Read Ntcham Matthieu 15 Bible Online

Matthieu 15 - Ntcham bible

Matthieu 15

¹Fariisab nì bimaradakaliibi biba nyánní Jeerusaleem ki dɔ́miń Yeesu cee ní ki bālifì-u yii:

²«Ba pu ní a-boonnooliibi kaa nóó ti-yaajakoobiliŋ ní? Kun puee baa fíntí bi-ŋalii kí wàatī ní kí nín jī tijin, kii ti-koobiliŋ nín sá puee[77].»

³Ní Yeesu kíí-bi yii: «Kin nimbi fáà, ni nín nóó ni-yaajakoobiliŋ ki yìntī Unimbɔti marabee!

⁴Unimbɔti bí yii: <Á nīn tɔ́ a-baa nì a-na,> ní ki gíti bí yii: <Un di yaa sòon̄ ki bíil̀ u-baa kii u-nee máaǹ bí kpɔ̀-u[78].>

⁵Ama ní nimbi dàkà binib yii a ŋūǹ kí tùkù a-baa àá a-na yii: <M nín bàà làá tīī-si tiŋyee m dūu ŋá Unimbɔti saraa.>

⁶A yaa gíti dáá lī mimmee, an kaa ti sá á tūtuǹ a-baa. Ni nín ŋáań pu ki kpìtī Unimbɔti bɔti ki ŋáań min ni-naanjab dàkèe dee.

⁷Mpoonnyoondambi! Unimbɔti bɔnaatiliu Yeesaya nín sòon̄ ni-pu miŋyee sá ibaamɔn. U nìn lī yii:

⁸<Unimbɔti bí yii: Binib nee nyɔ́ŋkí-mi nì bi-nyɔmmu fám ní, bi-pɔbiliŋ dátiǹ-mi.

⁹Bi jáaḿ-mi fám ní, kun puee tin binib náańee ní bi dàkà, ní ki cáa yíì man marab[79].>»

¹⁰Míǹ boonee ní Yeesu yíiń kunipaauee u-cee ní ki bí-bi yii: «Ní pīlifì kí gbìl̄ tibɔti nee taapu tiŋan.

¹¹An kaa sá tin di kóò unil nyɔkɔnee di kɔ̄ntí-u tijɔkɔndi Unimbɔti nimbiin, ama an sá tin nyēē unil nyɔkɔnee di kɔ̄ntí-u tijɔkɔndi.»

¹²Niinee, u-boonnooliibi sútìń ki bí-u yii: «Aa nyí yii tibɔti tin a bàà sòon̄ee wùn̄ Fariisabaaa?»

¹³Ní Yeesu bí yii: «Busubu bun kamaa ní m-Baa un bí yilpuee kaa cóoǹee, bi làá dāá fùkù-bu kí fá ní.

¹⁴Yàntīmaan-bi. Bi sá bijɔfub ní ki dàtī bijɔfub: ujɔfu yaa dàtī ujɔfuee, see bi-liitil ń lítí mboon.»

¹⁵Ní Peetroo bí-u yii: «Tùkù-ti dilaŋkpandi din a bàà gāāyee taapu.»

¹⁶Ní Yeesu bí-u yii: «Ni mun kaa láá cáá iciin níii?

¹⁷Naa nyí yii tin kɔkɔ kóò unil nyɔkɔnee cá u-poon, ní boonee ú cùú sɔ́ntáaa?

¹⁸Ama tin nyēē kinyɔkɔnee nyēē unil pɔbilin ní, an di kɔ̄ntí unil tijɔkɔndi Unimbɔti nimbiin,

¹⁹kun puee unil pɔbilin ní ilandɔkɔkpiti kɔkɔ nyēeń: nnikpaakoon, bininjab nì binimpoobi laakpaati, binaacimpɔmbi nì bisapɔmbi jɔkɔnti, bunaayubu, abɔgaan, asiibil.

²⁰Tin kɔ̄ntí unil tijɔkɔndi Unimbɔti nimbiinee dee. An yaa sá á jī tijin kaa fíntì a-ŋalii kii akoobil nín sá puee, an kaa kɔ̄ntí-si tijɔkɔndi Unimbɔti nimbiin.»

²¹Boonee, Yeesu yíkì niin ki nín cá Tiir nì Siidɔn watil pú.

²²Ukanaannimpu ubɔ nìn nyánní niin pú ki dɔ́miń ní ki fáá mbiil yii: «Ukpil, Daafiidi naantiiu, sɔ̄ m-saai! Di sá arasinii ubɔ kā m-bisal pu ki páb́-u ŋkpitim pu.»

²³Ama ní Yeesu kaa pée gātì-u tiba, ní u-boonnooliibi dɔ́miń ki gbāam̀-u yii: «Jà unimpu nee, di sá u pá ti-boon ki tátí kaa gbèentí.»

²⁴Ní Yeesu kíí yii: «Bi túnní-mi Isirayeel yab bin wáŋkì kii ipiiyee ŋmaniŋma cee ní.»

²⁵Ama ní unimpuee dɔ́miń ki gbāaǹ u-nimbiin ní ki bí yii: «Ukpil, jòoń-mi!»

²⁶Ní Yeesu lī yii: «An kaa máaǹ bí dū mbiyaamu jinti kí tīī mbɔbiyaamu.»

²⁷Ní unimpuee bí yii: «Tiŋman Ukpil, ama nì míǹ kɔkɔee, mbɔbiyaamu dindambi yaa bíi jīǹee, mbɔbiyaamu mun tòó igbasigbasi in lítée ní ki jīǹ.»

²⁸Niinee ní Yeesu bí yii: «Unimpu nee, a-fookiiu wīikéeee! A nín là puee, án ŋá míǹ kí tīī-si.» Niin niin ní u-bisalee pɔ́ɔkì.

²⁹Yeesu yíkì niinee ní ki búntì Galiilee mɔɔgbandi, ní ki cūtìi jɔ́m̀ dijool diba pu ki kāl̀.

³⁰Kunipaau nìn dɔ́miń u-cee ki yōoǹní bin tà bi-taaŋi puee nì bin wɔ̀b̄ee, nì bijɔfub, nì bimɔɔmiimbi, nì bibunliibi biba mun tikpil, ní bi cáań-bi ki bíl̀ u-nimbiin, ní u cáaǹ bi-kɔkɔ.

³¹An nìn ŋá kunipaauee maamaaci bi nín ká bimɔɔmiimbi sòoǹ, bin wɔ̀b̄ee pɔ́ɔkì, bitaakpalfub kíǹ ki còom̄ tiŋan, ní bijɔfub mun wál̀ee puee, ní bi bíi pàkà Isirayeel Nimbɔtiu.

³²Yeesu yíiń u-boonnooliibi, ki bí-bi yii: «Nnibiim nee gbí-mi falaa: di sá iwiin ita sèé nee bi nín bí m-cee, kaa cáá tiba kí jēe. Maa là kí jà-bi bí nīn kùǹ nì ŋkùm, bi-wunti ń tin yɔ̀tī nsanni.»

³³Ní u-boonnooliibi bí-u yii: «Kin, la ní ti làá nín kánní tijin kuteeu nee ni kí kpíiǹ nnibiim min bí nee dee?»

³⁴Ní Yeesu fātìi bālifì-bi yii: «Kpɔnɔb biŋa ní ni cáá ní?» Ní bi kíí-u yii: «Biluli, nì njɔŋkaaŋkaamu.»

³⁵Niinee ní u bí samaayee kɔkɔ ń kàl̄ taapu,

³⁶ní ki fōō kpɔnɔb bilulee nì ijɔmee, ki jáam̀ Unimbɔti an pu, ní ki gífì gífì ki tīī u-boonnooliibi yākatì kunipaauee.

³⁷Ní báà ŋma jíń ki díkí, ní bi kóoǹ agin ŋin nìn kíǹee ki gbéeǹ tikabiti tiluli.

³⁸Bin nìn jíń tijikaal gbantee nyáń bininjab kutukub binaa, baa kàan̄ binimpoobi nì mbiyaamu.

³⁹Bi jíń ki dóòyee, ní Yeesu yāntì kunipaauee nín kùǹ ní u kɔ́ buŋalimbu u nì u-boonnooliibi búntì Magadan watil pú.