Read Ntcham Matthieu 5 Bible Online

Matthieu 5 - Ntcham bible

Matthieu 5

¹Yeesu nín ká dinikitikpaandi gbantee, ní u jɔ́m̀ ki kāl̀ dijool pu, ní u-boonnooliibi sútì ki pìl̄-u.

²U nìn kíĺ ki bíi dàkà-bi yii:

³«Bin sīntiǹ bi-ba ki tīī Unimbɔtee bí mmɔnneeee, kun puee bi sá Unimbɔti Beelin yab!

⁴Bin bí kunimbaaunee bí mmɔnneeee, kun puee Unimbɔti làá dāá ŋméeǹ-bi!

⁵Binib bin mɔ̄ee bí mmɔnneeee, kun puee Unimbɔti làá dāá tīī-bi kutindaŋu!

⁶Bin deedee kùm nì deedee nyinnyooŋu cááyee bí mmɔnneeee, kun puee Unimbɔti làá dāá tīī-bi tikɔkɔ!

⁷Bin sūǹ binib saayee bí mmɔnneeee, kun puee Unimbɔti làá dāá sɔ̄ bi mun saai!

⁸Bin pɔbiliŋ bí diba nì Unimbɔtee bí mmɔnneeee, kun puee bi làá ká Unimbɔti!

⁹Bin cāabìń ŋgbansɔŋfi bi-jutiibi kansikinee bí mmɔnneeee, kun puee Unimbɔti làá dāá yíiń-bi u-biyaamu!

¹⁰Bin ní bi sàantí bi-deedeeu puee bí mmɔnneeee, kun puee bi sá Unimbɔti Beelin yab!

¹¹«Binib yaa bí ki sìí-ni ki sàantí-ni ki mɔ́ntí inyimɔn ki tūntí ni-pu ki sòoǹ tibɔkpitil kamaa ni-pu ni nín sá man yabee puee, ni bí mmɔnni.

¹²Nín̄ bímaan mmɔŋkpaan poon kí nīn fàal̀, kun puee tipaakpaandi dɔ̄ yilpu ki cí-ni. Míǹ mbaantiim ní bi nìn tí sāaǹ Unimbɔti bɔnaatiliibi bin nìn péé péé ki kāl̀ ní nimbi dāa nín páaǹní boonee[19].»

¹³Ní Yeesu kútì ki lī yii: «Nimbi di sá kii ŋyaam ki tīī duulinya. Ŋyaam yaa kpíìyee, mana ní bi gíti ŋūǹ kí ŋá ní mí fàtīí mɔ̄ɔkì? Mimmee maa ti bí tiban dee, see bí dū-mì kí fá mmɔŋki, ní binib jītí ki tà.

¹⁴«Ni sá kii ŋwalifee ní ki tīī duulinya. Kitiŋ kin bi máń ki tɔ́kɔ́ǹ kigbantaŋ puee kaa lìkintí ki-ba pu.

¹⁵Baa tí tùutī fitila kí dū dibool kí cíkiń u-pu, asee bí dūú tɔ́kɔń dikɔl pu ní án nīn wāĺ bin kɔkɔ bí kudiinee.

¹⁶Míǹ mbaantiim ní ni mun walifiŋu ń nīn ŋmíntí binib, bí ká tiŋan tin ni ŋáańee, kí pàkà ni-Baa Unimbɔti un bí yilpuee.»

¹⁷«Ní taa dàkafì yii m dɔ́miń kí kpìtī Mooyiisi marab nì tin Unimbɔti bɔnaatiliibi nìn sòon̄ee. Maa dɔ́miń kí kpìtī, m dɔ́miń kí ŋá bi nín lī puee ní.

¹⁸Ibaamɔn ní m tùkù-ni, ŋyunti ŋun ní yilpu nì taapu dáá bée, marabee ŋmaŋmabiti poon báà kubɔ kpá kí fɔ́táaa, kilɔmbiki kiba mun kpá kí kpìtī kí dāá sāā ŋyunti ŋun tin kɔkɔ pu an sòon̄ee ń ŋá.

¹⁹An pu ní un di yaa kpītì kimarawaai kiba ní ki dàkà bin kíǹee yii bí nīn ŋáań mimmee, udaan dāa sá kiyaawaai ní Unimbɔti Beelin. Ama un di yaa ŋúb́ marab ní ki dàkà binib bí nīn ŋáań mimmee, udaan dāa sá ukpaan ní Unimbɔti Beelin.

²⁰Ibaamɔn ní m sòoǹ nì ni, ni yaa kaa bí deedee ki jítiǹ bimaradakaliibi nì Fariisab, naa ŋūǹ kí kɔ́ Unimbɔti Beelin.»

²¹«Ni gbìl̄ bi tùkū ti-naanjab yii: <Á taa kpɔ̀ unil[20], un kamaa yaa kūū unilee, see bí cáá udaan ibɔsoon kí dáaĺ u-tafal.>

²²Ama man tùkù-ni yii un kamaa di yaa fōō diŋuul u-nabiki puee, see bí cáá-u ibɔsoon kí dáaĺ u-tafal. Un yaa sīī u-nabiki yii <Kinaatuuyee,> see bí cáá-u Bibɔsoonliibi kitil cee, ní un yaa sīī u-nabiki yii <Kunifaŋuee,> udaan máaǹ bí cáá-u ditafadaaldi ŋmiŋun ní.

²³An puee a yaa cáań saraa nsaraafan pu kí tīī Unimbɔti ní ki téetì yii a-nabiki díkí a-pu tibee,

²⁴yàntī a-saraau nsaraafan cee kí cùú ŋāŋkì si nì a-nabikee kansikin, ní kí nín gítiń kí ŋá a-saraau kí tīī Unimbɔti.

²⁵«A yaa ŋá ubɔ tiba ní u cáǹ-si ibɔsoonee, ŋāŋkì sii nì u kansikin malaa, ŋyunti ŋun ni dáá bí nsannee, án nín làá ŋá pu ú taa cáá-si kí tīī ubɔsoonli ní ubɔsoonlee mun ń dū-si kí tīī pilisi, ní úǹ ń cáá-si kí pìin̄ sarkee.

²⁶Ibaamɔn ní m tùkù-si, bi yaa cáá-si ki tɔ́ niinee, see á pà a-pɔndi nyíki nyiki, báà gboo kaa kīntí, ní bí nín líí-si.»

²⁷Yeesu bí-bi yii: «Kéè ni gbìl̄ bi síiǹ yii: <Á taa ŋá tilaakpaalaa[21]!>

²⁸Ama man tùkù-ni yii un kamaa di yaa kpēē unimpu ki bàà là kí mɔ̀nnì-uee kpáàa ŋá tilaakpaal dee u-pɔbilin.

²⁹An puee a-nimbil ŋgiil yal di yaa làá yàntī á lítí ikpitinee, lúkutí-dì kí fá, kun puee an ŋān̄ ki tīī-si a-wunjandi diba ń nīn kpá, ki jítiǹ a-wunti ń nīn bí mmɔm á kɔ́ ŋŋmin.

³⁰A-ŋaŋgiil di yaa làá tí yàntī á lítí ikpitinee, gùutī-ŋu kí fá, di sá yii an sɔ́ a-wunjandi diba ń nīn kpá, ki jítiǹ a-wunti ń nīn bí mmɔm á kɔ́ ŋŋmin.»

³¹«An tí lī yii: <Sii un yaa là kí jà a-nimpuuee, á tīī-u kugbɔŋu kun dàkà kun pu ní a là kí jà-uee ní kí nín jà-u[22].>

³²Ama man tùkù-ni yii un kamaa yaa jìn̄ u-nimpuu ní an kaa sá yii bi-catee kòóyee[23], mimmee u dū u-nimpuuee ki síiǹ tilaakpaal saŋŋu pu dee. Ní un mun yaa cáá unimpu un bi jìn̄ee mun ŋá tilaakpaal.»

³³«Ni gíti tí gbìl̄ bi nín tùkū ti-naanjab yii: <Á taa pùtī Unimbɔti yindi fám, a yaa pūtì-u ki bí yii a làá ŋá puee, ŋá míǹ kí tīī-u[24].>

³⁴Ama man tùkū-ni yii ní taa pée pùtī kpataaa. Ní taa pùtī yilpu, kun puee niin di sá Unimbɔti beejal,

³⁵kí taa pùtī kitiŋ, kun puee kitiŋ sá u-taaŋi tɔkɔnlaŋki ní, kí taa pùtī Jeerusaleem, kun puee Ubɔtikpaan tiŋki dee.

³⁶Á taa pùtī a-yil, kun puee aa ŋūǹ kí yàntī kuyikpibambaantiiu ń pīil̀aaa, kaa ŋūǹ kí yàntī kú bɔ̀ntī.

³⁷An yaa sá á kíí iiiŋyee, kíí <iiin>, an yaa sá á kíí aayeeyee, kíí <aayee>. Tin a yaa gíti páaǹ ki lī boonee nyánní Sitaan cee ní.»

³⁸«Ni gbìl̄ bi síiǹ yii: <Un yaa lēē a-nimbilee, a mun ń lēē u-yal kí téeǹ, ní un yaa lēē a-nyindee, a mun ń lēē u-yal kí téeǹ[25].>

³⁹Ama man tùkù-ni yii, a-juti yaa ŋá-si tikpitilee, á taa dū tikpitil kí tɔ̀-u ipɔntoon. Bi yaa fáá a-ŋaŋgiitaŋkpanjil ntampee, fàtī a-ŋaŋgan yal kí tīī bí fáá.

⁴⁰Ubɔ yaa là kí cáá-si ibɔsoon kí fōō a-bɔkutilee, dū a-bɔkutikpaandi kí kūtì kí tīī-u.

⁴¹Ubɔ yaa páb́-si yii á túń diwaŋgul kí còom̀ ditaŋkpal dibee, á túń diwaŋgulee kí còom̀ ataŋkpee ali.

⁴²Ubɔ yaa mēē-si tibee, pɔ̄-u, kí taa fàtī a-boon kí tīī un dɔ́miń a-cee kí pìnnì tibee.»

⁴³«Ni gbìl̄ bi síiǹ yii: <Á nīn néeń a-bɔɔ[26], kí nīn ná a-nannanliu.>

⁴⁴Ama man tùkù-ni yii ní nīn néeń ni-nannanliibi kí nīn mèé Unimbɔti ki tìì bin sàantí-nee.

⁴⁵Mimmee, ni sá ni-Baa un bí yilpuee biyaamu dee, kun puee úǹ yàntī u-wìiŋ́ŋu nyēē ki tìì binikpitib nì binimɔntiibi ní ki yàntī utaa nì ki tìì bin bí deedeeyee nì bin kaa bí deedeeyee.

⁴⁶Ni yaa néeń bin néeń-nee ŋmaniŋmee, ba paatii ní ni gíti kā ki cí kí dāá fōō Unimbɔti cee? Kaa sá míǹ ní bifɔtiliibi bin ni kpèé yii bi sá bikpitibee mun ŋáańaaa?

⁴⁷Ni yaa tí jáaḿ ni-nabiyaamu ŋmaniŋmee, la di nyáń u-ba? Bin kaa nyí Unimbɔtee mun ŋáań míǹ mbaantiim naa!

⁴⁸Míǹ puee ní nīn cáámaan mbimbimɔntiim tikɔkɔ poon kii ni-Baa un bí yilpuee nín cáá puee[27].»