Read Ntcham Matthieu 26 Bible Online

Matthieu 26 - Ntcham bible

Matthieu 26

¹Yeesu sòon̄ an bɔti ki dóòyee, ní ki bí u-boonnooliibi yii:

²«Kéè ni nyí yii an kíǹ iwiin ili dee tí jī Dilákatil jiŋaaliuaa[131]! Niin ní bi làá dū man Kinibiki kí ŋúbiǹ m-nannanliibi bí kpáá-mi ndɔpuntikaa pu.»

³Ní bisaraaŋakpilib nì Juuda yab tindaŋkpilib kpáfì usaraaŋakpil un bi yíì Kaayiifee naakookun,

⁴ki sòon̄ ki bɔ́ntì kí cúú Yeesu dibalin kí kpɔ̀-u.

⁵Ama ní ki lī yii: «Án taa nín̄ sá jiŋaalin, án nín làá ŋá pu samaa ń taa láa yīkì kí jáǹ-tee.»

⁶Yeesu nín nìn bí Beetanii, Siimɔn un nìn sá unyaŋgbantee dumpuee,

⁷ní unimpu ubɔ sútìń ki pìl̄-u ki ŋúbiń talaalumɔnti un pɔ̄ɔ̄ kudaau tikpilee, an kā ditaŋkpal kpalbanyaaŋwun[132]. Ŋyunti ŋun Yeesu kā ki jīǹ tijinee, ní u kpáatì talaaluee ki sītì Yeesu yil pu.

⁸Yeesu boonnooliibi nín ká mimmee, an kaa mɔ́ɔkiǹ-bi, ní bi bí yii: «Ba pu ní bi bíil̀ talaalumɔnti nee míǹ?

⁹Bi bàà ŋūǹ kí nyāfì-u animbikpaan kí dūú yàkatī biwɔfibaa!»

¹⁰Yeesu gbìl̄ bi nín bí ki sòoǹ tiŋyee, ní u bíi lìǹ-bi yii: «Ba pu ní ni páb́ unimpu nee míǹ? An sá ditummɔntiil ní u ŋá ki tīī-mi.

¹¹Kun puee ni nì biwɔfib di làá nīn pée bí baabadal[133], ama man kaa làá nīn bí ni-cee baabadal.

¹²U nín yāaǹ m-wunti pu talaalu nee, u bɔ́ntì-tì ki síiǹ m-síbitam dee[134].

¹³Ibaamɔn ní m tùkù-ni, duulinya jaŋŋi kɔkɔ, laakin ní bi dāa sòoǹ tibɔmɔntiil neeyee, bi làá dāá sòoǹ unimpu nee nín ŋá min nee kí nīn téetí u-pu.»

¹⁴Ní akpambal saalaa nì alee kansikin un bi yíì Juudasi Isikaariyɔtee cūtì ki ká bisaraaŋakpilib,

¹⁵ní ki bí-bi yii: «Ni làá tīī-mi ba ní ḿ nyàab̀ nsan ŋun ni làá dī kí cúú Yeesuee?» Ní bi kàan̄ animbil jitɔmbi mmuŋku nì saalaa ki tīī-u[135].

¹⁶Ŋyunti gbantee ní Juudasi kíĺ ki nyàab̀ nsan kí dū Yeesu kí ŋúbíǹ-bi.

¹⁷Jiŋaal un bi ŋmóò kpɔnɔb bin baa ŋá ŋkpɔnɔnyɔkɔee wimpeepeekaaŋuee, Yeesu boonnooliibi dɔ́miń ki bālifì-u yii: «La ní a là tí bɔ́ntí-si Dilákatil jiŋaaliu jinti ní?»

¹⁸Niinee ní u bí-bi yii, cùmaan kitiŋin ŋmɔŋŋmɔkɔ dumpu kí tùkù-u yii: «Ukpil bí yii: <M-yuntiŋu bāań ní nee, ní sii cee ní man nì m-boonnooliibi làá jī Dilákatil jiŋaaliu.>»

¹⁹Ní bi ŋá kíí Yeesu nín tùkū-bi puee, ki bɔ́ntì jiŋaalee.

²⁰Kujoou jóotèe, bi nì u kāl̀ ki bíi jīǹ tijin.

²¹Bi bíi jīǹee, ní u bí-bi yii: «Ibaamɔn ní m sòoǹ, ni-kansikin ubɔ làá dū-mi kí tīī m-nannanliibi.»

²²Niinee kunimbaau kɔ́-bi ní bi kíĺ ki bíi bàlifī-u ubɔ ubɔ yii: «Ukpil, kéè an kaa sá mamaa!»

²³Ní Yeesu kíí-bi yii: «An sá man nì un jīǹ disambibaantiilinee[136] di làá dū-mi kí ŋúbíǹ m-nannanliibi.

²⁴Man Kinibiki cá kí kpú ní nee, kii an nín ŋmàn̄ m-pu ki yóoǹ miŋyee[137], ama mbusu dɔ̄ ki cí un làá dū-mi kí nyāfiǹ m-nannanliibee! Bi yaa kaa bàà màl̄ udaan, an bàà sɔ́.»

²⁵Ní Juudasi un bíi cáá-u ki nyáfée bālifì-u yii: «Ukpil, man di làá dū-si kí tīīii?» Ní Yeesu kíí-u yii: «Iiin.»

²⁶Ŋyunti ŋun bi bí ki jīǹee, ní Yeesu yōoǹ kpɔnɔ ki pàkā Unimbɔti, ní ki cúu gífì ki yākatì ki tīī u-boonnooliibi, ní ki bí-bi yii: «Fōō kí ŋmɔ́maan! An di sá m-wunti.»

²⁷Ní ki tí yōoǹ ndamam ní ki jáam̀ Unimbɔti mi-pu, ní ki dūu tīī-bi, ní ki bí-bi yii: «Ni-kɔkɔ fōō kí nyɔ̀maan!

²⁸An di sá m-fatikuu un nyáń ki cáań mpèé Unimbɔti nì binib tikpil kansikin bí ká bi-kpitii pɔ̄tamee[138].

²⁹Ibaamɔn ní m tùkù-ni, m pée gíti kpá kí nyɔ̀ ndaam nee kí nīn cí daliŋkin man nì ni làá dāá gíti kpāfì kí nyɔ̀ ndaam min sá mpɔmee m-Baa Beelinee.»

³⁰Ŋyunti ŋun bi gāā jiŋaal laŋyi ki dóòyee[139], ní bi nyáń ki búntì Ɔliifi sufii jool pu.

³¹Niinee, Yeesu bí u-boonnooliibi yii: «Bi nín làá ŋá-mi puee làá yàntī ni-kɔkɔ ń fá-mi kunyeeu nee gba, kii Unimbɔti gbɔŋku nín sòon̄ ki síiǹ puee yii: <M làá kpɔ̀ upikpaal ní ipii ń yàl̄[140].>

³²Ama m yaa láa fīkitèe, m làá lìntī kí cùú cīití-ni Galiilee».

³³Ní Peetroo kíí-u yii: «Báà bi-kɔkɔ yaa féeń-si, man kpá kí fá-si jaanjaan!»

³⁴Ní Yeesu bí-u yii: «Ibaamɔn ní m tùkù-si, díǹ nyeeku gba, kí wàatī ukooja ń bāakèe, a làá néé mita ní yii saa nyí-mi.»

³⁵Ní Peetroo kíí-u yii: «Báà an yaa sá-mi ŋkúm, man nì si làá kpú, man kpá kí néé yii maa nyí-si!» Ní u-boonnooliibi bin kɔkɔ kíǹee mun lī míǹ mbaantiim.

³⁶Niinee ní Yeesu nì u-boonnooliibi bàn̄ laakin bi yíì Geetiseemaneeyee[141], ní u bí-bi yii: «Kàl̄maan doo, man làá cù nyɔkɔpu doo kí mèè.»

³⁷Ní u kpáaǹ Peetroo nì Seebeedee jipɔmbi liitil. Niinee, u kíĺ ki kpáàa bíi gbìl̀ dinimbinaamandi nì kunimbaau pu,

³⁸ní ki bí-bi yii: «Kunimbaau kɔ́-mi tikpil, ki cáǹ-mi ŋkúmin! Nín̄ kāmaan doo kí nīn wāĺ kí taa gèeǹ!»

³⁹Ní Yeesu sútì nyɔkɔpu fiii ní ki tātìi dōoǹ dicincibil ní ki bíi mèé yii: «M-Baa, falaanyɔkaa nee yaan ŋūǹ kí kàkatī kí wàatī-mi! Ama, min sii lèe nín ŋá, án taa ŋá min man lèe.»

⁴⁰Ní u fātìi gítìń u-boonnooliibi bitee cee ki ká bi dɔ̄ ki gèeǹ, ní u bí Peetroo yii: «Naa kpáàa ŋūǹ man nì ni ń kàl̄ kukúbambaantiiu kpaŋkpam ní taa gèeǹaaa?

⁴¹Fìntīmaan kí nīn mèé, án nín làá ŋá pu ni yaa kɔ́ icɔŋkinee ní taa lítée. Unil bàà cáá nlandɔkɔmɔnti, ama ní ki bí iwɔfin.»

⁴²Ní Yeesu fātìi tí nín gítí nliliitiim ki tí mēē yii: «M-Baa, an yaa sá yii m yaa kaa nyùn̄ falaa nee waa ŋūǹ kí jītée, a nín là puee ní ń ŋá!»

⁴³Ní u fātìi tí nín gítiń ki bāańee, bi tí dɔ̄ ki gèeǹ, kun puee ŋgeem nìn cáá-bi tikpil.

⁴⁴Ní u gíti tí yāntì-bi ki fātìi nín gítí ntataatiim, ki tí mēē ki būsì tibɔbaantiil.

⁴⁵Míǹ boonee u fātìi nín gítiń u-boonnooliibi cee, ní ki bí-bi yii: «Ni dɔ̄ ki gèeǹ ki ŋùŋfāa! Kpèè, kukúluu kun bi làá dū man Kinibiki kí nyāfiǹ binikpitibee bāań ní nee.

⁴⁶Yīkì, tí nīn cámaan! Un làá dū-mi kí nyāfèe di bāań nee!»

⁴⁷Yeesu kaa láá sòon̄ ki ŋmíl̀, ní u-kpambaliŋ saalaa nì alee kansikin un bi yíì Juudasee bāań u nì kunipaau nóoń ki ŋúbiń njimu nì atambɔn. Bisaraaŋakpilib nì Juuda yab tindaŋkpilib di nìn túnní-bi.

⁴⁸Úǹ un làá dū Yeesu kí nyāfèe nìn tīiń-bi kudaaŋŋu yii: «Un m yaa tin jáam̀ ki kpàl̄ee, un ni nyàab̀ee dee, ní cúú-u!»

⁴⁹Dicilpu niinee, u sútì ki pìl̄ Yeesu, ki bí-u yii: «Ukpil, a-jooku!» ní ki kpàl̄-u.

⁵⁰Ní Yeesu bí-u yii: «M-bɔɔ, ŋá tin pú a dɔ́mińee!» Niinee ní binibee dɔ́miń ki cúú Yeesu.

⁵¹Bin nìn bí Yeesu ceeyee kansikin ubɔ fɔ́fì u-tàataajiki ní ki gāā ki wúkutì usaraaŋakpil tɔntɔnliu tafal[142].

⁵²Ní Yeesu bí-u yii: «Gíiǹ a-tàataajiki kí fúuń kujitooun, kun puee bin kɔkɔ yaa yōoǹ njimuee, njimu di làá dāá kpɔ̀ bidambi.

⁵³A nyí yii maan ŋūǹ kí yíiń m-Baa ń jòoń-mi, ní ú tīiń-mi niin niin ituun kutukub kutukubaaa?

⁵⁴Ama, m yaa ŋá mimmee, mana ní Unimbɔti gbɔŋku nín sòon̄ ki síiǹ m-pu miŋyee làá ŋmā kí ŋá?»

⁵⁵Niinee ní u fātìi bí kunipaauee yii: «M sá unikpiti naaa? Ba pu ní ni ŋúbiń ntàataajimu nì atambɔn kí dāá cúú-mi! Baabadal m kàal̀ kunimbɔtidiin ki dàkà, ba pu ní naa cúú-mi niin?

⁵⁶Ama tin bí nee kɔkɔ bāań, án ŋá kii Unimbɔti bɔnaatiliibi nín ŋmàn̄ ki síiǹ m-pu miŋyee[143].» Niinee ní u-boonnooliibi kɔkɔ sáǹ ki fá-u.

⁵⁷Bin nìn cúú Yeesuee cáá-u ki cūnnì usaraaŋakpil Kaayiifi dumpu, niin ní bimaradakaliibi nì bitindaŋkpilib nìn kpáfì.

⁵⁸Ní Peetroo táá Yeesu aboon aboon ki tin bàn̄ usaraaŋakpil dumpu ki kāl̀ u-tɔntɔnliibi cee kí kpèè án nín làá kúntí miŋyee.

⁵⁹Bisaraaŋakpilib nì bibɔsoonliibi bin kɔkɔ kíǹee bíi nyàab̀ un làá ká nnyimɔn ŋubɔ kí sòoǹ u-pu bí ká nnaakpal kí kpɔ̀-uee.

⁶⁰Ama, nì min kɔkɔ binib dɔ́miń kupaau ki cáań inyimɔn seerab ki túǹ u-puee, báà ubɔ yɔu kaa kāl̀[144]. Boonee ní bili dɔ́miń ki bí yii:

⁶¹«Kijapaai nee bí yii, úǹ ŋūǹ kí wīī kunimbɔtidii kí fàtīí mā-ku iwiin ita[145].»

⁶²Niinee ní usaraaŋakpil yíkì ki bí Yeesu yii: «Binib nee nín bí ki sòoǹ a-pu miŋyee, ba ŋá ní saa kíikí ní?»

⁶³Ama ní Yeesu ŋmí-bi fɔ́ŋfɔŋ. Ní usaraaŋakpil gíti bí-u yii: «Nì Unimbɔti un bí dimaŋfalinee ní m pūtì ki tīī-si, á tùkù-ti a yaa sá Meesiya, ki sá Unimbɔti Jipɔɔn!»

⁶⁴Ní Yeesu kíí-u yii: «Míǹ ní a lī nee. Ama m tùkù-ni yii, kí yòon̄ kɔŋkɔnnee, ni làá ká man Kinibiki kā Mpɔŋkɔdaan ŋaŋgiil pú, ki làá dāá ká m nyánní yilpu atagbanni ki dòoń[146].»

⁶⁵Niinee, usaraaŋakpil dáaĺ ki cátì tiwan tin u pēēyee, ní ki bí yii: «U ŋèeǹ nì Unimbɔti ní! Ti gíti nyàab̀ seeradambi kí ŋá ba? Nimbi ni-ba, ni gbìl̄ u nín ŋèeǹ nì Unimbɔtee.

⁶⁶Ni ká yii ba?» Ní bi kíí-u yii: «U máaǹ ŋkúm ní[147]!»

⁶⁷Niinee ní bi kíĺ ki tíiĺ timɔtan ki làbitī u-nimbiin ní ki gbáà-u aŋaŋkul, ní biba mun fátí-u itampa[148]

⁶⁸ki lì-u yii: «Sii un bí yii a sá un Unimbɔti lēē ki túnnée, dàkà yii a sá Unimbɔti bɔnaatiliu, tùkù-ti un di fáá-see!»

⁶⁹Ŋyunti ŋun Peetroo nyáń mmɔŋki ki kā dicindinee, usapɔɔn ubɔ un bí niin ki tūǹ ditundee sútìń ki pìl̄-u, ní ki bí-u yii: «A mun nìn bí Yeesu Galiilee yɔuee cee ní!»

⁷⁰Ní Peetroo néé báà ŋma nimbiin yii: «Maa nyí tibɔti tin a sòoǹ nee.»

⁷¹U còom̄ ki cá kipunyɔkɔ watil púee, ní usapɔɔn ubɔ mun gíti ká-u, ní ki tùkū bin bí niinee yii: «Kijapaai nee mun nìn bí Yeesu Naasaareeti yɔuee cee ní.»

⁷²Ní Peetroo gíti tí néé ki pūtì yii: «Maa nyí uninja gbanti!»

⁷³An kútì fiiiyee, bin bí niinee mun sútìń u-cee ní ki bí-u yii: «A mun lafun sá binib bin nóó-uee kansikin ubɔ ní, a-sòontam dàkà míǹ.»

⁷⁴Niinee ní u kíǹ ki bíi pùtī ki tíntí yii: «Maa pée nyí kijapaai nee!» Kpalaayee, ní ukooja báakì.

⁷⁵Niinee ní Peetroo téetì dinyɔɔbundi din Yeesu bàà lī-uee, yii: «Kí wàatī ukooja ń bāakèe, a làá néé ŋfunyɔm mita yii saa nyí-mi[149].» Ní u nyáń ki súń ki yáliŋkì.