Read Ntcham 1 Maccabées 9 Bible Online

1 Maccabées 9 - Ntcham bible

1 Maccabées 9

¹Deemeetriyusi nìn gbìl̄ yii Niikanɔɔr kpíì kujaaun ní bi jáń ki pɔ́ɔkiǹ u-janjaliibi. Niinee ní u lēē yii u làá tɔ̄ nliliitiim, Alkiimee nì Bakideesi bí yòon̄ u-janjamɔntiibi kí cù Juudee.

²Bi nìn kíĺ Galiilee saŋŋu ní ki cūtìi gāā bi-janjanaapaal Meesalooti nyɔkɔpu, Arbeel caŋin. Bi nìn jáń ki fōō kitiŋ gbanti, ní ki kūū ki-nib tikpil.

³Abin 132 poon, dibindi poon ŋmapeepeekaau, ní bi gāā bi-janjanaapaal Jeerusaleem tiŋki nyɔkɔpu.

⁴Bi yíkì niinee ní ki yōoǹ bijanjaliibi kutukub mmuŋku nì bitanjakaliibi kutukub bili ki nín cá Beereeti tiŋkin.

⁵Juudasi nìn yōoǹ bijanjaliibi bimɔntiibi binib kutukub bita ní ki cūtìi gāā u-janjanaapaal Eelaasa tiŋkin.

⁶Juuda yab janjaliibi nín ká binannanliibi janjakitiŋ wīikí min tikpilee, ní bi fāŋkì, ní bi-kansikin tikpil sáǹ ki nyáń dijanjanaapaalin. An nìn pée kíǹ bijanjaliibi alaataa anii ní.

⁷Juudasi ká yii u-janjakitil bíi bàtī ŋyunti ŋun ní kujaau làá kíĺee. U-pɔbil nìn bíil̀ kun puee ŋyunti kaa ti bí ú kóoǹ u-janjaliibi kí kpāfì.

⁸U-wunti nìn yɔ̄tì. Nì míǹ kɔkɔee ní u bí bin kíǹ u-ceeyee yii: «Yīkìmaan! Tí cùú jáǹ ti-nannanliibi kí kpèè ti yaa làá ŋmā!»

⁹Bijanjaliibi kaa nìn kíí ki tɔ́kɔǹ u-pu. Bi bí yii: «Kɔŋkɔnnee taa pée ŋūǹ kí ŋá tiba. Kun baba ti pée ŋūǹ kí ŋée di sá tí fīī ti-maŋfal. Boonee, ti dāa ŋūǹ kí fàtīí gítiń ti nì ti-nabiyaamu kí nìkī kujaau. Taa pée náaǹ báà fiii.»

¹⁰Ní Juudasi kíí-bi yii: «Tí sāǹ ti-nannanliibi nimbiinaaa? M kpá kí ŋá míǹ. Báà an yaa sá ŋyunti nee ní tí kpú, tí kpú nì tininjati ti-nabiyaamu pu. Tí nīn ŋúb́ ti-jilmau tiba ń taa tākal̀-u.»

¹¹Binannanliibi janjaliibi nyáń bi-janjanaapaal pu, ki dɔ́miń ki yúl̀ Juuda yab nimbiin. Bitanjakaliibi nìn cúu yākatì mili pu. Bijanjaliibi bin ŋúb́ tijaataafun nì itɔfee līī bijanjaliibi nyɔkɔpu ki còom̄ ki dòoń. Bibaatandambi di līī.

¹²Bakideesi tīī u-janjaliibi mara yii bí nīn cá ŋgan pú. Bijanjaliibi bin còom̄ ataa puee còom̄ ajanliitil pu ki búǹ akantán. Juudasi janjaliibi mun búń akantán.

¹³Ajanjakiti alee bintindi puee, kitiŋ nìn cīŋkì ní. Kujaau kíĺ kutaafaau áli kujoou.

¹⁴Juudasi nìn dáań ki ká yii Bakideesi nì binannanliibi baatandambi bí u-ŋaŋgiil pú. Niinee Juuda yab bin cáá dipɔbilee nín cá Juudasi cee.

¹⁵Bi nìn dū bi-ba ki bíl̀ Siirii yab janjaliibi nín bí puee ŋgiil pú ní ki jìn̄-bi áli Asaraa jool.

¹⁶Bijanjaliibi bin bí ŋgan púee nín ká yii bi pɔ́ɔkiǹ bin còom̄ ŋgiil púee, ní bi mun gbáb́ ki bīiǹ Juudasi nì u-naacimbi pu ki jáà nì bi bi-boon pú.

¹⁷Dikɔ̀ndi nìn dūu pɔ́ɔkì tikpil, ní ajan liitilee binib tikpil kpíì.

¹⁸Bi nìn kūū Juudasi, ní bin kíǹee sáǹ.

¹⁹Joonatan nì Siimɔn nìn yōoǹ bi-maan wunti ki cáa cūnnì Moodiini tiŋkin ki bíl̀ bi-naanja kaakulin.

²⁰Isirayeel yab kɔkɔ nìn súń u-pu tikpil. Bi nìn dū iwiin tikpil ki ŋá-u dikpɔkpaandi. Bi nìn dū iwiin kupaau ki gāā ki būsì ŋkpiisilan nee yii:

²¹«U kpíì, ubaatandaan un nìn fìil̄ Isirayeelee. Mana ní an ŋūǹ kí ŋá míǹ?»

²²Juudasi tuuŋŋi ŋin kíǹee, tijáti tin u jáńee nì u-pɔ́ɔǹtam nì kun nìn tìì-u tinyoolee, baa ŋúń ki ŋmàn̄ ki síiǹ, di sá yii an nìn wīikí tikpil.

²³Juudasi kúm boonee, binib bin kaa tɔ́ Unimbɔti marabee nìn fātìi nyáń Isirayeel tiŋkin an kɔkɔ pu, ní binikpitib nìn fātìi ká dimákal.

²⁴Ŋyunti gbantee, ŋkùm miba nìn nyáń ki pɔ̄ɔ̄ ní dinibul kɔkɔ gítì bi-jandi pú.

²⁵Bakideesi nìn lēē binib bin kaa tɔ́ Unimbɔtee bí nīn kpòotī kitiŋ.

²⁶Bikpilib gbanti nìn nyàab̀ Juudasi bɔɔbi ní ki bàlifī-bi tibɔti. Míǹ boonee ní bí cáań-bi Bakideesi cee ní úǹ ń dáaĺ bi-tafal ní kí bèel̀-bi.

²⁷Doooo Unimbɔti bɔnaatiliibi yuntiŋu nín jítèe, Isirayeel yab kaa láá kɔ́ dinimbinaamandi diba poon míǹ.

²⁸Niinee ní Juudasi bɔɔbi kpáfì ní ki bí Joonatan yii:

²⁹«Doooo a-maan Juudasi nín kpíì nee, ubɔ kaa ti bí kii úǹ, kí cùú jáǹ ti-nannanliibi nì Bakideesi nì bin kɔkɔ kaa là ti-nibul bɔtee.

³⁰An pu ní ti lēē-si á fōō u-yil. A làá nīn sá ti-kpiliu ní kí nīn kpòotī-ti kujaau poon.»

³¹Joonatan nìn kíí ki fōō u-maan Juudasi yil kí nīn kpòotī Isirayeel yab.

³²Bakideesi nín gbìl̄ an bɔtee, ní u bíi nyàab̀ kí kpɔ̀ Joonatan.

³³Ama úǹ nì u-nib nì u-naal Siimɔn gbìl̄ míǹ ní ki sáǹ ki nín cá Teekoowa teekun. Bi nìn gāā bi-janjanaapaal Asifaar nyimbɔbil caŋin.

³⁴Ŋwiŋŋuŋfikaa ŋubɔee, Bakideesi béè laakin bi bée, ní u yōoǹ u-janjakitil ní bi cūtìi dūtì Jɔɔdan buŋŋu.

³⁵Joonatan nìn tú u-naal Yoowaneesi un kpòotī bijanjaliibi dicaŋŋee ú cù kí ká u-bɔɔbi Nabata yab. An nìn sá ú mèè-bi nsan bí cáań bi-waŋguliŋ kí yóoń bi-cee, di sá yii bi-waŋguliŋ nìn wīikí tikpil.

³⁶Ama Yoowaneesi cée ní Jambirii yab kíntì-u nsanni. Bi nìn cúú-u ki kpáaǹ awaŋgul kɔkɔ ki búntì.

³⁷Tíǹ jítèe ní Joonatan nì u-naal Siimɔn gbìl̄ yii Jambirii yab cáá tinimpucan. Unimpucaan baa nìn sá ukpikpaan ubɔ ní Kanaan tiŋkin, ní binib tikpil làá nyā Nabata tiŋkin kí céeǹ-u.

³⁸Baa súntì Jambirii yab nín kūū bi-naal Yoowaneesi puee. Ní bi jɔ́m̀ dijool faŋfakamin ki bál̀.

³⁹Bi bí niinee ní ki ká binib tikpil tikpil túń tiwan kpìti kpiti ki gà kuwoou ki dòoń. Unimpucaan cal nì u-bɔɔbi nì u-nabiyaamu līī nyɔkɔpu ki bɔ̀ɔ́ ŋgaŋgamu nì tibɔɔkaal ki túŋkí-bi. Bi nìn ŋúb́ tijanjawan tikpil.

⁴⁰Joonatan nì u-yab nyáń bi-balilaŋki ní ki páatìi jéetì bi-pu ki bíi kù-bi. Bi nìn kūū binib tikpil, ní bin kíǹee sáǹ ki dàb̄ dijool. Juuda yab nìn fōō bi-wanti kɔkɔ.

⁴¹Niinee tinimpucan dūu kpántì dikpool, ní bilaŋgaaliibi laŋyi dūu kpántì ikpiisilan[23].

⁴²Joonatan nì Siimɔn nín tɔ̀n̄ bi-naal kúm pɔntooŋyi ki dóòyee, ní bi cūtìi bál̀ Jɔɔdan puukun.

⁴³Bakideesi béè laakin Juuda yab bée. Ŋwiŋŋuŋfikaa ŋubɔ dalee ní u yōoǹ ajanjakiti tikpil ki nín cá Jɔɔdan buŋgbandi.

⁴⁴Niinee Joonatan bí u-yab yii: «Yīkìmaan! Tí já kí fīīmaan ti-ba. Tin poon ti bí díǹ nee pɔ̄ɔ̄ ki jítiǹ tin kpàà pée bàń-tee.

⁴⁵Unannanli bí ti-nyɔkɔpu ní ti-boon púee Jɔɔdan buŋŋu mun di dɔ̄ee. Kupuu nì abɔjanaakun di māntìi tú-ti an kɔkɔ puee. Taa ŋūǹ kí sāǹ kí cù laaba.

⁴⁶Tí kúum̀maan kí yíiń ti-Dindaan ú nyāntí-ti ti-nannanliibi ŋaan.»

⁴⁷Bi kíĺ kujaau ní Joonatan tāntì u-ŋal kí kpɔ̀ Bakideesi. Ama ní úǹ nɔ̄ntì ki gítì u-janjaliibi boon.

⁴⁸Niinee Joonatan nì u-yab yùkū ki tɔ́ Jɔɔdan buŋŋun ki wáŋkì ki tin nyáń digbándi. Ama bi-nannanliibi kaa nìn dūtì mbun kí jà bi-boon.

⁴⁹Yaadal wiiŋŋuee, Bakideesi janjaliibi kii binib kutuku pu di kpíì.

⁵⁰Bakideesi fātìi nín gítí Jeerusaleem tiŋkin. U nìn kíĺ ki bíi wúǹ Juudee timmu pu. U nìn máń aguŋfɔkɔ ki māntìi tú ntimuee, ní ki cóoǹ punuubi bin cáá tikpàlkaalee. Ntimu gbanti di sá Jeeriikoo nì Eemaayusi nì Beeti-Oorɔn, nì Beeteel nì Tiimina nì Faratɔn nì Teefɔn.

⁵¹U nìn dū ajanjakiti ní ki kāaǹ ntimu gbanti kɔkɔn bí nīn jáà nì Juuda yab kí taa gbèen̄.

⁵²U nìn mɔ̄tìi máń agun ki tú Beeti-Suur nì Geeseer timmu, ní ki ŋáŋkì Jeerusaleem tiŋki pɔ̀ti pu gundi. Niin ní u nìn dū ajanjakiti ki kāaǹ ní ki kpáafì tijikaal.

⁵³U nìn cúú kitiŋee kpootiliibi jipɔmbi ki tɔ́ sarka kitiŋ pɔ̀ti pu.

⁵⁴Abin 153, uŋmaliliiti poon, ní Alkiimee tīī mara yii bí gbá kí wīī digundi din bi máń ki tú kunimbɔtidii poon pu cindee. U nìn gbáń ki kpītì Unimbɔti bɔnaatiliibi tundi dee. Binib nìn kíĺ ki bíi gbáà ki wìil̄ digundi gbanti.

⁵⁵Ama ní iween iba dɔ́miń ki cúú Alkiimee, ní bi dū atuunee ki gbēeǹ. U nìn fàl̄ ní kaa nìn gíti ŋūǹ kí sòoǹ. Waa nìn gíti ŋūǹ kí tùkù ubɔ u-landɔkɔŋu nín sá pu kudiiyee puee.

⁵⁶Ŋyunti gbanti poon ní Alkiimee kpíì nì falaakpaan poon.

⁵⁷Bakideesi nín gbìl̄ Alkiimee kúm puee, ní u nín gítí ubɔti Deemeetriyusi cee. Ŋyunti gbanti ní Juudee kɔ́ ŋgbansɔŋfin abin ali.

⁵⁸Niinee Juuda yab bin kaa tɔ́ Unimbɔti marabee kóoǹ ki kpáfì ní ki lī tɔb cee yii: «Joonatan nì u-yab bí ŋgbansɔŋfin kɔŋkɔnnee, tiba kaa páb́-bi. Tí gíiǹní Bakideesi. U làá ŋmā kí cúú bi-kɔkɔ kunyabambaantiiu.»

⁵⁹Ní bi cūtìi ká-u, ní bi sòon̄ tibɔti gbanti pu.

⁶⁰Niinee Bakideesi yōoǹní dijanjakitikpaandi ki nín dòoń. U nìn ŋmàn̄ kugbɔŋu kubɔ dibalin ki tīiń bin bí u-jandi púee bí cúú Joonatan nì u-yab.

⁶¹Joonatan nì u-naacimbi nìn cúú binib imuŋku ili nì saalaa pu ki kūū. Bíǹ di nìn bɔ́ntì ki cūtìi cáań Bakideesi.

⁶²Boonee ní Joonatan nì Siimɔn nì bi-yab yíkìi búntì Beeti-Basi tiŋkin laakin ubɔ kaa ti kóòyee. Bi nìn fātìi máń kitiŋ gbanti ní ki máń digundi ki tú-kì.

⁶³Bakideesi nín gbìl̄ mimmee ní u kpáfì u-janjaliibi kɔkɔ, ní ki yíiń Juudee yab bin yú u-boonee bí dāá kūtì u-pu.

⁶⁴U nìn cūtì Beeti-Basi kí já nì kì, ní ki dū kujaau maasiimbi ki jáń nì kì an yúntì.

⁶⁵Joonatan nìn yāntì u-naal Siimɔn nì binib biba kitiŋin, ní úǹ nyáń ki búntì tisatin.

⁶⁶U nìn jáń ki pɔ́ɔkiǹ Oodoomeera nì u-maaliŋun yab nì Fasirɔn naakookun yab bi-timbiliikin. Bíǹ nìn kíí ki kútì Joonatan pu bí já kujaau. U nì u-janjakitil nìn cūtìi kpìl̄ Bakideesi.

⁶⁷Siimɔn nì u-yab nìn nyáń Beeti-Basi tiŋkin ní ki tūū kujaau maasiimbee ŋŋmi.

⁶⁸Bi nìn jáń nì Bakideesi, ní ki pɔ́ɔkiǹ-u sɔ́kɔ sɔkɔ. U-wunti nìn yɔ̄tì, kun puee u nín bàà bɔ́ntì puee, waa ŋúń ki ŋá míǹ.

⁶⁹U nìn fōō Juuda yab bin kaa tɔ́ Unimbɔti marab ki sáŋkì-u yii ú dāan̄ Juudeeyee pu diŋuul, ní ki kūū bi-kansikin binib tikpil. Míǹ boonee ní u lēē u-ban ki nín kùǹ u-tiŋkin.

⁷⁰Joonatan nín gbìl̄ mimmee, ní u tú binib Bakideesi cee bí ŋá mpèé ŋgbansɔŋfi ń dòon̄ bi-kansikin, ní binib bin u cúúyee, ú gíiǹ-bi kí líí.

⁷¹Bakideesi nìn gbìl̄ ki tīiǹ Joonatan. U nìn pūtì ki pōoǹ Joonatan yii u làá yàntī-u soooo u-maŋfal wiiŋyi kɔkɔ poon.

⁷²U nìn dū binib bin u nìn cúú Juudee tiŋkin ŋyunti ŋun jítèe ki tīī Joonatan, ní ki nín kùǹ u-tiŋkin. Bakideesi taal kaa nìn gíti tāā Juuda yab tiŋkin.

⁷³Kujaau kúntì Isirayeel tiŋkin. Joonatan nìn cūtìi kóò Miikimaasi tiŋkin ní. U nìn kpántì u-nibul kpiliu, ní ki kúntì binib bin kaa tɔ́ Unimbɔti marabee Isirayeel tiŋkin.