Read Ntcham 2 Maccabées 3 Bible Online

2 Maccabées 3 - Ntcham bible

2 Maccabées 3

¹Ŋyunti ŋun Ooniyasi nìn sá usaraaŋakpilee, circir tiŋki Jeerusaleem yab nìn bí ŋgbansɔŋfin ní. Bi nìn tɔ́ marab tiŋan. Di sá yii usaraaŋakpil Ooniyasi nìn néeń Unimbɔti, ní ki ná tikpitil.

²Bibɔtiibi bi-ba nìn tɔ́ kunimbɔtidii, ní ki nìn pūǹ-ku tiwannyaandi.

³Míǹ ní Asii tiŋki bɔtiu Seeleewukusi nìn lèekī úǹ u-ba gaajawanti poon ní ki dāā tiwan tin bi cáa ŋáań saraabee.

⁴Kijapaai kiba nìn bí bi yíì-kì Siimɔn. U nìn sá usaraaŋal ki bí Biiliga kitilin. Úǹ ní bi nìn lēē ú nīn kpèé kunimbɔtidii tundi. Usaraaŋakpil Ooniyasi nìn tīī mara yii bí nīn cí kitiŋee nyɔmmu. Ama Biiliga kaa nìn kíí ki tɔ́kɔ́ǹ u-pu.

⁵Waa nìn ŋūǹ kí sòoǹ kí líí Ooniyasi. Niinee ní u cūtìi ká Apoolooniyuusi, Traseeyaasi jipɔɔn. Ŋyunti gbantee, úǹ di nìn sá Siiriikpaan nì Feenisii gɔminau.

⁶U nín tùkū-u puee sèé: «Jeerusaleem Nimbɔtidiiku poon tigaajati gbí ní an kaa cáá bí lì. Baa ŋūǹ kí kàaǹ animbil ŋin bí niinee nyɔkɔm. Animbil gbanti jítì saraabi bin bi ŋáańee pu kpataaa. Ti ŋūǹ kí fōō animbil gbanti kí tīī ubɔti».

⁷Apoolooniyuusi cūtìi ká ubɔti. U máafì-u Siimɔn nín sòon̄ nì u tigaajati tin puee. Niinee ní ubɔti dū u-kàliŋkpiliu Eeliyoodoor ki tú Jeerusaleem. U nìn tīī-u mara ú cùú kóoǹní tigaajawan tin bí niinee.

⁸Eeliyoodoor kaa tāaǹ ní ki búntì. U nìn ŋá kii u cá kí kpèè Siiriikpaan nì Feenisii timmuee. Ibaamɔn poonee, u nìn cá kí ŋá kii ubɔti nín bí yii ú cùú ŋá puee ní.

⁹U bàn̄ Jeerusaleemee, usaraaŋakpil nì kitiŋin yab kɔkɔ nìn fōō-u mmɔntiim. Eeliyoodoor nìn tùkū-bi kun pu u dɔ́mińee. U nìn máafì-bi tin bi tùkū-u tigaajati tin bí kunimbɔtidiinee pu ní ki bālifì-bi yii: <Tin bi sòon̄ tigaajati gbanti puee sá tiŋmanaaa, an kaa sá?>

¹⁰Usaraaŋakpil nìn kíí-u yii animbil ŋin bí kunimbɔtidiinee dijandi sá ki tīī bikpiipoobi nì ataŋkpiibil ní.

¹¹Toobii jipɔɔn Yiirkan mun yì dijandi, unil gbantee sá unikpaan ní. Ama tin Siimɔn unikpiti cūtìi mɔ́ntì-nee kaa sá mbaamɔn. Animbil ŋin pée bée nyáń kiiloobi kutukub saalaa nì ubɔ ní sindaariya sá kiiloobi alaataa aŋmoo.

¹²Kí kūtèe, kunimbɔtidii nee sá kukpaaŋŋu ní ki sá circir ní unil kaa ŋūǹ kí bīil̀-ku ní bi nyí ku-pu duulinya kɔkɔn. An puee binib máká ku-pu ní taa ŋūǹ kí yòon̄ tin sá bi-wantee.

¹³Ama ubɔti nìn tīī Eeliyoodoor mara. An puee u nìn pée gbíntìi cɔ́ yii an sá bí yòon̄ animbil gbanti kí cáá ŋá ubɔti nimbidakaau poon ní.

¹⁴Ŋwiin ŋun u yóoǹee bàn̄ee ní u nín kóò kunimbɔtidiin kí kàaǹ tigaajawan tin bí poonee. Kitiŋin binib pɔbiliŋ nìn bíil̀ tikpil.

¹⁵Bisaraaŋaliibi nìn dū bi-saraaŋabɔkutiŋ ki pēeǹ. Bi nìn tātìi gbāaǹ nsaraafan nimbiin ki mēē Unimbɔti un di náań marab bin mɔ́tí tigaajati tin yú kunimbɔtidii poonee pu.

¹⁶A yaa nìn ká usaraaŋakpilee, an nìn cáá inimɔɔn. Di sá yii u-nimbiin nìn páĺ ní a ŋūǹ kí wāl̀ yii an páb́-u tikpil.

¹⁷U nìn fāŋkì tikpil ní u-wunti jìkì, ní an nìn dàkà yii u bíi jīǹ falaa.

¹⁸Binib nìn nyēē bi-diiŋŋin malaa, ki kpáfí akiti akiti ki mèé. Bi nìn là kí pìin̄ nsan bí taa kɔ́ǹ kunimbɔtidii icoon.

¹⁹Binimpoobi tikpil nìn yàl̄ ki gbí adanni. Bi nìn gbìn̄ kpɔsatab ki lēē abii ki bíl̀. Bisapɔmbi bin baa nìn kíí bi nyánnée, biba nìn sáń ki cá mpunyɔmu watil pú, ní biba sáń ki cá mpunyɔmu pú, àá kudii yilpu guŋŋi pu, ní biba ŋōō tɔkɔlab pu.

²⁰Bi-ŋalii nìn túĺ kutaa ní bi tíminsí ki yíì Unimbɔti.

²¹An nìn gíti gbí falaa á ká binib nín dɔ̄ dɔ̄ kitiŋ ki ŋmàl̄ tɔbin ki mèé puee. Usaraaŋakpil úǹ nìn yú ki cí nì kunimbaau.

²²Binib nìn bí ki mèé ti-Dindaan Mpɔŋkɔdaan ú wúń tigaajawan tin bi dūu yóoǹ kunimbɔtidiin, kí kpāafì-tì kí tīī bin cáań-tì ki yóoǹee.

²³Ŋyunti gbantee, Eeliyoodoor úǹ pée bíi ŋáań tin bi sòon̄ ki síiǹee.

²⁴U nì u-janjaliibi bāań ki yú ki kɔ́ĺ kunimbɔtidii gaajawanti. Niinee ní ŋfam min bí yilpuee Dindaan nì Mpɔŋkɔdaan yāntì maamaacikpaan ubɔ jítì niin. Niinee bin kɔkɔ mākaǹ kí kɔ́ee fāŋkì Unimbɔti pɔŋŋu. Bi-wunti nìn kpíì ní baa ti cáá mpɔn.

²⁵Di sá yii bi nìn ká utaamu ubɔ pēeń tiwannyɔkɔntikaal timɔntiil ní un kā-uee nimbiin nìn cáá tifaandi. An nìn bí kii uninja gbanti nìn pēē sindaariya bɔkutil din wúń u-puee ní. Utaamuee nìn wúliń nì mpɔn Eeliyoodoor pu kí dū nyɔkɔpu tafuŋfukuti kí gāā-u.

²⁶Binaacimpɔmbi bili nìn cílìń bi-pu dicilpu. Bi nìn cáá mpɔn tiŋan ní ki ŋān̄ kunyaaŋŋu, ní ki pēē tiwannyaandi. Ubɔ nìn yúl̀ Eeliyoodoor ŋaŋgiil pú ní un kíǹee yúl̀ u-ŋaŋgan pú, ní ki gbáà-u kaa gbèentí. Bi nìn nāfì-u tigbati tiŋan pu.

²⁷Niinee ní Eeliyoodoor lítì dicilpu kitiŋ ní dibɔmbɔŋkpaandi dɔ́miń ki bīiǹ u-pu. Binib nìn dɔ́miń ki yōoǹ-u ki páaǹ kilambaŋ kin bi ŋúb̀ee pu.

²⁸Unil un dáá kɔ́ kunimbɔtidii nimbikpaafidiikun nì kunipaau nì u-janjaliibee, úǹ di dɔ̄ kaa ti ŋūǹ kí ŋá tiba kí tūtuǹ u-bee. U-naacimbi nìn yōoǹ-u, ní ki nìn béè yii an sá Unimbɔti pɔŋŋu.

²⁹Unimbɔti pɔŋŋu nìn fáá Eeliyoodoor ki bíl̀, u dɔ̄ kaa ti cáá kinyɔkɔ kí sòoǹaaa, kaa ti cáá dimákal yii u làá ŋmátí.

³⁰Ŋyunti gbantee, kitiŋee nib nìn bíi jáaḿ ti-Dindaan un di wúń u-circir paaŋŋu pu nì maamaaci poonee. Ama kí wàatī ŋyunti gbanti ń nín bàńee, binib nìn gbí kunimbɔtidii poon ki nyùn̄ ŋkpatim kaa ti nyí tin poon bi bée. Kɔŋkɔnnee dipɔɔpindi nì mmɔn di gbí binib bin bí ku-poonee, kun puee ti-Dindaan dàkā u-pɔŋkpaaŋŋu.

³¹Dicilpu niinee ní bin táá Eeliyoodooree biba gbāam̀ usaraaŋakpil Ooniyasi yii ú mèè Yilpu Fɔ́ŋŋŋ Nimbɔtiu ú gíiǹní uninja un dɔ̄ ki tóob́ ŋkúm nee dimaŋfalin.

³²Usaraaŋakpil nìn fāŋkì yii ubɔti ŋūǹ kí dàkafì yii Juuda yab là kí kpɔ̀ ubɔti tuuŋŋu. An pu ní u ŋá ti-Dindaan saraa Eeliyoodoor ń pɔ̄ɔkì.

³³Usaraaŋakpil nìn ŋá ikpiti pɔ̄tam saraau. Ŋyunti gbantee, binaacimpɔmbi bilee tí lēē bi-ba ki dàkā Eeliyoodoor. Bi yú ki pēē tiwambaantiilee. Bi nìn bí-u yii: «Jāam̀ usaraaŋakpil Ooniyasi tikpil. U-pu ní ti-Dindaan làá tīī-si dimaŋfal.

³⁴Unimbɔti di fáá-si. Kɔŋkɔnnee, á māafì báà ŋma Unimbɔti pɔŋkpaaŋŋu nín sá ŋuŋyee.» Bi sòon̄ míǹ ki dóòyee ní ki wáŋkì.

³⁵Eeliyoodoor nìn ŋá ti-Dindaan saraa. U nìn mēē ti-Dindaan un yāntì u ŋmátèe ki yúntì. Míǹ boonee ní u kāaǹ Ooniyasi ní u nì u-janjaliibi nín gítí ubɔti cee.

³⁶Binib kɔkɔ nimbiinee ní u bíi máafí tin Unimbɔti un sá ukpaanee ŋá u-nimbigbɔŋu kée.

³⁷Ubɔti nìn bālifì-u yii: «Ŋma ní ti gíti ŋūǹ kí tɔ̄ Jeerusaleem dee?» Ní Eeliyoodoor kíí-u yii:

³⁸«A yaa cáá unannanli ubɔ àá ubɔ bí ki jáà nì a-beelee, á tɔ̄ udaan niin. Udaan yaa gítìń kaa kpíì, a làá ká bi nín gbáń-u ŋkpitim puee. Di sá yii Unimbɔti dàkà u-pɔŋŋu mpaan gbanti pu an kaa cáá bí lì.

³⁹Unimbɔti un kóò yilpuee wúń kunimbɔtidiiyee pu, ki cí-ku. U fátí ki kù bin kpāantí ilandɔkɔkpiti ki kóò ku-nee.»

⁴⁰Tin jítì Eeliyoodoor pu, nì an nín ŋá pu ubɔ kaa gbēē kunimbɔtidii gaajawantee dee.