāntì bibɔtiibi tikpil kɔ́ agìńni, ama ní u-tuuŋŋi nìn tìì Isirayeel yab dipɔɔpindi. Binib làá nīn pée téetí u-pu ní ki gà ilan ki pàkà-u baabadal.

⁸U nìn yìin̄ Juuda yab timmun ki kūū ki céetì binikpitib, ní ki nyántì Isirayeel yab Unimbɔti ŋuulin.

⁹U-yindi gbītì ki tin bàn̄ kitiŋ gbeennyɔkɔ. U nìn kóoǹ bin bi nìn là kí kpɔ̀ee ki kpáfì.

¹⁰Apoolooniyuusi nìn kóoǹ bijanjaliibi bin kaa sá Juuda yabee nì Samaarii janjakitiŋ ki kpáfì kí jáǹ Isirayeel yab.

¹¹Juudasi nìn gbìl̄ míǹ ní ki yíkìi túŋkì-u. U nìn jáń ki pɔ́ɔkiǹ Apoolooniyuusi ní ki kūū-u. Binannanliibi tikpil nìn fōō tiweendi ki kpíì ní bin kíǹee sáǹ.

¹²Juuda yab nìn fúkúl̀-bi, ní Juudasi nìn yōoǹ Apoolooniyuusi tàataajiki. Kíǹ ní u nìn kíǹ ki cáa jáà áli u-kúm dal.

¹³Siirii yab janjakpiliu Seerɔn gbìl̄ yii Juudasi kóoǹ bin fàŋkí Unimbɔtee dikitil nì bijanjaliibi ki kpáfì u-cee.

¹⁴Ní u lī u-ban yii: «M làá nyā diyindi ní bí nīn tìì-mi tinyool dibeel nee poon. M làá cùú jáǹ Juudasi nì u-yab bin kaa fātìi tɔ́ ubɔti marauee.»

¹⁵Niinee ní u yōoǹ bijanjaliibi kupaau ki nín cá. An nìn sá Unimbɔti nannanliibi bin nìn là kí tɔ̀ Isirayeel yab ipɔntoonee ní.

¹⁶Seerɔn nín tóob́ Beeti-Oorɔn gbantaŋkee ní Juudasi yōoǹ bijanjaliibi ŋwaam pu yéè ki túŋkì-u nsanni.

¹⁷Bi nín ká bijanjaliibi dàbìń ki túŋkiń-bee, ní bi bí Juudasi yii: «Taa náaǹ báà fiii. Mana ní ti làá ŋmā kí jáǹ dijanjakitil din pɔ̄ɔ̄ nee? Kí wàatī muee, taa cáá mpɔn, di sá yii taa jíń tiba díǹ.»

¹⁸Ní Juudasi kíí yii: «Kinikitiwaai ŋūǹ kí já kí pɔ̄ɔkiǹ dinikitikpaandi din pɔ̄ɔ̄yee sɔkɔmii ní. Unimbɔti ceeyee, an kaa sá binib wíiŋŋu ní u kpèé kí dūú fīī binib. Bi ŋūǹ kí nīn wīikí ki tí ŋūǹ kí taa nīn wīikí.

¹⁹Kujaaunee, dijajil kaa nyēeń bijanjaliibi wíiŋŋu pu. Ama Unimbɔti cee ní mpɔn nyēeń.

²⁰Ti-nannanliibi dòoń kí jáǹ-ti nì dibayoondi nì inikpiti ní. Bi là kí kpɔ̀ ti nì ti-nimpoobi nì ti-biyaamu kí yòon̄ ti-gaajawanti ní.

²¹Ama timbi ti-ba nì marab bin Unimbɔti tīī-tee pu ní ti jáà.

²²Unimbɔti làá nà ti-nannanliibi kunaau ti-nimbiin. Taa fàŋkìmaan-bi.»

²³Juudasi sòon̄ míǹ ki dóòyee, ní ki dūu gùl̄ Seerɔn nì u-janjaliibi pu kujaau, ní ki nàn̄-bi kunaau.

²⁴Juudasi nì u-yab kùl̄ ki páaǹ bi-boon ki tin sīntì Beeti-Oorɔn áli ki tin bàn̄ ditantakalin. Bi nìn kūū binib alaataa anii, ní bin kíǹee sáǹ ki nín cá Fiiliistii yab tiŋkin.

²⁵Binib nìn kíĺ ki kíǹ ki fàŋkí Juudasi nì u-naalib. Dinyoondi nìn kɔ́ atimbun ŋin māntìi tú-bee.

²⁶Juudasi nìn nyáń diyindi áli an tin bàn̄ ubɔti Antiyookuusi, ní anibul ŋin kíǹee kɔkɔ sòoǹ u-jajiliŋ pu.

²⁷Ubɔti Antiyookuusi nín gbìl̄ tin bi sòon̄ee, ní u fōō diŋuul tikpil. U nìn tīī mara yii bí kpāfì bijanjaliibi bin kɔkɔ bí u-beelinee. Bi nìn dūu ŋá dijanjakitikpaandi din pɔ̄ɔ̄yee ní.

²⁸U nìn lēē u-nimbidakaaun dibindi diba paati nimbiliŋ ki yākatì u-janjaliibi. U nìn kpáafì-bi bí bɔ́ntí kí nīn cí tin yaa pée bāańee pu.

²⁹Ama boonee u dāa dáań ki ká yii animbil dóò u-dakaaun. Lampoo nimbiliŋ ŋin bi nìn fōō kitiŋgbaŋ gbantinee kaa nìn bí tiban. Di sá yii ubɔti nìn cáań fìkil fikil nì nnaabu ki tɔ́ kitiŋee pu ki kúntì ayaajakoobil ŋin nìn pée bí kitiŋee pu doooo abin abinee.

³⁰Antiyookuusi nìn jīǹ animbil tikpil ki nìn pūǹ binib nì tiniti ki jítiǹ bibɔtiibi bin līntiǹ-uee. U nìn fāŋkì kí taa ti ká ŋŋmam kí ŋá míǹ.

³¹An bɔtee nìn cáań-u ilandɔkɔ ní u lēē kí cù Peersi tiŋgbammu mun bí niinee kí fōō lampoo kí ŋmā kí báá animbil tikpil.

³²Liisiyasi nìn sá dikpambal ní ki nìn sá ubɔti cindin niliu ubɔ. Antiyookuusi nìn lēē-u ú nīn kpèé dibeel bɔti kí yòon̄ Eefiraati mɔɔl kí tin cáá sāā Eejipiti kpaanyɔkɔ.

³³U nìn dū u-jipɔɔn Antiyookuusi ki ŋúbiǹ-u ú nīn dàkà-u kí nīn cí u-gítintam.

³⁴U nìn dū u-janjakitil dijandi nì kujaau kuntib ki tīī-u. U nìn tùkū-u u nín máaǹ kí ŋá tin kɔkɔ u dàkā-uee puee, cilinjee Juuda yab nì Jeerusaleem yab pu.

³⁵Liisiyasi máaǹ kí dū dijanjakitil kí tɔ̄ bi-pu dí nàan̄ Isirayeel yab pɔŋŋu, kí kúntí kun kíǹ fiii ki bí Jeerusaleemee, ní kí kpɔ̀ kí céetí binib bin kóò niinee bí taa ti téetí bi-pu.

³⁶U yaa ŋá míǹ ki dóòyee ní ú cáań binicambi kí kàan̄ bi-timmu kɔkɔn kí dū bi-kpaatanti kí yàkatī.

³⁷Ubɔti Antiyookuusi nìn yōoǹ dijanjakitil dijandi din kíǹee ki búntì Antiyɔɔsi, u-beel tiŋyil abin dilaataal nì imuŋku ili nì aluli poon. U dūtì Eefiraati mɔɔl ní ki dūu dī Yilpu pú tiŋkin.

³⁸Liisiyasi nìn lēē «Ubɔti bɔɔbi» kansikin bin sá biniŋmambee bita. Bíǹ di sá Doormeeni jipɔɔn Pitooleemee nì Niikanɔɔr nì Gɔɔrgiyasi.

³⁹U nìn dū bijanjaliibi bin còom̄ ataa puee kutukub imuŋku ili nì bitanjakaliibi kutukub biluli ki ŋúbiǹ-bi, ní ki dū-bi ki tú Juuda yab tiŋkin bí kúntí-kì kii ubɔti nín tīī mara puee.

⁴⁰Bikpilib bitee yōoǹ bi-janjakitiŋi kɔkɔ ki búntì. Bi tóob́ Eemaayusi tiŋkee ní ki gāā bi-janjanaapaal dipaal pu niin.

⁴¹Bibantiliibi bin bí kitiŋ gbantinee nín gbìl̄ an bɔtee ní bi yōoǹní sindaariya nì animbil tikpil nì ikusaka ki nín cá dijanjanaapaal pu kí dā Isirayeel yab. Idumee janjaliibi nì Fiiliistii yab nìn dɔ́miń ki kútì binannanliibi janjaliibi pu.

⁴²Juudasi nì u-yab nìn ká yii tibɔti nìn bíi pɔ́ɔkí. Di sá yii binannanliibi janjaliibi dɔ́miń ki gāā bi-janjanaapaal Isirayeel tiŋki pu. Bi nìn gíti gbìl̄ mun yii ubɔti Antiyookuusi tīī mara yii bí kúntí bi-nibul kɔkɔ múb.

⁴³Ní bi bíi lì bi-ŋmaniŋma kansikin yii: «Tí pìin̄-bi nsan bí taa ŋmā kí kúntí ti-nibul kɔkɔ míǹ. Tí já ti-nibul nì ti-nimbɔtidiiku pu.»

⁴⁴Niinee ní bi yíiń samaa kɔkɔ ki kpáfì bí bɔ́ntí dikɔ̀ndi, kí mèè kí bàlifì Unimbɔti ú sɔ̄ bi-saai kí dàkà-bi u-saasɔl nì u-laŋŋaŋfitiiku.

⁴⁵Jeerusaleem dɔ̄ fám kii kuteeuee. Bin kóò ki-nee ubɔ kaa kóòyaaa, ubɔ kaa nyēē. Binib còom̄ kunimbɔtidiin lìbiti libiti kaa fātìi tɔ́. Binicambi di kíǹ ki kóò kitiŋ pɔ̀ti pu, ní an dūu kpántì bin kaa sá Juuda yabee kɔŋkooŋŋu. Dipɔɔpindi kúntì Isirayeel nibul kansikin, awul nì tibati ŋmíl̀.

⁴⁶Juuda yab nìn kóoǹ ki kpáfì ki nín cá Miisipa, an bí Jeerusaleem nyɔkɔpu pú. Njaminee ŋwimmeem paaŋŋu ŋubɔ nìn bí niin.

⁴⁷Yaadalee, bi nìn bóob́ kinyɔkɔ ní ki dū ŋfantam ki pùkū bi-yiliŋ, ní ki cátì bi-wampeeŋkaati ní ki dū kpɔsatab ki pēeǹ.

⁴⁸Bi nìn kpátì kugbɔŋu kun poon marab kēe kí kàaǹ. Bíǹ kaa ŋáań kii bin kaa sá Juuda yabee nín ŋáań pu ki bàlifī bi-waaŋi ŋin sá akumpooyee.

⁴⁹Bi nìn cáań asaraaŋabɔkuti nì tijincɔ̀fikaal nì tikpaajin saalaatiiti. Bi nìn kóoǹ bin nìn pōoǹ ipoon ki dū bi-ba ki sú ti-Dindaan bi-yuntiŋu sāāyee ki kpáfì.

⁵⁰Bi nìn mēē ti-Dindaan mpɔn yii : «Ti làá nín ŋá binib nee mana dee? La ní ti làá nín cáá-bi kí cùnnì dee?

⁵¹A-circir diiku kɔ́ tijɔkɔndi, di sá yii binib kpēē-ku fám. A-saraaŋakpiliu bí kunimbaau nì icoo poon.

⁵²Bin kaa sá Juuda yabee kóoǹ ki kpáfì kí kúntí-ti. Sii a-ba nyí tin bi bíi dàkafī kí ŋá-tee.

⁵³Mana ní ti làá ŋmā kí yūĺ bi-nimbiin kí jáǹ-bi sii a-ba yaa kaa dɔ́miń ki tútuǹ-ti?»

⁵⁴Bi mēē míǹ ki dóòyee ní ki búń akantán ki kúuǹ mpɔn.

⁵⁵Míǹ boonee ní Juudasi lēē bijanjakpilib. Biba nìn sá binib kutuku kutuku kpilib, ní biba sá binib dilaataal dilaataal kpilib, ní biba mun sá binib ili nì saalaa saalaa kpilib ní bin kíǹ sá binib saalaa saalaa kpilib[16].

⁵⁶Kí nóó mara nín bālifì puee[17], u nìn yāntì bin kɔkɔ bíi māā adiinee nì bin dáá cáá binimpoobee nì bin dáá cóoǹ fiinyi sufiiyee nì bin muliŋ kaa bōotí mmɔ́ɔn nín kùǹ.

⁵⁷Niinee Isirayeel yab janjakitil yíkìi nín cá ki bàn̄ ki gāā bi-janjanaapaal Eemaayusi tiŋki ŋgiil pú.

⁵⁸Juudasi nìn bí-bi yii: «Bɔ́ntímaan ni-janjawanti kí nīn cáámaan dipɔbil. Ní bɔ́ntí kí já nì binib nee. Bi kóoǹ ki kpáfì kí já nì ti kí kúntí-ti ní kí nàan̄ ti-Nimbɔtidiiku.

⁵⁹An sɔ́ tí kpú kujaaun ki jítiǹ tí nīn bí kí ká ti-nibul nì ti-Nimbɔtidiiku nimɔɔŋyi.

⁶⁰Unimbɔti nín là miŋyee, míǹ ní u làá ŋá.»