Read Ntcham Matthieu 13 Bible Online

Matthieu 13 - Ntcham bible

Matthieu 13

¹Ŋwiin gbantee, Yeesu nyáń kudiin[66] ní ki cūtìi kāl̀ dimɔɔgbandi.

²Kunipaau nìn kóoǹní ki kpáfì u-cee, ní u jɔ́m̀ ki kāl̀ buŋalimbun nnyim pu, ní kunipaauee yú dibuŋgbándi.

³Ní u cáá tibɔŋmantikaal ki sòoǹ nì bi tibɔti tikpil, ní ki bí yii: «Uninja ubɔ di nyáń kí yàaǹ iwambool.

⁴U bíi yàantée ní abil aba lítì nsan pu, ní nnɔmbiyaamu dɔ́miń ki tōō ki jíń.

⁵Ní aba mun lítì kuteeun laakin kitiŋ kaa nyóòyee, ní ki pūtì kpáàa nyáń kun puee kitiŋ kaa nyóò.

⁶Ŋwìiń dāa píĺee, ní an kpíì kun puee inyaan kaa kɔ́ kitiŋ.

⁷Ní aba mun lítì ikuŋkumin, ní ikuŋkumee wíiǹ ki múkuǹ i-pu.

⁸Ama ní abil aba lítì laakin kitiŋ ŋān̄ee ní ki lòon̄ abil. Ŋwambool ŋubɔ lòon̄ abil dilaataal, ŋubɔ imuŋku ita, ŋubɔ mun mmuŋku nì saalaa.»

⁹Ní Yeesu bí yii: «Sii un yaa cáá ditafalee ń gbìl̄.»

¹⁰Yeesu boonnooliibi nìn sútìń ki pìl̄-u ní ki bālifì-u yii: «Ba pu ní a cáá tibɔŋmantikaal ki sòoǹ nì bi ní?»

¹¹Ní u kíí-bi yii: «Unimbɔti yāntì nimbi béè u-Beel bɔti tin bí dibalinee taapu. Ama an kaa yāntì bíǹ ń béé.

¹²Un yaa cááyee, bi làá gíti kūtì-u u-cee ń wíiǹ. Ama un kaa cááyee, bi dāa fòol̄ fiii un u cááyee ní ú gbíntí pílpil.

¹³Kun pu ní m cáá tibɔŋmantikaal ki sòoǹ nì bee dee: di sá bi kpèé ní kaa wāĺ, ki pílifí ní kaa gbìl̀.

¹⁴Bíǹ puee an ŋá kii Unimbɔti bɔnaatiliu Yeesaya nín nìn lī puee dee, yii Unimbɔti bí yii: <Ni làá dāá nīn pílifí, ama ní kaa làá gbìl̄. Ni làá dāá kpèè ama ní kaa làá wāl̀.

¹⁵Kun puee binib nee pɔbiliŋ tīlifì, ní bi kpáá bi-tafaliŋ ní ki ŋúb́ bi-nimbiliŋ, kí taa wāl̀aaa, kí taa gbìl̄aaa, kí taa béé taapu, kí taa kpántí bi-bimbim, ḿ bàà cáaǹ-bi[67].>

¹⁶Ama nimbee, ni bí mmɔnni kun puee ni-nimbiliŋ wāĺ man nì m-tuuŋŋi, ni-tafaliŋ mun gbìl̀ m-bɔti.

¹⁷Ibaamɔn ní m tùkù-ni, Unimbɔti bɔnaatiliibi nì deedee nib tikpil bàà nìn nyàab̀ kí ká kun ni ká nee, kaa ŋúń ki ká, bi bàà nìn nyàab̀ kí gbìl̄ tin ni gbìl̄ nee, kaa ŋúń ki gbìl̄-tì[68].»

¹⁸«Mimmee, pīlifìmaan uwambooyaanli bɔŋmantikaati din m lēe taapu.

¹⁹Un pílifì bi nín sòon̄ Unimbɔti Beel bɔti ní kaa gbìl̀ee, náań nì ŋwambool ŋun lítì nsan puee ní. Sitaan ukpiti di dòoń ki cútí tin bi búĺ u-pɔbilinee ki lèekī.

²⁰Ní un náań nì abil ŋin lítì kuteeunee, úǹ pílifí tibɔtee ní ki fòol̄-tì malaa nì dipɔɔpindi,

²¹ama waa yàntī tibɔtee ń kàl̄ u-ni kí yúntí kí báań inyaan. Unimbɔti bɔti puee, digìńdi kii disàandi diba yaa bāań-uee, ní ú dū nnimbɔtisan kí fá.

²²Un mun náań nì abil ŋin lítì ikuŋkuminee gbìl̄ Unimbɔti bɔti, ní duulinya poon landɔkɔi nì tigaajati tin ŋmàtíǹ binibee neendi ń dāá dūú múkúǹ an bɔti pu, ní tàa ŋūǹ kí lòoǹ.

²³Un pílifí Unimbɔti bɔti ki gbìl̀ taapuee làá tɔ̄ atummɔnti ŋin tìì Unimbɔti yindi tinyoolee kii iwambool in lítì kitimmɔntii pu ŋubɔ lòon̄ abil dilaataal, ŋubɔ mun imuŋku ita, ŋubɔ mun mmuŋku nì saalaayee ní.»

²⁴Ní Yeesu gíti dū tibɔŋmantikaal nee ki sòon̄ nì bi yii: «Unimbɔti Beel náań nì uninja ubɔ un búĺ iwamboomɔnti u-kpaabunee ní.

²⁵Kunyeeu, báà ŋma kɔ́ ki dōoǹee, ní u-nannanliu dɔ́miń ki dū ukeenja ki búĺ idin, ní ki búntì.

²⁶Ŋyunti ŋun idi nyáń ki lòon̄ee, ní ukeenja mun nyáń.

²⁷Ní bitɔntɔnliibi dɔ́miń ki bí bi-kpiliu yii: <Ukpil, an kaa sá idi ní a búĺ bukpaanaaa? Kin ukeenja mun nyáń la?>

²⁸Ní ukpilee kíí-bi yii: <An sá unannanli ubɔ di ŋá míǹ.> Ní bitɔntɔnliibi bālifì-u yii: <Mimmee, tí cù kí fùkù ukeenja gbanti kí fáaa?>

²⁹Ní u kíí-bi yii: <Aayee, taa fùkùmaan-u, kun puee ni yaa làá fùkùee, see án kpáaǹ idi kí fùkù.

³⁰Míǹ puee, yàntīmaan an kɔkɔ ń nīn yú ki cí kudiceeu. Ŋyunti gbantee ní ḿ tùkù-bi yii: 'Fùkùmaan ukeenjee kí bíĺ afeencun afeencun kí tūū ŋŋmi, ama cáámaan m-dii kí ŋá m-cakalaaun.'>»

³¹Ní Yeesu gíti tí dū tibɔti tiba ki ŋmāntiǹ-bi yii: «Unimbɔti Beel náań nì kisubilii kin uninja ubɔ cáa búĺ u-kpaabunee.

³²Kí mun di sá kisubifiifiitii asubil kɔkɔ kansikin, ama kì yaa nyáń ki wíiǹ ki dóòyee, kì wīikíǹ tikuŋfaal tin kɔkɔ kíǹee, ní kí kpántí busubu, áli nnɔmbiyaamu dòoń ki pāantí mu-diiŋŋi bu-paŋŋi pu.»

³³Ní Yeesu gíti tí dū tibɔŋmantikaal tiba mun ki tí ŋmāntiǹ-bi yii: «Unimbɔti Beel náań nì ŋkpɔnɔnyɔkɔ ní. Unimpu dù fiii ní kí ŋmàlim̀ ŋkpɔnɔyim tikpil poon kí búuń ní bukpɔnɔsaa kɔkɔ ń jɔ̄m̀.»

³⁴Yeesu nìn dù tibɔŋmantikaal ní ki sòoǹ nì samaa. Waa nìn sòoǹ nì bi fám see ú dūú ŋmàntīǹ tiba.

³⁵Mimmee, an ŋá kii Unimbɔti bɔnaatiliu nín nìn sòon̄ ki síiǹ puee dee, yii: «Nì tibɔŋmantikaal ní m làá dāá dūú sòoǹ nì bi, m làá dāá tùkù-bi doooo m nín náań duulinyee tin bí dibalinee[69].»

³⁶Niinee, Yeesu yāntì kunipaauee ní ki nín kùǹ, ní u-boonnooliibi sútì ki pìl̄-u ki bí-u yii: «Tùkù-ti ukeenja un bi cáa búĺ bukpaanee bɔŋmantikaati taapu.»

³⁷Ní Yeesu bí-bi yii: «Un būul̀ idee di sá man Kinibiki.

³⁸Bukpaayee di sá duulinya, ní idi sá Unimbɔti Beelin biyaamu, ní ukeenjee sá Sitaan biyaamu.

³⁹Unannanli un dɔ́miń ki búĺ ukeenjee di sá Sitaan. Kudiceeu di sá duulinya kúntitam, ní bidicaliibi sá Unimbɔti tuuŋyi.

⁴⁰Kii bi nín béeĺ ukeenja pu kí bíĺ afeencun kí tūū puee, míǹ ní an dāa sá duulinya kúntitam.

⁴¹Man Kinibiki làá dāá tɔ̄ń m-tuuŋyi ní í dāá lēē m-Beelin bin kɔkɔ sá nsugimu bi-jutiibi gbéetí ki lítée nì bin ŋáań ikpitee,

⁴²ní kí dū-bi kí tɔ̄ ŋŋmin kipaayin, laakin bi làá nīn kā ki sūǹ, bi-nyiŋŋi gà tɔb kàkakee.

⁴³Ama ní deedeedambi dāa jìl̀ kii ŋwìińee ní pàlpal bi-Baa Beelin. Un yaa cáá ditafalee ń gbìl̄[70].»

⁴⁴«Unimbɔti Beel náań nì kii tigaajati tin bál̀ bukpaa bubɔnee ní. Ubɔ kùn̄ ki bīitì ti-pu ní gíiǹ ki bīiǹ. An nín mɔ́ɔkiǹ-u puee, ní u cūtì ki nyáfì u-wanti tin kɔkɔ u cááyee pílpil ki cáa dá bukpaayee.

⁴⁵Unimbɔti Beel tí náań nì kii unyampu nín nyàab̀ abeedimbimɔnti puee ní.

⁴⁶U nín ká ŋin cáá kudapɔɔuee ní ú cùú nyāfì tin kɔkɔ u cááyee pílpil ní kí cáań kí dā.»

⁴⁷«Unimbɔti Beel náań nì kii bi nín dù kulaaŋŋu kí tɔ̄ dimɔɔlin án cúú kujɔmbuluu kamaa puee ní.

⁴⁸Bi nín dū kulaaŋŋu ki tɔ́ an cúú ijɔmee, ní bí dáaĺ kí nyāntiń dimɔɔgbandi, ní kí kàl̄ kí lútí imɔnti kí ŋá tikabitin, ní kí dū in kaa ŋān̄ee kí tɔ̄ kí fá.

⁴⁹Míǹ ní duulinya kúntitamee, án làá dāá ŋá. Unimbɔti tuuŋyi dāa dòoń ní kí gàntī binikpitib nì bimɔntiibi,

⁵⁰ní kí dū bikpitibee kí tɔ̄ ŋŋmin kipaayin, niin ní bi làá nīn sūǹ bi-nyiŋŋi gà tɔb kàkaka.»

⁵¹Ní Yeesu bālifì u-boonnooliibi yii: «Ni gbìl̄ tibɔti tin kɔkɔ m sòon̄-ni nee taapuɔɔɔ?» Ní bi kíí yii: «Iiin ti gbìl̄».

⁵²Ní u bí-bi yii: «Míǹ ní umaradakal kamaa un di yaa fōō Unimbɔti Beel bɔtee náań nì kudiidaan un cáá tigaajati ki lèekī ti-poon tikpikil nì tipɔn ki cáa tútúǹ binibee ní.»

⁵³Yeesu nín dū tibɔŋmantikaal ki sòon̄ nì bi ki dóòyee, ní u yíkì niin,

⁵⁴ní ki nín gítí u-tiŋkin laakin u kāl̀ ki wíiǹee. U bàn̄ee, ní ki kɔ́ niin kpafidiikun ki bíi dàkà u-dumpu yab Unimbɔti bɔti, ní bin kɔkɔ bí niinee bākatì sèeee, ní bi bíi lì yii: «U nín ká la iciin gbanti dee? An dī mana ní u ŋūǹ ki ŋáań maamaacib nee dee?

⁵⁵Ti nyí-uaa! An sá kapinta jipɔɔnaa! U-na di sá Maariiyaa[71]! U-naalib mun di sá Yakubu nì Jooseefi nì Siimɔn nì Juudaa!

⁵⁶U-niisalib mun di kóò ti-kansikineeyaa! Kin, an ŋá mana ní u cáá mpɔn nee?»

⁵⁷An di nìn yāntì ní baa fōō-u ki kíí. Ní Yeesu bí-bi yii: «Baa kpèé kí sìŋkīǹ Unimbɔti bɔnaatiliu fám laaba, an yaa kaa tin sá u-tiŋkin nì u-cindin[72].»

⁵⁸Bi nín kaa fōō-u ki kííyee pu ní waa nìn ŋá maamaacib tikpil niin.