Read Ntcham Matthieu 20 Bible Online

Matthieu 20 - Ntcham bible

Matthieu 20

¹«Unimbɔti Beel náań nì kii bukpaadaan ubɔ nín nyáń kutaafaau pɔ̀lpɔl kí nyàab̀ bipaadambi bí tɔ̄ ditundi u-kpaabun puee ní.

²U ká-bee, ní bi sòon̄ ki bɔ́ntì yii u làá pà-bi ŋwiin ŋubɔ tundi paati, ní u cáá-bi ki tɔ́ u-kpaabun.

³Tikúti tiwa gbáńee, u nyáń ki ká biba kā kinyɔŋin fám kaa bíi tūǹ diba,

⁴ní u bí-bi yii: <Ni mun, nín̄ cámaan m-kpaabun, m làá dāá pà-ni an nín máaǹ puee.>

⁵Ní bi búntì. Ní bukpaadaan tí nyáń tikúti saalaa nì tili, ní ki dāa nyáń wiŋkpooti tikúti tita ki ká biba mun.

⁶Kujoou tikúti tiŋmoo watilee, ní u tí nyáń ki ká biba kā, ní u bālifì-bi yii: <Ba ŋá ní doooo kutaafaau ni kā doo fám, kaa bíi tūǹ diba?>

⁷Ní bi kíí-u yii: <Di sá yii ubɔ kaa cúú-ti pàá.> Ní u bí yii: <Too, ni mun nín̄ cámaan man kpaabun.>

⁸«Kujoou jóotèe, ní bukpaadaan bí un kpèé u-paadambee yii: <Yíiń bipaadambee kí pà-bi bi-paati, kí kíliń bin m lúŋkèe kí dāá kátí bin m pééyee.>

⁹Ní bin bi cúú kujoou tikúti tiŋmooyee dɔ́miń, ní bi-kɔkɔ fōō ŋwimmɔn paati.

¹⁰Bin bin u péé péé ki cúúyee dàkafī yii bíǹ làá fōō tipaal án nīn wīikí ki jítiǹ bin lúŋkì boonee, ní bi dū ŋwiin ŋubɔ paati ki tīī báà ŋma.

¹¹Bi nín fōō animbilee, ní bi bíi gbùkum̄ ukpilee pu, yii:

¹²<Bin a lúŋkì ki fōō nee, kukúbambaantiiu ní bi dūu túń ditundi, ní a pàn̄-bi mbaantiim kii timbi bin kíĺ doooo kutaafaau ki kùn̄ ki gīī, ŋwìiń píĺ-tee.>

¹³Ní u fātìi kíí bi-kansikin ubɔ yii: <M-bɔɔ, maa mūul̀-si. Man nì si kaa sòon̄ a kíí yii a làá fōō ŋwiin ŋubɔ paati níii?

¹⁴Fōō a-nimbiliŋ kí nīn cá, m là kí tīī ujoolkaa nee kii m nín tīī si mun puee ní.

¹⁵Maa cáá nsan kí dū m-nimbiliŋ kí ŋá m nín là pueeee? Àá, m nín ŋá un béeyee tiŋanee ní an wù-si ní?>»

¹⁶Ní Yeesu gíti lī yii: «Biboompaanliibi làá dāá ŋá bisanlintiliibi, ní bisanlintiliibi ń dāá ŋá biboompaanliibi.»

¹⁷Ŋyunti ŋun Yeesu làá nīn cá Jeerusaleemee ní u yíiń u-boonnooliibi saalaa nì bilee ŋkpaanceeti, ki bí-bi yii:

¹⁸«Ni ká Jeerusaleem un ti jɔ́ḿ neeyaa, bi làá cúú man Kinibiki kí tīī bisaraaŋakpilib nì bimaradakaliibi, ní bíǹ ń dāá sòoǹ m-bɔti kí lì yii bí kpɔ̀-mi.

¹⁹Bi làá dū-mi kí ŋúbíǹ bin kaa sá Juuda yabee ní bíǹ ń bèel̀-mi kí gbá-mi anaalab, kí kpáá-mi ndɔpuntikaa pu kí kpɔ̀-mi, ní winta dalee ḿ fàtīí fìkitī.»

²⁰Niinee, Seebeedee jipɔmbi na yōoǹní u-jipɔmbi ki dɔ́miń Yeesu cee ki gbāaǹ u-nimbiin kí mèè-u tiba.

²¹Ní Yeesu bālifì-u yii: «Ba ní a là?» Ní u bí-u yii: «Ŋyunti ŋun a yaa láa kpántì ubɔtee, á yàntī m-jipɔmbi bili nee ubɔ ń dāá nīn kā a-ŋaŋgiil pú, un kíǹee a-ŋaŋgan pú.»

²²Ní Yeesu bí yii: «Naa nyí tin ni mèéyee. Ni ŋūǹ kí nyɔ̀ falaa un man làá nyɔ̀ naaa?» Ní bi kíí-u yii: «Iiin, ti ŋūǹ.»

²³Ní Yeesu kíí-bi yii: «Tiŋman, an lafun sá ní nyɔ̀ falaa gbanti[97], ama an yaa kíǹ ŋŋaŋgiil nì ŋŋaŋgan kakaaŋu bɔtee, an kaa sá man di pūǹ an paaŋyi. Ipaan gbanti sá ki tīī bin pu m-Baa bɔ́ntì-i ki síiǹee ní.»

²⁴U-boonnooliibi saalaa bin kíǹee nín gbìl̄ mimmee, ní bi fōō nnabiyaamu mulee pu diŋuul.

²⁵Niinee ní Yeesu yíiń bi-kɔkɔ, ní ki bí-bi yii: «Ni nyí yii atimbun bɔtiibi wɔ́b́ bi-yab, ní binikpaambi tɔ́kɔ́ bin kíǹee pu ki dàkà-bi bi-pɔŋŋu.

²⁶An kaa máaǹ kí nīn bí míǹ nimbi kansikin, ama un yaa là kí nīn sá ukpaan ni-kansikinee, udaan ń gíiǹ u-ba ni-tɔntɔnliu,

²⁷ní ni-kansikin ubɔ yaa là kí nīn sá upeepeekaayee, udaan ń nīn sá ni-yumbuu.

²⁸Míǹ ní man Kinibiki kaa dɔ́miń bí tɔ̄ ditundi kí tīī-mi, m dɔ́miń kí tɔ̄ atuun kí tīī binib ní kí dū m-maŋfal kí pà kí fōō binib tikpil kí líí[98].»

²⁹Ŋyunti ŋun Yeesu bíi nyēē Jeeriikoo tiŋkee, dinikitikpaandi diba nìn nóó-u.

³⁰Bijɔfub bili nìn kā nsan caŋin. Bi gbìl̄ Yeesu bíi jītée, ní bi bíi tátí yii: «Ukpil, Daafiidi naantiiu, sɔ̄ ti-saai!»

³¹Ní diniwulee bíi wòoǹ-bi yii bí ŋmīĺee ní bi mɔ̄tìi bíi tátí mpɔn yii: «Ukpil, Daafiidi naantiiu, sɔ̄ ti-saai!»

³²Niinee ní Yeesu sāā ki síl̀, ní ki yíiń-bi ki bālifì-bi yii: «Ba ní ni là ḿ ŋá kí tīī-ni ní?»

³³Ní bi kíí-u yii: «Ukpil, ŋúbití ti-nimbiliŋ.»

³⁴Ní Yeesu súń bi-saai ní ki gbēē bi-nimbiliŋ, kpalaa niinee ní bi wál̀, ki kíǹ ki nóó-u.