Read Ntcham Matthieu 27 Bible Online

Matthieu 27 - Ntcham bible

Matthieu 27

¹Kutaafaau pɔ̀lpɔlee, bisaraaŋakpilib kɔkɔ nì Juuda yab tindaŋkpilib kpáfì ki sòon̄ bi nín làá dī nsan ŋun pu ní kí kpɔ̀ Yeesuee.

²Ní bi bóob́-u ŋŋmii ki cáá-u ki ŋúbiǹ gɔmina Piilati.

³Juudasi un nìn dū Yeesu ki nyáfèe nín ká yii bi làá kpɔ̀ Yeesuee, ní u-pɔbil bíil̀ tin u ŋée pu, ní u cáań animbil jitɔmbi mmuŋku nì saalaayee ki gíiǹ ki tīī bisaraaŋakpilib nì Juuda yab tindaŋkpilib,

⁴ní ki bí-bi yii: «M ŋá ikpiti ní ki dū un kaa ŋá tibee ki tīī ní kpɔ̀!» Ní bíǹ kíí-u yii: «An ká timbi la? Sii nì a-bɔti dee!»

⁵Ní Juudasi dū animbilee ki yàl̄ kunimbɔtidiin, ní ki cūtìi lúntì u-ba ŋŋmii ki kpíì.

⁶Niinee bisaraaŋakpilib cūtì ki tōō animbilee, ní ki bí yii: «Ti-marau kaa pú-ti nsan tí dū an nimbiliŋee kí ŋá kunimbɔtidii nimbiliŋ dakaaun, kun puee an sá fatiku nimbiliŋ ní.»

⁷Ní bi sòon̄ ki gbìlīǹ tɔb, ní ki dū animbilee ki dá uyɔɔmaati ubɔ kpaabu ki dūu ŋá binicambi ceeku.

⁸An puee, bi yíì bukpaa gbanti yii «Fatiku kpaabu» áli nìn díǹ.

⁹An ŋá kii Unimbɔti bɔnaatiliu Yeereemii nín nìn sòon̄ puee dee yii: «Ní bi fōō animbil jitɔmbi mmuŋku nì saalaa ŋin Isirayeel yab nìn kíí yii bí pà u-puee,

¹⁰ní ki dū an nimbiliŋ ki dá uyɔɔmaati kpaabu, kii ti-Dindaan nín nìn tùkū-mi puee[150].»

¹¹Bi cáá Yeesu gɔmina nimbiin, ní gɔmina bālifì-u yii: «Sii di sá Juuda yab bɔtiuaaa?» Ní Yeesu kíí-u yii: «Míǹ ní a lī nee.»

¹²Ama, bisaraaŋakpilib nì Juuda yab tindaŋkpilib nín dū tibɔti tin ki túǹ u-puee, waa gātì báà tiba.

¹³Ní gɔmina Piilati bí-u yii: «Aa gbìl̄ tin kɔkɔ bi sòoǹ ki tūntí a-puee níii?»

¹⁴Ama Yeesu kaa pée gātì-u báà tiba an poon, ní an mɔ̄tìi bākatiǹ gɔmina tikpil.

¹⁵Dilákatil jiŋaaliu kamaayee, gɔmina nìn gīintí usarkadaan un samaa kɔkɔ yaa bālifèe ní kí líí.

¹⁶Ŋyunti gbantee usarkadaan ubɔ nìn bí un pu báà ŋma pée nyée, bi yíì-u Baaraabaasi.

¹⁷Ní Piilati bālifì samaa un nìn kpáfèe yii: «Ŋma ní ni là ḿ gíiǹ kí líí, Baaraabaasaaa, Yeesu un bi yíì yii Kriisitooyee?»

¹⁸Di sá yii u nìn nyí yii nnimbidiki ŋun bi cáá Yeesu puee di yì-tì ní bi cáań-u ki ŋúbiǹ-u.

¹⁹Ŋyunti ŋun u kā ibɔsoon puee, ní u-nimpuu túnní bí tùkù-u yii: «Á taa pée cèeǹ deedeedaan nee bɔtin! Di sá yii m jíń u-pu falaa tikpil kudamintiiun díǹ.»

²⁰Ní bisaraaŋakpilib nì Juuda yab tindaŋkpilib téé kunipaau ń lì yii bi là bí gíiǹ Baaraabaasi kí líí kí kpɔ̀ Yeesu.

²¹Ní gɔmina fātìi tí būsì ki bālifì-bi yii: «Binib bili nee kansikinee, ŋma ní ni là ḿ gíiǹ kí líí ní?» Ní bi kíí-u yii: «Baaraabaasi ní ti là á gíiǹ kí líí!»

²²Ní u fātìi bālifì-bi yii: «Kin, m làá ŋá Yeesu un bi yíì yii Kriisitooyee úǹ mana?» Ní bi-kɔkɔ kíí yii: «Bí kpáá-u ndɔpuntikaa pu!»

²³Ní u bālifì-bi yii: «Mimmee, ba kpitii ní u ŋá?» Ama ní bi mɔ̀tīi kūuntí mpɔn yii: «Bí kpáá-u ndɔpuntikaa pu!»

²⁴Gɔmina Piilati ká yii waa ti ŋūǹ kí ŋá tiba, fìkil fikil mɔ̀tīi bíi wīintée, ní u yōoǹ nnyim ki fíntì u-ŋalii samaa kɔkɔ nimbiin[151], ní ki bí yii: «Maa bí uninja nee kúm poon, ni nì ni-bɔti dee!»

²⁵Ní kunipaauee kɔkɔ kíí yii: «U-kpuulool ń lúntí timbi nì ti-biyaamu pu!»

²⁶Niinee ní gɔmina gíiǹ Baaraabaasi ki líì, ní ki yāntì bi gbáń Yeesu anaalab, ní ki dū-u ki tīī bí cáá-u kí kpáá ndɔpuntikaa pu.

²⁷Niinee ní Piilati soojab cáá Yeesu ki kɔ́ǹ gɔmina cindi poon, ní ki yíiń disoojakitil kɔkɔ dɔ́miń ki kpáfì.

²⁸Bi nìn pēetì u-wanti ní ki dū dibɔkutimandi cínciŋ ki pēeǹ-u.

²⁹Bi nìn dū ikuŋkum ki lùn̄ kibeefuulii ki cíkiǹ-u, ki dū ŋkpandɔ ki ŋúbiǹ u-ŋaŋgiil, ní ki kíǹ ki gbàantí u-nimbiin ki bèel̄-u yii: «Ti jáaḿ-si, Juuda yab bɔtiu!»

³⁰ní ki tíiĺ timɔtan ki làbitī-u, ki fòol̄ ŋkpandɔee ki cáa fátí u-yil.

³¹Bi bēel̀-u míǹ ki dóòyee, ní ki cúú dibɔkutimandee ki pēetì-u, ní ki gíiǹ úǹ u-ba wanti ki pēeǹ-u, ní ki cáá-u ki búntì kí tin kpáá ndɔpuntikaa pu.

³²Bi nyáń ki cée, ki tú uninja ubɔ nsanni u sá Siireen tiŋkin, bi yíì-u Siimɔn. Bi nìn páb́-u ú fōō Yeesu dɔpuntikaaŋu kí bùkun̄.

³³Bi nìn cáá Yeesu ki bānnì laakin bi yii Gɔlgɔtee, an taapu sá yii: «Kuyikpabiku laŋki.»

³⁴Bi nìn dū ŋkaam ki ŋmālim̀ ndamam poon[152] ki tīī-u ú nyɔ̀. U dákée ní ki yíì, kaa nyùn̄.

³⁵Ní bi dū-u ki kpáá ndɔpuntikaa pu, ní ki tɔ́ kasi ki yākatì u-bɔkutiŋ[153],

³⁶ki kíǹ ki kā ki cí-u.

³⁷Bi nìn ŋmàn̄ tiŋmaŋmabiti ki nákáǹ u-yil pú kí dàkà kun pu ní bi kūū-uee, yii: «Un bí nee di sá Yeesu, Juuda yab bɔtiu.»

³⁸Bi nìn kpáá digaŋgandambi bili idɔpuntikaa pu ki ŋàl̄-u, ubɔ bí u-ŋaŋgiil pú ní un kíǹee bí u-ŋaŋgan pú[154].

³⁹Bisanjitiliibi nìn bèel̄-u, ki gàatī bi-yiliŋ[155],

⁴⁰ki lì yii: «Sii un gbáà kí wīī kunimbɔtidii kí fàtīí mā-ku iwiin itee, a yaa sá Unimbɔti biki, fīī a-ba kí kpákatiń ndɔpuntikaa pu[156]!»

⁴¹Míǹ mbaantiim, bisaraaŋakpilib, nì bimaradakaliibi nì Juuda yab tindaŋkpilib mun bí ki bèel̄-u, ki lì yii:

⁴²«U fīī biba dee, kaa ŋūǹ kí fīī u-ba! U sá Isirayeel yab bɔtiu naa! Ú kpákatiń ndɔpuntikaa pu kɔŋkɔnnee! Mimmee, ti làá fōō-u kí kíí.

⁴³U dū u-mákal ki ŋá Unimbɔti pu dee, ki lì yii: <Man sá Unimbɔti Jipɔɔn>. Too, kɔŋkɔnnee Unimbɔti yaa néeń-u, ú fīī-uaa[157]!»

⁴⁴Digaŋgandambi bin bi nìn kpáá ki ŋàl̄-uee mun nìn sìí-u míǹ mbaantiim.

⁴⁵Kuwiŋkuluuee, dibɔmbɔndi jéetì kitiŋ kɔkɔ pu ki tin sāā tikúti tita.

⁴⁶Ki cá tikúti titee, Yeesu fáá mbiil mpɔn, yii: «Eelii, Eelii, lama sabakitanii?» Taapu sá yii, «M-Nimbɔtiu, m-Nimbɔtiu, ba ŋá ní a dū-mi ki fá?[158]»

⁴⁷Yeesu fáá mbiil mimmee, ní bin bí niinee biba gbìl̄ u-biiliŋuee pu, ní ki lī yii: «U yíì Eelii dee!»

⁴⁸Ní bi-kansikin ubɔ sáǹ ki yōoǹ kuca ki múĺ ndaam min gàm̀ee ni, ki dūu túuń ŋkpandɔ pu ki tīī-u ú nyɔ̀[159].

⁴⁹Ama ní bin kíǹee bí yii: «Yàntī! Tí kpèèmaan Eelii yaa làá dāá fīī-u!»

⁵⁰Yeesu gíti fáá mbiil mpɔnee ní ki sīntì.

⁵¹Niinee, sata un bi nìn dūu pītì kunimbɔtidii[160] poon ki gāntì laakin bi yíì circir páaa laŋkee nì laan kíǹee cúu cátì yilpu ki tin kátì taapu, ní kitiŋ cīŋkì, ní titaŋkpanaakɔti cúu búkutì.

⁵²Akaakul nìn cúu bīitì, ní bin nìn nóó Unimbɔti ki kpíìyee tikpil fīkitì,

⁵³ki nyáń bi-kaakuliŋin. Yeesu fìkititam boonee, an nibee kɔ́ Jeerusaleem tiŋkin, ní binib tikpil ká-bi.

⁵⁴Room soojakpiliu nì u-yab bin nìn cí Yeesuee nín ká kitiŋ cìŋkitam nì tin kɔkɔ pée jítèe, ní tifaandi cúú-bi tikpil ní bi lī yii: «Tiŋman, kijapaai nee lafun sá Unimbɔti Jipɔɔn ní.»

⁵⁵Binimpoobi kupaau mun nìn yú ndan ki kpèeń. Bi nìn céeǹní-u doooo Galiilee ní ki tútúǹ-u atuun.

⁵⁶Maarii un sá Magidalaa tiŋkinee nì Maarii un sá Yakubu nì Jooseefi nee, nì Seebeedee jipɔmbi na nìn bí bi-kansikin.

⁵⁷Kujoou jóotèe, ní ugaaja ubɔ dɔ́miń laakin bi nìn kpáá Yeesuee, bi yíì-u Jooseefi, u sá Arimatee tiŋkin. U mun nìn sá Yeesu boonnooliu.

⁵⁸Ní u cūtì ki ká Piilati, ní ki mēē-u nsan kí yòon̄ Yeesu wunti, ní Piilati bí yii bí dūú tīī-u.

⁵⁹Ní u cūtìi yōoǹ, ki nyàab̄ ŋŋaapiin mpɔɔn ki dūu fìn̄-u,

⁶⁰ní ki cáa ŋá u-kaakupɔndi din u nìn lùkū ditaŋkpalinee poon, ní ki bíntì ditaŋkpakpaandi diba ki pīiǹ dikaakul nyɔkɔpu, ní ki búntì.

⁶¹Maarii un sá Magidalaa tiŋkinee nì Maarii un kíǹee mun nìn cūtì ki kā ki pìl̄ dikaakulee nyɔkɔpu.

⁶²Bi bɔ́ntì ŋwiŋŋuŋfikaa kutaa wúntèe, ní bisaraaŋakpilib nì Fariisab nóó dicilpu ki cūtìi ká Piilati,

⁶³ní ki bí-u yii: «Ukpil, ti téetí yii unyimɔndaan nee nín nìn dáá bí dimaŋfalinee u nìn bí yii, u yaa kpíìyee, winta dalee u làá fìkitī[161].

⁶⁴Míǹ puee, yàntī soojab ń cù kí cīití u-kaakul áli iwiin ita, án nín làá ŋá pu u-boonnooliibi ń taa dāan̄ kí yɔ̀ u-wunti kí tùkù samaa yii u fīkitèe: mimmee, nnyimɔn gbanti ŋúǹ dāa pɔ́ɔkí kí jītíǹ mpeepeekaa.»

⁶⁵Ní Piilati kíí-bi yii «Ni cáá soojabaa! Cáámaan-bi bí cīití u-kaakul ni nín là puee.»

⁶⁶Ní bi dū kudaaŋŋu ki nákáǹ ditaŋkpalee pu ubɔ yaa gbēēyee bí bée, ní ki cáá soojab ki cíitì.