Read Ntcham Marc 11 Bible Online

Marc 11 - Ntcham bible

Marc 11

¹Ŋyunti ŋun bi cōom̀ ki tóob́ Jeerusaleem ki pìlīǹ Beetifagee nì Beetanii, Ɔliifi sufii jool caŋinee, ní Yeesu tú u-boonnooliibi kansikin bili,

²ki tùkū-bi yii: «Cùmaan kitimbilii kin bíń ni-nyɔkɔpu nee. Ni làá ká dimampɔmbil din pu báà ubɔ kaa láá kāl̀ee. Ní gbìntīḿmaan-dì kí cáań-mi.

³Ubɔ yaa bālifì-ni yii, Ba ní ni ŋáańee? Ní kíí-u yii, ti-Dindaan di nyàab̀ kimaŋ, u yaa dóòyee, u làá gíiǹní-kì doo an kaa làá yúntí.»

⁴Bi búntì ki bàn̄ ki ká dimampɔmbilee gbìn̄ ki nákáǹ kipunyɔkɔ, mmɔŋki didandi caŋin, ní bi bíi gbìntī-dì.

⁵Bin nìn sí niinee biba bí-bi yii: «Ba di cáá-ni ní ni gbìntī kimaŋ?»

⁶Ní bi kíí-bi kii Yeesu nín bàà tùkū-bi puee, ní binibee yāntì bi gbīntì-kì.

⁷Bi cáań dimampɔmbilee Yeesu cee ní ki pēetì bi-wampeeŋkaati ki páaǹ di-pu, ní Yeesu jɔ́m̀ ki kāl̀[50].

⁸Binib tikpil nìn kpátí bi-wanti ki bīil̀ nsan poon. Ní biba mun gàń tifaal akpaanni ki bīil̀[51].

⁹Bin nìn līī u-nyɔkɔpuee nì bin nìn pá u-boonee nìn kūuntí yii: «Oosaana! Unimbɔti ń bìin̄ un dòoń úǹ ti-Dindaan yindi puee!

¹⁰Unimbɔti ń bìin̄ ti-naanja Daafiidi beel din dòońee pu! Oosaana! Dàntìmaan un bí yilpu yilpuee[52]!»

¹¹Yeesu bàn̄ Jeerusaleemee, ki kɔ́ kunimbɔtidiin. U kɔ́ee ní ki kpēē ki māntì ki tú. Ama kunyeeu nín nìn bíi móotée puee, ní u fātìi nyáń u nì u-kpambaliŋ saalaa nì alee nín cá Beetanii

¹²Kutaa wúntèe, Yeesu nì u-boonnooliibi nyáń Beetanii tiŋkin ki cée, ŋkùm cúú-u.

¹³U kpēē ndanee, ki wál̀ busubu bun bi yíì fiigee sí ki cáá tifaal. Ní u cūtì bu-taapu kí kpèè u yaa bàà kāntí bu-biliŋ kí kìtī kí ŋmɔ́. U bàn̄ee, tifaal ŋmaniŋma di túkú. Kun puee an kaa nìn ŋmāntì ŋyunti ŋun busubuee lòoǹee.

¹⁴Niinee ní u lī busubuee yii: «Dalba dalba ubɔ ń taa láa gíti ŋmɔ́ sii biliŋ!» U nín sòon̄ mimmee, u-boonnooliibi gbìl̄.

¹⁵Bi búntèe, ki bàn̄ Jeerusaleem ki kɔ́ kunimbɔtidiin ní Yeesu kíĺ ki bíi jì biwannyafiliibi nì bidaliibi bin nìn bí niinee, ki lábití binimbikpantiliibi teebilib nì binanjinyafiliibi jaliŋ ki cìb̀.

¹⁶Waa pú mpaan ubɔ ń yòon̄ u-wanti kí còom̀ kí pùntī kunimbɔtidiin.

¹⁷Ní u kíĺ ki bíi sòoǹ nì bi yii: «An kaa ŋmàn̄ ki síiǹ yii: M-diiku làá nīn sá ŋwimmeem diiku ní ki tīī atimbun kɔkɔɔɔ? Ama ní nimbi dū-ku ki kpántì kunaayudii[53].»

¹⁸Bisaraaŋakpilib nì bimaradakaliibi gbìl̄ mimmee, ní ki bíi nyàab̀ nsan ŋun bi làá dī kí kpɔ̀-uee. Di sá yii bi nìn fàŋkí-u, kun puee tin u sòoǹee nìn kɔ́ samaa tikpil.

¹⁹Ku jóotèe ní Yeesu nì u-boonnooliibi nyáń kitiŋin.

²⁰Bi fàtīi gítiń kutaafaauee, ní ki ká fiigi subuee kūń ki kpáaǹ bu-nyaaŋyi.

²¹Niinee, Peetroo téetì, ní ki bí Yeesu yii: «Ukpil, kpèè fiigi subu bun a fu tɔ́ mbusuee kūń!»

²²Ní Yeesu fātìi kíí-bi yii: «Fōōmaan Unimbɔti kí kíí!

²³Ibaamɔn ní m sòoǹ nì ni, ubɔ yaa lī dijool nee yii: Á yīkì laakin a yú nee kí cùú jēetí tiŋkun, ní ki yaa kaa dàkafī ki gùgufī u-pɔbilin, ama ní ki yaa máká yii u nín lī puee làá ŋá mimmee, asee án lafun ŋá míǹ kí tīī udaan.

²⁴Míǹ pu ní m tùkù-ni yii, tin kɔkɔ ní ni yaa mēē Unimbɔtee, ní nīn máká yii ni fōō, ni làá lafun fōō kudɔŋu.

²⁵Ni yaa bíi mèé Unimbɔti ní ni nì ni-jutiibi kansikin kaa mɔ̄ee, dūú pɔ̄maan-bi, ní ni-Baa un bí yilpuee ń ŋmā kí dū ni mun yìntitam kí pɔ̄-ni.» [

²⁶Ama ni yaa kaa pūǹ ni-jutiibi bi-kpitiiyee, ni-Baa un bí yilpuee kaa làá dū ni mun kpitii kí pɔ̄-ni[54].]

²⁷Bi nìn tí fātìi gítì Jeerusaleem. Ŋyunti ŋun Yeesu kɔ́ ki bíi còom̄ kunimbɔtidiinee, bisaraaŋakpilib nì bimaradakaliibi nì bitindaŋkpilib dɔ́miń u-cee

²⁸ní ki bí-u yii: «Nì nsan ŋulɔŋu pu ní a fu jìn̄ binib kunimbɔtidiin ní? Ŋma di pú-si an saŋŋu ní?»

²⁹Ní Yeesu fātìi kíí-bi yii: «Dinyɔɔbumbaantiil ní m làá bàlifì-ni, ní kíí-mi kí wàatī ní ḿ nín tùkù-ni nì nsan ŋun pu ní m ŋáań mimmee.

³⁰Yoowaneesi nín fùul̀ binib Unimbɔti nyimee, ŋma di tīī-u an pɔŋŋu ní? Unimbɔtaaa, binib? Kíímaan-mi!»

³¹Ní bi kíĺ ki bíi lɔ́kɔfí bi-ŋmaniŋma yii: «Ti yaa kíí-u yii: <Unimbɔti di tīī-u>, u làá bàlifì-ti yii: <Kin ba ŋá ní naa fōō u-bɔti ki kíí?>

³²Mimmee, tí lì yii: <Binib di tīī-uaaa?...>» (Ama baa là kí lì míǹ, kun puee bi fàŋkí kunipaau. Di sá yii báà ŋma nìn nyí Yoowaneesi pu yii ibaamɔn u sá Unimbɔti bɔnaatiliu.)

³³Niinee, ní bi kíí Yeesu yii: «Taa nyí.» Ní Yeesu mun fātìi kíí-bi yii: «Ma mun kaa làá tùkù-ni nì nsan ŋun pu ní m ŋáań mimmee!»