Read Ntcham Matthieu 3 Bible Online

Matthieu 3 - Ntcham bible

Matthieu 3

¹Ŋyunti gbantee ní Yoowaneesi un fùul̀ binib Unimbɔti nyimee dɔ́miń ki bíi báakí Unimbɔti bɔti Juudee teekun, yii:

²«Kpántímaan ni-bimbim kun puee Unimbɔti Beel sútì ki pìlīń-ni.»

³Yoowaneesi pu ní Unimbɔti bɔnaatiliu Yeesaya nìn sòon̄ ki bí yii: «Ubɔ báakí kuteeun yii: Bɔ́ntímaan ti-Dindaan saŋŋu kí tàntīmaan u-sàmbiyaamu kí cīití-u[9]!»

⁴Yoowaneesi nìn pēē ugutaamu kuti bɔkutil ní ki gbìn̄ ŋgban dambalau u-caŋin[10], ní ki ŋmóò inaakitoon nì tisiil ŋmaniŋma.

⁵Jeerusaleem yab nì Juudee kɔkɔ, nì bin kóò Jɔɔdan buŋŋu caŋinee kɔkɔ yab nìn dòoń Yoowaneesi cee

⁶ki bìitī bi-kpitii pu ní Yoowaneesi fùul̀-bi Unimbɔti nyim Jɔɔdan buŋŋun.

⁷Yoowaneesi nín ká yii Fariisab nì Sadusab dòoń ú fàl̀-bi Unimbɔti nyimee, ní u bí-bi yii: «Nimbi bin tū kii ikoowaatee! Ŋma tùkū-ni yii ní sāǹ kí nyā Unimbɔti ŋuul din dòońee ni?

⁸Nín̄ tūm̀maan atuun ŋin dàkà yii ni fá ni-kpitiiyee

⁹kí taa nín̄ kā ki dàkafī ki gà ni-biŋŋi ki lì yii: <Abraam sá ti-naanja[11]>. Ibaamɔn ní m tùkū-ni, Unimbɔti ŋūǹ kí dū ataŋkpee nee kí kpántí Abraam naantiibi.

¹⁰Unimbɔti bɔ́ntì kicɔkɔ ki bíl̀ isufi taapu kí kpìkitī-i. Busubu bun kamaa yaa kaa lòoǹ abimɔntee, bi làá gāā-bu kí tɔ̄ ŋŋmin ní.

¹¹Man cáá nnyim ní ki fùul̀-ni ki dàkà yii ni bíi kpántí ni-bimbim, ama un làá dāan̄ man boonee làá dāá fàl̀-ni nì Unimbɔti Fam nì ŋŋmi ní. Úǹ cáá mpɔn ki jítiǹ man, maa sàafì kí nīn sá u-yumbuu kí yòon̄ u-naatakaŋ gba.

¹²Úǹ ŋúb́ u-yubakalkaaku, ní ki làá bàkal̀ kí gàntī tifin nì idi, ní kí dū idi kí ŋá kulɔŋŋun ní kí dū tifinee kí dūú tɔ̄ ŋŋmi ŋun kaa kúù jaanjaanee ni.»

¹³Niinee ní Yeesu nyánní Galiilee ki dɔ́miń Jɔɔdan buŋŋu caŋin Yoowaneesi cee ú fàl̀-u Unimbɔti nyim.

¹⁴Ní Yoowaneesi yíì, ki bí-u yii: «Man di bàà máaǹ kí dāan̄ sii cee sii ń fàl̀ man, ní sii gíti dòoń man ń fàl̀-saaa?»

¹⁵Ní Yeesu bí-u yii: «Kíí tí ŋá míǹ kɔŋkɔnnee, kun puee an máaǹ tí ŋá míǹ kí nóó min kɔkɔ Unimbɔti bàlifēe.» Niinee ní Yoowaneesi kaa ti kpákáǹ-u, ní ki fùl̄-u.

¹⁶Ŋyunti ŋun Yoowaneesi fùl̄-u ki dóò, u bíi nyēeń nnyiminee, kpalaayee ní kutagbɔŋu cúu pīitì, ní u wál̀ Unimbɔti Fam kpákatìń u-pu ki bí kii dibeenanjilee.

¹⁷Niinee ní Unimbɔti sòon̄ní kutaa pu yii: «Un bí nee di sá man Jipɔɔn un m néeń tikpilee, úǹ ní m-pɔbil fáatì[12].»