Read Ntcham Marc 14 Bible Online

Marc 14 - Ntcham bible

Marc 14

¹An nìn kíǹ iwiin ili, bí jī Dilákatil jiŋaaliu nì jiŋaal un bi ŋmóò kpɔnɔb bin kaa cáá ŋkpɔnɔnyɔkɔee[72]. Bisaraaŋakpilib nì bimaradakaliibi nìn nyàab̀ nì nciin poon kisàmbiki kin pu bi làá dī kí cúú Yeesu kí kpɔ̀-uee.

²Ní bi lī yii: «Án taa nín̄ sá jiŋaal poon, fìkil fikil ń taa kɔ́ samaa kansikin.»

³Yeesu nìn bí Beetanii, Siimɔn un nìn sá unyaŋgbantee dumpu. Ŋyunti ŋun u kā ki jīǹ tijinee, unimpu ubɔ kóoń ki ŋúbiń talaalumɔnti un bi yíì náaree. U nìn pɔ̄ɔ̄ kudaau tikpil ki kā ditaŋkpal kpalbanyaaŋwun[73]. Ní unimpuee fáá ki wīī kpalbee nyɔkɔ ki kpáatì talaaluee ki sītì Yeesu yil pu.

⁴Ní biba fōō diŋuul ki bí yii: «Ba pu ní bi fá talaalumɔnti nee míǹ?

⁵Bi bàà ŋūǹ kí nyāfì-u animbikpaan kí dūú yàkatī biwɔfib.» Ní bi yíkìi bíi wòoǹ unimpuee.

⁶Ní Yeesu bíi lìǹ-bi yii: «Yàntīmaan-u! Ba pu ní ni páb́-u míǹ? Unimpu nee ŋá ditummɔntiil ní ki tīī-mi.

⁷Ni nì biwɔfib di làá nīn pée bí baabadal[74]. Ni ŋūǹ kí nīn ŋáań-bi tiŋan ŋyunti ŋun ni yaa lèe. An yaa kíǹ man, maa làá nīn bí ni-cee baabadal.

⁸Min u ŋúńee ní u ŋée: u péé ki dɔ́miń ki yāaǹ-mi talaalu kí bɔ́ntí m-wunti kí cīití ŋu-síbitam dal dee.

⁹Ibaamɔn ní m tùkù-ni, duulinya kɔkɔwoooo laakin kamaa ní bi yaa láa sòon̄ m-bɔmɔntiitee, bi dāa téetí unimpu nee pu ki máafí min u ŋée.»

¹⁰Ŋyunti gbantee ní akpambal saalaa nì alee kansikin un bi yíì Juudasi Isikaariyɔtee cūtì ki ká bisaraaŋakpilibee kí sòoǹ nì bi min ní u làá ŋá kí dū Yeesu kí ŋúbíǹ-bee.

¹¹Bi nín gbìl̄ mimmee, an mɔ́ɔkiǹ-bi, ní bi pōoǹ-u yii bi làá tīī-u animbil. Juudasi nìn kíĺ ki bíi nyàab̀ ŋyunti ŋun di kítì ú dū Yeesu kí ŋúbíǹ-bee.

¹²Jiŋaal un bi ŋmóò kpɔnɔb bin kaa cáá ŋkpɔnɔnyɔkɔee wimpeekaaŋu dal ŋun bi làntī apibil kí jī Dilákatil jiŋaaliuee, ní Yeesu boonnooliibi bí-u yii: «La ní a là tí cù kí bɔ́ntí-si Dilákatil jiŋaaliu jinti?»

¹³Ní u tú u-boonnooliibi bili, ní ki tùkū-bi yii: «Nín̄ cámaan kitiŋin, ni làá tū uninja ubɔ tú dinyimbool. Ní nīn táá-u.

¹⁴Laakin u yaa tin kɔ́ee, ni mun ń kɔ́ niin kí bàlifì kudiidaan yii: <Ukpil bàlifī-si yii, m-diiku kun poon man nì m-boonnooliibi làá jī Dilákatil jiŋaaliu jintee bí la?>

¹⁵Niinee, u làá dàkà-ni diditɔntɔkɔl yilpu, kudii kun poon wāā, bi bɔ́ntì tikɔkɔ sée. Niin ní ni làá bɔ́ntí-ti tijin.»

¹⁶U-boonnooliibi búntì ki bàn̄ kitiŋinee, ki ká an jítì kii u nín bàà tùkū-bi pu ki síiǹee deedee, ní bi bɔ́ntì Dilákatil jiŋaaliu jinti.

¹⁷Kujoou jóotèe, Yeesu nì u-kpambaliŋ saalaa nì alee bāań niin.

¹⁸Ŋyunti ŋun bi kāl̀ ki bíi jīǹ tijinee, ní Yeesu bí yii: «Ibaamɔn ní m tùkù-ni, man nì nimbi bin kā ki jīǹee kansikin ubɔ làá dū-mi kí ŋúbíǹ m-nannanliibi[75].»

¹⁹Niinee, kunimbaau kɔ́-bi, ní bi kíĺ ki bíi bàlifī-u ubɔ ubɔ yii: «Kéè an kaa sá mamaa!» «Kéè an kaa sá mamaa!»

²⁰Ní Yeesu kíí-bi yii: «An sá nimbi saalaa nì bili nee kansikin ubɔ man nì un sèetī disambibaantiilinee[76].

²¹Man Kinibiki cá kí kpú ní nee, kii an nín ŋmàn̄ ki síiǹ m-pu miŋyee[77]. Ama mbusu dɔ̄ ki cí un làá dū-mi kí ŋúbíǹ m-nannanliibee. Bi yaa kaa bàà màl̄ udaan, an bàà sɔ́.»

²²Ŋyunti ŋun bi bíi jīǹee, ní Yeesu yōoǹ kpɔnɔ ki pàkā Unimbɔti, ki cúu gífì gífì, ki yākatì ki tīī u-boonnooliibi kɔkɔ, ní ki bí yii: «Fōōmaan! Doo di sá m-wunti.»

²³Ní ki yōoǹ ndaam, ki jáam̀ Unimbɔti ki dóòyee, ní ki dūu tīī-bi, ní bi-kɔkɔ nyùn̄.

²⁴Ní u tùkū-bi yii: «M-fatikuu dee, fatiku un cāabìń mpèé binib nì Unimbɔti kansikinee dee[78]. Fatikuee di nyáń kí fīī binib kupaau.

²⁵Ibaamɔn ní m tùkù-ni, maa ti bí kí nyɔ̀ ndamam nee kí nīn cí daliŋkin m làá gíti nyɔ̀-mì mpɔm Unimbɔti Beelinee.»

²⁶Ŋyunti ŋun bi gāā jiŋaal laŋyi[79] ki dóòyee, ní bi nyáń ki búntì Ɔliifi sufii jool pu.

²⁷Yeesu bí u-boonnooliibi yii: «Ni-kɔkɔ làá fá-mi, kii an nín ŋmàn̄ Unimbɔti gbɔŋkun puee yii: <M làá dāá fáá kí kpɔ̀ upikpaal, ní ipii ń yàl̄[80].>»

²⁸Yeesu gíti lī yii: «Ama m yaa láa fīkitèe, m làá lìntī kí cīití-ni Galiilee.»

²⁹Ní Peetroo lī-u yii: «Bi-kɔkɔ yaa féeń-saaa, man kpá kí fá-si.»

³⁰Ní Yeesu bí-u yii: «Ibaamɔn ní m tùkù-si, díǹ nyeeku gba, kí wàatī ukooja ń bāakì milee, a làá néé diba dibee mita pu yii saa nyí-mi!»

³¹Ní Peetroo kíí-u yii: «Báà an yaa sá-mi ŋkúm, man nì si làá kpú, man kpá kí néé yii maa nyí-si!» Ní u-boonnooliibi bin kɔkɔ kíǹee mun lī míǹ mbaantiim!

³²Yeesu nì u-boonnooliibi búntì laakin bi yíì Geetiseemaneeyee[81], ní Yeesu tùkū-bi yii: «Kàl̄maan doo, man làá cù kí mèè.»

³³U nìn kpáaǹ Peetroo nì Yakubu nì Yoowaneesi. Tifaandi nì dinimbinaamandi kíĺ ki bíi bàń-uee, ní u tùkū-bi yii:

³⁴«Kunimbaau kɔ́-mi tikpil ki cáǹ-mi ŋkúmin. Kàl̄maan doo kí nīn cí kí taa gèeǹ!»

³⁵U lī mimmee, ní ki sútì nyɔkɔpu fiii ní ki tin dōoǹ dicincibil, ní ki mēē yii an yaa bàà kítì, Unimbɔti ń kàkatī falaa yuntiŋu gbanti kí wàatī-u.

³⁶U nìn lī yii: «M-Baa, tiba kaa pée pɔ̄ɔ̄ a-cee! Kàkatī falaanyɔkaa nee kí wàatī-mi! Ama nì míǹ kɔkɔee, m nyàab̀ a-làtam ní, kaa sá mama m-ba nín là puee.»

³⁷Yeesu fātìi gítìń u-kpambaliŋ atee cee ki ká bi dɔ̄ ki gèeǹ, ní u fīntì-bi, ní kí bí Peetroo yii: «Siimɔn, a gèeǹ níii? Aa kpáàa ŋúń ki kāl̀ ki cíitì kukúbaantiiu ń jītí kí taa gèeǹaaa?

³⁸Fìntīmaan kí nīn mèé, án nín làá ŋá pu ni yaa kɔ́ icɔŋkinee ní taa lítée. Unil bàà cáá nlandɔkɔmɔnti, ama ní ki bí iwɔfin.»

³⁹Yeesu fātìi sútì nyɔkɔpu ki mēē ki sòon̄ tibɔbaantiil,

⁴⁰ní ki fātìi tí gítìń ní ki ká bi dɔ̄ ki gèeǹ, kun puee ŋgeem nìn cáá-bi tikpil. Bi fīntèe, baa nyí bi nín làá kíí-u puee.

⁴¹U búntì ki gíti tí gítìń ntataatiim, ní ki lī-bi yii: «Ni dáá gbíntìi dɔ̄ ki gèeǹ ki ŋùŋfāa! Too, an dóò. Kɔŋkɔnnee an ŋmāntì bí dū man Kinibiki kí ŋúbíǹ binikpitib dee.

⁴²Un làá dū-mi kí nyāfèe di bàan̄ nee. Yīkìmaan tí cù.»

⁴³Yeesu kaa láá sòon̄ ki ŋmíl̀, kpalaayee ní u-kpambaliŋ saalaa nì alee kansikin un bi yíì Juudasee cílìń, u nì kunipaau kubɔ, kúǹ ŋúbiń ntàataajimu nì atambɔn. Bisaraaŋakpilib nì bimaradakaliibi nì bitindaŋkpilib di nìn túnní-bi.

⁴⁴Juudasi un làá nìn dū Yeesu kí ŋúbíǹ-bee nìn tīī-bi kudaaŋŋu yii: «Un m yaa kpàl̄ ki jáam̀ee, un ni nyàab̀ee dee, ní cúúmaan-u tiŋan kí nīn cáá-u ki cá!»

⁴⁵Juudasi bāań kpalaayee ki sútì ki pìl̄ Yeesu, ní ki bí yii: «Ukpil,» ní ki kpàl̄-u.

⁴⁶Niinee bin táań Juudasee cìb̄ ki cúú Yeesu.

⁴⁷Bin nìn bí Yeesu ceeyee kansikin ubɔ fɔ́fì u-tàataajiki ní ki gāā ki wúkutì usaraaŋakpil tɔntɔnliu tafal[82].

⁴⁸Ní Yeesu bí-bi yii: «M sá unikpiti naaa? Ba pu ní ni ŋúbiń ntàataajimu nì atambɔn kí dāá cúú-mi?

⁴⁹Baabadal m bí kunimbɔtidiin ni-kansikin ki dàkà binib, ba pu ní naa cúú-mi niin? Ama kɔŋkɔnnee, Unimbɔti gbɔŋku nín sòon̄ ki síiǹ m-pu miŋyee ń ŋá!»

⁵⁰Niinee, u-boonnooliibi kɔkɔ sáǹ ki wāatì-u[83].

⁵¹Unaacimpɔɔn ubɔ nìn táá Yeesu ki pēē sata. Bi cìb̄ kí cúú-uee,

⁵²ní u yāntì sata bi-ŋaan ki sáǹ dicancaŋgbeel.

⁵³Bi cáá Yeesu ki búntì usaraaŋakpil dumpu, ní bisaraaŋakpilib nì bitindaŋkpilib nì bimaradakaliibi kɔkɔ kóoǹní ki kpáfì niin.

⁵⁴Peetroo nìn táá Yeesu aboon aboon ki tin bàn̄ usaraaŋakpil cindi ní ki kāl̀ soojab kansikin ki wùl̀ ŋŋmi.

⁵⁵Bisaraaŋakpilib nì bibɔsoonliibi kitil kɔkɔ nyàab̄ bin làá lēē seera Yeesu pu bí ŋmā kí kpɔ̀-uee, ní kaa ká.

⁵⁶Di sá yii binib tikpil nìn mɔ́ntì u-nyɔkɔpu, ní bi-nyɔmmu kaa pēē[84].

⁵⁷Biba yíkìi mɔ́ntì Yeesu pu ki lī yii:

⁵⁸«Ti gbìl̄ u sòon̄ yii: <M làá gbá kí wīī kunimbɔtidii kun binib máń nee, kí dū iwiin ita kí mā kupɔŋu kun binib kaa dū bi-ŋalii ki máńee[85].>»

⁵⁹Nì míǹ kɔkɔee, bin lēekì an seerau gbantee nyɔmmu kaa pēē.

⁶⁰Niinee, usaraaŋakpil yíkìi síl̀ bi-kɔkɔ nimbiin ki bālifì Yeesu yii: «Binib nee nín bí ki sòoǹ a-pu miŋyee, ba ŋá ní saa kíikí ní?»

⁶¹Ní u ŋmí, kaa gātì tiba. Ní usaraaŋakpil gíti bālifì-u mpɔm yii: «Sii di sá Unimbɔti tinyooldaan Jipɔɔn un u túnní ú nīn sá ubɔteeee?»

⁶²Ní Yeesu kíí-u yii: «M lafun sá-u. Ni làá dāá ká man Kinibiki kā Unimbɔti Mpɔŋkɔdaan ŋaŋgiil pú, ní ki làá ká m nyánní yilpu atagbanni ki dòoń[86].»

⁶³Usaraaŋakpil gbìl̄ mimmee, ní ki dáaĺ tiwan tin u pēēyee ki cátì, ní ki bí yii: «Ti gíti nyàab̀ seeradambi kí ŋá ba?

⁶⁴Nimbi ni-ba gbìl̄ u nín ŋèeǹ nì Unimbɔtee, ni dàkafī yii ba?» Ní bi-kɔkɔ bí yii u-bɔti kaa ŋān̄, u máaǹ ŋkúm[87].

⁶⁵Ní biba kíĺ ki tíiĺ timɔtan ki làbitī Yeesu pu. Bi dū ŋŋaabu ki bīiǹ u-nimbiin ki fátí-u, ní ki bàlifī-u yii: «Sii un wāĺee, tùkù-ti un di fáá-see!» Ní pilisib mun fōō-u ki bíi fátí-u itampa[88].

⁶⁶Ŋyunti ŋun Peetroo nìn dáá bí taapu cindinee, bisapɔmbi bin bí usaraaŋakpil cee ki tūǹ ditundee ubɔ dɔ́miń

⁶⁷ki ká Peetroo bíi wùl̀ ŋŋmi. Ní u kpēē u-nimbiin, ní ki bí yii: «Si mun nì Yeesu Naasaareeti yɔuee di nìn tāatí!»

⁶⁸Ní Peetroo néè ki bí yii: «Maa nyí tin a sòoǹee, kaa gbìl̀ ti-taapu.» Niinee, Peetroo nyáń ki nín kóò kunaakooun ní ukooja súń.

⁶⁹Ní usapɔɔnee gíti tí ká-u niin, ní ki bíi tùkù bin bí niinee yii: «Binibee kansikin ubɔ sèé!»

⁷⁰Ní u gíti néé. An kútì fiiiyee, bin nìn bí niinee bí Peetroo yii: «Tiŋman, si mun ŋmàl̄ binibee ni. Ti wāĺ yii a sá Galiilee watil pú niliu ní.»

⁷¹Niinee, Peetroo kíĺ ki bíi pùtī ki tíntí yii: «Maa nyí uninja un bɔti ni sòoǹee!»

⁷²Kpalaayee, ukooja báakì nliliitiim, ní Peetroo téetì dinyɔɔbundi din Yeesu bàà lī-uee, yii: «Kí wàatī ukooja ń bāakì milee, a làá néé diba dibee mita pu yii saa nyí-mi.» Niinee ní u kíĺ ki bíi sūǹ ki yáliŋkí.