Read Ntcham 2 Maccabées 2 Bible Online

2 Maccabées 2 - Ntcham bible

2 Maccabées 2

¹«Ti ká tigbaŋkpikil poon yii Unimbɔti bɔnaatiliu Yeereemii nìn tīī bin bi nìn cúú ki cáǹ kuyuŋuee mara yii bí lēē nsaraafan pu ŋŋmi kí kpáaǹ kii ti nín dá láá ká puee.

²Kí kūtèe, ubɔnaatil nìn dū marab gbɔŋku ki tīī-bi, ní ki bí-bi yii: <Ní taa súntí ti-Dindaan marab pu. Ni yaa tin ká awaa ŋin bi dū sindaariya àá animbil ki mɔ́ɔ́ nì tiwan tin bi dūu nyɔ̄kɔntì-ŋee, ní taa yàntī án kīil̀-ni.

³Yeereemii nìn gíti tīī-bi isaŋki nee jutiibi iba mun. Cilinjee, u nìn tīī-bi kunyannyaau bí dū bi-ba kí nákáǹ ti-Dindaan marab nì bi-pɔbiliŋ kɔkɔ.>

⁴«Kugbɔŋu gbantinee, an ŋmàn̄ yii Unimbɔti nìn kpáafì u-bɔnaatiliu ní u yōoǹ kunimbɔtidiin circir kɔŋkooŋŋu tantiu nì dipoondi dakaau ki kpáàa búntì. Míǹ boonee ní u jɔ́m̀ dijool din pu Mooyiisi nìn yúl̀ ki kpēē kitiŋ kin Unimbɔti nìn tīī u-nibulee[2].

⁵Yeereemii nín bàn̄ niinee, u nìn ká kutaŋkpanaakoou kukpaaŋŋu kubɔ. U nìn dū tanti nì dipoondi dakaau nì nsaraafan ŋun pu bi tùutī talaaluee ki ŋá ku-poon, ní ki pīiǹ kinyɔkɔ.

⁶Bin nì Yeereemii nìn cūtèe nìn dākafì yii bi làá fàtīí gítí kí dáań nsan, ama baa ti ŋúń ki béè-ŋu.

⁷Yeereemii nín gbìl̄ mimmee, ní u wòon̄-bi ki bí-bi yii: <Mpaan gbantee, ubɔ kaa làá ŋmā kí béé-ŋu kí nīn cí ŋyunti ŋun Unimbɔti làá dāá sɔ̄ u-nibul saai kí fàtīí kpāfì-bee.

⁸Ŋyunti gbantee ní ti-Dindaan ń dāá fàtīí dàkà tiwan gbanti. U làá dāá lēē u-nyooti kí dàkà ditagbandin, kii u nín nìn lēē ki dàkā Mooyiisi yuntiŋu, ní boonee ki dāa lēē ki dàkā ŋyunti ŋun Saloomɔn mēē ki dū kunimbɔtidii ki súee[3].>

⁹«Bi máafì mun ubɔti Saloomɔn nín nìn cáá iciin pu ki ŋá saraabi bin ki dū kunimbɔtidii kun u nìn máńee ki sú Unimbɔti puee[4].

¹⁰Mooyiisi nìn mēē ti-Dindaan ní ŋŋmi nyánní yilpu ki dɔ́miń ki wùn̄ saraabi. Míǹ mbaantiim ní Saloomɔn mun mēē ní ŋŋmi nyánní yilpu ki wùn̄ saraabi kɔkɔ múb[5].

¹¹Mooyiisi nìn lī yii: <Kuwaŋkuluu kun bi dūu ŋá ikpiti pɔ̄tam saraauee, bi dūu wùn̄ ŋŋmi, kun puee taa ŋmɔ́ ku-nanti[6].>

¹²Saloomɔn nìn jíń jiŋaal iwiin inii, kii bi nín pée jīǹ jiŋaal iyunti iba poon puee ní.»

¹³«Bi ŋmàn̄ tibɔbaantiil gbanti tigbɔn gbantin nì Neeyeemiya nín ká tin ki ŋmàn̄ ki síiǹee poon. Tigbɔn gbanti poonee, an lī mun min ní Neeyeemiya náań laakin bi sīintí tigbɔnee. Niin ní u kóoǹ tigbɔn tin sòoǹ bibɔtiibi nì bibɔnaatiliibi puee ki kpáfì, ki kpáaǹ Daafiidi nì bibɔtiibi nín ŋmàn̄ tigbɔn tin saraabi puee.

¹⁴Míǹ mbaantiim ní Juudasi mun kóoǹ tigbɔn tin kɔkɔ nìn yàl̄ an kɔkɔ tijáti tin bi jáń nì tee puee ki kpáfì. Tigbɔn gbanti bí ti-ŋaan.

¹⁵An yaa sá yii ni nyàab̀-tèe, ní tɔ̄ń binib ti-cee bí dāá fōō.»

¹⁶«Ti làá jī bi nín ŋá kunimbɔtidii circir puee jiŋaaliu. An pu ní ti bíi ŋmà-ni kugbɔŋu nee ni mun ń ŋá míǹ mbaantiim.

¹⁷Unimbɔti fīī u-nibul kɔkɔ. U gíiǹ báà ŋma tiŋki nì dibeel pɔŋŋu nì bisaraaŋaliibi tundi din bi tūǹ kunimbɔtidii poonee ki tīī-bi,

¹⁸kii u nín nìn pōoǹ pu mara poonee. An pu ní ti máká yii an kaa làá yúntí, Unimbɔti làá sɔ̄ ti-saai. Di sá yii u fīī-ti ki nyántì inaabukpaan poon ní ki ŋá kunimbɔtidii circir[7].»

¹⁹Tibɔkpaandi jítì Maakabee Juudasi nì u-naalib yuntiŋu. Bi nìn ŋá Kunimbɔtidikpaaŋŋu circir, ní bi fātìi dū nsaraafan ki sú Unimbɔti.

²⁰Bi nìn jáń nì Antiyookuusi Eepiifaani nì u-jipɔɔn Eepatɔɔr.

²¹Yilpu pɔŋyi nìn dɔ́miń ki tútúǹ bin mɔ́tì Juuda yab marab pu nì tiniti nì difaŋgiilee. An pu ní bi ŋúń ki jáń ki fōō kitiŋ kɔkɔ ki jìn̄ binannanliibi janjakitiŋ, min kamaa baa nìn náaǹee.

²²Bi fātìi fōō kunimbɔtidii kun nyáń diyindi duulinya kɔkɔnee. Bi jáń ki fōō Jeerusaleem, ní ki ŋá mpɔn bí nīn nóó marab bin bi bàà làá nìn kpìtēe[8]. Bi yaa ŋúń ki ŋá tin bí nee kɔkɔee, an sá diyimɔɔl din ti-Dindaan pú-bee nì u-ŋaŋkpaanti pu.

²³Ugbaŋŋmal Jaasɔn un sá Siireen tiŋkinee ŋmàn̄ tibɔti gbanti ki ŋá tigbɔn tiŋmoo poon ní. M làá màkan̄ kí kūlifì-ti kí ŋá kugbɔmbaantiiu poon.

²⁴Mbɔmaam gbanti cáá ikaan ŋmaŋmabiti tikpil, ní tibɔti tin bí poonee wīikí tikpil. An pu ní bin là kí bīfì kí béé tibɔti tin kā mbɔmaam gbantinee làá ká yii an pɔ̄ɔ̄.

²⁵An puee m nyàab̄ kí ŋmà tin làá nīn mɔ̄ee kí tīī bin pée là kí kàaǹee. Kun m lèe di sá yii tibɔti nee ń taa nīn pɔ̄ɔ̄ dicuul ki tīī bin là kí nīn téetí ti-puee. Kun m lèe di sá ḿ tūtuǹ bin kɔkɔ làá dāá kàaǹ kugbɔŋu neeyee.

²⁶M tīī m-ba ditundi kí kūlifì tibɔti nee, ní an tīī-mi ditundi tikpil. An kaa sá sɔkɔmii tundi ki tīī-mi: m nyáń kutuntuŋu kaa gèeǹ kunyeeu di-pu.

²⁷An bí kii unil un bíi ŋáań tijin kí fōō binicambee nín pɔ̄ɔntí tijinee ń fáatiǹ-bi puee ní, ní ni nyí yii an kaa sá sɔkɔmii. Ma mun tundi pɔ̄ɔ̄ kii ujiŋŋal gbantee ní. Nì míǹ kɔkɔee, m kíí kí tɔ̄ ditumpɔɔl gbanti nì dipɔbil diba kí tūtuǹ binib tikpil.

²⁸M làá yàntī ugbaŋŋmal ń bɔ́bití tin jítèe kɔkɔ tiŋan. Mamee, m làá pée tīī tin m làá kūlifèe abɔjal abɔjal ní.

²⁹Bi yaa làá mā kudipɔŋuee, udimal máaǹ kí kpèè kudiiyee mātam tundi kɔkɔ ní. Ama un làá pīil̀-ku ní kí nyāantì-kùee úǹ pée nyàab̀ kun u làá dūú nyāantì-kuee ní. Míǹ ní m dàkafī yii an sá ki tīī ma mun.

³⁰Un sòoǹ mmaam bɔtee máaǹ kí bīfì kí kɔ́ tin u làá māafèe poon tiŋan. U máaǹ kí nyɔ̀kɔfì kí béé tibɔtee nì ti-keeŋkeem.

³¹Ama un là kí kūlifì tibɔtee kí ŋmà binib tikpil ń ŋmā kí kàaǹee kaa máaǹ kí sòoǹ tikɔkɔ.

³²M làá kíĺ mbɔmaam nee, kí taa gbéeǹ tiba tin m dáá sòon̄ nee pu. Di sá yii á ŋmà tibɔkilkaal tin fɔ̀kɔ̀ee ní kí kūlifì tibɔti tin bi làá māafèe boonee, an sá kii digbaandee ní.