Read Ntcham 2 Maccabées 6 Bible Online

2 Maccabées 6 - Ntcham bible

2 Maccabées 6

¹Ŋyunti gbanti jítì boon fiiiyee, ní ubɔti dū uateenja Geerɔnti ki tú Jeerusaleem. An nìn sá bí páb́ Juuda yab bí fá bi-yaajakoobiliŋ, kí taa nín̄ gíti ŋúb́ Unimbɔti marab.

²Kí kūtèe, u máaǹ kí kɔ́ǹ kunimbɔtidii tijɔkɔndi, ní kí dū-ku kí sú diwaal Seesu, dijool Oolimpi waal. U nìn máaǹ kí dū kunimbɔtidii kun bí Geerisiim jool puee kí sú diwaal Seesu, dinincaŋfool waal, kii kitiŋ gbanti nib nín bālifì puee.

³Animbinaaman nìn pɔ̄ɔ̄, ní an nìn píĺ samaa kɔkɔ.

⁴Di sá yii bin kaa sá Juuda yabee nìn ŋáań bi nín là puee ní kunimbɔtidiin. Bi nìn kɔ́ǹ-ku fìkil fikil poon. Bi nì nnimpulaakpaamu nìn gbíiĺ ní ki dɔ̀ nì mu kunimbɔtidii circir cindin. Bi nìn cāabìń tin kòóyee niin.

⁵Bi nìn cáá tiwaŋkuti tin kòóyee ki pāantí nsaraafan pu, tiwaŋkuti tin mara kaa pú nsan bí dūú ŋá saraayee.

⁶Baa nìn pú Juuda yab nsan bí kàl̄ ŋwiŋŋuŋfikaa dal, àá bí jī bi-naanjab jiŋaalib, àá bí yíiń-bi yii bi sá Juuda yab.

⁷Uŋmal kamaa, bi yaa làá jī ubɔti maaliwiiŋŋu jiŋaaliuee, bi nìn páb̀-bi bí ŋmɔ́ tiwaatootinan, ní an nìn sá tin pɔ̄ɔ̄yee ki tīī-bi. An yaa nìn bàn̄ bí jī diwaal Diyooniisoosi jiŋaaliuee, bi nìn páb̀-bi bí cíkiń mbeefuulimu mun bi dū afiŋfin nì tifaal kí lùn̄ee kí páań diwaalee boon ki còom̄ ki tìì-dì jilma.

⁸Bin kóò Pitooleemayiisi tiŋkinee nìn bālifì bí nyāntí mara kí ŋmà ki síiń yii Greeki yab timmu mun pìlīǹ Juudee tiŋkee, bí síiń Juuda yab marabaanti gbanti, an dàkà yii bí páb́-bi bí jī tiwaatootijin.

⁹Bí làntì Juuda yab bin làá yíí kaa làá nóó Greeki yab koobiliŋee. An puee an kaa pɔ̄ɔ̄ unil ń kpèè kí wāl̀ nnaabu ŋun làá páannée.

¹⁰Míǹ puee bi nìn cūnnì binimpoobi bili ibɔsoon, kun puee bi nìn yāntì bi gíí bi-biyaamu akpancan. Bi nìn kúĺ bi-biyaamu ki lúntì bi-biiŋi pu ní ki cáá-bi ki yìiǹ báà ŋma nimbiin kitiŋ kɔkɔn. Boonee ní bi dū-bi ki tɔ́kɔǹ diguŋfɔkɔl diba pu ní ki téé-bi ki lúkú boon pú.

¹¹Juuda yab biba nìn nóó dicilpu ki cūtìi kɔ́ titaŋkpanaakɔtin, Jeerusaleem caŋin kí jī ŋwiŋŋuŋfikaa jiŋaaliu dibalin. Binib nìn cūtì Fiiliipi cee ki bīitì bi-pu ní bi wùn̄ bi-kɔkɔ ŋŋmi. Binibee nín tɔ́ circir wiiŋŋuee puee, baa mɔ́tì bi-ba pu.

¹²M gbàam̄ bin kɔkɔ làá kàaǹ kugbɔŋu neeyee yii bí taa yàntī inaabu nee ń yɔ̀tī bi-wunti. Bi máaǹ kí béé yii falaabi gbanti sá kí dàkà ti-nibul ní, an kaa sá kí kúntí-dì.

¹³Di sá yii an bàn̄ binib ń gíí Unimbɔti pu diŋuul. U yaa kaa dáaĺ bi-tafal dicilpu dicilpu, ki yàntī bi tūǹ atuŋkpiti ki yúntée, an sá kí dàkà u-ŋaŋkpaanti ní.

¹⁴Kí dáaĺ anibul ŋin kíǹee tafalee, tiwan kɔkɔ Dindaan cīití nì kimɔtii ní kí yàntī ŋí ŋá ikpiti kɔkɔ nì i-bulifi. Ama an kaa sá míǹ ní u lēē kí ŋá-ti.

¹⁵Waa yàntī tí ŋá ikpiti kɔkɔ nee nì i-bulifi kí dóó kí wàatī ní kí nín dáaĺ ti-tafal, see ŋwinjoolkaa dal bɔti.

¹⁶An pu ní waa páatí ti-pu u-poommɔŋŋu. Unimbɔti yaa cáá falaabi ki dàkà u-nibulee, waa dū-dì ki fá.

¹⁷M pée là kí téetí-ni ibaamɔn gbanti ní. Tibɔti nee boonee, tí fàtīí gítiń ti-bɔti pu.

¹⁸Eelasaar nìn sá bimaradakaliibi kansikin ubɔ ní. U nìn púĺ tikpil ní ki nìn ŋān̄ kunyaaŋŋu. Bi nìn páb́-u ú ŋmɔ́ ugbeeti[11] nanti ní ki cúú u-nyɔkɔ ki wāatì mpɔn.

¹⁹Ama Eelasaar nìn kíí kí kpú nì jilma ki jítiǹ ú nīn bí dimaŋfalin nì icoo. U nìn pée còom̄ u-ba pu ní ki cá laakin bi làá kpɔ̀-uee.

²⁰U nìn púul̀ tinan tin kā u-nyɔkɔnee ki fá. U nìn ŋá míǹ kí dàkà un sá kamaa yaa bí tibɔti gbantinee, u nín máaǹ kí ŋá puee dee: ti máaǹ kí ká dipɔbil kí yíí tin kòóyee, báà ti yaa néeń dimaŋfal.

²¹Binib bin nìn ŋá tiwaatootijin tin jáà nì Mooyiisi marau gbantee nìn nyí Eelasaar an yúntì. Bi nìn cúú-u ki kākatì ŋkpaanceeti ki sáŋkì-u yii: «Cùú cáań tinan tin sii a-ba tɔ́kɔǹee kí ŋmɔ́. Á ŋá kii tiwaatootinan tin ubɔti tīī mara yii bí ŋmɔ́ee ní a bíi ŋmóò.

²²A yaa ŋá mimmee, a làá nyā ŋkúmin ní bí fōō-si nì tiniti, kun puee ti nì sii bɔɔtiiku kaa sá díǹ.»

²³Ama Eelasaar nìn lēē jilma lēetam. U nìn sá unil un púĺee, ní báà ŋma nìn tɔ́-u u-puti nì u-yikpiti tin pīiǹ káŋkaŋee pu. Doooo u-biyatin kí dāá sāā u-tikpitee, baa kāntí u-pu ikpiti iba. Ama u nìn lēē dileel din cáá disíndi ki jítiǹ tíǹ kɔkɔee, cilinjee tin nóó nì circir marau un Unimbɔti u-ba yóoǹee. An pu ní u nìn bālifì yii bí cáá-u kí cùnnì ditaŋkpiilin malaa.

²⁴U nìn kútì ki lī yii: «Unil un cáá m-biŋŋi nee jutee kaa máaǹ kí nīn cáá mili mili bimbim. An yaa sá fám binipɔmbi tikpil làá dàkafì yii m cáá abin saalaa kpá dilaataal, ama ní ki lēē kí nóó anicaŋkoobil.

²⁵Mili mili bimbim gbanti puee, bi làá yàntī án kīil̀-bi man pu. M nín bí pu nee, an gíti kíǹ-mi iwiin iŋa ḿ dūú kàl̄ kitiŋ nee pu, ama án làá nīn sá icoo ní ki tīī m-tikpiti ní ḿ fá m-jilmau.

²⁶M ŋūǹ kí lóotí kí nyā binib tafadaaldi din bí nee poon. Ama m yaa bí dimaŋfalin àá ŋkúminaaa, maa làá ŋmā kí nyā Yilpu Fɔ́ŋŋŋ Nimbɔtiu bɔsooŋyin.

²⁷An puee m yaa ká dipɔbil ki kpíì díǹ, m tīī m-tikpiti jilma dee.

²⁸M yaa ŋá mimmee, m tīī binipɔmbi ŋabikamɔnti un làá dàkà-bi min bi máaǹ kí dū bi-maŋfal kí tīī circir marab bin unil máaǹ kí nīn tɔ́ee nì jilma kí taa gùgufèe.» U sòon̄ míǹ ki dóòyee ní ki túĺ nsan cáaa ki nín cá laakin bi làá kpɔ̀-uee.

²⁹Bin nìn cáá-u ki cée nìn wāĺ yii anyɔɔbun gbanti nìn sá tigbaambɔti ní. Niinee ní bi cúú bi-bimbim ki kpántì: binib bin bàà bíi dàkà-u kulaŋŋaŋfitiiuee kpáàa dūu kpántì bitɔŋfitiibi.

³⁰Ŋyunti ŋun bi bíi gbáà-u u làá kpúee ní u bíi dùǹ ki lī yii: «M-Dindaan nyí tikɔkɔ tiŋan. U nyí yii m bàà ŋūǹ kí ŋmátí kí nyā ŋkúm nee ŋaan. Ama kɔŋkɔnnee, bi bíi gbáà-mi anaalab ní m-wuŋgbaŋŋu bíi jīǹ falaa. Ama m-pɔbil poonee, nì mmɔn ní m bíi jīǹ falaa, kun puee m tɔ́ Unimbɔti.»

³¹Uninja nee nín dī pu ki kpíìyee dee. U dī u-kúm pu ki dàkā tininjati ŋabikau ki tīī binipɔmbi nì u-nibul kɔkɔ.