Read Ntcham 2 Maccabées 11 Bible Online

2 Maccabées 11 - Ntcham bible

2 Maccabées 11

¹Liisiyasi nìn sá bikàliŋkpilib kpiliu ní ki nìn sá «Ubɔti baabi» kansikin ubɔ. Úǹ di nìn kpēē ubɔti ki dàkā-u. Tin nìn jítèe kaa nìn mɔ́ɔkiǹ-u báà fiii.

²U nìn kpáfì bijanjaliibi kii kutukub imuŋku inaa, nì itaamu nì bitanjakaliibi kɔkɔ. Míǹ boonee ní u nín cá kí já nì Juuda yab. U cáá nlandɔkɔ kí yàntī Jeerusaleem ń kpántí Greeki yab tiŋki.

³U là bí nīn pà kunimbɔtidii pu lampoo, kii bi nín pà ntimu mun kíǹee poon waadiiŋŋi pu puee. U nìn là mun yii dibindi kamaayee, usaraaŋakpil ń nīn pà tiba u-tundi pu.

⁴Liisiyasi kaa nìn dū Unimbɔti pɔŋŋu ki yíiń tiba. Ama u nìn máká u-janjaliibi kutukub cutimaanyi bin còom̄ ataa puee nì u-tanjakaliibi kutukub kutukub nì u-kuntib imuŋku inaa in u cáa jáà kujaauee pu ní.

⁵Bi bàn̄ Juudee, ki tóob́ Beeti-Suur guŋkpaandee, an cáá ataŋkpee mmuŋku nì anii kí cù Jeerusaleem ŋgiil pú. Niin ní bi kíĺ kujaau.

⁶Maakabee nì u-yab nìn gbìl̄ yii Liisiyasi bí ki jáà nì Juuda timmu mun bi máń agun ki túee ní u kóoǹ samaa ki kpáfì. U nìn mēē ti-Dindaan ki sūǹ ki yīkintí yii ú tɔ̄ń ntuummɔnti ŋú dāá fīī Isirayeel tiŋki.

⁷Maakabee nìn sá upeekaa ki yōoǹ tijanjawan, ní ki tīī bin kíǹee kunyannyaau bí bíitíǹ dinimbinaamandi gbanti, kí tūtuǹ bi-nibul yab. Bi nìn cúú nsan dicilpu ki nín cá nì tininjati.

⁸Bi nìn nyáń Jeerusaleem tiŋkin kaa kɔ́ ndan ní ki ká utanjakal ubɔ pēē tiwampin káŋkaŋ ki fīintí tijanjawan tin sá sindaariyee.

⁹Niinee ní bi-kɔkɔ bíi jáaḿ Unimbɔti dicilpu u-ŋanti pu. U nìn tīī-bi kunyannyaakpaaŋŋu. An puee bi nìn bɔ́ntì kí sāā kí pùutī binib nì ipeecuncuti nì tikúti guŋŋi ŋin fɔ̀kɔ̀ee.

¹⁰Ti-Dindaan nìn súń bi-saai. Bi nìn bóob́ dikɔ̀ndi nì utanjakal un nyánní yilpuee tūtuntam pu.

¹¹Míǹ boonee ní bi wúkutì binannanliibi pu kii gbikintibee. Bi nìn kūū bijanjaliibi bin còom̄ ataa puee kutukub saalaa nì ubɔ nì bitanjakaliibi kutuku ubɔ nì alaataa aluu, ní ki kāl̀ bin kíǹee pu áli bi gīī ki sáǹ.

¹²Bin nìn sáǹ gbantee kansikinee, fiii di kaa nìn fōō tiweendi ki gbíntìi ŋúb́ tijanjawan. Liisiyasi u-ba nìn sáǹ nì icoo ní ki ŋmátì.

¹³Ama Liisiyasi kaa lóò iciin. U nìn dākafì bi nín jáń ki pɔ́ɔkiǹ-u miŋyee pu. U nìn gbìl̄ taapu yii ubɔ kaa ŋūǹ kí já kí pɔ̄ɔkiǹ Juuda yab, kun puee Unimbɔti Mpɔŋkɔdaan nìn jáà ki kútí bi-pu. U nìn dū ituun ki tú bi-cee

¹⁴bi nì i ń ŋá mpèé min máaǹee. U nìn pōoǹ-bi yii u làá páb́ ubɔti ú kpántí bi-bɔɔ.

¹⁵Maakabee un nìn là báà ŋma ŋantee nìn kíí tin Liisiyasi dūu bíl̀ u-nimbiinee. Ubɔti mun jandi púee, u nìn kíí kí ŋá tin kɔkɔ Juuda yab nìn bālifì ní Juudasi dūu ŋmàn̄ ki tīī Liisiyasee.

¹⁶Liisiyasi nín nìn ŋmàn̄ kugbɔŋu kun ki tīī Juuda yabee sèé: «Liisiyasi jáaḿ Juuda yab nibul.

¹⁷«Yoowaneesi nì Abisaloom bin ni túnnée dū kugbɔŋu kun ni ŋmàn̄ee ki tīī-mi. Bi gbāam̀ yii tí kíí tin ni bālifì-tee.

¹⁸M dàkā ubɔti tin sá ḿ dàkà-uee ní u kíí kí ŋá tin u ŋūǹ kí ŋée.

¹⁹Ni yaa gbíntìi bí nì dipɔbil diba nì gɔminee, m làá pɔ́ɔǹ iwiin in dòońee poonee kí ŋá min làá bútí ni-nibulee.

²⁰M tīī bin ni túnnée nì man yab mara bí sòoǹ kí bɔ́bití tin sá bí bɔ́bitée taapu.

²¹«Ní nīn bí tiŋan. «Abin 148, Seeyusi Kɔranti ŋmaliu iwiin 24 poon ní bi ŋmàn̄ kugbɔŋu nee.»

²²Kugbɔŋu kun ubɔti ŋmàn̄ Liisiyasee sèé: «Ubɔti Antiyookuusi jáaḿ u-nabiki Liisiyasi.

²³«Doooo ŋyunti ŋun ní ti-baa dōoǹ u-ŋaliŋu pu ki cūtìi ŋàl̄ inimbɔtee, m nín là puee di sá yii m-beelin yab ń nīn tūǹ bi-tuuŋŋi nì ŋgbansɔŋfi.

²⁴M gbìl̄ yii Juuda yab yíì kí nóó Greeki yab koobiliŋ kii m-baa nín nìn là puee. Bíǹ là kí nīn bí mbamin ní ki bàlifī yii bí pɔ̄-bi nsan bí nīn tɔ́ bi-marab.

²⁵M là yii dinibul gbanti ń nīn bí ŋgbansɔŋfin. M tīī mara yii bí gíiǹ bi-nimbɔtidiiku kí tīī-bi, ní kí yàntī bí nīn nóó bi-yaajakoobiliŋ.

²⁶An puee á tɔ̄ unil bi-cee ú cùú tùkù-bi ŋgbansɔŋfi landɔkɔŋu ŋun m cáá bi-puee. Bi yaa béè tin m lēē kí ŋée, bi-pɔbiliŋ làá sɔ̀ŋkì ní bí nīn tūǹ bi-tuuŋŋi nì ŋgbansɔŋfi.»

²⁷Kugbɔŋu kun ubɔti ŋmàn̄ ki tīī Juuda nibulee sèé: «Ubɔti Antiyookuusi jáaḿ bitindaŋkpilib kitil nì Juuda yab bin kíǹee kɔkɔ.

²⁸«M máká yii ni pɔ̄ɔ̄ tiŋan. Mama m-ba pɔ̄ɔ̄ tiŋan.

²⁹Meeneelasi tùkū-mi yii ni là kí kpì ni-dumpu kí cùú nìkī ni-tuuŋŋi!

³⁰Míǹ puee, un kamaa làá kpì kí wàatī ní uŋmal un bi yíì Santiikee ń nín bà iwiin mmuŋku nì saalaayee, baa làá dáaĺ udaan tafal.

³¹Ni ŋūǹ kí nīn ŋúb́ ni-jinti marab nì ni-marab bin kíǹee kii dooooyee. Kí kūtèe, ni-kansikin ubɔ yaa kaa nyí ní ki yīntì maree, baa làá dáaĺ udaan tafal.

³²M tú Meeneelasi ni-cee ú sɔ̀ŋkì ni-pɔbil.

³³«Ní nīn bí tiŋan. «Abin 148, Santiiki ŋmaliu iwiin saalku dal ní bi ŋmàn̄ kugbɔŋu nee.»

³⁴Room yab bíǹ nín ŋmàn̄ Juuda yab kugbɔŋu kuŋyee sèé: «Kiintusi Mamiyuusi nì Tiituusi Maniliyuusi nì Maniyuusi Seergiyusi bin Room yab lēē ki túee jáaḿ nimbi Juuda yab nibul.

³⁵«<Ubɔti nabiki> Liisiyasi nín pú-ni tiŋyee, ti mun ká yii an ŋān̄.

³⁶U nín bɔ́ntì tin kí dūú sòoǹ nì ubɔtee, ti gbàam̄-ni yii ní nyɔ̀kɔfì-tì tiŋan kí tɔ̄ń unil ti-cee an taa yúntí. Niinee ní timbi ń sòoǹ nì ubɔti an pu min ní án làá tūtuǹ-nee, di sá yii ti làá cù Antiyɔɔsi.

³⁷An puee ní yáb́ kí tɔ̄ń binib ti-cee, ti mun ń ŋmā kí béé ni-landɔkɔŋu.

³⁸«Ní nīn bí tiŋan. «Abin 148, Santiiki ŋmaliu iwiin saalku dal ní bi ŋmàn̄ kugbɔŋu nee.»