Read Ntcham Marc 12 Bible Online

Marc 12 - Ntcham bible

Marc 12

¹Niinee, Yeesu kíĺ ki cáá tibɔŋmantikaal ki sòoǹ, ní ki lī yii: «Uninja ubɔ di kùn̄ fiinyi sufii kpaabu. U cóoǹ kunaabakau ki māntì ki tú-bu, ní ki gbìn̄ mbòó[55] ŋun ni u làá nīn cùkutī abil ki lèekī ndamamee, ní ki gāā isupaa, ki dū bukpaayee ki kpāaǹ bipaadambi, ní ki búntì nsan.

²Isufee biliŋ kìtitam bāańee, ní u túnní u-tɔntɔnliu ubɔ bipaadambee cee ú dāá fōō u-jandi.

³Ní bi cúú utɔntɔnlee ki gbáń ní ki jìn̄-u ki gíiǹ nì iŋaŋkulim.

⁴Ní bukpaadaanee gíti tí nyàab̄ u-tɔntɔnliu upɔɔn ubɔ ki tú bi-cee. Ní bi gíti cúú u mun ki gbáń ki cíl̀ diyil ki sāaǹ-u.

⁵Ní bukpaadaan gíti tí lēē unitataati ki túnní ní bi kūū úǹ. Míǹ mbaantiim ní bi nìn ŋáaǹ bitɔntɔnliibi kupaau, bi nìn gbáń biba ní ki kūū biba.

⁶Báà ubɔ kaa ti bí ú tɔ̄, see u-jipɔmbaabil un u néeńee. Ní u dū-u ki túnní bi-cee njoolkaam, ki dākafì yii: <Bi làá fàŋkì m-jipɔɔn.>

⁷Ama bipaadambee nín wál̀ u dòońee, ní bi lī tɔb cee yii: <Kpèè, un làá dāá jī u-baa gaajawantee di dòońee! Tí kpɔ̀maan-u kí jī bukpaa.>

⁸U bāańee ní bi cìb̄ ki cúú-u ki kūū, ní ki dū-u ki lúkú ŋkpaabuku.»

⁹Yeesu lī míǹ ki dóòyee, ní ki bālifì-bi yii: «Kɔŋkɔnnee, bukpaadaanee làá ŋá mana? Asee ú dāan̄ kí kpɔ̀ bipaadambee, ní kí dū bukpaayee kí ŋúbíǹ bipɔmbi.

¹⁰Ni pée máaǹ ki kàan̄ Unimbɔti gbɔŋkun dinyɔɔbundi din lì yii: <Ditaŋkpal din bidimaliibi nìn dūu fée, díǹ di dāa kpántì ditaŋkpal din yì kudii pɔŋŋuee.

¹¹Ti-Dindaan nín ŋá tiŋyee kaa gbí mmaam ti-ceeee[56]?>»

¹²Ŋyuntee, Yeesu nannanliibi bíi nyàab̀ kí cúú-u, ní ki gíti fàŋkí kunipaau. Di sá yii u-nannanliibee nìn béè yii bíǹ pu ní u nìn sòon̄ tibɔŋmantikaal gbanti. Ní bi yāntì-u ki búntì.

¹³Bi túnní Yeesu cee Fariisab nì Eeroodi naacimbi kansikin biba bí dāan̄ kí píĺ-u tibɔti.

¹⁴Bi bāańee, ní ki bí-u yii: «Ukpil, ti nyí yii a sòoǹ ibaamɔn, kaa fàŋkí báà ubɔ, kaa fàtīi tɔ̄ báà udaan yaa bí puee, ki dàkà nnimbɔtisan nì ibaamɔn. Mimmee, ti-marau pú nsan yii tí pà lampoo kí tīī Room gɔminau Seesaaraaa, an kaa pú?»

¹⁵Yeesu béè bi-poonnyooŋŋu puee, ní ki bālifì-bi yii: «Ba pu ní ni píĺ-mi tibɔti míǹ kí kpèè m-nyɔkɔn? Cáaḿmaan-mi animbil ḿ kpèè!»

¹⁶Bi cáańee, ní u bālifì-bi yii: «Ŋma yindi nì u-yil di náká animbil pu na?» Ní bi kíí-u yii: «An sá Seesaar.»

¹⁷Niinee ní Yeesu fātìi kíí-bi yii: «Dūmaan tin Seesaar yèe kí tīī Seesaar kí dū tin Unimbɔti yèe kí tīī Unimbɔti!» Ní bi bākatì nì an nyɔɔbundi gbanti.

¹⁸Ŋyuntee ní Sadusab dɔ́miń Yeesu cee. - Bíǹ di sá dikitil din lì yii difìkitil kpée[57]. - Ní bi bí Yeesu yii:

¹⁹«Ukpil, Mooyiisi ŋmàn̄ ki síiǹ-ti yii, unil yaa cáá kinabiki ní kinabikee yaa kpíì ki yāntì unimpu kaa cáá kibikee, ú fōō ukpiipu kí màal̀ kí téeǹ u-nabikee yil[58].

²⁰Kun pu ti bàlifēe di sá nnabiyaamu mululi di nìn bí. Upeepeekaa cáá unimpu ní ki kpíì ki yāntì unimpuee, kaa màl̄.

²¹Uliliiti mun fōō ukpiipuee ní ki mun kpíì, kaa màl̄. Utataati mun míǹ,

²²ki tin sāā bilulee kɔkɔ cáá-u ki kpíì, kaa ká kibiki. Bíǹ kɔkɔ kúm boonee, unimpuee mun dāa dūu kpíì.

²³Míǹ puee, difìkitil dalee, bi-kɔkɔ yaa láa fīkitèe, bi-kansikin ŋma di dāa yì unimpuee? Kun puee bilulee kɔkɔ cáá-u ki ká.»

²⁴Ní Yeesu kíí-bi yii: «Kun pu ni bí diyìntil poonee di sá naa nyí Unimbɔti gbɔŋku poon bɔti, kaa nyí Unimbɔti pɔŋŋu mun.

²⁵Difìkitil yuntiŋuee, dinimpucaal nì dicamɔndi dāa kpá. Báà ŋma dāa bí kii Unimbɔti tuuŋyi nín bí pu yilpuee ní.

²⁶An yaa kíǹ bitaŋkpiibi fìkititamee, naa kàan̄ Mooyiisi nín ŋmàn̄ pu u-gbɔŋkuneeee? Laakin sòoǹ tin jítì kikuŋkumbiki caŋinee, Unimbɔti nìn lī-u yii: <Man di sá Abraam Nimbɔtiu, Isaaki Nimbɔtiu nì Jaakɔb Nimbɔtiu[59].>

²⁷Waa sá bitaŋkpiibi Nimbɔtiu, u sá bin wāĺee yɔu ní. Ni baasii bí diyintikpaandin ní!»

²⁸Bimaradakaliibee ubɔ nìn bí ki gbìl̄ tibɔti tin pu Yeesu nì Sadusab nìn kpákèe. U nín ká yii Yeesu kíí-bi mmɔntiimee ní u sútìń ki pìl̄-u ki bālifì-u yii: «Marab kɔkɔ kansikinee, ulɔu di sá ukpaan ní?»

²⁹Ní Yeesu kíí-u yii: «Mara un sá ukpaanee di sá un lì yii: <Isirayeel yab pīlifìmaan. Ti-Dindaan Unimbɔti sá ubaanti ní.

³⁰Ni máaǹ kí nīn néeń ni-Dindaan ni-Nimbɔtiu nì ni-pɔbiliŋ kɔkɔ nì ni-naŋki kɔkɔ nì ni-landɔkɔŋu kɔkɔ nì ni-pɔŋŋu mun kɔkɔ[60].>

³¹Maraliliiti di sá yii: <Á nīn néeń a-juti kii sii a-bee[61].> Mara ubɔ kaa ti bí ki jítiǹ bin bí nee.»

³²Ní umaradakalee lī-u yii: «An kā, ukpil. A lī nì ibaamɔn ní yii Unimbɔti sá ubaanti, ubɔ kaa ti bí asee úǹ baba[62].

³³Unil máaǹ kí nīn néeń Unimbɔti nì u-pɔbil kɔkɔ nì u-ciiŋyi kɔkɔ nì u-pɔŋŋu kɔkɔ, ní ki máaǹ kí nīn néeń u-juti kii úǹ u-bee. Míǹ jítiǹ tiwaŋkuti saraabi bin bi dù kí wà ŋŋmi kí tīī Unimbɔtee nì saraabi bin kɔ kíǹee[63].»

³⁴Yeesu ká yii u kíí-u nì iciinee, ní u lī-u yii: «Aa dátiǹ Unimbɔti Beel.» Niinee báà ubɔ kaa ti mākaǹ kí bàlifì-u tiba.

³⁵Yeesu nìn bíi dàkà binib Unimbɔti bɔti kunimbɔtidiinee, u bālifì-bi tibɔti yii: «Nì nsan ŋulɔŋu poon ní bimaradakaliibi lì yii Meesiya sá Daafiidi naantiiu ní?

³⁶Di sá Unimbɔti Fam yāntì Daafiidi u-ba sòon̄ yii: <Ti-Dindaan tùkū m-Dindaan yii: Kàl̄ m-ŋaŋgiil pú kí nīn cí ŋyunti ŋun m làá yàntī á nīn kíǹ ki tɔ́kɔ́ a-nannanliibi puee[64].>

³⁷Daafiidi u-ba yíì-u yii u-Dindaan, kin mana ní u ŋūǹ kí nīn sá u-naantiiu mun?» Kunipaau nìn pílifíǹ Yeesu ní an mɔ̄ǹ-bi.

³⁸Yeesu dàkatam poonee, ní u gíti lī yii: «Nín̄ nyím̀maan ni-ba nì bimaradakaliibi! Bíǹ di néeń ki pèentí abɔkutifɔkɔ ki yìiǹ bi jáaḿ-bi ipaan in pu binib kpáfée,

³⁹ki kàal̀ nyɔkɔpu jaliŋ akpafidiinni nì diinabin.

⁴⁰Bíǹ di fìkì bikpiipoobi wanti ki gbēentí ki mèé ŋwimmeem ki yúntí fɔ́rrr bí ká-bi. Bíǹ gbanti di dāa kóò ditafadaaldi din gíti lákatèe ni!»

⁴¹Yeesu cūtìi kāl̀ ki bíitiǹ laakin bi tòó saraa nimbiliŋee, ki kpèé kunipaau nín tòó animbil puee. Bigaajab tikpil nìn tòó animbikpaan,

⁴²ní ukpiipusoodaan ubɔ mun cáań igboo ili ki tɔ́.

⁴³Niinee ní Yeesu yíiń u-boonnooliibi ki bí-bi yii: «Ibaamɔn ní m tùkù-ni, ukpiipusoodaanee tɔ́ ki jítiǹ bin kɔkɔ tɔ́ saraa dooyee.

⁴⁴Bin béeyee cáań bi-nimbiliŋ ŋin baa làá dūu ŋá nì tibee ní ki tɔ́, ama unimpu nee, nì u-sool poonee, tin kɔkɔ u bàà cáá kí jēe ní u kúntì ki tɔ́.»