Read Ntcham Marc 13 Bible Online

Marc 13 - Ntcham bible

Marc 13

¹Ŋyunti ŋun Yeesu nyēeń kunimbɔtidiinee, ní u-boonnooliibi kansikin ubɔ bí-u yii: «Ukpil, kpèè bi nín dū ataŋkpakpaan ŋin ki máń adikpaan an ŋān̄ miŋyee!»

²Ní Yeesu kíí-u yii: «Kéè a ká adikpaan neeyaa! Dalbee, ditaŋkpal diba kaa dāa gíti tɔ́kɔ́ di-juti pu. An kɔkɔ làá dāá wīī ní.»

³Yeesu bàn̄ ki kāl̀ Ɔliifi sufii jool pu, u-nimbiin túliń kunimbɔtidiiyee watil, ní Peetroo nì Yakubu nì Yoowaneesi nì Andree bālifì-u tibɔti nee bi-ŋmaniŋma yii:

⁴«Tùkù-ti ŋyunti ŋun ní tin kɔkɔ a bàà lēe làá dāá bàńee, nì kudaaŋŋu kun ti làá dū kí béé yii ŋyunti bāańee.»

⁵Niinee, Yeesu kíĺ ki bíi sòoǹ nì bi yii: «Ní nīn nyíǹ ni-ba ubɔ ń taa ŋmàtiǹ-ni,

⁶kun puee binib tikpil làá dāá dū man yindi kí kpántí bi-yaŋ ní kí lì yii bíǹ di sá Meesiya ní kí ŋmàtiǹ binib tikpil.

⁷Ni làá dāá gbìl̄ bi sòoǹ tijáti tin pìlīǹ-nee nì tin dátiǹ-nee bɔti. Ama ni-pɔbiliŋ ń taa bīil̀. An máaǹ tíǹ kɔkɔ ń bàń kí wàatī, ama duulinya kúntitam kaa dá láá yá.

⁸Ditimbundi diba dāa yíkí kí jáǹ diba, ní dibeel diba mun ń jáǹ diba. Kitiŋ làá dāá cìŋkì ajan kupaau pu, ŋkùm làá dāá nyā. Tíǹ kɔkɔee dāa sá kii imatiŋween nín kífí puee ní.

⁹«Ní nīn nyíǹ ni-ba! Man puee bi làá dāá cùnnì-ni ibɔsoon, kí gbá-ni anaalab akpafidiinni, kí cáá-ni gɔminab nì bibɔtiibi nimbiin, mimmee ni làá ká mpaan kí sòoǹ nì bi man pu.

¹⁰Ama an máaǹ yii inibool kɔkɔ ń gbìl̄ m-bɔmɔntiiti kí wàatī ní duulinya ń nín kúntí.

¹¹Ŋyunti ŋun bi yaa láa cúú-ni ki cáǹ ibɔsoonee, ní taa nín̄ yáliŋkí tin ni làá tin sòoǹee pu. Ni yaa láa bàn̄ee, ní sòoǹ tin Unimbɔti yaa tīī-ni niinee. Di sá yii, an kaa sá nimbi di làá sòoǹ, an sá Unimbɔti Fam di làá tīī-ni tin ni làá sòoǹee.

¹²Unil làá dāá cúú u-nabiki ní kí tīī bí kpɔ̀, ní ubaati ń dū u-biki kí tīī bí kpɔ̀, ní kibiki ń jáǹ ki-baa nì ki-na ní kí yàntī bí kpɔ̀-bi[65].

¹³Báà ŋma dāa ná-ni kun puee ni nóó-mi. Ama un yaa pɔ́ɔǹ u-ba ki tin kátì-kuee di làá dāá ŋmátí.»

¹⁴«Ni làá ká <kuwaŋkpitiu kun cāabìń ntimbiilee> kɔ́ ki kíǹ ki bí laakin kuaa bàà máaǹ kí kɔ́ee[66]. - Un kàaǹ tibɔti nee máaǹ kí ŋá ŋká! - Ŋyunti gbantee, bin yaa láa bí Juudee tiŋkinee ń sāǹ kí dàb̄ ajoon.

¹⁵Un yaa láa bí dicindee ń taa lì yii u làá kpákatí kí kɔ́ kudiin kí yòon̄ tiba[67],

¹⁶ní un yaa láa bí kusaauee ń taa lì yii u là kí fàtī mmɔŋki kí yòon̄ u-bɔkutil.

¹⁷Ama falaa dɔ̄ ki cí bipɔdambi nì bimatib yaadal wiiŋyi!

¹⁸Mèèmaan Unimbɔti an bɔti ń taa bàń kuseeun.

¹⁹Doooo, Unimbɔti nín náań kitiŋ ki dāa sāā díǹ nee, an falaau juti kaa láá jéetì nnibiyaamu pu, míǹ ní falaa gbanti juti mun kaa ti bí kí dāan̄[68].

²⁰Ti-Dindaan yaa kaa bàà bātì falaayee wiiŋyi pu, báà unibaanti kaa bàà ŋmátí. Ama bin u lútì bí nīn sá u-yabee pu ní u bātì an wiiŋyi.

²¹«Ŋyunti gbantee, ubɔ yaa tùkū-ni yii, Meesiya bí doo, àá u bíń lapu, ní taa fōō kí kíí.

²²Di sá yii bin làá mɔ̄ntì yii bíǹ di sá meesiyabee nì Unimbɔti bɔnaatiliibee làá dāá nyā ki ŋáań tikpaŋkpantiil nì maamaaci tuuŋŋi, kí bàà dūú ŋmàtiǹ bin Unimbɔti lútèe gba.

²³Míǹ puee, ní nīn nyíǹ ni-ba. M tùkū-ni tikɔkɔ ní nīn nyí ki yóoǹ ní án nín bàń.»

²⁴«Falaayee yaa jítì boonee, ŋwìiń dāa kpántí dibɔmbɔndi, uŋmal mun kaa dāa gíti pīiǹ.

²⁵Iŋmalbijaa dāa kìtīń kutaa pu ki lítiń, ní ipɔn in bí kutaa puee ń cìŋkì[69].

²⁶Ŋyunti gbantee ní bi làá ká man Kinibiki dòoń atagbanni ki cáá mpɔn tikpil nì tinyool[70].

²⁷M làá dāá tɔ̄ń Unimbɔti tuuŋyi ń cù duulinya kɔkɔn, kí tin sāā kutagbɔŋu nì kitiŋkuntinyɔkɔ, kí kóoǹní bin bin Unimbɔti lútèe[71].»

²⁸«Ní pīlifìmaan fiigi subu nín dàkà-ti tibɔti tiŋyee. Di sá yii ni yaa ká fiigi subu tɔ́ apan ki bíi túkù tifaapɔnee, ni béetí yii kuseeu tóobiń dee.

²⁹Míǹ mbaantiim, ni yaa ká tin kɔkɔ m máafì-ni nee bíi jītée, béémaan yii m-dāantam tóobiń dee.

³⁰Ibaamɔn ní m tùkù-ni, waanee nib kaa làá kpú kí kúntí ní an bɔti kɔkɔ ń bàń.

³¹Kutagbɔŋu nì kitiŋ dāa bí kí kúntí, ama man bɔti kaa bí kí kúntí jaanjaan.

³²Ubɔ kaa nyí ŋwiin nì kukúluu kun ní an bɔtee làá bàńee. Unimbɔti tuuŋyi in bí yilpuee kaa nyí, man u-Jipɔɔn gba kaa nyí, asee ti-Baa Unimbɔti baba di nyí.

³³Ní nīn nyíǹ ni-ba kí taa gèeǹ. Di sá yii naa nyí an yuntiŋu.

³⁴An dāa bí kii unil ubɔ nín cá nsan pu ki yāntì u-tɔntɔnliibi u-cindee ní. U yākatì báà ŋma nì u-tundi, ní ki kpáafì un cí kipunyɔkɔee ń taa nín̄ gèeǹ, ní ki búntì.

³⁵Taa gèem̀maan! Di sá yii naa nyí ŋyunti ŋun kudiidaan làá bàńee, an yaa sá kujooueeee, kunyataasiiueeee, ŋkoosiimeeee, kutaafaaueeee, naa nyí.

³⁶Ní taa yàntī ú bàń kí túuǹ-ni ni dɔ̄ ki gèeǹ.

³⁷Tin m lì nee, m lì ki tùkù báà ŋma ní: taa gèem̀maan!»