Read Ntcham 2 Maccabées 7 Bible Online

2 Maccabées 7 - Ntcham bible

2 Maccabées 7

¹Bi nìn cúú nnabiyaamu mululi mubɔ. Ubɔti nìn gbáń-bi ibambaan nì anaalab, ki páb́-bi bí ŋmɔ́ ugbeeti nanti, tinan tin kòó Mooyiisi marau poonee.

²Bi-kansikin ubɔ nìn fōō dinyɔɔbundi bin kíǹee yil pu ki lī yii: «Ba ní a là kí bàlifì kí béé ti-pu ní? Ti bɔ́ntì kí kpú ki jítiǹ tí yìntīǹ ti-naanjab marab.»

³Ubɔti nìn fōō diŋuul ŋkpitim pu. U nìn yāntì bi dū sirbab nì daanseebi ki tɔ́kɔ́ǹ.

⁴Ŋyunti ŋun an píĺ ki mántèe ní u tīī mara bi gíí ki tìl̄ un fōō dinyɔɔbundi bin kíǹee yil puee limbil. U nìn gíti tīī mara bí lēē u-yigbandi, kí gùutī u-taaŋi nì u-ŋalii u-nabiyaamu nì u-na nimbiin.

⁵Ŋyunti ŋun waa ti ŋūǹ kí fālifèe ní u yāntì bi sútì-u kí pìl̄ ŋŋmi. U dáá wāĺ ní bi dū-u kí tɔ́ sirbee poon. U-wuŋgbaŋŋu nunuŋu nìn gbītì ki māntìi tú ŋfanee. Ŋyunti gbantee, u-nabiyaamu nì u-na tīī tɔb kunyannyaau kí kpú nì tininjati. Bi nìn lī yii:

⁶«Ti-Dindaan ti-Nimbɔtiu wāĺ-ti, ní u lafun làá sɔ̄ ti-saai. An bí kii Mooyiisi nín nìn bíi wòoǹ u-nibul pu ki gāā nlan ŋuŋyee ní yii: <Ti-Dindaan làá sɔ̄ u-tɔntɔnliibi saai[12].>»

⁷Upeekaa nín kpíì mimmee ní bi cáań uliliiti ki sāaǹ-u. Bi nìn lēē u-yigbandi nì tiyikpiti ní ki bālifì-u yii: «A làá ŋmɔ́ tigbeetinan neeyaaa, a là bí sàaǹ a-wunti jaŋŋi ŋin kíǹee kɔkɔ?»

⁸Ní u kíí u-sooŋyin yii: «Maa làá ŋmɔ́.» An pu ní bi sāaǹ u mun kii upeekaayee.

⁹Kí wàatī uliliitee ń kpúee, u nìn bí ubɔti yii: «A sá unikpɔl ní. A bíi lèekī ti-maŋfal díǹ, ama duulinya Bɔtiu làá dāá fìkitī timbi bin tɔ́ u-marab ki bíi kúùyee. U làá dāá yàntī ti nì u ń nīn bí ki cá jaanjaan!»

¹⁰Míǹ boonee ní bi sāaǹ utataati. Bi nìn tīī-u mara yii ú nyāntí u-limbil, ní u nyántì kaa tāaǹ, ní ki tāntì u-ŋalii mun kaa fāŋkì.

¹¹U nìn lī nì tininjati yii: «Unimbɔti un bí yilpu nee di tīī-mi m-wunti jaŋŋi. Ama u-marab puee, maa dū-ŋi ki yíiń tiba, ní m cáá dimákal yii u làá fàtīí gíiǹ-ŋi kí tīī-mi.»

¹²Unaacimpɔɔnee nín kaa nìn dū falaabi ki yíiń tiba puee, an nìn ŋá ubɔti u-ba nì bin nìn māntìi túee bitii.

¹³U kpíìyee ní bi sāaǹ unanaati mun míǹ tikpil.

¹⁴U mun làá kpúee ní u bí ubɔti yii: «Unil yaa kūū-see, a ŋūǹ kí nīn cáá dimákal yii Unimbɔti làá dāá fìkitī-si. Ama siiyee, a pée kpá kí fìkitī kí ká dimaŋfal.»

¹⁵Dicilpu niin ní bi cáań uŋmooŋmooti ki sāaǹ-u.

¹⁶Ama ní u kpēē ubɔti ní ki lī yii: «A ŋūǹ kí ŋá min a lèe binib kansikin min kamaa a sá unil kii bimbee. Ama á taa dàkafì yii Unimbɔti súntì u-nibul pu.

¹⁷Cīití fiii, a làá ká u-pɔŋkpaaŋŋu, nì u nín làá yàntī sii nì a-biyaamu nì a-naantiibi ń jī falaa puee.»

¹⁸Úǹ boonee ní bi cáań ululuuti. Kí wàatī ú kpúee ní u bí ubɔti yii: «Taa kīil̀ a-ba. An sá ti-kpitii pu ní ti bíi jīǹ falaa nee kɔkɔ, di sá yii ti ŋá ti-Nimbɔtiu ikpiti. An pu ní inaabu nee jéetì ti-pu.

¹⁹Ama sii un di lēē kí jáǹ Unimbɔtee, á taa dàkafì yii a làá gbíntí fám, kaa ká ditafadaaldi.»

²⁰Bi-na máaǹ bí pàkà-u, ní ki sá un pu bi máaǹ kí nīn téetée. U yú ki ká u-biyaamu mululee kɔkɔ kpíì ŋwimbaanti. Ama u nìn ká dipɔbil ki ŋmēē, kun puee u nìn dū u-mákal ki páaǹ ti-Dindaan pu ní.

²¹U nìn bí ki tìì bi-kɔkɔ ubɔ ubɔ kunyannyaau bi-sooŋyi poon. Tin u nìn gbìl̀ u-banee máaǹ bí tīī jilma, ní dimatipɔbil din u nìn cááyee nìn sòoǹ nì dininjapɔbil ní. U nìn bí-bi yii:

²²«Maa nyí bi nín máń ni-pu ki tākaǹ m-poonee. Man di kaa tīī-ni kufoou, kaa tí ŋá tiwun jaŋŋi ki túkuǹ ni-wunti pu.

²³Un náań duulinyee di náań unil ní ki sá tiwan kɔkɔ nyeel. Úǹ di làá tīī-ni dimaŋfal u-laŋŋaŋfitiiku poon, kun puee ni dū ni-ba ki ŋá saraa kɔŋkɔnnee ni nín néeń u-marabee pu.»

²⁴Ubɔti Antiyookuusi nìn dākafì yii u bíi bèel̄-u ki sīī-u ní. Niinee ní u bíi nyàab̀ kí sɔ̀kɔl̀ ujipɔŋwaal un nìn dáá bí dimaŋfalinee. Kí kūtèe, u nìn pōoǹ-u ipoon. U nìn pūtì ki pōoǹ yii u làá yàntī ú kpántí ugaaja kí nīn bí mmɔnni u yaa kíí ki fá u-yaajakoobiliŋ. U nìn pōoǹ kí dū-u kí kpántí <Ubɔti bɔɔ> ní kí kàan̄-u ŋkakaakpaan pu.

²⁵Ama kinaacimpɔmbikee kaa nìn pée dū tin u sòon̄ee ki túń ditundi. Niinee ní ubɔti yíiń ki-na. U nìn là kí sɔ̀kɔl̀-u ú sāŋkì u-biki kí fīī ki-maŋfal.

²⁶An nìn fōō ŋyunti. Niinee ní kibikee na dāa kíí kí màkan̄ kí sɔ̀kɔl̀ u-jipɔɔn.

²⁷U nìn kpōoǹ u-jandi pú. U nìn mɔ́ntì uwɔ́bil utɔŋfitee ní ki bí u-jipɔɔn bi-sooŋyi poon yii: «M-biki, sɔ̄ m-saai. M cáá a-pool iŋmal iwa, ní a ŋáam̀ m-biil abin ata, ní m lōō-si ki kpíiǹ-si ki dāa sāā díǹ.

²⁸M-biki, m gbàam̄-si ní, kpèè kutaa kí kpèè kitiŋ kí kpèè tin kɔkɔ bí poonee. Béé yii Unimbɔti kaa pée dū tiba ki náań-tì. Míǹ mbaantiim ní u náań binib mun.

²⁹An puee á taa fàŋkì utɔŋfiti nee, ama á dàkà yii bin kpíìyee lafun sá a-mambi kí kíí kí kpú. Niinee m dāa ŋūǹ kí ká si nì a-mambi ŋyunti ŋun Unimbɔti yaa láa dàkā-ti u-poommɔŋŋuee.»

³⁰U dáá bí ki sòoǹee ní kinaacimpɔmbikee bí yii: «Ni cí ba ní? Maa làá nīn tɔ́ ubɔti marau, ama m làá nīn tɔ́ mara un Mooyiisi tīī ti-naanjabee ní.

³¹Sii ubɔti Antiyookuusi, sii di cáań inaabu nee kɔkɔ ki tɔ́ Juuda nibul pu. Ama a pée kpá kí ŋmátí kí nyā Unimbɔti ŋaan.

³²Timbee, ti-kpitii pu ní ti bí ki jīǹ falaa.

³³Ti-Dindaan Unimbɔti un bí dimaŋfalinee fōō ti-pu diŋuul ŋyunti ŋubɔ poon fiii ní. Ama an sá kí sāŋkì-ti kí dàkà-ti ní. Míǹ boonee u nì timbi u-tɔntɔnliibi kansikin làá mɔ̄ɔkì.

³⁴Ama sii ti-Dindaan nannanliu un cáá titantan inifunaan kɔkɔ kansikinee, a gúntí a-ba fám ní. Sii un dúkutì a-ŋal ti-Dindaan tɔntɔnliibi puee, taa nín̄ cáá dimákakulindi!

³⁵Tiŋman, Unimbɔti Mpɔŋkɔdaan wāĺ tikɔkɔ, ní a kpá kí lóotíí nyā u-bɔsooŋyin.

³⁶M-nabiyaamu nín yúl̀ deedee nì Unimbɔti poondee puee, bi jíń falaa ŋyunti ŋubɔ poon fiii. Bi làá dāá fōō u-cee dimaŋfal kí nīn cáa cá jaanjaan. Ama siiyee, Unimbɔti làá sòoǹ a-bɔti ní kí dáaĺ a-tafal min máaǹee a-bayoondi pu.

³⁷Kii m-mambi nín ŋá puee, m làá dū m-wuŋgbaŋŋu kí tīī kí nīn tɔ́ m-yaajakoobiliŋ. M gbàam̄ Unimbɔti yii ú taa tàan̄ kí sɔ̄ ti-nibul saai. M gíti mèé-u yii ú dūú dī falaabi nì inaabu pu kí lēē u-ba kí dàkà-si á béé yii úǹ di sá Unimbɔti.

³⁸Unimbɔti Mpɔŋkɔdaan yaa kpáatì u-ŋuul ki sītì ti-nibul puee, u cáá mbaamɔn. Ama m mèé yii man nì m-mambi puee, u-ŋuul ń sɔ̀ŋkì.»

³⁹Ubɔti ká yii ujipɔŋwaalee kpēē-u fám. Nì diŋuukpaandi poonee, u nìn gíti sāaǹ-u tikpil ki jítiǹ bin kíǹee.

⁴⁰Nì míǹ kɔkɔee, u nìn yúl̀ deedee ki dū u-mákal ki páaǹ ti-Dindaan pu áli ki tin kpíì.

⁴¹Míǹ boonee ní bi-na páaǹ u-biyaamu kɔkɔ boon ki kpíì.

⁴²Ama m sòon̄ tiwaatootinan nì bi nín sāaǹ binib tikpil miŋyee pu tikpil.