Read Ntcham Matthieu 23 Bible Online

Matthieu 23 - Ntcham bible

Matthieu 23

¹Niinee, Yeesu bí kunipaauee nì u-boonnooliibi yii:

²«Bimaradakaliibi nì Fariisab di bí ki dàkà Mooyiisi marab.

³Míǹ puee, ní nīn ŋáaḿmaan min bi dàkà-nee, ama ní taa fōō bíǹ bi-ba bimbim, kun puee baa ŋáań tin bi dàkà yii binib ń nīn ŋáańee.

⁴Bi nyāntí marab bin nyìm̀ kii awaŋgulee ní ki tūntí binib ní kaa là kí dū bi-ŋambiki kí dáb́ awaŋgulee kí tūtuǹ binib.

⁵Bi pée tūǹ bi-tuuŋŋi kɔkɔ binib ń nīn wāĺ-bi ní. Bi wàantí igban in pu bi ŋmà Unimbɔti bɔti ki cáa fìǹ bi-ŋalii nì bi-yigbeeŋee, ní ki fɔ̀kɔntí bi-bɔkutiŋ gbeeŋgbeeŋyi[115].

⁶Bi néeń ki kàal̀ ikakaamɔnti diinabin nì nyɔkɔpu kakaai akpafidiinni,

⁷ki néeń bí nīn jáaḿ-bi binibin, ki néeń bí nīn yíì-bi <Ukpil, ukpil.>

⁸Ama nimbi ń taa yàntī bí nīn yíì-ni <Ukpil>, kun puee ni cáá ukpibaanti ní, ní ni-kɔkɔ sá nnabiyaamu.

⁹Ní taa yíiń ubɔ kitiŋ pu <ni-Baa>, kun puee ni-Baa pée sá ubambaanti ní, ki bí yilpu.

¹⁰Ní taa yàntī bí nīn yíì-ni <Uyidaan>, kun puee ubaanti di sá ni-Yidaaŋwu, úǹ di sá Meesiya.

¹¹Un gíiǹ u-ba ni-tɔntɔnliuee di dāa sá ukpaan ni-kansikin.

¹²Un yaa yōoǹ u-ba yilpuee bi làá dāá sìntīǹ-u taapu, ní un yaa sīntiǹ u-ba taapuee, bi làá dāá yòon̄-u yilpu.»

¹³Yeesu bí yii: «Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni pìintí binib Unimbɔti Beel punyɔkɔ. Naa làá kɔ́ ni-ba, ní kaa là bin bàà là kí kɔ́ee ń kɔ́.» [

¹⁴«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni fìkì tin kɔkɔ bikpiipoobi cááyee, ní ki mèé ŋwimmeem min yúntí fɔ́rrree bí ká-ni. An pu ní Unimbɔti làá dāá dáaĺ ni-tafal tikpil[116]!]

¹⁵«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni yìiǹ tiŋkub nì kitiŋ jaaŋŋi kɔkɔ pu ki nyàab̀ un làá kpántí ni-boonnooliuee, ní ni yaa ŋúń ki yāntì u kpántì u-bee, ní ní yàntī ú kpántí un làá dāá kɔ́ ditafadaaldinee mili pu kí jītíǹ nimbi.

¹⁶«Mbusu dɔ̄ ki cí-ni, nimbi bijɔfub bin kpòotī binibee, kun puee ni lì yii: <Unil yaa pūtì kunimbɔtidiiyee, an kaa sá tiba, ama un yaa pūtì sindaariya un bí kunimbɔtidiinee, ú ŋá min u pūtèe.>

¹⁷Bigbaambi, bijɔfub! Ba di páb́ ní? Sindaariyaaa, kunimbɔtidii kun yāntì sindaariyee kpántì circiree?

¹⁸Ni tí lì yii: <Unil yaa pūtì nsaraafanee, an kaa sá tiba, ama un di yaa pūtì saraa un pá nsaraafan puee, ú ŋá min u pūtèe.>

¹⁹Bijɔfub, tilati di páb́ ní? Saraayaaa, nsaraafan ŋun pu saraayee pá ki kpántì circiree ní?

²⁰Un di yaa pūtì nsaraafanee, pūtì ki kpáaǹ tin kɔkɔ pá nsaraafan puee dee.

²¹Un di yaa pūtì kunimbɔtidiiyee, pūtì Unimbɔti un kóò kudii gbantinee dee.

²²Un yaa pūtì kutaayee, pūtì Unimbɔti beejal nì Unimbɔti un kā di-puee dee[117].

²³«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni pà tikuŋfaal tin kɔkɔ ni kùee saalaa kamaa pu kubɔ kubɔ[118], ama ní ki yíití, kaa nóó marab bin bɔti páb́ee, an dàkà yii: á nīn cáá ibaamɔn, kí nīn sūǹ binib saai, kí nīn yú deedee. Tin bàà máaǹ ní ŋée dee, ní kí nín dū tin kíǹee kí páań boon.

²⁴Bikpootiliibi bin jɔ̀b̄ee! Ni jákà ki lèekī isii ni-nyɔkaatin, ama ní ki nátí igutaamu.

²⁵«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni fíntí tiyuti nì asambil boon, ama ní ni-naayutuuŋŋi nì tiwan tin ni fìkēe gbí poon.

²⁶Fariisab bijɔfub! Ní péé kí fíntímaan kuyuu poon, ní boon mun ń kpáàa nyā.

²⁷«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni náań nì akaakul ŋin bi píil̀ boonee ní. Ŋi ŋān̄ nnimbikpee, ama ní ŋi-poonee anikpil sūū ní akpab gbí.

²⁸Míǹ ní ni mun bí. Binib wāĺ-ni ŋgban puee yii ni sá deedeedambi, ama mpoonnyoon nì ikpiti di gbí ni ni.

²⁹«Mbusu dɔ̄ ki cí-ni, nimbi bimaradakaliibi nì Fariisab mpoonnyoondambi, kun puee ni māā Unimbɔti bɔnaatiliibi akaakumɔnti ní ki nyāantí bin yúl̀ deedeeyee kaakuliŋ,

³⁰ní ki lì yii: <Ti yaa bàà nìn bímaan ti-naanjab yuntiŋu, taa bàà nìn kútí bi-pu bí kpɔ̀ Unimbɔti bɔnaatiliibi gbanti.>

³¹Míǹ ní ni bíi lèekī ni-ba pu seera yii ni sá bin kūū Unimbɔti bɔnaatiliibee naantiibi.

³²Mimmee, púntímaan ni-naanjab nín nìn kíĺ ditundi diŋyee!

³³Nimbi bin tū kii ikoowaatee! Mana ní ni dàkafī yii ni ŋūǹ kí ŋmátí kí taa kɔ́ ditafadaaldi laŋki?

³⁴An puee, ní pīlifìmaan: M làá tɔ̄ń ni-cee Unimbɔti bɔnaatiliibi nì biciŋfitiibi nì bidakaliibi. Ni làá kpɔ̀ biba, kí kpáá biba idɔpuntikaa pu, kí gbá biba anaalab ni-kpafidiiŋŋin, kí jà biba bí póotí ntimu.

³⁵An puee nnikpaakoon tafadaaldi làá dāá lítí ni-pu, deedee nib bin kɔkɔ ni kūūyee pu, kí yòon̄ ŋyunti ŋun bi nìn kūū Abeelee kí tin sāā ŋyunti ŋun bi kūū Sakari Baaraasii jipɔɔn kunimbɔtidii nì nsaraafan kansikinee[119].

³⁶Ibaamɔn ní m tùkù-ni, nnikpaakoonee tafadaaldi làá dāá lítí nimbi waanee nib pu ní.»

³⁷«Jeerusaleem yab, Jeerusaleem yab, nimbi di kù Unimbɔti bɔnaatiliibi ní ki cáá ataŋkpee ki yāŋkí ki kù bin Unimbɔti túnní ni-ceeyee! Miŋa pu ní maa mākaǹ kí bàà kóoǹ ni-kɔkɔ kí kpāfì m-cee kii ukoonaati nín kōontí u-biyaamu u-taapu puee? Ama ní ni yíì.

³⁸Too, kɔŋkɔnnee Unimbɔti làá fá ni nì ni-diiku[120].

³⁹M tùkù-ni yii, kí yòon̄ díǹ kí nīn cée, naa làá ti ká-mi kí nīn cí ŋyunti ŋun ni làá dāá sòoǹ m-pu yii: <Unimbɔti ń bìin̄ un dòoń ti-Dindaan yindi puee[121].>»