Read Ntcham 2 Maccabées 9 Bible Online

2 Maccabées 9 - Ntcham bible

2 Maccabées 9

¹Ŋyunti gbantee ubɔti Antiyookuusi nyánní Peersi ki fātìń nì tinyool fiii.

²Di sá yii u nìn kɔ́ Peerseepooliisi tiŋkin ki mākaǹ kí fūkul̀ tiwan tin bí kunimbɔtidiin niinee kí kpáàa já kí fōō kitiŋee. Ama niin nib kaa nìn kíí bi-ba pu ní ki yōoǹ tijanjawan ki jáń ki jìn̄-u. An dāa kúntèe, u sáǹ ní ki nín gítiń nì icoo gbòooo.

³U bāań Eekibataanee ní ki gbìl̄ tin jítì Niikanɔɔr nì Tiimootee janjaliibi puee.

⁴Niinee ní u fōō diŋuul ŋkpitim pu. U nìn lēē yii u làá dū tin Peersi yab ŋá ki yāntì u sáǹee kí nyìntī Juuda yab pu. An pu ní u nìn tīī un ŋàal̀ u-tɔrɔkuuee mara yii ú nīn pée cá kí taa yūĺ áli kí tin bà laakin bi cée. U-lambilee ní u bí yii: «M yaa bàn̄ Jeerusaleem tiŋkinee, m làá yàntī kitiŋee ń kpántí Juuda yab ceeku ní.» Ama waa nyí yii Unimbɔti bɔ́ntì kí sòoǹ u-bɔti.

⁵U bíi sòoǹ u-nyɔkɔ kaa láá ŋmíl̀ ní ti-Dindaan un wāĺ tikɔkɔee, Isirayeel yab Nimbɔtiu dū kuweeŋkpiiu kun baa wāĺ kaa ŋūǹ kí cáaǹee ki tɔ́ u-pu. Ipɔŋween in pɔ̄ɔ̄ ki múkù ina kaa gbèentée di nìn cúú-u.

⁶Falaabi gbanti māaǹ-u, di sá yii úǹ u-ba túń atuun ŋin kaa bím̀ee ki yāntì binib nai nìn múkù.

⁷Nì míǹ kɔkɔee, u-lambil kaa nìn bātì báà fiii. U nìn gbíntìi dáá máká u-ba pu ní ki nìn díkí Juuda yab pu diŋuul, ní ki tīī un ŋàal̀-uee mara ú cù malaa. Ama dicilpu dicilpu niin ní u nyáń u-tɔrɔkuu un nìn bíi sáń malaa malaayee poon ki lítì. U nìn lítì mpɔn, an puee u-ŋalii nì u-taaŋi kɔkɔ nìn kɔ́fì kɔ́fì.

⁸Kí wàatī míǹ ń ŋée, u nìn máká u-ba pu, ní ki nìn dàkafī yii u jítiǹ báà ŋma. U nìn dàkafī yii u ŋūǹ kí tīī tinyiŋgban mara ní ki ŋūǹ kí dū ajoofɔkɔ kí páań saniya pu kí ŋmàntī! Kɔŋkɔnnee, úǹ di dɔ̄ kitiŋ, ní an sá bí yòon̄-u kilambaŋ kin bi ŋúb̀ee puee. Niin dàkà un sá kamaa yii an sá Unimbɔti pɔŋŋu.

⁹Unikpiti gbanti nìn dáá bí dimaŋfalin, ama u nìn bíi jīǹ falaa tikpil. U-wunnanti nìn tìfī u-wunti pu ki lítí ní akoosibil gbí u-nimbiliŋin ki cáá nyìki nyiki. U-wunti tin nìn sūūyee nìn núù ki kóò u-janjaliibi kɔkɔ.

¹⁰Kí wàatī tibɔti gbantee ń bàńee, ubɔti nìn dàkafī yii u làá ŋmā kí jɔ̄m̀ kí tūū iŋmalbijaa in bí kutaa puee. Kɔŋkɔnnee, ubɔ kaa ti ŋūǹ kí yòon̄-u, di sá yii u nìn gíti núù an jítì mara pu.

¹¹An nìn nāaǹ Antiyookuusi ní dúsi dusi. Unimbɔti nìn fáá-u, ní u dɔ̄ ki jīǹ falaa tikpil an kaa kúntí. Niinee ní u kíĺ ki bíi féeń u-lambikpaandi ki bíi béetí tin poon u bée.

¹²Úǹ u-ba kaa nìn gíti ŋūǹ kí tíkí u-nunnuŋu. Niinee ní u bí yii: «An ŋān̄ unil ń nīn tɔ́ Unimbɔti. Nisaaleen ń taa dū u-ba kí ŋmàntīǹ Unimbɔti.»

¹³Unikpiti gbanti nìn kíĺ ki bíi mèé ti-Dindaan, ama úǹ kaa nìn gíti ŋūǹ kí sɔ̄ u-saai.

¹⁴Antiyookuusi nìn pōoǹ ki lī yii: «M nìn bíi ŋáań malaa malaa kí cùú nàan̄ circir tiŋki nee kí dū-kì kí kpántí kuceeu. Ama kɔŋkɔnnee m pú kinyɔkɔ yii kì kíǹ ki bí ki-ba pu.

¹⁵M nìn lēē yii m làá dū Juuda yab nì bi-biyaamu nikpiliŋ kí tīī ipeecuncuti nì kaajiikub ní. Di sá yii man ceeyee, baa máaǹ kí síb́-bi dikaakulin. Kɔŋkɔnnee, m là yii Juuda yab ń nīn cáá nsan kí ŋá tikɔkɔ kii Ateeni yabee.

¹⁶Dooooyee m nìn kɔ́ kunimbɔtidiin ki fúkúl̀ tiwan. Ama kɔŋkɔnnee, m làá dū saraamɔntiibi ní kí nyāantì-ku. Saraa sambiliŋ ŋin bi nìn yōoǹee, m làá tīī ŋin jítiǹ mimmee bí dūú téeǹ. Mama m-ba nimbiliŋ ní m làá dūú dā tiwan bí dūú ŋá saraabi.

¹⁷Kí kūtèe, m làá kpántí ujuudaja ní kí cù ntimu mun kɔkɔ poon binib bée kí sòoǹ Unimbɔti pɔŋŋu pu.»

¹⁸Antiyookuusi walifii kaa nìn sɔ̄ŋkì, di sá yii Unimbɔti di nìn bíi sòoǹ u-bɔti min máaǹee. Ubɔti nìn ká yii dimákal kaa nìn gíti bí. Niinee ní u ŋmàn̄ Juuda yab kugbɔŋu ki bíi gbàam̄-bi yam. U nìn ŋmàn̄-bi yii:

¹⁹Mama Antiyookuusi un sá ubɔti bijanjaliibi kpiliuee, m jáaḿ nimbi Juuda yab biniŋmambi. Unimbɔti ń tīī-ni ŋgbampɔn kí yàntī án bútí-ni tikɔkɔ poon!

²⁰«Ni nì ni-nabiyaamu yaa pɔ̄ɔ̄ ní ni-tuuŋŋi còom̄ kii ni nín là pueeyee, m jáaḿ Unimbɔti an pu. Úǹ pu ní m máká.

²¹Mamee, m dɔ̄ ní kaa ti cáá mpɔn. Ama nì dineendi poon ní m téetí ni-pu, di sá yii ni tīī-mi disíndi ki dàkā-mi kulaŋŋaŋfitiiu. «M nín nyáń Peersi tiŋkin ki kùǹee, iween iba cúú-mi. M ká yii an máaǹ ḿ kpèè min ní m làá ŋá ní bin kɔkɔ bí m-beelinee ń nīn bí nsɔŋfinee.

²²M-wunti kaa yɔ̄tì m-weeŋyi gbanti pu, ama m máká yii m làá pɔ̄ɔkì.

²³Nì míǹ kɔkɔee, m téetí yii m-baa nìn lēē un làá fōō u-yilee ní ki nín búntì ntimu mun bí yilpu puee ni kujaau.

²⁴Waa nìn là yii tiba yaa túuǹ-bi àá kubɔkpiiu kubɔ yaa bāań u-beelin yab puee, bí taa béé min bi làá ŋée. Di sá yii báà ŋma nìn nyí un ní ubɔti dū kitiŋ pu bɔti ki ŋúbiǹee.

²⁵Kí kūtèe, m dáań ki ká yii ntimu mun pìlīǹ m-beelee bɔtiibi nìn nyàab̀ ŋyuntimɔnti kí ŋá tiba, ní ki cɔ́ŋkí ki kpèé tin làá bàń-mee. An pu ní m lēē m-jipɔɔn Antiyookuusi ú fōō m-yil kí kpántí ubɔti. M nìn dū-u ki dàkā-ni ŋfunyɔm tikpil ní ki nìn dū-u ki kpāaǹ ni-kansikin tikpil, ŋyunti ŋun m nìn cá Yilpu pú timmunee. M ŋmàn̄-u kugbɔŋu kun m tīī ni mun nee.

²⁶«Tin m mèé-ni tikpilee sɔ̀: Téetímaan tiŋan tin m nìn ŋá ki tīī ni-nibulee, nì ni-kansikin ubɔ ubɔee pu. Ní nīn gbíntìi dàkà man nì m-jipɔɔn kulaŋŋaŋfitiiu ki cá.

²⁷M nín bɔ́ntì pu ki síiǹee, m cáá dimákal yii u làá nīn ŋúb́ míǹ. U làá nīn ŋúb́-ni soooo nì kulaŋŋaŋfitiiu, ní ni làá gbìlīǹ tɔb tiŋan.»

²⁸Míǹ ní unikpɔl un sīī Unimbɔtee dāa kúntì u-maŋfal wiiŋyi falaakpaambi poon kii u nín yāntì bin kíǹee jíń falaakpaambi puee. U kpíì nsansaaŋkúm kinicantiŋin dijool pu.

²⁹Fiiliipi un sá u-bɔɔ doooo tibiyatinee di yōoǹní-u ki cáań Antiyɔɔsi. Ama waa nìn cáá u-jipɔɔn Antiyookuusi pu dimákal. An puee ní u nín cá Eejipiti tiŋkin, ubɔti Pitooleemee Filoomeetɔɔr cee.