Read Ntcham 2 Maccabées 13 Bible Online

2 Maccabées 13 - Ntcham bible

2 Maccabées 13

¹Abin 149 poonee, ní Juudasi nì u-janjaliibi gbìl̄ yii Antiyookuusi Eepatɔɔr nì bijanjaliibi tikpil nín cá kí já nì Juudee tiŋki.

²Bikàliŋkpilib kpiliu Liisiyasi un nìn kpēē-u u wíiǹee nìn céeǹ ubɔti. Báà ŋma nìn kpòotī bijanjaliibi bin còom̄ ataa puee kutukub dilaataal nì saalaa nì bitanjakaliibi kutukub biŋmoo nì alaataa ata nì kujaau kuntib mmuŋku nì bili nì janjatɔrɔkub bin cáá njimu mun jītí tiŋanee alaataa ata.

³Meeneelasi nìn kútì bi-pu, ní ki kíil̀ ubɔti yii ú lìntī nyɔkɔpu. Waa nìn ŋá míǹ kí fīī u-tiŋki, ama u nìn ŋá míǹ kí fàtīí kpántí usaraaŋakpil ní.

⁴Ama ti-Dindaan un sá bibɔtiibi kɔkɔ Bɔtiuee nìn lūkutì Antiyookuusi ní u gíí Meeneelasi pu diŋuul. Liisiyasi nìn lēē ki dàkā ubɔti yii unikpɔl gbanti di yì agìń ŋin kɔkɔ poon bi bí nee. Niinee ní ubɔti tīī mara yii bí cáá Meeneelasi kí cùnnì Beeree tiŋkin kí kpɔ̀-u niin kí nóó nì niin yab koobiliŋ.

⁵Kitiŋ gbantinee, sintil difɔkɔku kubɔ nìn bí ku-fɔkɔŋŋu nìn sá meetab mmuŋku nì biŋmoo ní ŋfantam gbí poon. Kudifɔkɔuee yilpuee, maasiin ubɔ bí niin ki màntī ki cáá binib ki fù ŋfantamin ijaan kɔkɔ pu.

⁶Bi yaa nìn cúú unil un fúkúl̀ kuwaadii àá ki ŋá ikpitikpaan ibee, an niliu ní bi nìn cáǹ kí jɔ̄m̀ niin. Niinee ní bí téé udaan kí tɔ̄ ŋfantamin ní ú kpú.

⁷Meeneelasi unikpitee nín kpíì ŋkúm miŋyee dee. Baa nìn síb́-u dikaakulin gba,

⁸ní u nìn máaǹ míǹ. Di sá yii u nìn ŋá ti-Dindaan saraafaŋŋu nì circir ŋmiŋu nì circir fantam tikpitil tikpil. Too, ŋfantam mun poon ní Meeneelasi kpíì.

⁹Ubɔti Antiyookuusi nìn còom̄ ki cá nlandɔkɔkpiti gbí u-yilin. U là kí sàaǹ Juuda yab kí jītíǹ u-baa nín nìn sāaǹ-bi puee.

¹⁰Juudasi gbìl̄ mimmee ní ki bí u-nibul kɔkɔ yii bí nīn mèé ti-Dindaan ŋwiimpu nì kunyeeu ki lì yii: «Ti-Dindaan, dāan̄ kí tí fīī-ti, di sá yii bi làá tí kàkatī-ti kí wàatī a-marau nì ti-tiŋki nì ti-circir nimbɔtidiiku dee.

¹¹Timbi a-nibul bàà kíĺ ki bíi ŋùŋfī dee. Ti-Dindaan, taa ti yàntī tí kɔ́ binikpitib nee ŋaan.»

¹²Juuda yab nìn ŋá ki nóó nì maree dicilpu. Bi nìn gbāā bi-yigbeeŋi tūū kitiŋ iwiin ita. Bi nìn bóob́ kinyɔkɔ ki súń ki mēē Unimbɔti un ŋān̄ee. Míǹ boonee ní Juudasi tīī-bi kunyannyaau yii bí bɔ́ntí kí nīn cí.

¹³U nìn sòon̄ nì bitindaŋkpilib ní ki lēē yii bi làá kíĺ nsan kí cùú ŋāŋkì tibɔti gbanti nì ti-Dindaan tūtuntam poon. Baa làá nīn kā ki cí ubɔti janjaliibi ń dāá já kí fōō Juudee tiŋki nì Jeerusaleem.

¹⁴Juudasi nìn dū kujaauee nín làá còom̀ puee ki ŋá duulinya kɔkɔ Náanliu ŋaan ní. Míǹ boonee ní u tīī u-janjaliibi kunyannyaau bí já kujaau kii bibaatandambee áli kí tin kpú bi-marab nì bi-bɔkpaaŋi nì Jeerusaleem nì kunimbɔtidii nì bi-tiŋki kɔkɔ pu. Juudasi nìn gāā u-janjanaapaal Moodiini tiŋki caŋin ní.

¹⁵Dinyɔɔbundi din u nìn tīī u-janjaliibi bí nīn tɔ́kɔ́ ki jáàyee di sá: «Unimbɔti di yì dijajil». U nìn lēē binaacimpɔmbi bin cáá dibaatandee, ní kunyeeuee, u nì bi cūtìi bíi jáà laakin ubɔti tantiu cɔ́ee pú. Niinee, u nìn kūū binib kutukub bili. Kí kūtèe, u-janjaliibi nìn kūū kunti un sá bi-kɔkɔ kansikin ukpaanee nì un ŋàal̀-uee.

¹⁶An ŋá mimmee ní dinyoondi kɔ́ binannanliibi ní fìkil fikil kɔ́ dijanjanaapaalin. Dijajil gbanti boonee ní Juudasi nì u-yab nín kùǹ

¹⁷ŋyunti ŋun ŋwìiń bíi nyēēyee. Bi nìn ŋúń ki ŋá míǹ ti-Dindaan un di nìn tútúǹ-bi ki wúń bi-puee pu ní.

¹⁸Ubɔti nìn béè yii Juuda yab sá bininjab. Niinee ní u là kí ŋá nciin kí já kí fōō bi-paaŋyi.

¹⁹U nìn nín cá kí já nì Beeti-Suur tiŋki. Kitiŋ gbanti nìn sá Juuda yab tiŋki ní bi máń digundi ki tú-kì. Ama Juuda yab nìn jìn̄-u. Bi nìn jáń ki pɔ́ɔkiǹ-u ní waa ŋúń ki ŋá u nín bàà mākafì puee.

²⁰Juudasi nìn tīī Beeti-Suur yab tin an nìn bàlifēe.

²¹Ama Roodookuusi, Juuda yab janjaliu ubɔ nyáń u-yab boon ki dū bi nín bɔ́ntì kí já pu dibalinee ki nyáfiǹ binannanliibi. Bi nìn nyàab̄-u ki ká-u ní ki kūū-u.

²²Ubɔti tí ká Beeti-Suur yab nliliitiim ki sòon̄ nì bi. U nìn là u nì bi ń ŋá mpèé. Bíǹ nìn kíí míǹ ní Antiyookuusi yāntì u-janjaliibi búntì ki wāatì-bi.

²³Boonee ní u cūtìi jáń nì Juudasi nì u-yab ní bíǹ pɔ́ɔkiǹ-u. Ubɔti nìn yāntì Fiiliipi Antiyɔɔsi tiŋkin ú nīn kpèé dibeel pu bɔti. Fiiliipi nìn fātìi bíi jáà nì Antiyookuusi ní waa ti nyí tin poon u bée. Niinee ní u fātì Juuda yab pu bí sòoǹ kí gbìlīǹ tɔb. U nìn tīī-bi tin kɔkɔ bi bālifèe. U nìn pūtì kí ŋá min kítèe kí tīī-bi ní u nì bi ŋá mpèé. Míǹ boonee ní u ŋá saraabi ki pú tiwan ki tīī kunimbɔtidii tinyool.

²⁴U nìn fōō Maakabee mmɔntiim. Boonee ní ubɔti dū Eegeemooniidi ki kāaǹ kí yòon̄ Pitooleemayiisi kí cáá sāā Geeree tiŋki gɔmina.

²⁵U nìn cūtì Pitooleemayiisi, ama an kaa nìn mɔ̄ǹ kitiŋ gbanti yab u nì Juuda yab nín ŋá mpèéyee pu. Bi nìn fōō diŋuul ní ki nìn là yii ubɔti ń kpìtī mpèé ŋun u ŋá nì Juuda yabee.

²⁶Niinee ní Liisiyasi fōō dinyɔɔbundi binib kɔkɔ nimbiin, ní ki bíi mɔ́tí nì u-pɔŋŋu kɔkɔ mpèé ŋun bi nì Juuda yab ŋée pu. U nìn ŋúń ki sòon̄ nì bi ní bi gbìl̄ taapu ki sɔ̄ŋkì bi-pɔbil. U nìn ŋúń ki gíiǹní-bi nsammɔnti pu. Míǹ boonee ní u nín cá Antiyɔɔsi. Ubɔti Antiyookuusi nín cūtìi jáń nì Juuda yab ki dāa yāntèe, tin jítèe dee.