Read Ntcham Matthieu 21 Bible Online

Matthieu 21 - Ntcham bible

Matthieu 21

¹Ŋyunti ŋun bi tóob́ Jeerusaleem ki bàn̄ Beetifagee timbiliiki kin bí Ɔliifi sufii jool[99] caŋinee, ní Yeesu lēē u-boonnooliibi bili ki tú.

²U nìn bí-bi yii: «Nín̄ cámaan kitimbilii kin bí ti-nyɔkɔpu nee. Ni yaa bàn̄ kpalaayee, ni làá ká kimansalii kiba nì ki-biki gbìn̄ niin. Ní gbìntīń-mu kí cáań-mi.

³Ubɔ yaa bālifì-ni tibee, kíímaan-u yii: <Ti-Dindaan di nyàab̀-mu,> niinee, udaan làá yàntī ní cáań-mu.»

⁴An jítì míǹ kí dàkà Unimbɔti bɔnaatiliibi nín nìn lī ki síiǹ puee yii:

⁵«Tùkùmaan Siiyɔn tiŋki nib, yii: Kpèèmaan, ni-bɔtiu dòoń ni-cee, ki sá unil un mɔ̄ee. U kā kimaŋ pu, u kāń dimampɔmbil, kimansalii biki pu[100].»

⁶Ní u-boonnooliibee búntì ki cūtìi ŋá kii Yeesu nín bí yii bí ŋá miŋyee.

⁷Bi cáań kimansaliiyee nì kimambiki, ní ki dū bi-bɔkutiŋ ki páaǹ mu-pu, ní Yeesu jɔ́m̀ ki kāl̀.

⁸Ní dinikitilee kansikin binib tikpil kpátí bi-bɔkutiŋ ki bīil̀ nsan pu, ní biba mun gà tikpakpati ki bīil̀ nsan pu[101].

⁹Ní kunipaau kun līī Yeesu nyɔkɔpuee nì kun pá u-boonee kūuntí yii: «Oosaana! Daafiidi naantiiu ń ká tinyool! Ti-Dindaan ń bìin̄ un dòoń u-yindi puee! Bí nyɔ̄ŋkì Unimbɔti un bí yilpuee[102]!»

¹⁰Yeesu nín bàn̄ ki kɔ́ Jeerusaleemee, ní kitiŋ kɔkɔ fōō ki píĺ dàmmm, ní binib bàlifī yii: «Unil nee sá ŋma ní?»

¹¹Ní kunipaauee kíikí yii: «An sá Yeesu Unimbɔti bɔnaatiliu un sá Naasaareeti Galiilee tiŋkinee.»

¹²Ní Yeesu kɔ́ kunimbɔtidiin ki jìn̄ biwannyafiliibi nì bidaliibi kɔkɔ ki nyántì, ní ki lábitì binimbikpantiliibi teebilib nì binanjinyafiliibi jaliŋ ki cìb̄,

¹³ní ki bí-bi yii: «An ŋmàn̄ Unimbɔti gbɔŋku poon yii: <Bi làá dāá nīn yíì man diiku ŋwimmeem diiku ní,> ama ní nimbi dū-ku ki kpántì kunaayudii[103].»

¹⁴Niinee ní bijɔfub nì bin tà bi-taaŋi puee sútìń ki pìl̄-u kunimbɔtidii poon, ní u cáaǹ-bi.

¹⁵Bisaraaŋakpilib nì bimaradakaliibi nín ká maamaaci tuuŋŋi ŋin Yeesu ŋáaǹee, nì mbiyaamu nín bí kunimbɔtidii poon ki tátí yii: «Oosaana! Daafiidi naantiiu ń ká tinyoolee!» ní bi fōō diŋuul,

¹⁶ní ki bí-u yii: «A gbìl̀ bi nín tátí ki lì pueeyaaa, saa gbìl̀ ní?» Ní u kíí-bi yii: «M gbìl̀! Naa láá pée kàan̄ Unimbɔti gbɔŋkun laakin an ŋmàn̄ yii: <A yāntì mbiyaamu ki kpáaǹ mun dáá bíi ŋáaḿee nyɔ́ŋkí-si[104]>?»

¹⁷U lī mimmee, ní ki yāntì-bi, ki nyáń ki búntì Beetanii ki tin dōoǹ.

¹⁸Ku wúntì kutaafaau, Yeesu fàtīi gítiń kitiŋinee ní ŋkùm cúú-u.

¹⁹U kpēēyee ki ká busubu bun bi yíì fiigee yú nsan caŋin, ní u pāatì busubuee taapu ki bàà nyàab̀ asubil kí ŋmɔ́, ní ki ká yii an sá tifaal ŋmaniŋma ní. Ní u lī busubuee yii: «Sii pée gíti kpá kí lòoǹ dibil.» Kpalaa niin ní busubuee kūń.

²⁰U-boonnooliibi ká mimmee ní an ŋá-bi bitii, ní bi bālifì-u yii: «Mana ní busubuee pūtì kpáàa kūń míǹ dicilpuee?»

²¹Ní Yeesu bí-bi yii: «Ibaamɔn ní m tùkù-ni, ni yaa fōō Unimbɔti ki kíí mbaamɔmin kaa gùgufēe, an kaa sá min m ŋá busubu nee ŋmaniŋma ní ni làá dāá ŋmā kí ŋá. Ni dāa ŋūǹ kí lì gba dijool nee yii: <Á yīkì laakin a yú nee kí cùú jēetí tiŋkun!> ní dí lafun ŋá míǹ.

²²Tin kamaa ní ni yaa mēē Unimbɔti ní ki yaa fōō ki kíí yii u làá ŋá kí tīī-nee, ni làá ká kudɔŋu.»

²³Yeesu tí kɔ́ kunimbɔtidiin ki bíi dàkà binib Unimbɔti bɔtee, ní bisaraaŋakpilib nì Juuda yab kpilib dɔ́miń u-cee ki bālifì-u yii: «Nì nsan ŋulɔŋu pu ní a tūǹ atuun ŋin a tūǹ nee ní? Ŋma di pú-si an saŋŋu?»

²⁴Ní u bí-bi yii: «Dinyɔɔbumbaantiil ní m làá pée bàlifì-ni ní kíí-mi kí wàatī, ní ma mun ń tùkù-ni nì nsan ŋun pu ní m ŋáań mimmee.

²⁵Yoowaneesi nín fùul̀ binib Unimbɔti nyimee, ŋma di tīī-u an pɔŋŋu ní? Unimbɔtaaa, binib?» Niinee ní bi kíĺ ki bíi sòoǹ bi-ŋmaniŋma yii: «Ti yaa kíí yii: <An sá Unimbɔti di túnní-u,> u làá wòoǹ-ti yii: <Kin, ba ŋá ní naa fōō-u ki kíí?>

²⁶Ti yaa tí kíí-u yii: <An sá binib di túnní-uaaa,> ti fàŋkí kunipaau mun, kun puee báà ŋma kɔkɔ nyí yii Yoowaneesi sá Unimbɔti bɔnaatiliu ní.»

²⁷Ní bi kíí Yeesu yii: «Taa nyí.» Ní u mun bi yii: «An yaa sée, ma mun kaa làá tùkù-ni nì nsan ŋun pu ní m ŋáań mimmee!»

²⁸Ní Yeesu gíti bí yii: «Ni dàkafī tibɔti nee pu yii ba? Uninja ubɔ di cáá binaacimpɔmbi bili ní ki bí upeepeekaa yii: <M-jipɔɔn, á cù kusaau díǹ kí tɔ̄ ditundi.>

²⁹Ní kibikee yíì ki lī yii: <Maa làá cù,> ama ní boonee ki dāa kpántì ki-landɔkɔŋu ní ki búntì kusaau.

³⁰Ní u cūtì un kíǹee cee ní ki lī u mun tibɔbaantiil. Ní úǹ kíí-u yii: <M-baa, m làá cù!> ama ní kaa gbóoń kusaau.

³¹Binaacimpɔmbee liitil kansikinee, ulɔu di ŋá min bi-baa lèe?» Ní bi kíí yii: «Upeepeekaa di ŋá.» Niinee ní Yeesu bí-bi yii: «Ibaamɔn ní m tùkù-ni, bifɔtiliibi nì nnimpulaakpaamu làá lìntī ni-nyɔkɔpu kí kɔ́ Unimbɔti Beelin.

³²Di sá yii Yoowaneesi dɔ́miń ni-cee ki dàkà-ni deedee saŋŋu ní naa fōō-u ki kíí, ama ní bifɔtiliibi bin ni kpèé fámee nì nnimpulaakpaamu fōō-u ki kíí. Ni nín ká mimmee boonee naa kpántì ni-landɔkɔi kí fōō-u kí kíí.»

³³Ní Yeesu bí yii: «Gíti pīlifìmaan tibɔŋmantikaal nee. Uninja ubɔ di kùn̄ fiinyi kpaabu. U cóoǹ kunaabakau ki māntì ki tú-bu, ki gbìn̄ mbòó ŋun ni u làá nīn ŋmāam̀ isufee biliŋee, ki gāā isupaa bukpaayee kansikin[105], ní ki dū isufee ki tīī bipaadambi biba, ní ki búntì nsan.

³⁴Isufee biliŋ kìtitam bàn̄ee, ní ukpilee túnní u-tɔntɔnliibi biba u-paadambee cee bí fōō u-jandi kí cáań-u.

³⁵Ní bipaadambee cúú u-tɔntɔnliibee ubɔ ki gbáń ní ki kūū ubɔ mun ní ki yáŋkì utataati ataŋkpee ki kūū.

³⁶Ní bukpaadaanee gíti túnní bitɔntɔnliibi biba bíǹ wīikíǹ bin u péé péé ki túnnée, ní bipaadambee tí cúú bi mun ki ŋá kii bi nín ŋá bipeepeekaabee puee.

³⁷Boonee ní u baasii dū u-jipɔɔn ki tú, ki dàkafī yii: <Úǹ sá m-jipɔɔnee, bi làá fàŋkì-u.>

³⁸Ama bipaadambee nín ká u-jipɔɔnee páaǹnée, ní bi bíi lì tɔb cee yii: <Kpèè un làá dāá jī bukpaa fool boonee di dòońee! Tí kpɔ̀maan-u kí jī kusaau!>

³⁹Ní bi cúú-u ki nyántì ŋkpaabuku ki kūū-u.»

⁴⁰Ní Yeesu bālifì-bi yii: «Mimmee bukpaadaan yaa láa bāańee, u làá ŋá-bi mana?»

⁴¹Ní bisaraaŋakpilib nì Fariisab kíí-u yii: «U yaa bāańee, see ú kpɔ̀ binikpitib gbanti nsansaaŋkúm ní kí dū u-kpaabu kí tīī bipaadambi bin ŋyunti yaa bāań, bi làá nīn tìiń-u an subiliŋee.»

⁴²Ní Yeesu bí-bi yii: «Naa láa pée kàan̄ Unimbɔti gbɔŋkun laakin lī yii: <Ditaŋkpal din bidimaliibi nìn dūu fée, díǹ di dāa kpántì ditaŋkpal din ŋúb́ kudii pɔŋŋuee. Ti-Dindaan nín ŋá tiŋyee kaa sá maamaaci ki tīī-taaa[106]?>

⁴³An pu ní m tùkù-ni yii bi làá dāá fōō ni-cee Unimbɔti Beel kí dūú tīī ditimbundi din yab làá ŋá Unimbɔti lammee. [

⁴⁴Un di yaa lítì ditaŋkpalee puee làá yàaǹ, ama ní ditaŋkpalee yaa tàb̄ uŋyee, udaan làá nà ní dúsi dusi[107].]»

⁴⁵Bisaraaŋakpilib nì Fariisab nín gbìl̄ Yeesu bɔŋmantikaati gbantee, ní bi béè yii bíǹ ní u lì.

⁴⁶Ní bi bíi nyàab̀ nsan ŋun bi làá dī kí cúú-uee, ama ní ki fàŋkí kunipaau, kun puee báà ŋma nyí yii Yeesu sá Unimbɔti bɔnaatiliu ní.