Read Ntcham Matthieu 11 Bible Online

Matthieu 11 - Ntcham bible

Matthieu 11

¹Yeesu nín tīī u-boonnooliibi saalaa nì bilee isansaŋki ki dóòyee, ní u yíkì ki nín nìkì ntimu mun kíǹee ni ki sòoǹ Unimbɔti bɔti ki dàkà binib.

²Ní Yoowaneesi un fùul̀ binib Unimbɔti nyimee kāl̀ kusarkadiinee ki gbìl̄ Kriisitoo tuuŋŋi ŋin u tūǹee pu. Niinee ní u lēē u-boonnooliibi biba ki tú bí cùú bàlifì-u yii:

³«Sii di sá un ti nyí yii u dòońeeyaaa, tí nīn kā ki cí ubɔ ní?»

⁴Ní Yeesu kíí-bi yii: «Nín̄ cámaan kí māafì Yoowaneesi tin ni kée nì tin ni gbìl̄ee:

⁵Bijɔfub nimbiliŋ ŋúbitì, bideembi cōom̀, binyaŋgbantiibi wunti ŋáŋkì, bitafakpaafub kíǹ ki gbìl̀, bitaŋkpiibi fīkitì, m sòon̄ tibɔmɔntiil ki tīī binandambi[51].

⁶Unil un fōō-mi ki kíí kaa gùgufēe bí mmɔnneeee!»

⁷Yoowaneesi boonnooliibi búntèe ní Yeesu bíi sòoǹ Yoowaneesi pu samaayee cee ki bí yii: «Ni nín cūtì kuteeun ki kpēē Yoowaneesee, dinicil dilal ní u sá? U sá kii dikaliŋgbaandi din kubuŋu fīintéeee?

⁸Ba ní ni cūtì ki kpēē ní? Unil un pēē agaajabɔkuteeee? Bin pēē agaajabɔkutee, bi kāntí bíǹ abeecinni ní!

⁹Kin, ba ní ni baasii cūtì niin ki kpēē ní? Ni cūtì ki kpēē Unimbɔti bɔnaatiliu níii? Iiin tiŋman, m tùkù-ni yii, un ní ni ká niinee jítiǹ Unimbɔti bɔnaatiliu pu gba.

¹⁰Kun puee Yoowaneesi sá un pu Unimbɔti gbɔŋku poon sòon̄ yii: Unimbɔti bí yii: <M làá tɔ̄ń m-tɔntɔnliu ú lìntīń a-nyɔkɔpu kí bɔ́ntí-si nsan.> Ní Yeesu gíti bí-bi yii:

¹¹Ibaamɔn ní m sòoǹ, bin kɔkɔ unimpu núuĺ ki màl̄ee kansikinee, ubɔ kaa bí ki jítiǹ Yoowaneesi. Ama un sá kiwaai Unimbɔti Beelinee jítiǹ Yoowaneesi.

¹²Kí yòon̄ ŋyunti ŋun Yoowaneesi un fùul̀ binib Unimbɔti nyimee sòon̄ Unimbɔti bɔti ki dāa sāā díǹee, Unimbɔti Beel dɔ́miń nì mpɔn ní, bin nimbiliŋ máǹ di-puee di kóò.

¹³Unimbɔti bɔnaatiliibi kɔkɔ nì Mooyiisi marab sòon̄ Unimbɔti Beel pu bɔti ní ki dāa dūu sāā Yoowaneesi yuntiŋu.

¹⁴Ni yaa là kí gbìlīǹ-mee, Yoowaneesi di sá Eelii un bi nìn sòon̄ yii u làá gítińee.

¹⁵Un yaa cáá ditafalee ń gbìl̄.»

¹⁶Ní Yeesu gíti bí yii: «Ba ní m làá dū waanee nib kí ŋmàntīǹ dee? Bi náań nì mbiyaamu mun kā sampaan puee ní, mubɔ kūuntí ki lì mu-jutiibi yii:

¹⁷<Ti búń-ni awul, naa ŋɔ́ń, ki gāā-ni ikpiisilan, naa súń.>

¹⁸Di sá yii Yoowaneesi un fùul̀ binib Unimbɔti nyimee dɔ́miń ní kaa là tijinaaa, kaa là ndaam, ní ni bí yii: <Arasinii di bí u-pu.>

¹⁹Ní man Kinibiki dɔ́miń ki jīǹ ki nyù, ní ni bí yii: <Uninja nee sá upoofu, ki sá udanyɔl, ní ki bɔ́ɔtí bifɔtiliibi nì binikpitib bin kɔ kíǹee.> Ama bin fōō Unimbɔti ciiŋyi ki kííyee dàkà yii i sá deedee.»

²⁰Niinee ní Yeesu bíi wòoǹ ntimu mun poon u nìn ŋá maamaacib tikpilee nib, kun puee baa kpántì bi-bimbim.

²¹U bí yii: «Mbusu dɔ̄ ki cí nimbi Koorasin tiŋki nib, mbusu dɔ̄ ki cí ni mun Beetisayida tiŋki nib. Kun puee, maamaacib bin m ŋá ni-cee nee di yaa bàà nìn ŋámaan Tiir nì Siidɔn timmun, niin yab bàà nìn kpántìmaan bi-bimbim malaa, ki pēeǹ kpɔsatab ki dū ŋfantam ki pùkū bi-ba[52].

²²An puee m tùkù-ni yii, ibɔsoon dalee, nimbi tafadaaldi dāa jítiǹ Tiir nì Siidɔn nib yal.

²³Kin, nimbi Kapeernayum tiŋki nib, ni nyí yii ni làá yīkì yilpu kí tin tūū kutagbɔŋu níii? Ni làá sìntī kí bà taapu taŋkpiibi ní, kun puee maamaacib bin m ŋá ni-cee nee di yaa bàà nìn ŋámaan Soodoom tiŋkinee, bíǹ bàà nìn kpántìmaan bi-bimbim ki bàà dáá gbíntìi bí díǹ[53].

²⁴An puee ní m tùkù-ni yii, ibɔsoon dalee, Soodoom tiŋki tafadaaldi dāa sɔ́ǹ nimbi yal.»

²⁵Ŋyunti gbantee ní Yeesu bí yii: «Óooo, m-Baa, yilpu nì taapu Dindaan, m nyɔ́ŋkí-si a nín dū tibɔti nee ki bál̀ bin yíì bi-ba biciŋfitiibi nì binyiliibi, ki dū-tì ki dàkā bin sá ŋwaamuee[54].

²⁶M-Baa, tiŋman a ŋá míǹ kun puee míǹ di ŋān̄ a-cee ní ki fáatì-si.

²⁷«M-Baa dū tikɔkɔ ki ŋúbiǹ-mi, ní báà ubɔ kaa nyí man u-Jipɔɔn, asee m-Baa baba. Míǹ ní ubɔ mun kaa tí nyí m-Baa asee man u-Jipɔɔn baba, nì bin man u-Jipɔɔnee yaa là kí dū-u kí dàkèe.

²⁸«Nimbi bin tú awaŋgul ki gīīyee, dāam̄maan man cee ḿ túutí-ni ní ŋùŋfì,

²⁹kí yòom̄maan man kpaambooku kí fōōmaan m-bɔti. Kun puee m-poon mɔ̄, ní m-bɔti kaa pɔ̄ɔ̄, ni làá ká diŋuŋfil[55].

³⁰Man kpaambooku pɔ̀fì ní m-waŋgul mun bí fúku fuku.»