Read Ntcham Matthieu 10 Bible Online

Matthieu 10 - Ntcham bible

Matthieu 10

¹Yeesu yíiń u-boonnooliibi saalaa nì bilee, ní ki tīī-bi mpɔn bí jà arasiniibi kí cáaǹ iween kɔkɔ nì bin wɔ̀b̄ee kɔkɔ.

²Yeesu kpambaliŋ saalaa nì alee yiŋŋi sɔ̀. Mbaayee, Siimɔn un bi gíti yíì Peetroo (an taapu sá yii: Ditaŋkpal), nì u-naal Andree, nì Seebeedee jipɔmbi Yakubu nì u-naal Yoowaneesi,

³nì Fiiliipi nì Baateeleemii, nì Toomasi nì Maatiiu un sá ufɔtilee, nì Yakubu Alfee jipɔɔn, nì Tadee,

⁴nì Siimɔn un nìn là kí jáǹ Room yabee, nì Juudasi Isikaariyɔti un dāa dū Yeesu ki nyáfiǹ u-nannanliibee.

⁵Yeesu nìn tú u-kpambaliŋ saalaa nì alee, ní ki kpáafì-bi yii: «Ní taa cù bin kaa sá Juuda yabee cee, kí taa kɔ́ Samaarii yab timmun.

⁶Túĺmaan Isirayeel yab bin bí kii ipii in wáŋkèe cee.

⁷Cùú sòom̀maan Unimbɔti bɔti yii: <Unimbɔti Beel sútì ki pìlīń-ni.>

⁸Cáam̀maan bibunliibi kí fìkitī bitaŋkpiibi kí ŋāŋkì binyaŋgbantiibi wunti, kí jà arasiniibi. Kii ni nín fōō faalaa puee, ni mun tīīmaan faalaa.

⁹Ní taa nyàab̀ sindaariya nì animbil nì tikúman nimbiliŋ kí fúuń ni-tɔkɔliŋin.

¹⁰Ní taa nyàab̀ tilɔti ni-saŋkindi pu, nì abɔkuti ali, nì anaataka nì ŋkpandɔ, kun puee bin kansikin ni bí ki tūǹ ditundee di máaǹ kí kpèè-ni[44].

¹¹«Ni yaa bàn̄ ki kɔ́ kitiŋkpaaŋŋin àá kitiŋwaai poonee, nyàab̀maan kí béé un kítì kí fōō-nee. Ni yaa kɔ́ udaan ceeyee, ní kàl̄maan niin kí tin sāā ŋyunti ŋun ni làá dāá yīkì kitiŋ gbantinee.

¹²Ni yaa kɔ́ kudicaŋuee nee, ní péé kí jāam̀-bi, yii: <Unimbɔti ń tīī-ni ŋgbansɔŋfi[45]!>

¹³Bin bí kudicaŋu gbantinee yaa kítèe, ní ni nín jáam̀ ki tīī-bi ŋgbansɔŋfi ŋuŋyee làá nīn bí bi-pu. Ama bi yaa kaa kítì kí fōō ŋgbansɔŋfi gbantee, ŋú fàtīí gítiń ni-cee.

¹⁴Ni yaa kɔ́ dicindi diban, àá kitiŋ kiban ní bi yaa yíì kaa fōō-ni, kaa là kí pīlifiǹ-nee, ní nyāmaan niin kí gbāfì ni-taaŋi kpɔŋkpɔm[46].

¹⁵Ibaamɔn ní m tùkù-ni, ibɔsoon dalee, Unimbɔti nín nìn dáaĺ Soodoom nì Goomoora[47] timmu tafal ki yāntì ŋŋmi nyánní yilpu ki wùn̄-mu puee dāa sɔ́ nì kitiŋ gbanti yab nín làá ká ditafadaaldi diŋyee.»

¹⁶Ní Yeesu bí-bi yii: «Ní pīlifì. M dū-ni ki tú kii ipiiyee isaakpan kansikin. An puee ní nīn nyíǹ ni-ba kii ikoobuee kí nīn bímaan soooo kii abeenanjilee.

¹⁷Ama ní nīn nyíǹ ni-ba nì binib, kun puee bi làá nīn cútí-ni ki cáǹ ibɔsoon, kí nīn gbáà-ni anaalab bi-kpafidiiŋŋin.

¹⁸Bi làá nīn cáǹ-ni biyidambi nì bibɔtiibi cee man pu, án nín làá ŋá pu ní sòoǹ tin ni nyí man puee Juuda yab nì bin kaa sá Juuda yabee nimbiinee.

¹⁹Bi yaa láa cáǹ-ni bibɔsoonliibi nimbiinee, ní taa nín̄ yáliŋkí min ní ni làá tin sòoǹee nì tin ni làá lèe pu. Ŋyunti gbantee ní Unimbɔti làá tīī-ni tibɔti tin sá ní lèe.

²⁰An kaa sá nimbi ni-ba di làá sòoǹ, ni-Baa Unimbɔti Fam di làá dī ni-pu kí sòoǹ.

²¹Unil dāa cútí u-nabiki kí tīī bí kpɔ̀, ní ubaati ń dāá cúú u-biki kí tīī bí kpɔ̀, ní mbiyaamu mun dāa yíkí kí jáǹ bibaatiibi nì binaatiibi kí yàntī bí kpɔ̀-bi.

²²Báà ŋma làá nīn ná-ni kun puee ni fōō-mi ki kíí. Ama un yaa pɔ́ɔǹ ki tin kátì-kuee dāa kāntí difiil.

²³Bi yaa láa bíi páb̀-ni kitiŋ kibanee, ní sāǹ kí póotí kiban. Ibaamɔn ní m tùkù-ni, naa làá yìiǹ kí dóó Isirayeel timmu kɔkɔ ní man Kinibiki ń bàń.

²⁴Utumbifil ubɔ kaa bí ki jítiǹ un dàkà-uee, míǹ ní utɔntɔnli ubɔ mun kaa bí ki jítiǹ u-kpiliu.

²⁵An ŋmāntì utumbifil ń nīn kíǹ ki bí kii un dàkà-uee, ní utɔntɔnli mun ń nīn kíǹ ki bí kii u-kpiliuee. Bi yaa yíiń kudiidaan yii Beelseebuul, arasiniibi bɔtiuee, mana ní baa dāa ŋūǹ kí yíiń u-dicaŋku yab bíǹ míǹ?»

²⁶An puee, ní taa fàŋkìmaan binib. Tin kɔkɔ bí dibalinee làá dāá nyā mpaampiin pu ní tin pu baa nyée, bi làá dāá béé-tì.

²⁷Tin ní m tùkū-ni dibɔmbɔndinee, sòom̀maan-tì ŋwiimpu, ní tin ní m lɔ́kɔfì-ni dibalinee, dū-tì kí bāakìmaan.

²⁸Taa fàŋkìmaan bin ŋūǹ kí kpɔ̀-ni ama ní kaa ŋūǹ kí kpɔ̀ ni-naŋkee. Ama fàŋkìmaan Unimbɔti un ŋūǹ kí dū ni nì ni-naŋki kɔkɔ kí tɔ̄ ŋŋmin kí nàan̄ee[48].

²⁹Baa nyáfí seerib bili gbòooo? Nì míǹ kɔkɔee, ni-Baa Unimbɔti yaa kaa pú nsan, seer ubɔ kaa lítiń kitiŋ.

³⁰Nimbee, Unimbɔti kàan̄ ni-yikpiti kɔkɔ ní.

³¹An puee, ní taa fàŋkì: ni pɔ̄ɔ̄ kudaau ki jítiǹ kuseerpaau.

³²Un kamaa yaa lī binib nimbiin yii u sá man yɔuee, ma mun dāa lì m-Baa un bí yilpuee nimbiin yii u sá m-yɔu ní.

³³Ama un di yaa néè binib nimbiin yii waa nyí-mee[49], ma mun làá néé m-Baa un bí yilpuee nimbiin yii maa nyí-u.

³⁴«Ní taa dàkafì yii m cáań ŋgbansɔŋfi kitiŋ pu, maa cáań ŋgbansɔŋfi, kitàataajiki ní m cáań.

³⁵M dɔ́miń kí yàkatī unil nì u-baa, usapɔɔn nì u-na, unimpu nì u-beel ní.

³⁶Unil nannanliibi di dāa sá u-dicaŋkun yab[50].

³⁷«Un néeń u-baa àá u-na ki jítiǹ mamee kaa kítì kí nīn sá man yɔu, ní un néeń u-jipɔɔn àá u-bisal ki jítiǹ mamee kaa kítì kí nīn sá man yɔu.

³⁸Un yaa kaa yōoǹ u-dɔpuntikaaŋu ki túǹ kí nīn nóó-mee, kaa kítì kí nīn sá man boonnooliu.

³⁹Un di nyàab̀ kí fīī u-maŋfalee làá fá-dì. Un di yaa dū u-maŋfal ki fá man puee di dāa kāntí u-maŋfal.»

⁴⁰«Un yaa fōō-nee, fōō man dee, ní un yaa fōō-mee fōō un túnní-mee dee.

⁴¹Un yaa fōō Unimbɔti bɔnaatiliu yii u nín sá Unimbɔti bɔnaatiliuee puee, udaan làá dāá fōō tipaal tin Unimbɔti bɔnaatiliuee làá dāá fōōyee ní. Ní un yaa fōō un yú deedee Unimbɔti nimbiinee, yii u nín yú deedee Unimbɔti nimbiinee puee, udaan làá dāá fōō tipaal tin un yú deedee Unimbɔti nimbiinee làá dāá fōōyee ní.

⁴²Un di yaa pú ŋwaamu nee kansikin kiba nnyinsɔm kpaŋkpam kì nyùn̄ yii kì nín sá man boonnooliuee puee, ibaamɔn ní m tùkù-ni, udaan làá ká u-paati.»