Read Ntcham Matthieu 8 Bible Online

Matthieu 8 - Ntcham bible

Matthieu 8

¹Yeesu kpákatìń dijool puee, ní kunipaau nóó-u.

²Ní unyaŋgbanti ubɔ sútìń ki pìl̄-u, ki gbāaǹ u-nimbiin ki bí-u yii: «Ukpil, cáaǹ-mi kun puee m nyí yii a yaa là, a ŋūǹ kí cáaǹ-mi m-wunti ń ŋāŋkì.»

³Niinee ní Yeesu tāntì u-ŋal ki gbēē-u, ní ki bí yii: «M là. Pɔ̄ɔkìm̄!» Niin niin ní uninjee pɔ́ɔkì ní u-wunti ŋáŋkì.

⁴Ní Yeesu bí-u yii: «Pīlifì tiŋan, á taa tùkù báà ubɔ tibɔti nee, ama á cáá a-ba kí dàkà usaraaŋal ú bée yii a-wunti ŋáŋkì, ní kí ŋá saraa kii Mooyiisi marab nín lī puee ní usaraaŋal ń tùkù báà ŋma ń gbìl̄ yii a pɔ́ɔkì[32].»

⁵Yeesu kɔ́ Kapeernayum tiŋkinee, ní Room soojakpiliu ubɔ sútìń ki pìl̄-u ki gbāam̀-u yii:

⁶«Ukpil, m-tɔntɔnliu dɔ̄ kudiin ki būǹ, ki fàl̄ ki yáliŋkí tikpil.»

⁷Ní Yeesu bí-u yii: «M làá cù kí cáaǹ-u.»

⁸Ní usoojakpilee bí-u yii: «Ukpil, maa máaǹ á kɔ́ m-dumpu. Pée lì dinyɔɔbundi dibaba m-tɔntɔnliu làá pɔ̄ɔkì.

⁹Di sá yii man m-ba, m cáá bikpilib bin taapu m bée, ní ki mun cáá soojab bin mun bí man taapuee. M ŋūǹ kí tùkù ubɔ yii: <Cù doo!> ní ú cù, ní kí bí ubɔ mun yii: <Dāan̄ doo!> ní ú dāan̄, ní kí bí m-tɔntɔnliu una yii: <Ŋá yéè!> ní ú ŋá.»

¹⁰Yeesu nín gbìl̄ an nyɔɔbuŋŋee, ní u bākatì ki bí bin nóó-uee yii: «Ibaamɔn ní m sòoǹ nì ni, maa láá pée ká Isirayeel yab kansikin ubɔ cáá fookii kii Uroomja nee.

¹¹Míǹ ní m tùkù-ni yii binib tikpil làá dāá nyānní ŋwìiń nyalaŋki pú nì ŋu-jeetilaŋki pú kí kɔ́ Unimbɔti Beelin, bi nì Abraam nì Isaaki nì Jaakɔb ń kpāfì kí jī nnaam!

¹²Ama ní Isirayeel yab bin bàà máaǹ kí nīn sá Unimbɔti Beelin yabee, bí dāá nyāntiń-bi mmɔŋki kí tɔ̄ dibɔmbɔndin, laakin ní bi làá nīn sūǹ bi-nyiŋŋi gà tɔb kàkakee.»

¹³Ní Yeesu tùkū usoojakpilee yii: «Nín̄ kùǹ a-dumpu, a nín fōō ki kíí puee, án ŋá míǹ kí tīī-si.» Kukúluu gbanti poon ní utɔntɔnlee kpáàa pɔ́ɔkì.

¹⁴Yeesu kɔ́ Peetroo dumpuee ní ki ká Peetroo nimpuu na būǹ ki dɔ̄ u-wunti píĺ kpaŋkpam.

¹⁵Niinee ní Yeesu gbēē u-ŋal, ní u pɔ́ɔkì tiwun sɔ̄ŋkì ní u yíkì ki ŋá-u tijin u jíń.

¹⁶Kujoou jóotèe ní bi cáań-u binib bin pu arasiniibi kēe tikpil, ní u sòon̄ ki jìn̄ arasiniibee. U nìn cáaǹ bibunliibi kɔkɔ.

¹⁷U ŋá míǹ ki nóó nì Unimbɔti bɔnaatiliu Yeesaya nín nìn lī puee, yii: «U fōō ti-wɔfii nì ti-weeŋyi[33].»

¹⁸Yeesu nín ká yii kunipaau māntì ki tú-uee, ní u pú u-boonnooliibi kinyɔkɔ yii bí kɔ́ buŋalimbu kí dùtī kí cù lapu pu mɔɔgbandi.

¹⁹Niinee ní umaradakal ubɔ sútìń ki pìl̄-u ní ki bí yii: «Ukpil, m làá nīn nóó-si báà laakin ní a yaa cée.»

²⁰Ní Yeesu kíí-u yii: «Jiiŋkpaaibi cáá bi-kɔŋkooŋyi ki dɔ̀, ní nnɔmbiyaamu mun cáá mu-diiŋŋi, ama man Kinibiki kaa cáá laakin m làá bíĺ m-yil kí ŋùŋfèe.»

²¹Ní bin nìn nóó-uee kansikin ubɔ bí-u yii: «Ukpil, pɔ̄-mi nsan ḿ síb́ m-baa.»

²²Ní Yeesu bí-u yii: «Sii dee, nóó man, kí yàntī bitaŋkpiibi ń nīn síb̀ bi-taŋkpiibi.»

²³Niinee ní Yeesu kɔ́ buŋalimbun ní u-boonnooliibi mun nóó-u ki búntì.

²⁴Kpalaayee kubuŋkpaaŋŋu kubɔ kíĺ ki bíi jītí dimɔɔl pu ní buŋalimbuee bíi gbéè nnyim, ama ní Yeesu dɔ̄ ki gèeǹ.

²⁵Ní u-boonnooliibi sútì ki pìl̄-u ní ki fīntì-u ki bí-u yii: «Ti-Dindaan, fīī-ti, ti kpíì ní!»

²⁶Ní Yeesu bí-bi yii: «Ba ŋá ní ni fàŋkí míǹ? Ni-fookiiu kaa náaǹ báà fiii!» U lī míǹ ki dóòyee, ní ki yíkì ki yúl̀ ki kpātì kubuŋu nì nnyim pu, ní an ŋmíl̀ fɔ́ŋfɔŋ díkí diki.

²⁷Ní binibee bākatì sèeee, ní ki bíi lì yii: «Kin, u nín sá ŋma dee ní ki kpáaǹ kubuŋu nì dimɔɔl tɔ́-u nan[34]?»

²⁸Yeesu nín dūtì lapu mɔɔgbandi Gadaraa[35] yab tiŋkinee, ní binib bili bin pu arasiniibi kā bi wáatèe nyánní kuceeun ki túŋkiń-u. Biwaatiibee nìn cáá ntoom tikpil, an puee ubɔ kaa nìn màkantí kí dī niin.

²⁹Bi nìn bíi kūuntí yii: «Unimbɔti Jipɔɔn, a nyàab̀-ti nì tilati poon ní? Ibɔsoon yuntiŋu kaa láá bāań ní a dɔ́miń doo kí sàaǹ-taaa?»

³⁰Digbeetikitikpaandi[36] diba nìn bí ŋkpaanceeti niin ki jīǹ.

³¹Ní arasiniibee gbāam̀-u yii: «A yaa làá jà-tee, á jà-ti kí kɔ́ǹ digbeetikitil nee ni»

³²Ní u bí yii: «Nín̄ cámaan!» Ní bi nyáń biwaatiibin ki kɔ́ digbeetikitilee ni, ní igbeetee sáǹ ki wúntì nsitimin ki jéetì dimɔɔlin ki gbíntì nnyimin ki kpíì.

³³Ní bin kpàá igbeetee sáǹ ki cūtì ki tùkū kitiŋin tin kɔkɔ jítèe ki kpáaǹ bin pu arasiniibi nìn kēe mun yati.

³⁴Ní kitiŋin nib kɔkɔ nyáń ki nín túŋkí Yeesu. Bi nín ká-uee, ní bi gbāam̀-u yii ú yīkì bi-tiŋki pu.