Read Ntcham Matthieu 6 Bible Online

Matthieu 6 - Ntcham bible

Matthieu 6

¹«Ní nīn nyí nì ni-ba kí taa nín̄ nyāntí ni-deedeebítam ki dàkà binib yii bí ká-ni. Ni yaa ŋáań tiŋan ki dàkà binibee, naa tin gíti kāntí tipaal tiba ni-Baa un bí yilpuee cee.

²«A yaa làá pɔ̄ uwɔfi ubɔ tibee, taa nín̄ báakí bí ká yii sii di bíi tìì tiba, kii ipoonnyoondambi nín báakí adan pu nì akpafidiinni puee. Bi ŋáań míǹ binib ń nīn pàkà-bi ní. Ibaamɔn ní m tùkù-ni, bi fōō bi-paati ki dóò.

³Ama sii yaa làá pɔ̄ uwɔfi tibee, á tīī a-ŋaŋgan ń taa nín̄ nyí a-ŋaŋgiil nín ŋá tiŋyee.

⁴Á ŋá dibalin, ní a-Baa un wāĺ dibalinee ń téeǹ-si.»

⁵«Ni yaa bíi mèéyee, ní taa nín̄ mèémaan kii ipoonnyoondambi bin néeń ki yūlifí dicancaal akpafidiinni nì asaŋkaŋkpil ki mèé báà ŋma ń nīn wāĺ-bee. Ibaamɔn ní m tùkù-ni, bi fōō bi-paati ki dóò.

⁶Ama, sii yaa làá mèèyee, á kɔ́ a-diikun, kí dūú pìin̄ kí mèè, a-Baa bí niin dibalin. A-Baa un wāĺ tin bí dibalinee làá pà-si.

⁷«Ni yaa bíi mèéyee, taa nín̄ bùsīmaan anyɔɔbun kii bin kaa nyí Unimbɔtee nín ŋáań puee. Bíǹ dàkafī yii bi yaa bíi mèé ki bùsī anyɔɔbunee ní Unimbɔti làá pīlifiǹ-bi.

⁸Nimbi ń taa fōō bíǹ nín ŋáań puee, kun puee kí wàatī ní mèè ni-Baayee, u nyí kun páb́-nee.

⁹Nín̄ mèémaan yii: <Ti-Baa un bí yilpuee, yàntī bí nyɔ̄ŋkì a-yindi.

¹⁰Yàntī a-Beel ń dāan̄. Bí ŋá a nín là puee taapu doo, kii bi nín ŋáań yilpu puee.

¹¹Pɔ̄-ti díǹ jikaati.

¹²Dū ti-kpitii in ti yīntiǹ-see kí pɔ̄-ti, kii ti mun nín cáá bin yìntīǹ-tee kpitii ki pūǹ-bi puee.

¹³Taa pɔ̄ mpaan Sitaan ń kīil̀-ti, ama á nyāntí-ti u-ŋaan. [Kun puee sii di yì dibeel nì mpɔn nì tinyool kí nīn cá jaanjaan. Ameeni[28]>.]

¹⁴Di sá yii ni yaa cáá tin ni-jutiibi yìntīǹ-nee ki pūǹ-bee, ni-Baa un bí yilpuee làá dū tin ni mun yīntiǹ-uee kí pɔ̄-ni.

¹⁵Ama ni yaa kaa cáá tin ni-jutiibi yìntīǹ-nee ki pūǹ-bee, ni-Baa un bí yilpuee kaa làá dū ni mun kpitii kí pɔ̄-ni.»

¹⁶«Ni yaa bóob́ kinyɔkɔee ní taa bīil̀ ni-nimbiiŋyi kii ipoonnyoondambi nín ŋáań puee. Bíǹ bíiĺ bi-nimbiiŋyi binib ń béé yii bi bóob́ kinyɔkɔ ní. Ibaamɔn ní m tùkù-ni, bi fōō bi-paati ki dóò.

¹⁷Ama sii yaa bóob́ kinyɔkɔee, fíntí a-nimbiin kí càatī a-yikpiti,

¹⁸án nín làá ŋá pu báà ubɔ ń taa béé yii a bóob́ kinyɔkɔee. A-Baa un bí dibalinee baba ń nīn nyí, ní úǹ un wāĺ dibalinee ń tīī-si a-paati.»

¹⁹«Ní taa nín̄ nyàab̀maan tigaajati ki sīintí ni-ba taapu doo laakin dikɔtuul ŋūǹ kí mɔ́, ní tì ŋūǹ kí tí dāmintì, ní binaayub mun ŋūǹ kí cíĺ kudii kí kɔ́ kí yɔ̀-tèe.

²⁰Nín̄ ŋáaḿmaan min fáatì Unimbɔtee ní ú dū tipaal kí síiń-ni yilpu laakin dikɔtuul kpáaa, tiwan kaa dámintáaa, ní binaayub mun kaa tí ŋūǹ kí cíĺ kí kɔ́ kí yɔ̀ee.

²¹Kun puee laakin a-gaajati bée, niin ní a-landɔkɔŋu mun bí.»

²²«Unil nimbiliŋ di sá u-wunti fitilau. A-nimbiliŋ yaa wāĺee, a-wunti kɔkɔ bí ŋwalifin ní.

²³Ama a-nimbiliŋ yaa kaa wāĺee, a-wunti kɔkɔ bí dibɔmbɔndin ní. Ŋwalifi ŋun bí a-nee yaa sá dibɔmbɔndee, mimmee dibɔmbɔndee kaa cáá juti.»

²⁴«Unibaanti kaa ŋūǹ kí nīn sá bikpilib bili tɔntɔnliu: see ú nīn ná ubɔ kí nīn néeń un kíǹee, àá ú dū u-ba kí yā kí nákáǹ ubɔ ní kí nīn kpèé un béeyee fám. Naa ŋūǹ kí nīn sá Unimbɔti tɔntɔnliibi kí nīn sá animbil mun tɔntɔnliibi.»

²⁵«An pu ní m tùkù-ni yii: Ní taa nín̄ yáliŋkí kun ni làá jī ki làá nyɔ̀ kí nīn bée, nì tin ni làá pèen̄ee pu. Di sá yii dimaŋfal jítiǹ tijin, ní tiwun mun jítiǹ abɔkuti, àá an kaa sá míǹ?

²⁶Kpèèmaan nnɔmbiyaamu mun ŋàaǹ kutaa puee, muaa būul̀aaa, kaa cēēyaaa, kaa cáá cakalaabi ki kpáafí tijikaal, ama ní ni-Baa un bí yilpuee kpīintí-mu. Kpèè, nimbi cáá kudapɔɔu ki jítiǹ-mu kpataaa!

²⁷Ni-kansikin ŋma di ŋūǹ kí nīn kā ki nìiǹ, kí gbéeǹ u-maŋfal wiiŋyi pu fiii?

²⁸«Kin, ba pu ní ni kā ki yáliŋkí kun ni làá pèen̄ee pu? Kpèèmaan, nsupumpukum min nyēē tisatinee: maa tūǹ ditundaaa, kaa lù satab,

²⁹ama m tùkù-ni yii ubɔti Saloomɔn, nì u-gaajati kɔkɔee[29], waa ŋúń ki ká tiwannyaandi ki pēeǹ an bàn̄ mpumpukum gbanti kansikin miba nyaaŋku.

³⁰Unimbɔti yaa nyāantí míǹ timool tin bí tisatin díǹ, fool ŋŋmi ń dāá wà-tèe, mimmee waa làá ŋá án jītíǹ míǹ ki tīī-naaa? Ba pu ní ni-fookiiu kaa náaǹ míǹ?

³¹Mimmee, taa nín̄ yáliŋkímaan ki lì yii: <Ti làá jī ba? Ti làá nyɔ̀ ba? Ti làá pèen̄ ba?>

³²An sá bin kaa nyí Unimbɔtee di nyàab̀ tíǹ múlmul. Ama nimbi Baa un bí yilpuee nyí yii an wanti kɔkɔ máaǹ ní nīn cáá-tì.

³³Péé kí nyàab̀maan Unimbɔti Beel nì deedee un u bàlifī-ni yii ní nīn bée, ní Unimbɔti ń dū tin kíǹee kí kūtì-ni.

³⁴Míǹ puee ní kpèè díǹ yati, ní taa nín̄ yáliŋkímaan fool pu. Fool mun nì u-yati ní. Ŋwiin kamaa nì ŋu-gìńdi ní.»