Read Ntcham 1 Maccabées 6 Bible Online

1 Maccabées 6 - Ntcham bible

1 Maccabées 6

¹Ubɔti Antiyookuusi nìn bíi yìiǹ ntimu mun bí yilpu púee ni. Ŋyunti gbanti ní u gbìl̄ yii kitiŋ kiba nìn bí Peersi, bi yíì-kì Eelmaayiisi. Kì nìn nyáń diyindi ki-gaajati nì ki-nimbiliŋ nì ki-sindaariyau pu.

²Tigaajawan nìn gbí ki-waadiikun. Tijanjawan tin sá sindaariyee nì agbampɔɔ nì tijanjawan tiba mun nìn bí. Fiiliipi jipɔɔn Aleekisandir un nìn sá Maseeduwaan bɔtiu upeepeekaa ki jíń Greeki yab pu dibeelee di nìn dū tiwan gbanti kɔkɔ ki síiǹ niin.

³Antiyookuusi nìn cūtì Eelmaayiisi ki nyàab̀ kí já kí fōō kitiŋee kí ŋmā kí fūkul̀-kì. Ama waa nìn ŋúń, kun puee kitiŋee yab nìn gíti dáá béè tin u bíi bɔ́ntée pu.

⁴Bi nìn yōoǹ tijanjawan ki jáń nì u ní ki yāntì u dāa sáǹ. Nì icookpaan gbòooo ní u nín gítí Babiloon.

⁵Antiyookuusi dáá bí Peersi tiŋkin ní ntuun ŋubɔ dɔ́miń ki tùkū-u yii bi jáń ki pɔ́ɔkiǹ dijanjakitil din u tú Juudee tiŋkinee.

⁶Liisiyasi nìn yōoǹ dijanjakitikpaandi ní ki cūnnì niin. Ama Juuda yab nìn jáń ki pɔ́ɔkiǹ-bi ní bi sáǹ. Di sá yii Juuda yab nìn jáń ki pɔ́ɔkiǹ ubɔti janjakitiŋ ki fōō bi-janjawanti nì kujaau masiimbi nì tigaajawan tikpil. An nìn tīī Juuda yab janjakitil mpɔn.

⁷Áli gba bi gbáń ki wīī ntimbiil wanti tin ubɔti nìn yāntì bi máń nsaraafan pu circir kɔŋkooŋŋun Jeerusaleem tiŋkinee. Bi nìn máń agun ŋin fɔ̀kɔ̀ee ki māntìi tú kunimbɔtidii kii dooooyee nì Beeti-Suur, ubɔti tiŋki.

⁸Ubɔti Antiyookuusi nín gbìl̄ an bɔtee ní an ŋá-u bitii ní u-pɔbil bíil̀. U nìn búŋkì dikáal ní ki tātìi dōoǹ u-lambaŋki pu. Waa nìn gíti nyí tin poon u bée, kun puee an kaa nìn cōom̀ kii u nín bàà nìn là puee.

⁹U nìn dōoǹ míǹ iwiin kupaau ní ki nìn mɔ̀tīi kóò kunimbaakpaaŋŋun. U nìn ká yii an kaa làá yúntí u làá kpú.

¹⁰Niinee ní u yíiń bin u nìn lēē ki yíì yii <Ubɔti bɔɔbee> ní ki bí-bi yii: «Maa ti ŋūǹ kí gèeǹ ní ilandɔkɔ nyīī-mi ki múĺ.

¹¹M bíi bàlifī m-ba yii ba pu ní agìń nee jéetì m-pu ní m kɔ́ kunimbaakpaaŋŋun míǹ? Di sá yii m nìn cáá mpɔn ní ki nìn ŋáań tiŋan ní binib nìn néeń-mi.

¹²Ama kɔŋkɔnnee, m bíi téetí tikpitil tin kɔkɔ m ŋá Jeerusaleem tiŋkinee pu. M yōoǹ sindaariya nì animbil sambiliŋ ŋin nìn bí kunimbɔtidiinee, ní ki tīī mara yii bí kpɔ̀ kí céetí Juudee yab fám baa ŋá tiba.

¹³M béè yii an sá míǹ pu ní nnaabu nee jéetì m-pu ní m làá kpú nì kunimbaau kinicantiŋin.»

¹⁴Ní u yíiń Fiiliipi <Ubɔti bɔɔbi> kansikin ubɔ ní ki dū-u ki kāaǹ u-beel kɔkɔ pu tibɔtiil.

¹⁵U nìn dū u-beefuuliiki nì dibeebɔkutil nì u-bɔmbiki kin pu u-daaŋku kēe ki tīī-u. U nìn bí-u yii ú kpèè u-jipɔɔn Antiyookuusi tiŋan, kí bɔ́ntí-u ú dāá kpántí ubɔti.

¹⁶Peersi tiŋkin niin ní ubɔti Antiyookuusi kpíì dibindi diba kpá iluli nì saalaa poon.

¹⁷Liisiyasi nín gbìl̄ ubɔti kúm puee ní u dū u-jipɔɔn Antiyookuusi un úǹ u-ba kpēē doooo tibiyatinee ki kāaǹ dibeel ní ki páaǹ-u diyindi yii Eepatɔɔr.

¹⁸Ŋyunti gbantee, binannanliibi nìn dáá kóò Jeerusaleem tiŋki pɔ̀ti pu laakin bi máń digundi ki túee. Bi nìn pìintí Isirayeel yab nsan bí taa còom̀ kí màntī kunimbɔtidii. Bi nìn nyàab̀ nsàmbiyaamu mun pu ní bi làá ŋá-bi tikpilee, ní ki yú bin kaa sá Juuda yabee boon.

¹⁹Juudasi nìn lēē kí kúntí-bi, ní ki kóoǹ samaa ki kpáfì bí màntīí tū-bi.

²⁰Isirayeel yab nìn kóoǹ ki kpáfì ní ki māntìi gíb́ kitiŋ pɔ̀ti pu abin 150 poon. Bi nìn mɔ́ɔ́ kujaau masiimbi kí jáǹ bi-nannanliibi kí wìil̀ agun.

²¹Ama bin nìn kóò kitiŋ pɔ̀ti puee biba nìn ŋúń ki sáǹ ki ŋmátì. Isirayeel yab bin kaa bí deedeeyee biba nìn kútì bi-pu,

²²ní bi nín cá ubɔti Antiyookuusi Eepatɔɔr cee. Bi nìn bí-u yii: «Kí cáá sāā ŋyunti ŋulɔŋu ní a làá kàl̄ kí cīití ní kí nín dáaĺ ti-nannanliibi tafal, kí tɔ̀ ti-samaau pɔntooŋyi ní?

²³Timbi nìn kíí ki túń ditundi ki tīī a-baa, ki tɔ́ u-bɔkpaaŋi ki dū u-marab ki túń ditundi.

²⁴An di yì-tì ní ti kpántì ti-nibul nannanliibi. Kí kūtèe, bi kūū ti-kansikin bin bi yaa nìn pée kée, ní ki fúkúl̀ ti-gaajawanti.

²⁵An kaa sá timbi baba ní bi jáń nì, ama ki kpáaǹ ntimu mun bí ki kɔ́ĺ-tee.

²⁶Ŋyunti nee poonee, bi māntìi tú Jeerusaleem tiŋki pɔ̀ti pu laakin bi máń digundi ki túee ki là kí já kí fōō. Bi máń digundi ki tú kunimbɔtidii nì Beeti-Suur tiŋki.

²⁷A yaa kaa yíkì ki kpīiǹ-bi kɔŋkɔnnee, bi làá gíti ŋá tikpitil tikpil, ní aa dāa gíti ŋūǹ kí gbèen̄-bi.»

²⁸Ubɔti nín gbìl̄ an bɔtee ní u fōō diŋuul. U nìn kóoǹ <Ubɔti bɔɔbi> nì u-janjakitil kpilib nì bitanjakaliibi kpootiliibi ki kpáfì.

²⁹Kí kūtèe, u nìn mēeń ajanjakiti ŋin nyánní abee ŋin kíǹee nì ntimu mun Meediiteeranee tiŋkuu māntìi túee poon.

³⁰U-janjakitil nìn cáá bijanjaliibi bin còom̄ ataa puee binib kutukub dilaataal nì bitanjakaliibi kutukub mmuŋku, nì kujaau kuntib mmuŋku nì saalaa nì bili.

³¹Ubɔti nì u-janjaliibi dūu bāań Idumee ní ki kíĺ ki bíi jáà nì Beeti-Suur tiŋki. Bi nìn dū iwiin tikpil ki jáń nì kitiŋee nì kujaau masiimbi. Ama Juuda yab nìn nyánní ki wùn̄ masiimbee ŋŋmi, ní ki jáń nì tininjati.

³²Niinee Juudasi yíkìń Jeerusaleem tiŋki pɔ̀ti pu ki dɔ́miń ki gāā u-janjanaapaal Beeti-Sakariya ki bíitiǹ ubɔti janjanaapaal.

³³Ku wúntì kutaafaau pɔ̀lpɔlee, ní ubɔti dū u-janjakitil ki tɔ́ Beeti-Sakariya saŋŋu pu. U-janjaliibi nìn tātìi gbāaǹ kí kíĺ dikɔ̀ndi ní bi búń ŋyin.

³⁴Bi nìn tīī kujaau kuntibee fiigi biliŋ nì muuri biliŋ ŋin bi ŋmáaḿee nyim bí nyɔ̀ án nyàatī-bi bí já kujaau.

³⁵Bi nìn dū-bi ki sákaǹ bijanjaliibi bin còom̄ ataayee kansikin ní. Kunti kamaa caŋinee, bijanjaliibi bin nìn dū agbampɔɔ ki pēeǹ ki cíkí tasa janjafuulimmuee kutuku ubɔ di nìn yú. Kí kūtèe, bitanjakaliibi bimɔntiibi alaataa aŋmoo di nìn nóó kunti kamaa.

³⁶Kunti yaa nìn pée ŋá puee, míǹ ní bi mun nìn ŋáań, ní ki nóó-u ki cá laakin u yaa pée dū u-ba ki bíl̀ee. Baa nìn kàkatī bi-ba kí wàatī-u kí cù ndan.

³⁷Bi nìn dū idɔ ní ki gāā kibiŋ ki tɔ́kɔǹ kunti kamaa boon, ní ki dū iŋmii ki cúú an pɔ̄ɔ̄ kíb. Bi nìn ŋá míǹ kí wúń bijanjaliibi bita bin nìn kā kunti pu ki jáàyee nì un nìn kpòotī-uee.

³⁸Ubɔti nìn dū bitanjakaliibi bin kíǹee ki yóoǹ dijanjakitil janliitiliŋ pu. Bi-tundi di nìn sá bí nīn jáà nì Juudasi janjakitiŋ kí nīn kpáàa wúń bijanjaliibi bin còom̄ ataayee pu.

³⁹Ŋwìiń nín nyáń sindaariya nì tasa kúti fuulimmu mun bi cíkée puee, ní ajoon pu fōō ki wál̀ bɔ́iii ní ki kíǹ ki jìliŋkī kii aŋminaapooyee.

⁴⁰Ubɔti janjaliibi tātìi gbāaǹ kí kíĺ kujaau. Biba nìn jɔ́m̀ ki tɔ́kɔ́ kigbantaŋ pu ní bin kíǹee bí ditantakalin. Bi-kɔkɔ nìn pée nóó mpɔn pu ní ki còom̄ ki cá nì dimákal.

⁴¹Bin kɔkɔ yaa nìn pée gbìl̄ bijanjaliibi dikitikpaandi gbanti bintindi nì bi nín còom̄ ki náaǹ puee nì tijanjawan nín fátí tɔb an ŋáań kuwoou kuŋyee wunti nìn gbáà ní kpàkpakpa. An nìn baasii sá dijanjakitikpaandi din pɔ̄ɔ̄yee ní.

⁴²Juudasi nì u-janjakitil nín cá ki tātìi gbāaǹ dikɔ̀ndi pu. Bi nìn kūū ubɔti janjaliibi binib alaataa aluu.

⁴³Eelasaar un bi gíti yíì yii Afaraŋyee nìn dáań ki ká kunti ubɔ. Úǹ nìn gbìfiǹ bin kɔkɔ kíǹee, ní ubɔti janjawanti nìn píń u-pu. Eelasaar nìn dākafì yii ubɔti kā kuntee pu ní.

⁴⁴Niinee ní u lēē u-ban yii u làá dū u-ba kí sú kí fīī u-nibul, ní kí nyā diyindi kí nīn cá jaanjaan.

⁴⁵Eelasaar nìn sáǹ nì tininjati ki cūtì bijanjaliibi bin nìn còom̄ ataayee kansikin, ní ki kù binib ŋgiil pú nì ŋgan pú, ní binannanliibi kàkatī bi-ba ki wàatī-u ajanliitil pu.

⁴⁶U ŋá soooo ki kɔ́ kunti taapu, ní ki sāā u-taapu pú ki kūū-u. Kuntee nìn lítì Eelasaar pu ní u kpíì niin niin.

⁴⁷Juuda yab nín ká ubɔti janjakitil pɔŋŋu nì tininjati tin bi cááyee, ní bi túlifì ki gítì bi-boon pú.

⁴⁸Ubɔti janjaliibi nín cá Jeerusaleem kí cùú já nì Juuda yab. Ubɔti nìn bɔ́ntì kí já nì Juudee tiŋki kɔkɔ nì Siiyɔn jool.

⁴⁹U nì Juuda yab bin bí Beeti-Suuree ŋá mpèé ki gbìlīǹ tɔb. Bíǹ nìn nyáń kitiŋee ni, di sá baa nìn gíti cáá tijin kí jī kí ŋmā kí tíkiń kujaau kí cù ndan. Di sá yii dibindi gbanti nìn sá dibindi din bi yàntī tikpaatan ń dòon̄ kí ŋùŋfèe ní[22].

⁵⁰Ubɔti nìn jáń ki fōō Beeti-Suur tiŋki, ní ki dū u-janjaliibi biba ki kāaǹ niin bí nīn kpèé-kì.

⁵¹U māntìi tú kunimbɔtidii an yúntì. U dū kujaau maasiimbi ki gbāaǹ kí jáǹ Juuda yab kí wīī agun. U nìn cáá maasiimbi bin tòó aŋminaapooyee nì bin tòó ataŋkpeeyee nì tikúti tɔfii kí nīn tòó ipiin nì tijaataafun.

⁵²Juuda yab mun nìn mɔ́ɔ́ bi-masiimbi kí dūú nàan̄ bi-nannanliibi yab. Bi nìn jáń ki yúntì.

⁵³Ama tijin kaa ti bí kunimbɔtidiin laakin bi kpáafí-tèe. Kun puee an nìn sá dibinluluútiil din poon baa kù tikpaal kí yàntī ntimu ń ŋùŋfèe ní. Kí kūtèe, Juuda yab bin nìn nyánní ntincamun ki dɔ́miń ki kɔ́ Juudeeyee dū tijin tin kíǹee ki jíń.

⁵⁴Ŋkùm puee, binib bin kíǹ ki bí kunimbɔtidiinee kaa ti náaǹ. Báà ŋma nìn túĺ u-laŋki ní.

⁵⁵Liisiyasi gbìl̄ yii ubɔti Antiyookuusi nìn lēē Fiiliipi ú dàkà u-jipɔɔn Antiyookuusi ú dāá jī dibeel.

⁵⁶U nìn tí gbìl̄ mun yii u nì ubɔti janjaliibi bin nìn bí u-ceeyee nín gítiń Peersi nì Meedii, ní ki nyàab̀ kí nīn kpòotī dibeel tuuŋŋi mun.

⁵⁷Liisiyasi nín gbìl̄ mimmee ní u bɔ́ntì malaa kí búntí. Niinee ní u bí ubɔti nì bijanjakpilib nì bijanjaliibi yii: «Ti-pɔŋŋu pée bàtī ní ki cá baabadal, ní taa ti cáá tijin mun náaǹ. Kitiŋ kin ti bíi jáà nì nee pɔ̄ɔ̄ tikpil ní dibeel mun tuuŋŋi dɔ̄ ki cí-ti.

⁵⁸Tí gbèen̄ kí taa ti já nì binib nee. Ti nì bi ń ŋá mpèé ní ti nì samaa kɔkɔ ń gbìlīǹ tɔb.

⁵⁹Tí pɔ̄-bi nsan bí nīn nóó bi-yaajakoobiliŋ kii dooooyee. Di sá yii bi yaa yíkì kaa kíí bi-ba pu ki bíi ŋáań tin bí nee kɔkɔee, an sá yii ti nín kúntì bi-yaajakoobiliŋee pu ní bi bíi ŋáań míǹ.»

⁶⁰Ubɔti nì abɔtibil nìn kíí ki tɔ́kɔǹ tibɔtee pu. Liisiyasi nìn lēē binib ki tú Juuda yab cee bí cù kí ŋá mpèé nì bi. Juuda yab nìn kíí bi nín lī puee.

⁶¹Ubɔti nì bikpilib pūtì yii bi làá nīn tɔ́ bi nín sòon̄ ki síiǹ puee. Niinee Juuda yab nyáń kitiŋ pɔ̀ti pu laakin bi máń digundi ki túee.

⁶²Ama ubɔti nín bāań Siiyɔn jool pu ki ká bi nín máń digundi ki wúń kitiŋee puee ní waa ti tɔ́ u nín pūtì puee. U nìn tīī mara bí gbá kí wīī agun ŋin māntìi tú kunimbɔtidiiyee.

⁶³Míǹ boonee ní u yíkì malaa ki nín gítí Antiyɔɔsi. U bàn̄ee ní ki ká yii Fiiliipi kpántì kitiŋee kpiliu. U nìn jáń nì u ní ki fōō Antiyɔɔsi mpɔn.