Read Ntcham Matthieu 9 Bible Online

Matthieu 9 - Ntcham bible

Matthieu 9

¹Niinee ní Yeesu kɔ́ buŋalimbun ki fātìi dūtì dimɔɔl ki nín gítiń u-tiŋkin[37].

²Binib biba nìn túǹní ufaliŋfaan ubɔ nlún pu ki cáań ki bíl̀-u. Yeesu nín ká binib gbanti fōō ki kíí yii u ŋūǹ kí cáaǹ ubunlee ní u bí ufaliŋfaanee yii: «M-biki, pɔ́ɔǹ a-ba, m dū a-kpitii ki pú-si!»

³Niinee ní bimaradakaliibi biba bíi dàkafī bi-pɔbiliŋin yii: «Kijapaai nee ŋèeǹ nì Unimbɔti ní[38].»

⁴Yeesu béè tin bi bíi dàkafēe, ní ki bālifì-bi yii: «Ba pu ní ni cáá ilandɔkɔkpiti míǹ?

⁵Ba di pɔ̄ɔ̄ dilil ní: <A ká a-kpitii pɔ̄tam> di pɔ̄ɔ̄ dilil naaa, <Yīkì kí yūĺ kí nīn còom̄> di pɔ̄ɔ̄ ní?

⁶Ama ní béé yii, man Kinibiki cáá mpɔn kitiŋ pu kí dū unil kpitii kí pɔ̄-u.» Niinee ní u bí ufaliŋfaanee yii: «Yīkìm̄ kí yòon̄ a-lúŋŋu kí nīn kùǹ a-dumpu.»

⁷Ní kijapaayee nyīī ki yíkì ki nín kùǹ.

⁸Kunipaauee nín ká mimmee, ní tifaandi kɔ́-bi, ní bi bíi pàkà Unimbɔti u nín pú binib mpɔn ŋuŋyee pu.

⁹Yeesu nyáń niin ki cée, ní ki ká uninja ubɔ bi yíì-u Maatiiu u kā fɔtiku diikun. Yeesu nìn bí-u yii: «Dāan̄ kí nīn nóó-mi!» Niinee ní u yíkì ki táá-u.

¹⁰Yeesu kɔ́ ki kāl̀ Maatiiu dumpu ki bíi jīǹ tijinee[39] ní bifɔtiliibi tikpil nì binikpitib bin kɔ kíǹee dɔ́miń ki kútì u nì u-boonnooliibi pu ki mun bíi jīǹ.

¹¹Fariisab ká mimmee, ní ki bí u-boonnooliibi yii: «Ba pu ní ni-kpiliu nì bifɔtiliibi nì binikpitib bin kɔ kíǹee kpáfì ki kā ki jīǹ tijin míǹ[40]?»

¹²Yeesu gbìl̄ an bɔtee, ní ki bí-bi yii: «Bin pɔ̄ɔ̄yee kaa nyàab̀ unyɔɔdaan, see bin būǹee.

¹³Cùú bīfìmaan Unimbɔti nyɔɔbundi nee taapu, yii: <Maa là saraabi[41], m là ní nīn sūǹ tɔb saai ní.> Maa dɔ́miń kí yíiń deedeedambi, m dɔ́miń kí yíiń binikpitib ní.»

¹⁴Niinee ní Yoowaneesi boonnooliibi sútìń ki pìl̄ Yeesu, ní ki bālifì-u yii: «Ba pu ní timbi nì Fariisab bōob̀ kinyɔkɔ múlmul, ní sii boonnooliibi kaa bōob̀ ní?»

¹⁵Ní Yeesu kíí-bi yii: «Unimpucaan cal bɔɔbi ŋūǹ kí nīn bí kunimbaaun ŋyunti ŋun unimpucaan cal u-ba dáá béeee? Aayee, baa ŋūǹ! Ama ŋyunti ŋubɔ bí ki dòoń, bi làá dāá yòon̄-u bi-kansikin, an yuntiŋu ní bi dāa bōob̀ kinyɔkɔ.

¹⁶«Baa gífí ŋŋaapɔɔn kí dūú lìb̄ dibɔkutikpikil. Bi yaa ŋá mimmee, ŋŋaapɔɔn kpāantí dibɔkutikpikil ní kí cátí ní dibùndee ń mɔ̀tīí wàan̄.

¹⁷Míǹ ní baa tí dù ndapɔm kí fúuń tilɔkpikilin. Bi yaa ŋá mimmee, tilɔti pòol̄ ní ndaam ń kpáatíí fá ní tilɔti mun ń bīil̀. Míǹ puee, bi dù ndapɔm ní kí sìtī tilɔpɔnni, ní an kɔkɔ ń nīn bí.»

¹⁸Yeesu nìn bí ki sòoǹ nì bi an bɔtee, ní Juuda yab yidaaŋwu ubɔ bāań ki gbāaǹ u-nimbiin, ní ki bí yii: «M-sapɔmbiki dáá pée kúù dee, dāan̄ kí dū a-ŋal kí páań ki-pu, kì làá fìkitī!»

¹⁹Ní Yeesu yíkì ní u-boonnooliibi nóó-u.

²⁰Ní unimpu ubɔ nìn bí ki fùul̀ ŋkpin doooo abin saalaa nì ali an kaa gúǹ. Yeesu còom̄ ki cée, ní u dīń Yeesu boon pú ki dɔ́miń ki gbēē u-bɔkutijúti.

²¹Kun puee u nìn dākafì u-pɔbilin yii: «M yaa pée ŋúń ki gbēē u-bɔkutil kpaŋkpamee, m bàà pɔ́ɔkí.»

²²Yeesu fātì ki ká-u ní ki bí yii: «M-bisal, pɔ́ɔǹ a-ba, a nín fōō ki kíí puee fīī-si.» Niin niin ní unimpuee pɔ́ɔkì.

²³Yeesu dūu bàn̄ uyidaanee dumpuee ki ká bin búǹ awul ki gà ikpiisilanee nì kunipaau kun bíi gà dituweelee gbí niin kìlammm.

²⁴Niinee ní u bí-bi yii: «Nyāmaan doo! Kisapɔmbiki kaa kpíì, kì gèeǹ ní.» Ní bi bíi bèel̄-u.

²⁵Bi nìn nyántì binib kɔkɔ, ní Yeesu nín kóò kudii poon ní ki cúú kisapɔmbikee ŋal ní kì yíkì.

²⁶An bɔtee nìn dūu gbītì kitiŋ gbanti jaŋŋi kɔkɔn.

²⁷Yeesu nyáń niin ki búntèe, ní bijɔfub bili páaǹ u-boon ki tátí yii: «Daafiidi naantiiu, sɔ̄ ti-saai!»

²⁸Yeesu bàn̄ kudiinee, ní bijɔfubee sútì ki pìl̄-u, ní u bālifì-bi yii: «Ni fōō ki kíí yii m lafun ŋūǹ kí cáaǹ-naaa?» Ní bi kíí-u yii: «Iiin, Ukpil, a ŋūǹ kí cáaǹ-ti.»

²⁹Ní Yeesu gbēē bi-nimbiliŋ ki bí-bi yii: «Ni nín fōō ki kíí yii m ŋūǹ kí cáaǹ-nee, án ŋá míǹ kí tīī-ni.»

³⁰Niinee ní bi-nimbiliŋ cúu ŋúbitì. Ní Yeesu kpáafì-bi yii: «Ní pīlifì tiŋan, ní taa pée yàntī ubɔ ń béé tibɔti nee!»

³¹Ama bi nyánnée ní ki kíĺ ki bíi sòoǹ Yeesu pu kitiŋ gbanti kɔkɔn.

³²Bi nyáń niin ki cée ní bi cáań uninja ubɔ Yeesu cee, arasinii kā u-pu ní u sá umɔɔmiin.

³³Ŋyunti ŋun Yeesu jìn̄ arasiniiyee, ní umɔɔmiinee kíĺ ki bíi sòoǹ, ní kunipaau kun nìn bí niinee bākatì sèeee ní ki lī yii: «Doooo nee, taa láá pée ká yéè Isirayeel tiŋkin ki ká!»

³⁴Ama ní Fariisab bíǹ bí yii: «An sá arasiniibi bɔtiu di tīī-u an pɔŋŋu ní u cáa jì arasiniibi[42].»

³⁵Yeesu nìn yìiǹ ntiŋkpaamu nì ntiŋwaamu poon ki dàkà binib akpafidiinni, ki sòoǹ tibɔmɔntiil tin sá Unimbɔti Beel bɔtee, ki cāantí iween kɔkɔ nì bin kɔkɔ wɔ̀b̄ee.

³⁶U nín nìn ká kunipaau gbantee ní an kɔ́-u inimɔɔn kun puee binibee nìn gīī bi-wunti yɔ̄tì a lì kii ipii in kaa cáá ukpaalee[43].

³⁷Niinee ní u bí u-boonnooliibi yii: «Kudiceeu wīikí tikpil, ama ní bicaliibi kaa náaǹ.

³⁸An puee, ní mèèmaan kusaaudaan ú tɔ̄ń bitɔntɔnliibi ń dāá cā!»