Read Ntcham Matthieu 28 Bible Online

Matthieu 28 - Ntcham bible

Matthieu 28

¹Ŋwiŋŋuŋfikaa jítì ku wúntì kɔɔsil ntaafaabɔmbɔminee, Maarii un sá Magidalaa tiŋkinee, nì Maarii un kíǹee[162] cūtì kí kpèè dikaakul.

²Kpalaayee kitiŋ cīŋkì tikpil, ní Unimbɔti tuuŋŋu ŋubɔ nyánní yilpu ki dɔ́miń ki cúú ditaŋkpakpaandee ki bíntì ní ki kāl̀ di-pu.

³U nìn jìl̀ kii ntaaŋmɔŋmɔee, ní u-wampeeŋkaati pīiǹ káŋkaŋ.

⁴Soojab nín wál̀-uee, ní bi fāŋkì tikpil, bi-wunti bíi jìkì ní bi fìkī.

⁵Ní Unimbɔti tuuŋŋuee bí binimpoobee yii: «Nimbi taa fàŋkìmaan! M nyí ni nín nyàab̀ Yeesu un bi kpáá ndɔpuntikaa puee.

⁶Waa bí doo, u fīkitì, kii u nín nìn pée lī puee. Dāan̄ kí kpèèmaan laakin u nìn dɔ̄ee,

⁷kí nīn cámaan malaa, kí tùkù u-boonnooliibi yii u fīkitì ditaŋkpiilin. U làá lìntī kí cù Galiilee[163], niin ní ni làá tin ká-u. Tin m cáá kí tùkù-nee dee.»

⁸Niinee ní bíǹ búntì malaa, tifaandi nì dipɔɔpiŋkpaandi kɔkɔ ŋmàl̄, ki sáń ki cá kí cáá dinyɔɔbundee kí tùkù Yeesu boonnooliibi.

⁹Niin kpalaa ní Yeesu tú-bi nsan ní ki jáam̀-bi, ní bi sútì ki pìl̄-u ní ki tātìi gbāaǹ u-taaŋi taapu ki jáam̀-u.

¹⁰Ní Yeesu bí-bi yii: «Taa fàŋkìmaan! Cù kí tùkùmaan m-nabiyaamu yii bí nīn cá Galiilee. Niin ní bi làá tin ká-mi.»

¹¹Ŋyunti ŋun binimpoobee dáá bí nsanni ki cée, ní soojab bin nìn cí dikaakulee biba cūtì kitiŋin ki máafì bisaraaŋakpilib tin jítèe kɔkɔ.

¹²Ní bíǹ kpáfì Juuda yab tindaŋkpilib ki sòon̄ ki gbìlīǹ tɔb, ní ki nyàab̄ kunimbigbaau ki ŋéeb́ soojab nyɔmmu,

¹³ní ki tùkū-bi yii: «Ní lì yii, kunyeeu timbi dɔ̄ ki gèeǹee, ní u-boonnooliibi dɔ́miń ki yùn̄ u-wunti[164].

¹⁴Báà gɔmina yaa gbìl̄aaa, timbi làá sɔ̀kɔl̀-u kí nyāntí-ni tibɔtin.»

¹⁵Ní soojab fōō animbil, ní ki ŋá bi nín bí bí ŋá puee. Ní an bɔtee gbītì Juuda yab kansikin ki dāa sāā díǹ.

¹⁶Yeesu boonnooliibi saalaa nì ubɔee búntì Galiilee gbantaŋki kiba pu, laakin Yeesu nìn bí bí kíntí-uee[165].

¹⁷Bi nín ká-uee, ní bi gbāaǹ ki jáam̀-u, ama nì míǹ kɔkɔee, bi-kansikin biba nìn dàkafī mili mili.

¹⁸Ní Yeesu sútìń ki sòon̄ nì bi, yii: «M fōō yilpu nì taapu kɔkɔ pu mpɔn.

¹⁹Míǹ puee, nín̄ cámaan atimbun kɔkɔ nib cee kí dū-bi kí kpántí m-boonnooliibi[166], kí fàl̀-bi Unimbɔti nyim, Ubaati, nì man u-Jipɔɔn nì Circir Fam yindi pu.

²⁰Ní dàkà-bi bí nīn ŋúb́ tin kɔkɔ m tīī-ni ní ŋée. Ní nīn nyí yii m bí ni-cee baabadal áli duulinya kúntitam.»