Read Ntcham Matthieu 16 Bible Online

Matthieu 16 - Ntcham bible

Matthieu 16

¹Fariisab nì Sadusab dɔ́miń Yeesu cee kí píĺ-u tibɔti ní ki bí-u yii ú ŋá maamaaci ubɔ kí dàkà-bi yii Unimbɔti bí u-cee.

²Ní Yeesu kíí-bi yii: «Kujoouee, ni lì yii: <Kutagbɔŋu làá nīn ŋān̄, kun puee atagban ŋmàl̄ mmam.>

³Ní kutaafaauee ni lì yii: <Utaa làá nì díǹ kun puee atagban bí gùŋgum.> Ni nyí kutaa bimbim míǹ, ní kaa ŋūǹ kí béé tidaandi tin Unimbɔti bíi ŋáań iyunti in bí nee poonee[80].

⁴Waanee nib binikpitib bin kaa yú deedee nì Unimbɔtee bàlifī yii ḿ ŋá kudaaŋŋu kubɔ kí dàkà-bi. Baa làá ká kudaaŋŋu kubɔ asee kun náań nì Yoona yɔkɔee[81]!» U lī mimmee ní ki yāntì-bi ki búntì.

⁵U-boonnooliibi nín dūtì dimɔɔgbandee, bi súntì kaa kpáaǹní kpɔnɔb.

⁶Ní Yeesu bí-bi yii: «Ní nīn nyí nì ni-ba nì Fariisab nì Sadusab kpɔnɔnyɔkɔŋu pu.»

⁷Ní u-boonnooliibi bíi dàkafī bi-ban yii: «Ti nín kaa kalin kpáaǹní kpɔnɔbee pu ní u lī mimmaaa?»

⁸Yeesu béè bi-landɔkɔi, ní ki lī-bi yii: «Ba pu ní ni bíi dàkafī ni-ban ni nín kaa ŋúbiń kpɔnɔbee pu? Ba pu ní ni-fookiiu kaa náaǹ míǹ?

⁹Nìn díǹ naa láá gbìl̄ taapuɔɔɔ? Naa téetí kpɔnɔb biŋmoo bin m gífì ki tīī binib kutukub biŋmoo ŋmɔ́ ki díkí áli ni tōō bin kíǹee tikabiti saalaa nì tileeee?

¹⁰Àá naa téetí kpɔnɔb biluli bin m gífì ki tīī binib kutukub binaa ŋmɔ́ ki díkée? Tikabiti tiŋa ní ni nìn tōō bin kíǹee ní?

¹¹Ba pu ní m nín bí-ni yii ní nīn nyíǹ ni-ba nì Fariisab nì Sadusab kpɔnɔnyɔkɔŋu puee, naa béè yii an kaa sá kpɔnɔb pu ní m sòoǹ ní?

¹²Niinee ní u-boonnooliibi nín béè yii waa nìn bíi sòoǹ nì bi ŋkpɔnɔnyɔkɔ pu, ama Fariisab nì Sadusab dàkatam pu ní u nìn bíi sòoǹ.

¹³Ní Yeesu nì u-boonnooliibi búntì Seesaaree Fiiliipi tiŋki watil pú. Bi cée, ní u bālifì-bi yii: «Binib lì man Kinibiki pu yii m sá ŋma ní?»

¹⁴Ní bi kíí-u yii: «Biba bí yii a sá Yoowaneesi un fùul̀ binib Unimbɔti nyimee, ní biba mun bí yii a sá Unimbɔti bɔnaatiliu Eelii, ní biba mun bí yii sii di sá Yeereemii àá Unimbɔti bɔnaatiliibi kansikin ubɔ.»

¹⁵Ní Yeesu bālifì-bi yii: «Kin nimbi fáà, ŋma ní nimbi nyí yii m sá ní?»

¹⁶Ní Siimɔn Peetroo kíí-u yii: «Sii di sá Meesiya, ki sá Unimbɔti un bí dimaŋfalinee Jipɔɔn.»

¹⁷Ní Yeesu bí-u yii: «Siimɔn, Yoowaneesi jipɔɔn, a bí mmɔnni! Di sá yii an kaa sá unil di lēē an baamɔŋyi ki dàkā-si, an sá m-Baa un bí yilpuee di dàkā-si.

¹⁸Man tùkù-si yii: sii di sá Peetroo, ditaŋkpakpaandi nee pu ní m làá mā m-nikitil kí tɔ́kɔń[82], ní ŋkúm nì mi-pɔŋŋu làá nyàfiǹ kí gúĺ, kaa làá ŋmā kí ŋá-dì tiba.

¹⁹M làá dū Unimbɔti Beel saafiibi kí tīī-si, ní a yaa sòon̄ ki síiǹ pu taapu dooyee, míǹ ní an sòon̄ ki síiǹ yilpu mun[83].»

²⁰Yeesu lī míǹ ki dóòyee, ní ki bí u-boonnooliibi yii bí taa pée tùkù báà ubɔ yii úǹ di sá Meesiya.

²¹Ŋyunti gbantee ní Yeesu kíĺ ki sòoǹ ki cántí u-boonnooliibi yii: «An sá yii ḿ cù Jeerusaleem, bitindaŋkpilib nì bisaraaŋakpilib nì bimaradakaliibi ń sàaǹ-mi tikpil, ní kí kpɔ̀-mi, winta dalee, ní ḿ fìkitī.»

²²Ní Peetroo cáá-u ki kākatì ŋkpaanceeti ki wòon̄-u yii: «Ukpil, Unimbɔti ń cùnnì mbusu ndan! An kaa làá bàń-si míǹ.»

²³Ní Yeesu fātìń Peetroo pu ní ki bí-u yii: «Sii un cáá Sitaan landɔkɔŋuee, sútí niin kí wàatī-mi. A sá-mi kisugiŋ ní nsan pu. Saa dàkafī Unimbɔti yam, a dàkafī nniyaamin ní.»

²⁴Niinee ní Yeesu tùkū u-boonnooliibi yii: «Un yaa là kí nóó-mee ń fá úǹ u-ba nín là puee, kí yòon̄ u-dɔpuntikaaŋu kí nīn nóó-mi.

²⁵Kun puee un di yaa là kí fīī u-maŋfalee làá dāá lántí-dì, ama un di yaa fá u-maŋfal man puee di làá dāá fīī-dì.

²⁶Unil, a yaa jíń duulinya nee kɔkɔ ní ki yaa fá a-naŋkee, ba ní a páatì? Ba ní a ŋūǹ kí dūú pà kí fīī a-ba?

²⁷Man Kinibiki làá dāan̄ nì m-Baa Unimbɔti nyooti, ní m-tuuŋyi dāa nóó-mi, ní ḿ dāá pà báà ŋma nì u-tundi nín sá puee[84].

²⁸Ibaamɔn ní m tùkù-ni, biba bí ni-kansikin doo kaa làá kpú ní kí ká man Kinibiki ń dāan̄ kii ubɔtee.»