Read Ntcham 2 Maccabées 12 Bible Online

2 Maccabées 12 - Ntcham bible

2 Maccabées 12

¹Juuda yab nì Liisiyasi nín sòon̄ ki gbìlīǹ tɔb míǹ ki ŋá mpèéyee, ní Juuda yab fātìi kíĺ ki bíi kù bi-sati.

²Ama kitiŋee ni gɔminab kansikinee, Tiimootee nì Geeneeyusi jipɔɔn Apoolooniyuusi nì Siipiri yab janjakpikpaaŋwu Niikanɔɔr kaa nìn yāntì Juuda yab ká ŋgbansɔŋfi báà fiii ki ŋūŋfì.

³Joopee tiŋkin yab nìn ŋá ntimbiil tundi diba. Bi nìn mɔ́ntì yii bi sá Juuda yab bin kóò bi-tiŋkinee bɔɔbi ní. Bi nìn yíiń bi nì bi-nimpoobi nì bi-biyaamu bí kɔ́ iŋaliŋfi in bíǹ bi-ba kpááyee poon kí yìiǹ tiŋku pu.

⁴Kii kitiŋee kɔkɔ yab nín nìn kpáfì ki lēē mimmee puee, Juuda yab nìn kíí. Kun pu bi nìn kííyee di sá yii bi nìn là kí dàkà-bi yii bi là ŋgbansɔŋfi ń nīn bí bi-kansikin ní baa dàkafī bi-pu tibɔkpitil tiba. Ama bi nín ŋàal̄ ki kɔ́ tiŋku poon poonee ní Joopee yab kpáatì bi-kɔkɔ ki sītì nnyimin. Bi nìn jítì binib alaataa ali pu.

⁵Juudasi nín gbìl̄ yii bi kūū u-nibul digaŋgamee ní u kpáfì u-janjaliibi ki tīī-bi mara.

⁶Bi nìn mēē Unimbɔti un sòoǹ binib bɔti nì ibaamɔnee ní ki nín cá kí jáǹ bin kūū bi-nabiyaamuee. Kunyeeuee ní bi wùn̄ bi-ŋaliŋfii nì laakin i yūlifée, ní ki kūū bin kɔkɔ sáǹ ki bál̀ niinee.

⁷Bi nìn dū Joopee tiŋki punyɔmmu ki pīiǹ. Niinee Juudasi fātìi nín gítí ki ŋá nlandɔkɔ yii boonee ú dāá gítiń kí kpɔ̀ bin kɔkɔ kóò Joopee tiŋkinee.

⁸U nìn gbìl̄ mun yii Jamina yab là kí kpɔ̀ Juuda yab bin kóò bi-tiŋkinee, kii Joopee yab nín ŋá puee.

⁹Kunyeeuee ní u cūtìi jáń nì Jamina yab. U nìn tūū meelab yulilaŋki ŋŋmi. A yaa nìn yú Jeerusaleemee, a wāĺ aŋmilimbil ní. Kí nyā niin kí cù Jeerusaleemee, an sá kii ataŋkpee imuŋku ili nì aŋmoo ní.

¹⁰Míǹ boonee ní Juudasi nì u-yab yíkì Jamina tiŋki kí cùú jáǹ Tiimootee. Bi nìn sútì ki wāatì Jamina tiŋki fiii kii ataŋkpee ali. Ŋyunti gbantee, bilaalibub kii binib kutukub biŋmoo pu nì bitanjakaliibi alaataa aŋmoo dɔ́miń ki bíi jáà nì bi.

¹¹Kujaau nìn píĺ ki pɔ́ɔkì, ama Unimbɔti nìn tútuǹ-bi ní Juuda yab jáń ki pɔ́ɔkiǹ-bi. Bi nín jáń ki pɔ́ɔkiǹ-bi mimmee ní bilaalibub gbāam̀ Juudasi yii ú yàntī bí ŋá mpèé. Bi nìn pōoǹ yii bi làá tīī Juuda yab tiwaŋkuti ní kí gíti tɔ̄ atuun aba mun kí tīī-bi.

¹²Juudasi nìn ká yii bi ŋūǹ kí dāá lafun kèetī-bi atuun tikpil poon. An pu ní u nìn kíí u nì bi ŋá mpèé. Bi ŋá mpèé míǹ ki dóòyee ní Bilaalibub nín gítí bi-tantibin.

¹³Juudasi nìn gíti jáń nì Kaaspoo tiŋki kin bi máń digundi ki túee. Atimbun tikpil di nìn kpáfì ki kóò niin.

¹⁴Binib gbanti nìn máká bi-guŋŋi ŋin pɔ̄ɔ̄yee nì tijin tin bi kpáafèe pu kí já kujaau. Bi nìn kíĺ ki bíi sìí Juudasi nì u-yab, ki sòoǹ nì bi tibɔfan kɔkɔ nì ti-bulifi. Kí kūtèe bi nìn gíti sòon̄ anyɔɔbun ŋin kaa kítì unil ń gíiǹ kí sòoǹee ki bēel̀ Unimbɔti.

¹⁵Ama Juudasi nì u-yab nìn kúuǹ ki yíiń duulinya kɔkɔ Dindaan un sá Mpɔŋkɔdaan ki nìn yāntì Joosuwa yuntiŋu agun lítì baa dū kujaau maasiimbi báà ubɔ ki gbēēyee. Míǹ boonee ní bi páatìi jéetì kitiŋee guŋŋi pu nì tininjati.

¹⁶Unimbɔti làtam poonee, bi nìn fōō kitiŋee. Bi nìn kūū binib tikpil. An puee dimɔɔl din nìn dɔ̄ ki pìl̄ niin di-waaŋŋu sá kii meeta alaataa anaayee nìn ŋá kii fatiku pùub̄ ki gbí di-nee ní.

¹⁷Juudasi nì u-yab yíkì Kasfoo tiŋki. Bi nìn cōom̀ kii ataŋkpee dilaataal nì imuŋku ili nyɔkɔm ní ki dūu bàn̄ kitiŋ kiba bi yíì-kì Karaasi. Bi nìn máń digundi ki tú-kì ní Juuda yab bin bi yíì Toob yabee kóò niin.

¹⁸Baa nìn gíti ká Tiimootee niin. U nìn búntì di sá yii waa nìn ŋúń ki ŋá tiba, ama u nìn dū bijanjaliibi bin ŋúb́ tijanjawan tiŋan puee ki kāaǹ laaba.

¹⁹Maakabee janjaliibi kpilib bili Doositee nì Soospateeree cūtì ki jáń nì bi. Bi nìn kūū bin Tiimootee dūu kāaǹ kitiŋ kin bi máń diguŋkpaandi gbanti poonee. Bin bi nìn kūūyee nìn jítì kutukub saalaa pu.

²⁰Maakabee nìn cúú u-janjaliibi ki yākatì akiti akiti, ní ki lēē bikpilib bin làá nīn kpòotī-ŋee. U nìn kùl̄ ki páaǹ Tiimootee boon. Bijanjaliibi bin còom̄ ataa puee binib kutukub dilaataal nì mmuŋku nì bitanjakaliibi kutukub bili nì alaataa aŋmoo nìn bí u-cee.

²¹Tiimootee nín gbìl̄ yii Juudasi tóobiń-uee, ní u yāntì binimpoobi nì mbiyaamu nín cá Kanayiim tiŋkin nì awaŋgul kɔkɔ. An nìn pɔ̄ɔ̄ bí já niin kujaau, kun puee niin sàmbiyaamu kɔkɔ nìn wáab́ wáab́ ní kaa wāā.

²²Juudasi janjaliibi bipeepeekaabi nín pée páaǹnée ní dinyoondi kɔ́ binannanliibi. Bi nìn nyùn̄ ŋkpatim ní ki kíǹ ki sáń an kɔkɔ pu lìbiti libiti. Di sá yii Unimbɔti un wāĺ tikɔkɔee lēē u-ba ki dàkā-bi. Iyunti ibee, bíǹ bi-ba janjajutiibi di nìn cáá bi-tàataajimmu ki tìì tɔb tiweendi àá ki sàatī ki pùutī tɔb.

²³Juudasi nìn kùl̄ ki bīiǹ binikpitib gbanti boon ní ki kūū binib kutukub mmuŋku nì saalaa.

²⁴Doositee nì Soospateer janjaliibi nìn cúú Tiimootee u-ba. U nìn gbāam̀-bi nciin poon yii bí pée gíiǹ-u ki líí kí taa ŋá-u tiba. U nìn bí-bi yii bi-kansikin biba baabi nì bi-nabiyaamu bí u-ŋaan. An puee tiba yaa pée ŋá-uee, bi làá kpɔ̀-bi.

²⁵Bi nìn sòon̄ ki yúntì ní Tiimootee pōoǹ-bi yii u làá gíiǹ bi-baabi kí líí kí taa ŋá-bi tiba. An puee Juuda yab nìn gíiǹ-u ki líì kí ŋmā kí fīī bi-nabiyaamu.

²⁶Boonee ní Juudasi fōō Kanayiim nì diwaal Atargatiisi tootipaaŋŋu. U nìn kūū niin binib kutukub mmuŋku nì biŋmoo ní.

²⁷Bi nín jáń ki pɔ́ɔkiǹ binannanliibi ki nāaǹ-bee, ní Juudasi nín cá kí já nì Eefrɔn tiŋki. Bi nìn máń agun ki tú kitiŋ gbanti ní Liisiyasi nì u-yab kóò niin. Binipɔmbi bin pɔ̄ɔ̄yee nìn cūtìi yúl̀ agunee nyɔkɔpu ki jáń nì tininjati. Kitiŋ gbantinee, kujaau maasiimbi nì tijanjawan tikpil nìn bí.

²⁸Ama Juuda yab nìn mēē ti-Dindaan un cáá mpɔn kí dū u-pɔŋŋu kí nàan̄ binannanliibi pɔŋyee. Bi nìn ŋúń ki jáń ki fōō kitiŋee ki kūū binib bin nìn bí ki jáà ki-puee kii kutukub mmuŋku nì biŋmoo.

²⁹Bi yíkì niinee ní ki cūtìi táká Siitoopooliisi tiŋki. Kí yīkì Jeerusaleem kí cù niinee, an nyēē ataŋkpee dilaataal nì ataŋkpee saalaa ní.

³⁰Ama Juuda yab bin nìn kóò niinee tùkū-bi yii: «Siitoopooliisi yab ŋá-ti tiŋan, ní ti nín nìn kɔ́ nnaabunee, bi nìn fōō-ti tiŋan.»

³¹Niinee ní Juudasi nì u-naacimbi jáam̀ binibee tiŋan. Bi nìn gíti bí-bi yii bí nīn nìkì ki dàkà Juuda yab kulaŋŋaŋfitiiu iwiin in bí ki dòońee poon. An kíǹ fiii bí jī Pantikooti jiŋaaliuee ní u nín gítí Jeerusaleem.

³²Pantikooti jiŋaaliu jítèe, ní Juudasi nì u-yab cūtìi jáń nì Idumee gɔminau Gɔɔrgiyasi.

³³Gɔɔrgiyasi nìn túŋkì-bi ki ŋúb́ bijanjaliibi kutukub bita nì bitanjakaliibi alaataa anaa.

³⁴Bi kíĺ kujaau ní bi kūū Juuda yab tikpil.

³⁵Utanjakal ubaatandaan Doositee un bí Bakeenɔɔr kitil poonee cìb̄ ki cúú Gɔɔrgiyasi. U nìn ŋúb́ u-wampeeŋkaati ní ki dáaĺ-u mpɔn. U nìn là kí cúú digaŋgam daan gbanti nì u-nimbiliŋ ní. Ama Tiiraasi yab tanjakaliu ubɔ yùkū ki léeǹ Doositee pu ní ki gāā ki gūutì u-ŋal. Gɔɔrgiyasi nìn ŋúń ki sáǹ ki ŋmátì ki cūtìi kɔ́ Mareesa tiŋkin.

³⁶Eesdriyaasi janjaliibi bin nìn bíi jáà an yúntèe nìn gīī ní púb. Niinee Juudasi gbāam̀ ti-Dindaan ki lī yii: «Dàkà yii a jáà ki kútí ti-pu kí nīn sá ti-janjakpiliu kujaau nee poon.»

³⁷Míǹ boonee ní u fáá njanjakuŋkuunti u-sooŋyi poon, ní ki gāā ijanjalan. Boonee ní u cūtìi nyáń Gɔɔrgiyasi janjaliibi pu ki túuǹ-bi ní ki yāntì bi sáǹ.

³⁸Kujaau boonee ní Juudasi kpáfì u-janjaliibi ki nín cá Adulaam tiŋkin. Ŋwiŋŋuŋfikaa làá nìn kíĺ dee. Bi nìn ŋá bi-ba circir ki nóó akoobil nín sá puee ní ki kāl̀ niin ki jíń ŋwiŋŋuŋfikaa jiŋaaliu.

³⁹Kutaa wúntèe ní Juudasi naacimbi cūtìi yōoǹní Juuda yab bin kpíì kujaaunee. An nìn páb́ di sá yii bi nìn là kí síb́-bi kí ŋàl̄ bi-baabi bi-dicaŋŋi kaakuliŋin ní.

⁴⁰Ama bi kpēē un kamaa kpíìyee wampeeŋkaati poonee, awaa wanti dee. Too, mara mun kaa nìn pú Juuda yab nsan tiwan gbanti ń nīn bí bi-cee. Niinee báà ŋma ká kun pu ní binib gbanti kpíìyee.

⁴¹Bi-kɔkɔ nìn kíĺ ki bíi gà ilan ki nyɔ́ŋkí ti-Dindaan un sòoǹ nnibiyaamu bɔti nì ibaamɔnee, úǹ un lèekī tin baa wāĺee ki pāantí mpaampiin puee.

⁴²Bi nìn mēē-u yii ú dū ikpiti in bi ŋée kí pɔ̄. Míǹ boonee ní Juudasi un sá ubaatandaanee sòon̄ nì u-janjaliibi. Báà ŋma nìn ká tin bāań ikpiti in bin kpíìyee ŋée puee. U nìn tīī u-janjaliibi kunyannyaau bí taa ŋá ikpiti gbanti juti.

⁴³Juudasi nìn yāntì bijanjaliibi tɔ́ animbil kii jitɔmbi kutukub bili pu. U nìn tú bi dū animbil gbanti ki cūnnì Jeerusaleem bí dūú ŋá saraa ikpiti gbanti pɔ̄tam pu. Juudasi nín nìn ŋá miŋyee nìn sá ditummɔntiil din unil máaǹ kí pàkèe, di sá yii u nìn máká bitaŋkpiibi fìkititam pu.

⁴⁴U yaa kaa bàà nìn máká yii ŋwiin bí bijanjaliibi bin kpíì nee làá dāá fìkitēe, ŋwimmeem min bi mèé bitaŋkpiibi puee bàà sá fám kaa cáá taapu dee.

⁴⁵Ama Juudasi nìn máká yii bin yú nì Unimbɔti deedeeyee làá dāá fōō tipaamɔntiil. Unil un sá Unimbɔti bɔɔyee nín máaǹ kí dàkafì puee dee. An pu ní u ŋá saraa gbanti bitaŋkpiibi yil pu bí ŋmā kí ká bi-kpitii pɔ̄tam.