Read Ntcham Matthieu 18 Bible Online

Matthieu 18 - Ntcham bible

Matthieu 18

¹Ŋyunti gbantee ní Yeesu boonnooliibi dɔ́miń u-cee ki bālifì-u yii: «Ŋma di sá ukpaan Unimbɔti Beelin ní?»

²Ní u yíiń kibiyaawaai kiba ki yóoǹ bi-nimbiin,

³ní ki bí-bi yii: «Ibaamɔn ní m tùkù-ni, ni yaa kaa kpántì ni-bimbim ki ŋá kii mbiyaamuee, ni kpá kí kɔ́ Unimbɔti Beelin.

⁴Un sá ukpaan Unimbɔti Beelinee di sá un di sìntīǹ u-ba ki kpántí kii kibikee.

⁵Un kamaa yaa fōō kibiyaawaai kiba kii kíǹee juti man puee, udaan fōō man dee.»

⁶«Ama un di yaa yāntì mbiyaamu mun fōō-mi ki kíí nee kansikin kiba ŋá ikpitee, an sɔ́ bí dū kunakpaaŋŋu kí kúĺ udaan neen kí cáá-u kí tɔ̄ tiŋkun ú múĺ taapu taapu.

⁷Mbusu bí duulinya pu, kun puee tiwan tikpil yàntī binib ŋáań ikpiti. Tin yàntī binib ŋáań ikpitee làá nīn pée bí ní. Ama mbusu bí ki tīī un pu ní án làá dīńee.

⁸«An yaa sá a-ŋal kii a-taal di yaa làá yàntī á ŋá ikpitee, gùutīí fá kí wàatī a-ba! Á kɔ́ dimaŋfal din kaa kúntée ni nì ditaagindi kii diŋaŋgindi sɔ́ nì a-ŋalii liitil nì a-taaŋi liitil ń nīn bí, bí cáá-si kí tɔ̄ ŋŋmi ŋun kaa kúù jaanjaanee ni.

⁹An yaa ti sá a-nimbil di yaa làá yàntī á ŋá ikpitee, á lúkutí-dì kí fá. Á kɔ́ dimaŋfal din kaa kúntée ni nì dinimbil dibee sɔ́ǹ a-nimbiliŋ liitil ń nīn kā, bí cáá-si kí tɔ̄ ŋŋmi ŋun kaa kúù jaanjaanee ni.»

¹⁰«Ní nīn nyíǹ ni-ba kí taa kpèè mbiyaamu nee kansikin kiba fám. M tùkù-ni ibaamɔn ní yii ituun in kpèé-muee bí m-Baa un bí yilpuee nimbiin ŋyunti sá kamaa. [

¹¹Di sá yii man Kinibiki dɔ́miń kí fīī bin nìn wáŋkèe ní[89].]

¹²«Ni dàkafī yii ba? Unil yaa cáá ipii dilaataal, ní ubɔ wáŋkì i-kansikinee, waa yàntī ubɔ kpá dilaataal in kíǹee ajoon pu kupikpaaun kí cùú nyàabìń ubɔ un wáŋkèeee?

¹³M tùkù-ni yii, u yaa tin ká-uee, u-bɔti mɔ́ɔkíǹ-u kí jītíǹ ubɔ kpá dilaataal in kaa wáŋkèe bɔti.

¹⁴Míǹ mbaantiim ní ni-Baa un bí yilpuee kaa là mbiyaamu nee kansikin báà kiba ń wāŋkì.»

¹⁵«A-nabiki yaa yīntiǹ-see, cù u-cee kí dàkà-u min ní u ŋá-si an kaa kítèe sii nì u ŋmaniŋma. U yaa gbìl̄ ki tīiǹ-see, mimmee, a ŋúń ki gíiǹní a-nabiki nsammɔntin dee.

¹⁶Ama u yaa yíì, kaa gbìlīǹ-see, á kpáaǹ unil ubɔ kii bili kí cù u-cee, án nín làá ŋá pu binib bili kii bita ń ká kí ŋmā kí sòoǹ min udaan ŋá an kaa kítèe, kii Unimbɔti gbɔŋku poon nín lī puee[90].

¹⁷U yaa kaa tí gbìl̄ ki tīiǹ bi muee, á tùkù Unimbɔti nikitil. U yaa tí yíì, kaa gbìlīǹ Unimbɔti nikitilee, ú kpántí a-cee kii unil un kaa nóó Unimbɔtee.»

¹⁸«Ibaamɔn ní m tùkù-ni, tin ní ni yaa bóob́ taapu dooyee, míǹ ní an bóob́ yilpu mun[91].

¹⁹«Ibaamɔn ní m tùkù-ni, binib bili ni-kansikin yaa kpáfì kinyɔkɔ taapu doo ki mēē báà kuŋyee, m-Baa un bí yilpuee làá tīī-bi kudɔŋu.

²⁰Di sá yii laakin binib yaa kpáfì bili kii bita man yindi puee, m bí bi-kansikin.»

²¹Niinee ní Peetroo dɔ́miń Yeesu cee ki bālifì-u yii: «Ukpil, m-nabiki yaa yīntiǹ-mi, kí tin sāā miŋa ní an máaǹ ḿ dūú pɔ̄-u ní? Kí tin sāā milulaaa?»

²²Ní Yeesu kíí-u yii: «Aayee, an kaa sá miluli, an sá kí tin sāā imuŋku ita nì saalaa miluli pu ní á pɔ̄.»

²³An puee, Unimbɔti Beel náań nì kii ubɔti ubɔ nín yíiń u-tɔntɔnliibi bí dāá pà-u bi-pɔɔŋŋi puee ní.

²⁴U kíĺ ki bíi kàaǹee, ní bi cáań-u u-pɔ̀nliu ubɔ un cáá-u dipɔndi miiliyɔmbi kutukuee.

²⁵Kijapaayee nín kaa nìn cáá kun ní u làá dūú pèe, ní ukpilee bí yii bí dū u nì u-nimpuu nì u-biyaamu nì tin kɔkɔ u cááyee kí nyāfì án ŋmā kí bà kunimbiŋmiiu.

²⁶Ní utɔntɔnlee tātìi gbāaǹ u-kpiliu nimbiin, ki dɔ̄ kitiŋ ki fìlim̄ ki gbāam̀-u yii: «Á jī kimɔtii! M làá dāá pà-si kɔkɔ.»

²⁷U nín kaa ŋūǹ kí pà puee ní u-kpiliu súń u-saai ki dū u-pɔndi ki pú-u, ní ki bí yii ú nīn cá.

²⁸«Utɔntɔnlee nyáńee ní ki dūu tú u-tɔntɔnjuti un mun cáá úǹ dipɔndi kutukuee nsan, ní ki cìb̄ ki cúú-u ki ŋmáaḿ u-neen ki bí-u yii <Pà-mi m-nimbiliŋ!>

²⁹Ní u-tɔntɔnjutee gbāaǹ u-nimbiin ní ki gbāam̀-u yii: <Á jī kimɔtii, m làá pà-si.>

³⁰Ama waa kíí see u nín cáá-u ki tɔ́ sarka ú pà u-pɔndi kɔkɔee.

³¹U-tɔntɔnjutiibi nín ká min jítèe, ní an kɔ́ bíǹ inimɔɔn, ní bi cūtìi kàan̄ tin jítèe kɔkɔ ki tùkū bi-kpiliu.

³²Niinee ní bi-kpiliu yíiń utɔntɔnlee ní ki bí-u yii: <A sá utɔŋfiti ní! A nín gbāam̀-mi puee ní m dū a-pɔndi ki pú-si.

³³An kaan máaǹ á sɔ̄ a-bɔɔ saai kii man nín súń a-saai pueeee?>

³⁴Ní u-kpiliuee gíí diŋuul, ní ki yāntì bi dū-u ki tɔ́ sarkan bí dáaĺ u-tafal áli ú dāá pà u-pɔndi kɔkɔ kí dóó.»

³⁵Ní Yeesu bí yii: «Míǹ ní m-Baa un bí yilpuee làá dāá ŋá un kamaa kaa dū u-nabiki kpitii ki pú-u nì u-pɔbil kɔkɔee.»