Read Ntcham Matthieu 14 Bible Online

Matthieu 14 - Ntcham bible

Matthieu 14

¹Ŋyunti gbantee, Eeroodi un nìn sá ubɔti Galiileeyee gbìl̄ bi nín sòoǹ Yeesu pu miŋyee

²ní ki bí u-tɔntɔnliibi yii: «Unee di sá Yoowaneesi un fùul̀ binib Unimbɔti nyimee. U fātìi fīkitì ní, an pu ní u cáá mpɔn ki ŋáań maamaacib míǹ.»

³Di sá yii Eeroodi nìn tīī mara bí cúú Yoowaneesi kí bóob́-u iŋmii ní kí cáá-u kí tɔ̄ sarkan. Kun pu ní u nìn ŋá mimmee di sá yii u nìn cáá u-maan Fiiliipi nimpuu, bi yíì-u Eeroodiyadi[73].

⁴Yoowaneesi nìn tùkū Eeroodi yii: «An kaa máaǹ á cáá unimpu gbanti[74].»

⁵Niinee ní u kíǹ ki nyàab̀ kí kpɔ̀ Yoowaneesi, ama ní ki fàŋkí Juuda yab, kun puee báà ŋma nìn nyí Yoowaneesi pu yii u sá Unimbɔti bɔnaatiliu.

⁶Daliŋkin bi bíi jīǹ Eeroodi maaliwiiŋŋu jiŋaaliuee, Eeroodiyadi bisal ŋɔ́ń bin bi yíiń jiŋaalee nimbiin, ní an mɔ́ɔkiǹ Eeroodi.

⁷U nìn pūtì ki bí yii: «Kun kamaa ní a yaa lèe, á bàlifì-mi, m làá tīī-si kudɔŋu.»

⁸Ní usapɔɔnee na yāntì u lī yii: «Á tùkutī Yoowaneesi un fùul̀ binib Unimbɔti nyimee yil kí tàkan̄-mi kpaatan kɔŋkɔnnee.»

⁹Niinee, an kɔ́ ubɔti kunimbaau. U nín gíti dáá pūtì bin u yíińee nimbiinee ní u kíí yii u làá tīī-u,

¹⁰ní ki tú ubɔ ń cù kusarkadiin kí tìlīń Yoowaneesi un fùul̀ binib Unimbɔti nyimee yil kí cáań.

¹¹Ní bi tīl̀ Yoowaneesi yil ki ŋá kpaatan, ki cáań ki tīī usapɔɔnee, ní u mun cáa tīī u-na.

¹²Yoowaneesi boonnooliibi nìn dɔ́miń ki yōoǹ-u ki cáa síb́, ní ki cūtì ki tùkū Yeesu tin jítèe.

¹³Yeesu nín gbìl̄ mimmee, ní u yíkì niin u nì u-boonnooliibi kɔ́ buŋalimbu ki búntì laakin binib kpée, ama ní kunipaau nyánní ntimun ki còom̄ ataa ki nín jì u-boon.

¹⁴Yeesu nì u-boonnooliibi nyáń buŋalimbunee, ní ki ká kunipaau nín tíibińee. Binibee nìn cúú-u falaa ní u kíĺ ki bíi cāantí bibunliibi.

¹⁵Kujoou bíi jóotée, ní u-boonnooliibi sútìń ki pìl̄-u, ní ki bí-u yii: «Binib kaa kóò laakin ti bí nee, kunyeeu mun bíi móotí. Míǹ puee, yàntī binib ń nīn cá ntimbilimun kí dā tijin kí jī.»

¹⁶Ní Yeesu kíí-bi yii: «An kaa bàlifī bí cù, nimbi ni-ba ń tīīmaan-bi tijin bí jī.»

¹⁷Ní bi bí-u yii: «Kpɔnɔb biŋmoo nì ijɔm ili ja di bí.»

¹⁸Ní u bí yii: «Yòon̄ kí cáaḿmaan-mi!»

¹⁹Niinee, ní u bí yii samaa kɔkɔ ń kàl̄ kumɔsɔŋu pu, ní u fōō kpɔnɔb biŋmoo nì ijɔm ilee ní ki wáaǹ ki kpēē kutaa, ki jáam̀ Unimbɔti, ní ki gífì gífì kpɔnɔbee ki dūu tīī u-boonnooliibi, ní bíǹ dūu yākatì binib kɔkɔ.

²⁰Ní bi-kɔkɔ jíń ki díkí, an kíǹ, ní bi kóoǹ akpɔnɔkati nì ajɔŋgin ŋin kíǹee ki gbéeǹ tikabiti saalaa nì tili[75].

²¹Binib bin nìn jíń tijin gbantee nìn bàn̄ kii bininjab kutukub biŋmoo, baa kàan̄ binimpoobi nì mbiyaamu.

²²Niinee ní Yeesu yāntì u-boonnooliibi kɔ́ buŋalimbu malaa ki līntì ki dūtì lapu buŋgbandi, ní Yeesu úǹ dáá bí niin ki tùkù binib yii bí nīn kùǹ.

²³U yāntì bi nín kùǹee, ní u kākatì ŋkpaanceeti dijool pu kí mèè. Kunyeeu mɔ́ee u dáá gbíntìi bí niin u-baba.

²⁴Buŋalimbuee mun nìn bàn̄ dimɔɔl kansikin kaa ti cá, kun puee kubuŋu nìn túŋkiń-bu ní tinyiŋgban nìn yāŋkí-bu.

²⁵Ki cá kutaawuntuŋuee, ní Yeesu tɔ́kɔǹ nnyim pu ki còom̄ ki cá u-boonnooliibi cee.

²⁶Bi nín ká u páaǹní ki còomìń nnyim puee, ní bi-pɔbiliŋ máĺ, ní bi bí yii: «Ufaŋfanti dee!» ní tifaandi kɔ́-bi ní bi bíi gbáà ibiil.

²⁷Kpalaayee ní Yeesu bí-bi yii: «Cúúmaan ni-pɔbiliŋ, an sá man! Taa fàŋkìmaan!»

²⁸Niinee ní Peetroo bí-u yii: «M-Dindaan, an yaa lafun sá sii, á yàntī ḿ tɔ́kɔń nnyim pu kí còom̀ kí dāan̄ a-cee.»

²⁹Ní Yeesu bí-u yii: «Nín̄ dòoń!» Ní Peetroo nyáń buŋalimbun ki tɔ́kɔǹ nnyim pu ki còom̀ ki nín cá Yeesu cee.

³⁰U nín bíi còom̄ ki cá ki ká kubuŋu nín jītí pu mpɔnee, ní u fāŋkì, ki kíĺ ki bíi múl̀ nnyimin, ní ki fáá mbiil yii: «M-Dindaan, fīī-mi.»

³¹Kpalaayee ní Yeesu tāntì u-ŋal ki cúú-u ní ki bí-u yii: «A-fookiiu pátì, ba pu ní a fāŋkì?»

³²Ní bi-liitil kɔ́ buŋalimbun, ní kubuŋu ŋmíl̀.

³³Bin nìn kā buŋalimbunee gbāaǹ Yeesu nimbiin ki bí-u yii: «Ibaamɔn, a lafun sá Unimbɔti Jipɔɔn.»

³⁴Bi dūtì dimɔɔl ki bàn̄ Geeneesareeti tiŋki jandi dibee ní ki kpákatì[76].

³⁵Niin yab kpáàa béè Yeesu, ní ki nākaǹ bi tùkū ajan kɔkɔ nib, ní bi yōoǹní bibunliibi kɔkɔ ki cáań u-cee

³⁶ki mèé-u yii ú yàntī bí gbēē u-bɔkutijúti kpaŋkpam, ní bin kɔkɔ lafun gbēēyee pɔ́ɔkì.