Read Ntcham Matthieu 22 Bible Online

Matthieu 22 - Ntcham bible

Matthieu 22

¹Ní Yeesu tí dū tibɔŋmantikaal nee ki ŋmāntì ki lī yii:

²«Unimbɔti Beel nín náań nì kuŋyee sɔ̀. Ubɔti ubɔ di cáá unimpu ki tīī u-jipɔɔn ní ki ŋá tican kí tīī binib,

³ní ki dū u-tɔntɔnliibi ki tú bí cù kí tùkù binib bin u yíińee yii bí dāan̄, ama ní bi yíì kaa dɔ́miń.

⁴Ní u gíti dū u-tɔntɔnliibi biba mun ki tú ki bí-bi yii: <Cùú tùkùmaan bin m yíińee yii, tijikaal bɔ́ntì ki dóò, m kūū inajaa, ki kūū tiwaŋkuti tin cáá ŋkpamee, an kɔkɔ bɔ́ntì ki sí! Bí dāan̄ tí jī jiŋaal.>

⁵Ama bi-kansikin báà ubɔ kaa fātìi tɔ́, ní báà ŋma búntì u-laŋki: ubɔ búntì u-saaku, ubɔ mun búntì u-bantil,

⁶ní bin kíǹee cúú bitɔntɔnliibee ki sāaǹ ki kūū.

⁷Ní ubɔtee fōō diŋuul ní ki dū u-soojab ki tú bi cūtìi kūū binikpɔliibi gbanti ki sēē bi-tiŋki mun ŋŋmi.

⁸Niinee ní u bí u-tɔntɔnliibi yii: <Tijikaal bɔ́ntì ki sí dee, ama ní bin m bàà yíińee kaa kítì.

⁹Míǹ puee nín̄ cámaan isampuyakati pu kí nīn yíìń bin kɔkɔ ní ni yaa pée kée bí dāan̄ kí jī.>

¹⁰Ní bitɔntɔnliibee nyáń isantaan pu ki kpáfì bin kɔkɔ bi kée, bikpitib nì bimɔntiibi kɔkɔ, ní ki cáań-bi ki gbéeǹ kudii.

¹¹«Ubɔtee kɔ́ kí kpèè bin u yíińee, ki dūu ká kijapaai kiba kíǹ kaa pēē jiŋaal bɔkutil din bin béeyee pēē ki dɔ́miń tinimpucan jiŋaaliuee.

¹²Ní u bālifì-u yii: <M-bɔɔ, ba ŋá ní a kɔ́nní doo kaa pēē dijiŋaabɔkutil?> Ní kijapaayee kā ki ŋmí.

¹³Niinee ní ubɔti bí u-tɔntɔnliibi yii: <Bóob́maan u-taaŋi nì u-ŋalii iŋmii kí dū-u kí tɔ̄ mmɔŋki dibɔmbɔndin. Niin ní u làá sɔ̄ u-nyiŋŋi ń nīn gà tɔb kàkaka.>

¹⁴Di sá yii bi yíiń kunipaau, ama ní ki lútì fiii.»

¹⁵Niinee Fariisab cūtì ki sòon̄ ki bɔ́ntì bi nín làá dī min kí dū tibɔti kí píĺ Yeesu ú sòoǹ bí ŋmā kí cúú-uee.

¹⁶Ní bi dū bi-yab biba nì Eeroodi yab ki tú bí dāá bàlifì-u yii: «Ukpil, ti nyí yii sii di sòoǹ ibaamɔn ní ki dàkà min ní Unimbɔti là unil ń nīn bée, kaa fàŋkí binib nín dàkafī puee, kaa fàtīí tɔ̄ báà udaan yaa sá uŋyee.

¹⁷Mimmee á tùkù-ti sii nín dàkafī tibɔti nee pu miŋyee. Ti-marau pú-ti nsan tí pà lampoo kí tīī Room gɔminau Seesaaraaa, an kaa pú?»

¹⁸Ama ní Yeesu béè bi-landɔkɔkpitii, ní ki bí-bi yii: «Ipoonnyoondambi, ba pu ní ni píĺ-mi tibɔti kí kpèè m-nyɔkɔn míǹ?

¹⁹Dàkàmaan-mi animbil ŋin bi cáa pà lampooyee.» Ní bi lēē animbil ki dàkā-u.

²⁰Ní u bālifì-bi yii: «Ŋma yil nì u-yindi di náká animbil pu na?»

²¹Ní bi kíí-u yii: «An sá Room gɔminau Seesaar.» Ní Yeesu bí-bi yii: «Dūmaan tin gɔmina yèe kí tīī gɔmina, kí dū Unimbɔti mun yati kí tīī Unimbɔti!»

²²Bi nín gbìl̄ an bɔtee ní bi bākatì sèeee, ní ki yāntì-u ki búntì.

²³Ŋwimbaanti gbantee, Sadusab biba mun dɔ́miń Yeesu cee. Bíǹ di sá dinikitil din lì yii difìkitil kaa bée[108]. Bi bālifì Yeesu yii:

²⁴«Ukpil, Mooyiisi bí yii: <Ubɔ yaa kpíì, kaa màl̄ mbiyaamu, u-nabiki ń fōō ukpiipu kí màal̀ kí téeǹ u-nabiki kin kpíìyee yil[109].>

²⁵Kun pu ti bàlifēe di sá nnabiyaamu mululi nìn bí ti-kansikin. Upeepeekaa cáá unimpu ní ki kpíì ki yāntì unimpuee, kaa màl̄ kibiki, ní u-naal fōō ukpiipu.

²⁶Míǹ mbaantiim uliliitee kpíì, kaa cáá kibiki, ní utataati mun fōō ukpiipu ní ki mun kpíì. Bi pée fòol̄ ukpiipuee míǹ ní ki tin sāā ululuúti ní u mun kpíì.

²⁷Boonee ní unimpuee mun dāa dūu kpíì.

²⁸Difìkitil dalee, nnabiyaamu mululee kansikinee, ŋma di dāa yì unimpu dee? Kun puee bi-kɔkɔ pée cáá-u ki ká.»

²⁹Ní Yeesu kíí-bi yii: «Ni bí diyìntil poon ní nee, kun puee naa nyí Unimbɔti gbɔŋku poon bɔtaaa, kaa nyí Unimbɔti pɔŋŋu mun.

³⁰Di sá yii, binib yaa láa fīkitèe, dinimpucaal nì dicamɔndi dāa gíti kpá, báà ŋma dāa bí kii Unimbɔti tuuŋyi nín bí pu yilpuee ní.

³¹An yaa kíǹ bitaŋkpiibi fìkititamee, naa láá pée kàan̄ ki ká Unimbɔti nín sòon̄ nì ni pueeee? U bí yii:

³²<Man di sá Abraam Nimbɔtiu, ki sá Isaaki Nimbɔtiu, ki sá Jaakɔb mun Nimbɔtiu[110].> Unimbɔti yaa bí yii u sá bin kpíìyee Nimbɔtiuee, mimmee an dàkà yii úǹ ceeyee, bíǹ kɔkɔ kaa kpíì dee.»

³³Kunipaau kun nìn bíi pílifíǹ-uee nìn bākatì nì u-dàkatam.

³⁴Fariisab nín gbìl̄ yii Yeesu sòon̄ ki líì Sadusabee ní bíǹ kpáfì,

³⁵ní bi-kansikin umaradakal ubɔ là kí píĺ Yeesu tibɔti kí kpèè u-nyɔkɔnee ní ki bālifì-u yii:

³⁶«Ukpil, marab kɔkɔ kansikinee, ulɔu di sá ukpaan ní?»

³⁷Ní Yeesu kíí-u yii: «Á nīn néeń a-Dindaan a-Nimbɔtiu nì a-pɔbil kɔkɔ, nì a-naŋki kɔkɔ, nì a-landɔkɔŋu kɔkɔ[111].»

³⁸Mara un sá ukpaan ki līīyee dee.

³⁹Ní maraliliiti un páb́ kii upeepeekaayee sèé: <Á nīn néeń a-juti kii sisi a-bee[112].>

⁴⁰Marab bili nee pu ní Mooyiisi marab nì Unimbɔti bɔnaatiliibi dàkatam kɔkɔ tɔ́kɔ́.»[113]

⁴¹Fariisab nín nìn dáá gbíntìi bí dicilpuee, ní Yeesu bālifì-bi dinyɔɔbundi nee yii:

⁴²«Ni dàkafī Meesiya pu yii ba ní? Ŋma naantiiu ní u sá ní?» Ní bi kíí-u yii: «Daafiidi naantiiu.»

⁴³Ní Yeesu bí-bi yii: «Kin, ba pu ní Unimbɔti Fam yāntì Daafiidi u-ba yíiń-u yii u-Dindaan ní? Di sá u bí yii:

⁴⁴«<Ti-Dindaan tùkū m-Dindaan yii: Kàl̄ m-ŋaŋgiil pú kí nīn cí ŋyunti ŋun m làá yàntī á nīn kíǹ ki tɔ́kɔ́ a-nannanliibi puee[114].>

⁴⁵«Mimmee, Daafiidi yaa yíì Meesiya yii u-Dindaanee, mana ní u gíti ŋūǹ kí nīn sá u-naantiiu mun?»

⁴⁶Bi-kansikin ubɔ kaa ŋúń ki kíí-u báà dinyɔɔbumbaantiil. Kí yòon̄ ŋyunti gbantee ubɔ kaa ti mākaǹ kí bàlifì-u tiba kí kpèè u-nyɔkɔn.