Read Ntcham Marc 1 Bible Online

Marc 1 - Ntcham bible

Marc 1

¹Tibɔmɔntiil tin sòoǹ Yeesu Kriisitoo Unimbɔti Jipɔɔn puee kílilaŋki sèé.

²Yeesaya Unimbɔti bɔnaatiliu nìn ŋmàn̄ u-gbɔŋku poon ki síiǹ, yii: Unimbɔti bí yii: «M-tuuŋŋu sèé! M túnní-ŋu ŋú lìntīń a-nyɔkɔpu kí dāá ŋāŋkì-si nsan.

³M-tuuŋŋuee di báakí kuteeun yii: Bɔ́ntímaan ti-Dindaan saŋŋu, kí tàntīmaan u-sàmbiyaamu kí cīití-u[1]!»

⁴Ntuunee di sá un bi yíì Yoowaneesi u kóò kuteeun ki fùul̀ binib Unimbɔti nyimee. U nìn báakí ki tùkù binib yii: «Kpántímaan ni-bimbim kí yàntī bí fàl̀-ni nnyim, Unimbɔti ń dū ni-kpitii kí pɔ̄-ni.»

⁵Ní Juudee watil pú yab nì Jeerusaleem tiŋkin nib kɔkɔ nìn cá Yoowaneesi cee. Bi nìn bìitī bi-kpitii pu, ní u fùul̀-bi Unimbɔti nyim Jɔɔdan buŋŋun.

⁶Yoowaneesi gbanti nìn pēē ugutaamu kuti bɔkutil ní ki gbìn̄ ŋgban dambalau[2]. U nìn ŋmóò inaakitoon nì tisiil ní. U nìn báakí ki lì yii:

⁷«Ubɔ bí m-boon ki tóobiń ki cáá mpɔn ki jítiǹ man. Maa sàafì kí nīn sá u-yumbuu kí sɔ́ntí kí kútí u-naataaŋmiii gba.

⁸Nì nnyim ní m cáa fùul̀-ni, ama úǹ làá dāá dū Circir Fam ní kí fàl̀-ni.»

⁹Ŋyunti gbantee, Yeesu nyánní Galiilee tiŋki kin bi yíì Naasaareetee, ki dɔ́miń Yoowaneesi fùl̄-u Jɔɔdan buŋŋun.

¹⁰Yoowaneesi nín fùl̄-u ki dóò u nyēeń nnyiminee, ní u wál̀ kutagbɔŋu pīitì ní Unimbɔti Fam kpákatìń kii dibeenanjilee ki tɔ́kɔǹ u-pu,

¹¹ní u gbìl̄ Unimbɔti sòon̄ní kutaa pu ki lī yii: «Sii di sá m-Jipɔɔn un m néeń tikpilee! M-pɔbil fáatì-si[3].»

¹²Kpalaa niinee ní Unimbɔti Fam yāntì u cūtì kuteeun.

¹³U nìn ŋá kuteeun iwiin imuŋku ili ní Sitaan cɔ́ŋkì-u. U nì ipeel di nìn kíǹ ki bí, ní Unimbɔti tuuŋyi bí u-cee ki kèetī-u.

¹⁴Bi nìn cúú Yoowaneesi ki pīiǹ kudii. Míǹ boonee ní Yeesu cūtì Galiilee ki kíĺ ki bíi sòoǹ Unimbɔti bɔmɔntiiti ki tùkù-bi yii:

¹⁵«Ŋyunti bāań. Unimbɔti Beel sútì ki pìlīń-ni. Fámaan ni-kpitii kí fōōmaan tibɔmɔntiil nee kí kíí!»

¹⁶Ŋwiin ŋubɔ, Yeesu bíi kpàkaǹ Galiilee mɔɔlee ní ki ká bijɔncuuliibi bili, Siimɔn nì u-naal Andree bí ki tòó kulaaŋŋu dimɔɔlin.

¹⁷Ní Yeesu bí-bi yii: «Dāá nīn nóómaan-mi. Ni sá bi-jɔncuuliibi ní, ama m làá dū-ni kí kpántí bin nyàabìń binib ki cāabìń m-ceeyee.»

¹⁸Ní bi yāntì bi-laanti dicilpu niin ki táá-u.

¹⁹U cōom̀ ki cūtì ndan fiiiyee, ní ki gíti ká Seebeedee jipɔmbi Yakubu nì Yoowaneesi kā buŋalimbun ki ŋáŋkí tilaandi.

²⁰Kpalaa niinee ní Yeesu yíiń-bi ní bi yāntì bi-baa Seebeedee nì bitɔntɔnliibi buŋalimbun ki táá-u.

²¹Yeesu nì u-boonnooliibi cūtì Kapeernayum tiŋkin. Ŋwiŋŋuŋfikaa bāańee, ní Yeesu kɔ́ kukpafidiin ki kíĺ ki bíi dàkà binib Unimbɔti bɔti.

²²Binib bin nìn bíi pílifíǹ-uee nìn bākatì tikpil nì u-dàkatam. Kun puee u-dàkatam nìn cáá mpɔn kaa náań nì bimaradakaliibi yam.

²³Kpalaa niinee, unil ubɔ un pu arasinii kēe téeń kukpafidiin niin yii:

²⁴«Yeesu Naasaareeti yɔu, a nyàab̀-ti nì tilati ní? A dɔ́miń kí kúntí-ti níii? M nyí un ní a sée! A sá circirdaan un nyánní Unimbɔti ceeyee ní!»

²⁵Ní Yeesu kpātì arasiniiyee pu, yii: «Á ŋmīĺee kí nyā uninja nee ni!»

²⁶Ní arasinii yāntì uninjee wunti fáá dijinjikil ŋkpitim pu, ní u tīl̀ mbiil mpɔn, ní ki nyáń u-ni.

²⁷Báà ŋma bākatì sèeee, ní ki bàlifī tɔb yii: «Ba bɔti ní ti nín ká na? Tibɔcan sèé! Nì mpɔn ní u pūǹ kinyɔkɔ ki kpáaǹ arasiniibi bí nyā, ní bi pílifíǹ-u!»

²⁸Ní Yeesu yindi gbītì kpalaa Galiilee jaŋŋi kɔkɔn.

²⁹Bi nyáń kukpafidiin kpalaayee ní u nì Yakubu nì Yoowaneesi búntì Siimɔn nì Andree dumpu.

³⁰Siimɔn nimpuu na nìn būǹ ki dɔ̄ u-wunti píĺ kpaŋkpam. Bi bàn̄ kpalaayee ní bi tùkū Yeesu unimpuee bumbunti pu,

³¹ní u kɔ́ unimpuee cee ki cúú u-ŋal ki yáatì-u ki kāaǹ. Niin ní u-wunti sɔ̄ŋkì ní u pɔ́ɔkì, ní u yíkì ki kíĺ ki bíi ŋáań tijin kí tīī-bi.

³²Kujoou, ŋwìiń jéetèe, bi cūnnì Yeesu cee bibunliibi nì binib bin pu arasiniibi kēe kɔkɔ,

³³ní kitiŋin yab kɔkɔ kóoǹ ki kpáfì kudii kun ni u nìn bée nyɔkɔpu.

³⁴Binib kupaau nìn būǹ igbaŋween nín bí pu i-ba i-bee ní u cáaǹ-bi, ní ki jìn̄ arasiniibi tikpil ki nyántì, kaa pú-bi kinyɔkɔ bí sòoǹ, kun puee bi nìn nyí un ní u sée.

³⁵Kutaa wúntì ntaafaabɔmbɔminee Yeesu péé ki nyáń ki búntì ŋkpaanceeti kumooun kí mèè Unimbɔti.

³⁶Siimɔn nì u-jutiibi nìn cūtìi bíi nyàab̀-u.

³⁷Bi ká-uee, ní ki bí-u yii: «Báà ŋma bíi nyàab̀-si.»

³⁸Ní u kíí-bi yii: «Tí cùmaan ntiŋgbamu mun kíǹee mun poon, ḿ sòoǹ nì bi mun Unimbɔti bɔti. Míǹ pu ní m dɔ́miń kitiŋ pu.»

³⁹Ní u cūtì ki māntì Galiilee jaŋŋi kɔkɔ ki sòon̄ Unimbɔti bɔti akpafidiinni ní ki jìn̄ arasiniibi biwaatiibi pu.

⁴⁰Ŋwiin ŋubɔee, uninja ubɔ dɔ́miń Yeesu cee u-wunti píń dinyaŋgbandi. U gbāaǹ Yeesu nimbiin ní ki gbāam̀-u ki lī yii: «A yaa là, a ŋūǹ kí cáaǹ-mi m-wunti ń ŋāŋkì.»

⁴¹Ní Yeesu súń u-saai ki tāntì u-ŋal ki gbēē-u ní ki bí-u yii: «M là! Pɔ̄ɔkìm̄.»

⁴²Niinee, dinyaŋgbandi kpáàa wáŋkì, ní u-wunti ŋáŋkì.

⁴³Yeesu ŋée, ní ki jìn̄-u ú fàtīí gítí malaa,

⁴⁴ní ki kpáafì-u tiŋan ki lī yii: «Taa pée tùkù báà ubɔ tibɔti nee. Cáá a-ba kí dàkà usaraaŋal, kí ŋá saraa kii Mooyiisi marau nín lī puee kí dàkà yii a pɔ́ɔkì an nīn sá-bi seera[4].»

⁴⁵Nì min kɔkɔ bi kpáafì-uee, u nín pée búntèe, u kíĺ ki máafí báà ŋma tin jítì u-puee, ki yāntì tibɔti gbītì ilaan kɔkɔ. An puee, Yeesu kaa nìn gíti ŋūǹ kí kɔ́ kitiŋ poon binib kansikin. U nìn kíǹ ki bí ikpaanceeti ní binib nyēeń ajan kɔkɔ pu ki dòoń u-cee.