Read Ntcham 1 Maccabées 7 Bible Online

1 Maccabées 7 - Ntcham bible

1 Maccabées 7

¹Abin 151 poonee, ní Seeleewukusi jipɔɔn Deemeetriyusi sáǹ Room tiŋkin nì binib biba ki nín cá kitiŋ kiban. Kitiŋ gbanti nìn bí Meediiteeranee tiŋkuu gbandi ní. Niin ní u kāaǹ u-ba ubɔti.

²Ŋyunti ŋun u kíĺ nsan ki nín cá u-naanjab beecindin Antiyɔɔsee, ní bijanjaliibi cúú Antiyookuusi Eepatɔɔr nì Liisiyasi ki cáań u-cee.

³Deemeetriyusi nín gbìl̄ mimmee ní u bí yii: «Maa pée là kí wāl̀-bi.»

⁴Ní bijanjaliibi kūū-bi, ní Deemeetriyusi kāl̀ dibeejal pu.

⁵Isirayeel yab bin kɔkɔ kaa ŋúb́ Mooyiisi marabee dɔ́miń ki ká-u. Alkiim un nìn là kí kpántí usaraaŋakpilee di nìn līiń-bi nsan.

⁶Bi dɔ́miń ki bíi kúŋfí Juuda yab bin kíǹee boon yii: «Juudasi nì u-nabiyaamu kūū <Ubɔti bɔɔbi> kɔkɔ, ní ki jìn̄-ti ti-tiŋki pu.

⁷Tɔ̄ unil un pu a cáá dimákalee kɔŋkɔnnee ú cùú kpèè Juudasi gbanti nín bíil̀ tin kɔkɔ ti-dumpu nì ubɔti timmunee. Udaan ń dáaĺ Juudasi nì u-nabiyaamu nì bin tútúǹ-uee tafal.»

⁸Ubɔti Deemeetriyusi nìn lēē Bakideesi, <Ubɔti bɔɔbi> kansikin ubɔ nì Siiriikpaan gɔminau. U nìn sá unikpaan ní dibeel poon, ní ki nìn yú nì ubɔti deedee.

⁹Deemeetriyusi nìn tú u nì unikpiti Alkiimee. Ubɔti nìn yāntì u fātìi kpántì usaraaŋakpil, ní ki tīī-u mara yii ú téeǹ Isirayeel yab tikpitil tin bi ŋée.

¹⁰Bakideesi nì Alkiimee nìn yōoǹ dijanjakitikpaandi ní ki nín cá Juudee. Bi bàn̄ee ní ki tú binib Juudasi nì u-nabiyaamu cee ki mɔ́ntì-bi yii u là u nì bi ń ŋá mpèé.

¹¹Ama Juuda yab dáań ki ká yii bi dɔ́miń nì dijanjakitikpaandi ní. An puee baa fōō tin bi sòon̄ee ki kíí.

¹²Nì míǹ kɔkɔee bimaradakaliibi nín cá Alkiimee nì Bakideesi cee kí nyàab̀ kí kpèè bi nín làá ŋá puee.

¹³Isirayeel yab kansikinee, Asiidee yab di sá bipeepeekaabi ki ŋá mpèé nì bi.

¹⁴Di sá yii bi lī yii: «Alkiimee un nì ubɔti janjaliibi nóó ki dɔ́mińee sá Aarɔn dicaŋkun yɔu ní. Waa làá ŋmā kí ŋá-ti tikpitil.»

¹⁵Alkiimee nìn sòon̄ nì bi nì kinyɔɔmɔɔi ní ki pūtì ki lī yii: «Taa nyàab̀ kí ŋá ni nì ni-bɔɔbi tikpitil tiba.»

¹⁶Asidee yab nìn fōō ki kíí míǹ, nì míǹ kɔkɔee Alkiimee yāntì bi cúú bi-kansikin binib imuŋku ita ki kūū ŋwimbaanti. Circir Gbɔnti lī yii:

¹⁷«Bi dū a-circir nib wunti ki yàl̄ an kɔkɔ pu, ní ki dū bi-fatikuu ki yāaǹ Jeerusaleem tiŋki ki māntìi tú, ní ubɔ kpá kí síb́-bi.»

¹⁸Niinee tifaandi cúú samaa kɔkɔ ní bi-wunti kíǹ ki jìkì. Binib nìn bí ki lì yii: «Binib nee sá binikpɔliibi ní kaa bí deedee. Di sá yii bi nyáń mpèé ŋun bi ŋá nì tee nì bi nín pūtì puee boon.»

¹⁹Bakideesi yíkì Jeerusaleemee ní ki nín cá Beeti-Sayiiti tiŋkin ki cūtìi gāā u-janjanaapaal. U nìn cúú binib bin nìn bí u-jandi púee tikpil nì Juuda yab biba mun. U nìn yāntì bi kūū-bi ní ki cáá-bi ki tɔ́ lɔkɔkpaan ubɔn.

²⁰U nìn dū Alkiimee ki kāaǹ kitiŋgbaŋ gbanti pu gɔmina, ní ki yāntì bijanjaliibi biba u-cee bí tūtuǹ-u. U ŋá míǹ ki dóòyee ní ki nín gítí ubɔti cee.

²¹Alkiimee nìn pée ŋá tin kɔkɔ u ŋūǹee kí ŋmā kí kpántí usaraaŋakpil ní.

²²Bin cāabìń fikil fikil kitiŋ puee kɔkɔ nìn kpáfì u-cee. Bi nìn fōō Juudee tiŋki ní ki kɔ́ǹ Isirayeel yab digìŋ́kpaandin.

²³Juudasi ká yii Alkiimee nì u-bɔɔbi bíi ŋáań Isirayeel yab tikpitil ki jítiǹ bin kaa sá Juuda yabee.

²⁴Niinee ní Juudasi yìin̄ Juudee timmu kɔkɔn. U nìn dátí bin kɔkɔ nìn dū bi-ba ki nákáǹ Alkiimeeyee, ní ki pīiǹ-bi nsan bí taa ti còom̀ kitiŋee pu.

²⁵Alkiimee ká yii Juudasi nì u-naacimbi bíi pɔ́ɔkí, ní waa ti ŋūǹ kí já nì bi. Niinee ní u nín gítí ubɔti cee ki mɔ́ntì ki túǹ bi-pu yii bi bí ki tūǹ atuŋkpiti.

²⁶Niikanɔɔr sá ubɔti janjakpilib kansikin ubɔ ní. U nìn kútì dibeel bɔtibiliŋ pu. U-nimbil kaa nìn pée là kí wāl̀ Isirayeel yab. Ubɔti nìn dū úǹ ní ki tú ú cùú kúntí dinibul gbanti.

²⁷Niikanɔɔr nìn bàn̄ Jeerusaleem nì dijanjakitikpaandi. U sòon̄ nì Juudasi nì u-naalib biibii poon yii u là u nì bi ń ŋá mpèé. U nìn bí-bi yii:

²⁸«Kujaau kaa máaǹ kí nīn bí man nì nimbi kansikin. Man nì bijanjaliibi bikaaŋkaabi làá dāá ká-ni nì ŋgbansɔŋfi poon.»

²⁹Niikanɔɔr bàn̄ee ní ki jáam̀ Juudasi nì kunabitiiu poon. Ama binannanliibi nìn bɔ́ntì kí cúú Juudasi.

³⁰Juudasi nìn béè yii Niikanɔɔr nìn ŋúb́ kulandɔkɔkpiiu ní ki dɔ́miń u-cee. An puee u nìn fāŋkì ní kaa yāntì dikpafil gbanti yúntì.

³¹Niikanɔɔr nín ká yii bi béè tin u bàà bɔ́ntèe puee, ní u yíkì Jeerusaleem ki cūtìi bíi jáà nì Juudasi Safarsalama.

³²Bi nìn kūū Niikanɔɔr janjaliibi binib alaataa aŋmoo ní bin kíǹee sáǹ ki kɔ́ Daafiidi tiŋkin.

³³Tíǹ jítèe ní Niikanɔɔr nín jɔ́ḿ Siiyɔn jool pu. Bisaraaŋakpilib nì bitindaŋkpilib nyáń circir kɔŋkooŋŋun kí dāá jāam̀-u nì ŋgbansɔŋfi. Bi nìn dàkā-u saraawɔkaa un bi ŋá ubɔti yil puee.

³⁴Ama ní Niikanɔɔr bíi bèel̄-bi ki sìí-bi, ní ki tíil̀ ki lābitì-bi ki kɔ́ǹ-bi tijɔkɔndi. U nìn sòon̄ nì bi dilambil poon,

³⁵ní ki pūtì diŋuul poon yii: «Min bí neeyee, see ní dū Juudasi nì u-janjaliibi kí ŋá m-ŋaan. Yaa sá fám, m làá fàtīí gítiń kí tūū kunimbɔtidii nee ŋŋmi, ŋyunti ŋun kujaau yaa láa dóòyee.» Ní u yíkì nì diŋuul.

³⁶Niinee bisaraaŋaliibi nín kóò dicindi. Bi nìn yáatìi yúl̀ nsaraafan nì circir kɔŋkooŋŋu nimbiin ní ki sūǹ ki lì yii:

³⁷«Ti-Dindaan, sii di lēē kudii nee kú nīn sá a-yɔku. A là yii kú nīn sá kudii kun poon anibul làá nīn mèé-si ki gbàam̄-see ní.

³⁸Dáaĺ Niikanɔɔr gbanti nì u-janjaliibi tafal. Yàntī bí kpú kujaaun. Téetí bi-siibiliŋ pu, kí taa yàntī bí ŋmátí.»

³⁹Niikanɔɔr yíkì Jeerusaleem, ní ki cūtìi gāā u-janjanaapaal Beeti-Oorɔn. Siirii yab janjakitil diba nìn dɔ́miń ki kútì u-pu.

⁴⁰Juudasi úǹ nìn gāā u-janjanaapaal Adaasa tiŋkin ní. U-janjaliibi nìn nyáń binib kutukub bita. Niin ní u mēē ŋwimmeem nee yii:

⁴¹«Ti-Dindaan, ubɔti ubɔ tuuŋyi nìn sīī-si ŋwiin ŋubɔ. Niinee a-tuuŋŋu dɔ́miń ki kūū u-janjaliibi binib kutukub dilaataal nì imuŋku inaa nì biŋmoo.

⁴²Míǹ mbaantiim ní á nà dijanjakitil nee ti-nimbiin díǹ. Mimmee bin kɔkɔ kíǹ ki bí dimaŋfalinee làá béé yii Niikanɔɔr sīī a-circir diiku. Sòoǹ u-bɔti kí nóó nì ikpiti in u ŋée.»

⁴³Ajanjakiti nìn kíĺ kujaau uŋmal un bi yíì Adaaree iwiin saalaa nì ita dal ní. Bi nìn nàn̄ Niikanɔɔr janjakitil, ní úǹ u-ba sá upeekaa ki kpíì kujaaun.

⁴⁴U-janjaliibi nín ká yii bi kūū-uee ní bi dū bi-janjawanti ki fá ki sáǹ.

⁴⁵Juuda yab nìn dū ŋwimmɔn ki jìn̄-bi kí yòon̄ Adaasa kí cáá sāā Geeseer. Bi nìn pá bi-boon ki búǹ akantán.

⁴⁶Binib nìn nyēeń Juuda yab timbilimmu mun māntìi túee poon. Bi nìn màntīí tū-bi ijaan liitil pu, ní ki nìn yàntī binannanliibi fàtīi jáà nì tɔb. Bi nìn kūū Niikanɔɔr janjaliibi kɔkɔ, ubɔ kaa kíǹ.

⁴⁷Juuda yab nìn kóoǹ binannanliibi janjawanti nì bi-gaajawanti. Bi nìn lēē Niikanɔɔr yil ki gíí u-ŋaŋgiil ŋun u nìn tāntì nì dilambilee. Bi nìn cáa cūnnì Jeerusaleem ki bíl̀ bin kóò niinee kɔkɔ nimbiin.

⁴⁸Samaa nìn bí mmɔŋkpaanni ní ki jíń jiŋaal ŋwiin gbanti kii bi nín jīǹ jiŋaakpaan puee ní.

⁴⁹Juuda yab nìn lēē kí nīn jīǹ jiŋaal gbanti dibindi kamaa uŋmal un bi yíì Adaaree poon iwiin saalaa nì ita dal.

⁵⁰Juudee tiŋki nìn kɔ́ nsɔŋfin ŋyunti ŋubɔ poon fiii.