Read Ntcham 2 Maccabées 1 Bible Online

2 Maccabées 1 - Ntcham bible

2 Maccabées 1

¹«Juuda yab bin bí Jeerusaleem nì Juudee tiŋki kɔkɔnee jáaḿ bi-nabiyaamu mun bí Eejipiti tiŋkinee. Bi mèé bi-pu yii bí nīn cáá ŋgbansɔŋfi án bútí-bi.

²«Unimbɔti ń ŋá-ni tiŋan kí téetí mpèé ŋun u nìn ŋá nì Abraam nì Isaaki nì Jaakɔb bin sá u-deedee tɔntɔnliibee pu.

³Ú tīī ni-kɔkɔ dipɔbil din làá nīn jáaḿ-u, kí nīn ŋáań u-lammi nì dipɔbil dibee.

⁴Ú pìitī ni-pɔbiliŋ ní ŋmā kí gbìl̄ u-marab nì u-bɔkpaaŋi taapu, ní kí tīī-ni ŋgbansɔŋfi.

⁵Ú fōō ni-wimmeem, kí dū ni-yìntitam kí pɔ̄-ni, kí taa fá-ni nnaabu yuntiŋu.

⁶Ŋwimmeem min ti bí doo ki mèé Unimbɔti ni-pu ŋyunti nee poonee dee.

⁷«Ŋyunti ŋun Deemeetriyusi nìn sá ubɔti abin 169 poonee, timbi Juuda yab, ti nìn ŋmàn̄ tin bí nee yii: <Doooo Jaasɔn nì u-yab nín nyáń Unimbɔti ti-Bɔtiu nì circir Tiŋki boonee, ti kɔ́ agìŋ́kpaan poon ní.

⁸Binib gbanti wùn̄ kunimbɔtidii punyɔɔkpaaŋki, ní ki kūū maanyiibab. Ama ní ti mēē ti-Dindaan ní u fōō ti-wimmeem. Ti ŋá saraabi nì ŋyim saraabi. Ti tūū fitilab kunimbɔtidiin, ní ki cáań kpɔnɔb bin bi ŋáań Unimbɔti saraayee ki páaǹ.>

⁹«Kɔŋkɔnnee, ti bíi ŋmà-ni kugbɔŋu nee ki tùkù-ni yii ní jī tibìń jiŋaaliu Kiisileewu ŋmaliu poon.

¹⁰«Abin 188 poon ní ti ŋmàn̄ kugbɔŋu nee.» «Bin kóò Jeerusaleem nì Juudeeyee nì bitindaŋkpilib nì Juudasi jáaḿ Ariistoobul, un sá bisaraaŋaliibi bin bi dūu sú ti-Dindaanee dicaŋkunee nì ubɔti Pitooleemee saŋkiliu. Ti jáaḿ Juuda yab bin bí Eejipitee mun ki mèé yii bí nīn cáá dipɔɔpindi nì ŋgbampɔn.

¹¹«Unimbɔti fīī-ti ki nyántì animbinaaman tikpil poon. An pu ní ti jáaḿ-u nì ti-pɔbiliŋ kɔkɔ, u nín tútúǹ-ti ti jáń nì ubɔtee.

¹²Di sá yii Unimbɔti u-ba di jìn̄ bin dɔ́miń kí jáǹ circir tiŋkee.

¹³Tiŋman, ŋyunti ŋun ní ubɔti Antiyookuusi cūtì Peersee, an nìn bí kii ubɔ kaa nìn ŋūǹ kí já kí pɔ̄ɔkiǹ u-janjakitilee. Ama bi kūū bi-kɔkɔ Naneeya waadiikun. Diwaal din sá unimpuee tandambi nìn ŋá nciin ní ki kūū-bi.

¹⁴Antiyookuusi nì u-bɔɔbi nìn cūtì circir paaŋŋu gbanti pu yii u nì uwaanimpuee ń cáá tɔb. Ibaamɔnee, u nín nìn là puee di sá bí dū tigaajakpaandi tin bí kuwaadiiyee poonee kí pà-u kucootiiu[1].

¹⁵Naneeya tandambi nìn nyántì tigaajatee ki kpàl̄, ní ubɔti nì bin nóó-uee nín kóò kuwaadiin. Ŋyunti ŋun bi kɔ́ee, ní bi dū mpunyɔmu ki pīiǹ.

¹⁶Bi nìn cúú kipunyɔkɔ kin bí kudii yilpu dibalinee ki pīitì, ní ki dī niin ki yáŋkì ubɔti nì u-naacimbi ataŋkpee ki kūū. Bi nìn gūutì gūutì bi-taaŋi nì bi-ŋalii nì bi-yiliŋ ní ki dū ayilee ki lúkuń bin bí mmɔŋkee.

¹⁷Ti nyɔ́ŋkí Unimbɔti tin kɔkɔ u ŋée pu. Di sá yii úǹ di dū bin nìn kpèé-u fámee ki líiǹ ŋkúm.»

¹⁸«Kiisileewu ŋmaliu iwiin mmuŋku nì iŋmoo dalee, ti làá jī ti nín ŋá kunimbɔtidii circir puee jiŋaaliu. An pu ní ti ká yii an ŋān̄ tí tùkù-ni ní jī-u kii bi nín jīǹ Tibìń jiŋaaliu puee. Ní dāá téetí Neeyeemiya nín nìn fātìi máń kunimbɔtidii nì nsaraafan ŋŋmi dɔ́miń ki wùn̄ puee.

¹⁹Di sá yii bi nín nìn cúú ti-naanjab ki cūnnì Peersi kuyuŋuee, bisaraaŋaliibi bin nìn yú deedeeyee nìn lēē nsaraafan pu ŋmiŋu ki cáa bál̀ dilɔkɔgindi din poon nnyim kpée taapu taapu. Bi nìn bál̀-ŋu tiŋan ní báà ubɔ kaa nìn ká-ŋu.

²⁰Abin tikpil jítì boon, ní Unimbɔti mun nín lēē ŋyunti ŋuŋyee bàn̄ee, ní Peersi bɔtiu tú Neeyeemiya Jeerusaleem. Neeyeemiya nìn bālifì bisaraaŋaliibi bin nìn dū ŋŋmi gbanti ki bál̀ee jipɔmbi yii bí cù kí nyàabìń-ŋu.

²¹Bíǹ nìn bí yii baa ká ŋŋmi gbanti, ama nnyim di dɔ̄ taapu ŋàtabù. Niinee ní Neeyeemiya bí-bi yii bí cùú cáań nnyim gbanti. Ŋyunti ŋun tikɔkɔ bɔ́ntì bí ŋá saraayee, ní Neeyeemiya tīī bisaraaŋaliibi mara yii bí kpáatí nnyimee kí sìtī idɔ nì saraa un pá idɔee pu.

²²Bi nìn ŋá míǹ, an kútì fiiiyee ní ŋwìiń ŋun pu ditagbandi bàà bīīyee cúu nyātì. Ŋyunti gbantee ní ŋŋmi ŋubɔ fōō nsaraafan pu, ní an ŋá binib kɔkɔ maamaaci.

²³Ŋyunti ŋun saraa bíi wùee, bisaraaŋaliibi nì bin kɔkɔ nìn bí niinee nìn bíi mèé Unimbɔti. Joonatan di nìn mèé ní bin kíǹee nì Neeyeemiya kíikí.

²⁴Bi nín nìn mēē puee sèé: «<Ti-Dindaan, ti-Dindaan Unimbɔti, sii di náań tikɔkɔ. A sá kuwambiiu ní ki cáá mpɔn, ki sá deedeedaan, ní a-poon mɔ̄. Sii baba di sá ubɔti, ki sá ulaŋŋaŋfiti.

²⁵A cáá tiniti, ki bí deedee, ki sá Mpɔŋkɔdaan. Sii baba di bí ki cá jaanjaan. A nìn lēē ti-naanjab ní ki gāntì-bi ki yóoǹ bí nīn nóó-si.

²⁶Fōō saraa nee kí tīī a-nibul Isirayeel yab. Wúń bi-pu, di sá yii sii di yì-bi, ní kí ŋá-bi circir.

²⁷Kóoǹ ti-nibul yab bin yàl̄ ki bíń kuyuŋu ajan kɔkɔ puee kí kpāfì. Kóoǹ-bi ntimu kɔkɔn kí kpāfì. Fàtī a-nimbikpeeŋu kí túĺ bin ní bi bíiĺ ki kpèé fámee. Niinee atimbun ŋin kíǹee làá béé yii sii di sá ti-Nimbɔtiu.

²⁸Dáaĺ bin sàantí-ti ki bèel̄-ti nì dilambil poonee tafal.

²⁹Fàtīí gíiǹ a-nibul kí kàan̄ a-circir tiŋkin, kii Mooyiisi nín nìn sòon̄ pu ki síiǹee.>

³⁰«Boonee ní bisaraaŋaliibi kíĺ ki bíi gà inyɔŋki laŋyi.

³¹Saraayee nín wùn̄ ki dóòyee ní Neeyeemiya tīī mara yii bí kpáatí nnyim min kíǹee kí sìtī ataŋkpakpaan pu.

³²Bi ŋá mimmee ní ŋŋmi fōō, ama ŋŋmi ŋun nìn bíi fòol̄ nsaraafan puee nìn wāĺ ní bɔ́iii, ní ki dāa kpíì.

³³«An bɔtee nìn gbītì an kɔkɔ, ní bi dū-tì ki máafì Peersi yab bɔtiu yii, laakin bisaraaŋaliibi nìn dū ŋŋmi ki bál̀ ní bi nín cúú-bi ki cūnnì kuyuŋuee, bi ká nnyim niin. Nnyim gbanti ní Neeyeemiya nì binib bin nìn bí u-ceeyee dūu wùn̄ saraabi.

³⁴Ubɔti nìn bālifì bālifì ki béè yii an lafun jítì míǹ ní u yāntì bi bàkā niin ki māntìi tú, ní ki dūu ŋá circir paaŋŋu.

³⁵An nìn cáań ubɔti animbil tikpil, ní u nìn pú u-bɔɔbi bin bɔti fáatì-uee tiwampɔkaal tikpil.

³⁶«Neeyeemiya nì u-yab nìn yíiń nnyimee yii <Neefitaar>, an taapu di sá yii an ŋáań circir. Ama binib tikpil nìn yíì-mì yii <Nafitee>.»